9–15 nō ’Ātopa

Philipi ; Kolosa

« E ti’a iā’u te mau mea ato’a nei i te Mesia, tei tauturu mai iā’u ra »

E aha te taime hope’a ’outou i te tai’ora’a i te mau mana’o pae vārua i tae mai, ’o tā ’outou ho’i i pāpa’i i roto i te tuatāpapara’a i te Faufa’a ’Āpī ? E mea maita’i paha ’ia hi’ohi’o ri’i i te mau muhumuhu tā ’outou i fāri’i.

Pāpa’i i te mau mana’o e tae mai

’Ua pāpa’i Paulo i tāna mau ’episetole i tō Philipi ’e i tō Kolosa ’a mau ai ’oia i roto i te fare tāpe’ara’a. ’Ia tai’o rā ’oe, ’aita e hōho’a ra e ta’ata i roto i te fare tāpe’ara’a terā e pāpa’i ra. E rahi a’e tā Paulo i parau nō ni’a i te ’oa’oa, te poupou ’e te māuruuru, i tāna i parau nō ni’a i te ’ati ’e te mau tāmatara’a : « ’O te Mesia tei parauhia nei », tāna i parau, « ’o tā’u ïa e ’oa’oa nei, ’e e ’oa’oa ho’i au » (Philipi 1:18). ’E « ta’a ’ē noa atu ā tā’u tino nei, tei ’ō ’outou ā ta’u vārua, i te ’oa’oara’a i te hi’ora’a atu i tā ’outou ha’apa’o maita’i, ’e te pāpū o tō ’outou fa’aro’o i te Mesia ra » (Kolosa 2:5). Pāpū roa ē, « te hau o te Atua » tā Paulo i ’ite i roto i tōna mau ’ati, ’ua « hau ’ē atu [ïa] i te ’ite ta’ata nei » (Philipi 4:7), e ’ohipa pāpū rā. I roto i tā tātou iho mau tāmatara’a, e nehenehe tā tātou e ’ite ato’a i te reira hau ma te « ’oa’oa i te Fatu, ’eiaha e fa’aea » (Philipi 4:4). E nehenehe tā tātou, mai ia Paulo te huru, e tūru’i hope roa i ni’a ia Iesu Mesia, « nōna i noa’a ai tō tātou ora » (Kolosa 1:14). E ti’a ia tātou ’ia parau mai ia Paulo ē : « E ti’a iā’u te mau mea ato’a nei i te Mesia, tei tauturu mai iā’u ra » (Philipi 4:13 ; hi’o ato’a Kolosa 1:11).

Mau mana’o nō tā’u iho tuatāpapara’a pāpa’ira’a mo’a

Philipi 2:5–11 ; Kolosa 1:12–23

’Ua niuhia tō’u fa’aro’o i ni’a ia Iesu Mesia.

’Ua parau te peresideni Russell M. Nelson ē, i te fa’atumura’a ’oia i tāna tai’ora’a papa’iraa mo’a i ni’a i te mau ’īrava nō ni’a ia Iesu Mesia, ’ua tupu mau te hō’ē ’ohipa i ni’a iāna ’e ’ua mana’o ’oia ē, « ’ua taui [tōna] huru ! » (« Fa’ahaere mai i te mana o Iesu Mesia i roto i tō tātou oraraʼa », Liahona, Mē 2017, 39). E nehenehe e pe’e i tōna hi’ora’a ’a tai’o ai i te Philipi ’e te Kolosa (hi’o ta’a ’ē Philipi 2:5–11 ; Kolosa 1:12–23). E aha te ha’api’ira’a tā ’oe e ’apo nei nō ni’a i te Fa’aora ? Nāhea teie mau parau mau e tauturu ai ia ’oe ’ia « taui [tō ’oe] huru » ?

Philipi 2:12–13

Tē « rave fa’aoti hua [ānei tātou] i tō [tātou] ora » ?

Tē fa’a’ohipa nei te tahi mau ta’ata i te parau ē « e rave fa’aoti hua i tō ’outou ora »(Philipi 2:12), ’ei pa’epa’era’a i te mana’o ē, e fa’aorahia tātou nā roto ana’e i tā tātou iho mau tauto’ora’a. I te tahi atu pae, tē fa’a’ohipa nei te tahi mau ta’ata i te ha’api’ira’a a Paulo ē « i ora ho’i ’outou i te aroha mau i te fa’aro’o » (Ephesia 2:8) ’ei fa’a’itera’a ē ’aita e ’ohipa e tītauhia nō te fa’aorara’a. Tē ha’api’i pāpū nei rā te mau pāpa’ira’a mo’a, mai te mau pāpa’ira’a a Paulo ato’a ho’i, ē, tītauhia terā e piti ato’a ra, te maita’i rahi o Iesu Mesia ’e te tauto’ora’a a te ta’ata hō’ē nō te fāri’i i te fa’aorara’a. ’E noa atu ā tā tātou mau tauto’ora’a rahi nō te rave fa’aoti hua i tō tātou ora, « ’o te Atua tei ’ohipa i roto ia ’outou » (Philipi 2:13 ; hi’o ato’a Philipi 1:6 ; 2 Nephi 25:23 ; Arata’i nō te mau pāpa’ira’a mo’a, « Maita’i »).

Philipi 3:4–14

E mea ho’ona te fa’atusiara’a ato’a nō te ’evanelia a Iesu Mesia

E rave rahi mea tā Paulo i fa’atusia i tōna fa’afāriura’ahia i te ’evanelia a Iesu Mesia, mai tōna ti’ara’a rahi i roto i te sōtaiete ’āti Iuda ’ei pharisea. I roto i te Philipi 3:4–14, e ’imi i te mau mea tā Paulo i ’āpī i te mea ho’i ’ua ineine ’oia e fa’atusia nō te ’evanelia. E aha tōna mana’o nō ni’a i tāna mau fa’atusiara’a ?

E feruri atu ai i tō ’oe iho ti’ara’a pipi. E aha tā ’oe i fa’atusia nō te ’evanelia a Iesu Mesia ? E aha tā ’oe i fāri’i ? E fa’atusiara’a atu ā ānei tā ’oe e mana’o ra ē e tītauhia nō te riro mai ’ei pipi pūpū rahi atu ā nā te Fa’aora ?

Hi’o ato’a 3 Nephi 9:19–20 ; Te Ha’api’ira’a Tumu ’e te mau Fafaura’a 58:2–5 ; Taylor G. Godoy, « Hō’ē mahana fa’ahou », Liahona, Mē 2018, 34–36.

Philipi 4:1–13

E nehenehe tā’u e ’oa’oa i roto i te Mesia noa atu tō’u vaira’a.

E fa’ahi’ora’a rahi te orara’a o Paulo nō te parau a te peresideni Russel M. Nelson ē : « Tei ni’a te fa’atumura’a o tō tātou orara’a […] ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna te ’oa’oa e tae mai ai » (« Te ’oa’oa ’e te oraora pae vārua », Liahona, Novema 2016, 82).

’Ia tai’o ’oe i te Philipi—te pene 4 iho ā rā—e ’imi i te mau fa’ahitira’a e nehenehe e tauturu ia ’oe ’ia ’ite i te ’oa’oa noa atu ā te mau fifi o te orara’a. E aha te taime ’a ’ite ai ’oe i « te hau o te Atua » i roto i te hō’ē taime fifi ? (’īrava 7). Inafea ’oe i te ’itera’a i te pūai « i te Mesia » nō te rave i te mau ’ohipa pa’ari ? (’īrava 13). I tō ’oe mana’o, nō te aha e mea faufa’a ’ia « fa’a’oroma’i » noa atu ā te vaira’a ? (’īrava 11). Nāhea te fa’a’ohipara’a i te mau mea i fa’ahitihia i roto i te ’īrava 8 e tauturu ai ia ’oe ’ia ’ite i te ’oa’oa i roto i tō ’oe vaira’a ?

Hi’o Alama 33:23 ; DieterF. Uchtdorf, « ’Ia māuruuru i roto i te mau huru ato’a o te orara’a », Liahona, Mē 2014, 70–77.

Kolosa 3:1–17

E riro te mau pipi a Iesu Mesia ’ei ta’ata « ’āpī » ’ia ora rātou i tāna ’evanelia.

Nāhea ’oe e ’ite ai ē, tē tauturu ra te ’evanelia a Iesu Mesia ia ’oe ’ia riro ’ei hō’ē « ta’ata ’āpī [’aore rā ’ei vahine ’āpī] » ? Hō’ē rāve’a nō te ferurira’a i te reira, ’o te tai’ora’a ïa i te Kolosa 3:1–17 ’a hāmani atu ai i te hō’ē tāpura nō te mau peu, te huru ’e te ’ohipa a terā « ta’ata tahito », ’e i ni’a i te tahi atu tāpura, ’o te mau peu ïa, te huru ’e te mau ’ohipa a te « ta’ata ’āpī ».

’A pāpa’i i tō ’oe mau mana’o nō ni’a i te huru te Fa’aora e taui nei ia ’oe, ’ia ti’a ia ’oe ’ia hi’o fa’ahou i te reira i muri iho nō te hi’o i tō ’oe haerera’a i mua.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Philipi.’Ua ’ite paha te ’utuāfare i te fa’ahiti-pinepine-ra’a-hia te mau ta’o ’oa’oa ’aore rā pōpou, i roto i te Philipi. I te taime tāta’itahi e ’ite ’outou i te reira nā ta’o, e nehenehe e tāpe’a nō te ’āparaura’a i tā Paulo i ha’api’i nō ni’a i te rāve’a ’ia ’ite i te ’oa’oa.

Philipi 2:14–16.Nāhea tātou e « ’ana’ana [ai] mai te mau ti’arama o te ao nei » ?

Philipi 4:8.E nehenehe te ’utuāfare e hi’o mai i te mau mea e « feruri atu » ’o tē tano i te mau tātarara’a i roto i teie ’īrava (hi’o ato’a Hīro’a fa’aro’o 1:13). E aha te mau ha’amaita’ira’a e tae mai i ni’a i tō ’outou ’utuāfare nō te pe’era’a i te parau a’o a Paulo ?

Kolosa 1:23 ; 2:7.Pēnei a’e e nehenehe te ’utuāfare ’ia tai’o i teie mau ’īrava ma te pārahi ’ati a’e i te hō’ē tumu rā’au, ’aore rā ma te hi’o i te hōho’a nō te hō’ē tumu rā’au (mai terā i roto i teie arata’i ha’api’ira’a). E aha te aura’a o nā parau « tumuhia » ’e « a’ahia » i roto i te Mesia ? Nāhea tātou e tauturu ai te tahi i te tahi ’ia ha’apūai i tō tātou a’a pae vārua ?

Kolosa 2:2–3.E au paha tō ’outou ’utuāfare i te fa’a’ī i te hō’ē « ’āfata tao’a rahi » i te mau mea e fa’ahōho’a i te mau « tao’a rahi » ’e « te tao’a ra o te pa’ari ’e te ’ite » ’o tā ’outou e ’apo mai i roto i te ’evanelia.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’A ’oa’oa na, e Ari’i te Fatu ! », Te mau hīmene, N°29.

Ha’amaita’i i tā tātou ha’api’ira’a

Ora mai te au i tō ’oe ’itera’a pāpū. ’Ua ha’api’i Elder Neal A. Maxwell : « Tā ’outou ha’api’ira’a ’o ’outou iho ïa ». « E ha’amana’o-a’e-hia tō ’outou huru […] i te hō’ē noa atu parau mau i roto i te hō’ē ha’api’ira’a » (i roto Ha’api’ira’a mai tā te Fa’aora, 13).

’Ua ha’api’i Paulo ē, ’ia « a’ahia » tō tātou fa’aro’o i roto ia Iesu Mesia (Kolosa 2:7).