’Ua fārerei te Fa’aora ti’afa’ahou ia Paulo i roto i te fare tāpe’ara’a (hi’o Te ’Ohipa 23:11). E nehenehe Iesu Mesia e fa’aora ia tātou i te « zugo tāvini ra » (Galatia 5:1).

25 nō Tetepa–1 nō ’Ātopa

Galatia

« E ha’apa’o i tā te Vārua ra »

’Ia tai’o ’outou i te Galatia, e pāpa’i i te mau mana’o e tae mai. Nā te reira e tauturu ia ’outou ’ia ha’amana’o ’e ’ia feruri i te reira ananahi.

Pāpa’i i te mau mana’o e tae mai

Tē pūpū nei te ’evanelia a Iesu Mesia i te ti’amāra’a i te tītīra’a pae vārua. I te tahi rā taime, te ta’ata tei ’ite i te ti’amāra’a o te ’evanelia, e fāriu ’ē mai ïa ’oia nō te « tāvini fa’ahou ā [i te ti’a ’ore] » (Galatia 4:9). ’O te mea ïa tā te tahi mau ta’ata Galatia e rave ra—tē fāriu ’ē ra rātou i te ti’amāra’a tā te Mesia i pūpū ia rātou (hi’o Galatia 1:6). Nō reira, ’ua riro te ’episetole a Paulo i tō Galatia ’ei pi’ira’a rū ’ia ho’i mai i te « ti’amā tā te Mesia i fa’ati’amā mai ia tātou nei » (Galatia 5:1). E pi’ira’a teie tei tītauhia ia tātou ’ia fa’aro’o ’e ’ia ha’apa’o i te mea ē, noa atu ā e tau ’ē teie, tē tāmau noa nei te ’arora’a i rotopū i te ti’amāra’a ’e te tītīra’a. Mai tā Paulo i ha’api’i, ’aita i nava’i ’ia « parauhia atu […] ’ia noa’a te ti’amā » (Galatia 5:13) ; e mea ti’a ato’a rā ia tātou ’ia « tāpe’a tāmau māite » i te reira (Galatia 5:1) nā roto i te tūru’ira’a i ni’a i te Mesia.

Mau mana’o nō tā’u iho tuatāpapara’a pāpa’ira’a mo’a

Galatia 1–5

E fa’ati’amā te ture a te Mesia iā’u.

’Ua pāpa’i Paulo i te feiā mo’a nō Galatia i tōna fa’aro’ora’a ē, tē arata’i-’ē-hia ra rātou e te mau ha’api’ira’a hape. (hi’o Galatia 1:6–9). Hō’ē o teie mau ha’api’ira’a hape, ’oia ho’i ïa, ’ia noa’a i te ’Ētene te ora, tītauhia ia rātou tei fāri’i i te ’evanelia ’ia peritomehia ’e ’ia ha’apa’o ato’a rātou i te mau peu o te ture a Mose (hi’o Galatia 2). ’Ua pi’i Paulo i teie mau peu tumu ra te « zugo tāvini ra »(Galatia 5:1). ’Ia tai’o ’oe i te parau a’o a Paulo i tō Galatia, ’a hi’o i te mau parau tumu ’o tē nehenehe e tauturu ia ’oe ’ia māramarama i te ti’amā mau. E nehenehe ato’a tā ’oe e feruri e aha te mau peu hape, ’aore rā te mau zugo tāvini ra e vai ra i roto i tō ’oe orara’a. E mea ānei e tāpe’a ra ia ’oe ’ia ’ite i te ti’amāra’a tā te ’evanelia e pūpū nei ? ’Ua nāhea te Mesia ’e tāna ’evanelia i te « fa’ati’amā[ra’a] mai ia [’oe] » ? (Galatia 5:1).

Hi’o ato’a 2 Nephi 2:27 ; 9:10–12.

Galatia 3

E ta’ata ’āi’a vau nō te mau ha’amaita’ira’a i parauhia ia Aberahama ra.

E feiā mo’a nō Galatia tei ha’ape’ape’a ē, nō te mea e ’ere rātou i te hua’ai mau nō Aberahama, e’ita ïa rātou e fāri’i i te mau ha’amaita’ira’a i parauhia ia Aberahama, mai te fa’ateiteira’a ho’i. ’Ia au i tei pāpa’ihia i roto i te Galatia 3:7–9, 13–14, 27–29, e aha te mau tītaura’a nō te riro ’ei « hua’ai nō Aberahama » ?

Nō te aha te mau ha’amaita’ira’a i fafauhia ia Aberahama ra, e mea faufa’a nō ’outou ?

Galatia 3:6–25

I ia Aberahama ra te ’evanelia a Iesu Mesia.

’Ua fa’ata’a mai te peropheta Iosepha Semita ē : « E’ita e ti’a ia tātou ’ia ti’aturi ē, ’ua ma’ua tō tahito ra i terā tau ’e terā tau nō ni’a i te fa’anahora’a o te ra’i mai tā te ta’ata e rave rahi e parau nei, inaha ho’i te mau mea ato’a i fa’aorahia, ’ua fa’aorahia ïa nā roto i te mana nō teie fa’anahora’a tāra’ehara rahi, i nā mua a’e i te taera’a o te Mesia ’e mai reira atu ē i teienei […] ’Ua pūpū Aberahama i te tusia, noa atu rā, ’ua ha’api’ihia ’oia i te ’evanelia » (« The Elders of the Church in Kirtland to Their Brethren Abroad », The Evening and the Morning Star,Māti 1834, 143, JosephSmithPapers.org). I tō ’oe mana’o, nō te aha e mea faufa’a nō te feiā mo’a i te ’anotau o Paulo ’ia ’ite ē, ’ua fāri’i Aberahama ’e te tahi atu mau peropheta tahito i te ’evanelia a Iesu Mesia ? Nō te aha e mea faufa’a nō ’oe ’ia ’ite i te reira ? (Hi’o Helamana 8:13–20 ; Mose 5:58–59 ; 6:50–66.)

Hi’o ato’a Te Mau Ha’api’ira’a a te Mau Peresideni o te ’Ēkālesia : Iosepha Semita (2007), 53–65.

Galatia 5:13–26 ; 6:7–10

Mai te mea e « ha’apa’o [vau] i tā te Vārua ra », e fāri’i au i « tā te Vārua e fa’atupu ra ».

I te tuatāpapara’a ’oe i teie mau ’īrava e ’ite ai ’oe e aha te fāito ’oe e ha’apa’o ra i tā te Vārua ra. Tē ’ite ra ānei ’oe i te mau hotu o te Vārua e fa’ahitihia nei i roto i te mau ’īrava 22–23 ? E aha te tahi atu ā mau hotu, ’aore rā mau maita’i, nō te orara’a pae vārua tā ’oe i ’ite ? E feruri i tei tītauhia ia ’oe ’ia rave nō te fa’atupu hope roa atu ā i te reira hotu. Nāhea te fa’atupura’a i teie hotu e nehenehe ai e ha’amaita’i i te mau tā’amura’a faufa’a rahi o tō ’oe orara’a ?

E mea ti’a iā’u ’ia ’imi i « tā te Vārua e fa’atupu ra » i roto i tō’u orara’a.

Mai te mea tē tāmata ra ’oe i te ha’apa’o i tā te Vārua ra, ’e e au ra ho’i aita tā ’oe mau tauto’ora’a e fa’atupu ra i te hotu i parauhia, ’a tai’o i te Galatia 6:7–10. ’Ia mana’o ’oe, e aha te poro’i a te Fatu nō ’oe i roto i teie mau ’īrava ?

Hi’o ato’a Alama 32:28, 41–43 ; Te Ha’api’ira’a Tumu ’e te mau Fafaura’a 64:32–34.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Galatia 3:11.E aha te aura’a o te parau « i te fa’aro’o ra, e ora ïa » ? Tē nāhea ra tātou i te rirora’a ’ei ’utuāfare i te fa’aro’o ra, e ora ïa ?

Galatia 4:1–7.E nehenehe e ’ōmua i te Galatia 4 nā roto i te paraparaura’a i te ta’a-’ē-ra’a e vai ra i roto i te mau tāvini o te ari’i ’e tāna iho mau tamari’i. E aha tā te tamari’i o te ari’i e fāna’o nei ’aita tā te tāvini ? E feruri i te reira ’a tai’o ai ’outou i te mau ’īrava 1–7. E aha tā teie mau ’īrava e ha’api’i nei nō ni’a i tō tātou tā’amura’a i te Metua i te ao ra ?

Galatia 5:16–26.E nehenehe e paraparau i te ta’a-’ē-ra’a nō « tā te tino e rave nei » ’e « tā te Vārua e fa’atupu ra. » ’Ei fa’a’ana’anataera’a i te ’āparaura’a, e nehenehe e tu’u i ni’a i te tahi mau hotu ta’a ’ē i te mau parau tā Paulo i fa’ahiti nō ni’a i tā te Vārua e fa’atupu ra. ’Ei reira te melo tāta’itahi o te ’utuāfare e mā’iti ai hō’ē, ’a parau ai e aha te reira ’e ’o vai te ta’ata e fa’ahi’o nei i te reira hotu. E nehenehe te reira e fa’atupu i te hō’ē ’āparaura’a nō ni’a i te mau rāve’a e ti’a ai i te ’utuāfare ’ia tītau i te Vārua ’ia pārahi mai i roto i te fare, nō te fa’atupu i te reira hotu. I muri iho i te ’āparaura’a, e nehenehe e tāpūpū i te reira mau mā’a hotu, e ’āno’i pauroa ’e e ’amu atu ai.

Galatia 6:1–2.Tē vai ra paha te taime e « ro’ohia [te hō’ē melo o te ’utuāfare] i te hapa ra ». E aha te parau tauturu tā ’outou e ’ite ra i roto i te Galatia 6:1 nō ni’a i te ’ohipa e rave i terā taime ?

Galatia 6:7–10.Mai te peu ’ua tanu ’āmui a’enei te ’utuāfare i te hō’ē tumu rā’au, e nehenehe e fa’a’ohipa i te reira ’ei fa’ahōho’ara’a nō te parau tumu ē : « ’O tā te ta’ata e ueue ra, ’o tāna ā ïa e ’ō’oti mai » (’īrava 7). ’Aita ana’e, e nehenehe e ui i te mau melo o te ’utuāfare i te mā’a hotu ’aore rā te mā’a tupu au roa a’e nā rātou, ’e ’ia paraparau nō ni’a i te mau mea e tītauhia nō te fa’atupu i te reira. (Hi’o i te hōho’a i te pae hope’a o teie arata’i ha’api’ira’a.) E nehenehe tā ’outou e paraparau nō ni’a i te mau ha’amaita’ira’a tā te ’utuāfare e tīa’i ra ’ia fāri’i ’e te rāve’a nō te « ’ō’oti » i te reira mau ha’amaita’ira’a.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Ha’api’i iā’u ’ia ’ite i te maita’i », Te mau hīmene, N°189.

Ha’amaita’i i tā tātou ha’api’ira’a

E tauturu i tō ’outou ’utuāfare ’ia fa’aau i te mau pāpa’ira’a mo’a ia rātou iho. ’Ua parau Nephi ē « ’Ua fa’aau ho’i au i te mau parau pāpa’i mo’a ato’a ia mātou, ’ia riro te reira ’ei maita’i ’e ’ei ha’api’ira’a ho’i nō mātou » (1 Nephi 19:23). ’Ei tauturura’a i tō ’outou ’utuāfare ’ia rave i te reira, e nehenehe tā ’outou e ani ia rātou ’ia feruri i te tahi taime ’ua ’ite rātou i te hotu tā te Vārua i fa’atupu, mai tei fa’a’itehia i roto i te Galatia 5:22–23. (Hiʼo Ha’api’ira’a mai tā te Fa’aora, 21.)

’Ua ha’api’i Paulo ē, ’ia pe’e [tātou] i tā te Vārua ra, e fāri’i tātou i « tā te Vārua e fa’atupu ra » i roto i tō tātou orara’a.