« 16–22 nō ’Ātopa. 1 ’e 2 Tesalonia : ‘’Ia fa’ati’a ho’i i tei toe i tō ’outou fa’aro’o’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2023 (2022)

« 16–22 nō ’Ātopa. 1 ’e 2 Tesalonia », Mai, pe’e mai—nō te ta’ata hō’ē ’e te ’utuāfare : 2023

Hōho’a

te tuahine misiōnare e paraparau ra i te feiā ’āpī tāne

16–22 nō ’Ātopa

1 ’e 2 Tesalonia

« ’Ia fa’ati’a ho’i i tei toe i tō ’outou fa’aro’o »

Mai te peu e’ita tātou e pāpa’i i te mau mana’o e tae mai nō ’ō mai i te Vārua, e mo’e ia tātou. E aha tā te Vārua e muhumuhu nei ia ’outou ’ia pāpa’i ’a tai’o noa ai ’outou i te 1 ’e 2 Tesalonia ?

Pāpa’i i te mau mana’o e tae mai

I Tesalonia, ’ua fa’ahapahia Paulo ’e Sila nō te « [’orure-hau-ra’a] i te mau fenua ato’a nei » (Te ’Ohipa 17:6). ’Ua riri te tahi feiā fa’atere ’āti Iuda i tā rāua porora’a, ’e ’ua ’ume atu ra rātou i te ta’ata ’e ’ua tupu ihora te ti’arepu (hi’o Te ’Ohipa 17:1–10). ’Ei fa’ahope’ara’a, ’ua parauhia Paulo rāua ’o Sila ’ia fa’aru’e ia Tesalonia. ’Ua pe’ape’a Paulo nō te mau ta’ata Tesalonia i fa’afāriu-’āpī-hia ’e nō te hāmani-’ino-ra’a tā rātou e fa’aruru ra, e’ita tāna e nehenehe e ho’i mai nō te fārerei ia rātou. ’Ua pāpa’i ’oia : « ’Ore a’era e ti’a iā’u ’ia ha’amahu noa atu ā, i tono atu ai […] ’ia ’ite i tō ’outou fa’aro’o. » ’Ei pāhonora’a, nā te rima tauturu o Paulo i Tesalonia, ’o Timoteo, i « hōpoi mai i te parau maita’i ra o tō ’outou fa’aro’o, ’e te aroha » (1 Tesalonia 3:5–6). Inaha, ’ua mātauhia te feiā mo’a nō Tesalonia ’ei hi’ora’a nō « te feiā ato’a i fa’aro’o » (1 Tesalonia 1:7), ’e ’ua parare te parau nō tō rātou fa’aro’o nā te mau ’oire nā te ara. E feruri na i te ’oa’oa o Paulo ’e tōna mana’o hau i te fa’aro’ora’a ē, ’aita tāna ’ohipa i rotopū ia rātou « i te mea faufa’a ’ore » (1Tesalonia 2:1). ’Ua ’ite rā Paulo ē, ’aita te ha’apa’o maita’i tahito e nava’i nō te oraora i te pae vārua ananahi, ’e tē pe’ape’a ra ’oia i te ’ohipa a te mau ’orometua ha’avare i rotopū i te feiā mo’a (hi’o 2 Tesalonia 2:2–3). Tāna poro’i ia rātou ’e ’ia tātou nei, ’o te tāmaura’a ïa i te « fa’ati’a ho’i i tei toe i tō [tātou] fa’aro’o » ’e i te « [fa’arahi] atu ā » tō tātou here (hi’o 1 Tesalonia 3:10 ; 4:10).

Hōho’a

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

1 Tesalonia 1–2

E tāvini te mau pipi a te Mesia i te ta’ata ma te ateate ’e te here.

I roto i te 1 Tesalonia, tē fa’a’ite nei te mau parau a Paulo i te māna’ona’ora’a ’e te ’oa’oa o te hō’ē ta’ata tei hōro’a tā’āto’a iāna i te tāvinira’a i te mau tamari’i a te Atua. I roto iho ā rā i nā pene mātāmua e piti nō te 1 Tesalonia, e ’ite ’oe i te mau ta’o ’e te mau parau e fa’a’ite ra e aha te huru ’e te mau ’ohipa a te hō’ē pipi nā te Fatu. ’Ei hi’ora’a, e aha te ha’api’ira’a tā ’oe e ’apo nei i roto i te 1 Tesalonia 1:5–8 ; 2:1–13 nō ni’a i te tāvinira’a i te Fatu ?

’A feruri i te mau taime tā ’oe iho e fāna’o nei nō te tāvini i te Atua ’e tāna mau tamari’i. E aha tā ’oe e ’ite ra i roto i teie mau pene ’o tē fa’auru ia ’oe ’ia ha’amaita’i atu ā i tā ’oe tāvinira’a ? E nehenehe e ui ia ’oe iho i te mau uira’a nō ni’a i te mau mea tā ’oe e tai’o ra, mai teie te huru « E hi’ora’a ānei au nō te mau mea tā’u i ’ite ? » (hi’o 1 Tesalonia 1:7).

1 Tesalonia 3:7–13 ; 4:1–12

« Fa’a’ī’ī […] i te aroha ’e ’ia mani’i. »

’Ua ’oa’oa Paulo i te ha’apa’o maita’i o te feiā mo’a nō Tesalonia (hi’o 1 Tesalonia 3:7–9). ’Ua hina’aro ato’a rā ’oia ia rātou ’ia « rahi atu ā » i roto i taua ha’apa’o maita’i ra (1 Tesalonia 4:1). ’Ia tai’o ’oe i te 1 Tesalonia 3:7–13 ; 4:1–12, ’a feruri i te mau rave’a « ’ia rahi atu ā » tō ’oe fāito pae vārua (1 Tesalonia 4:10). ’Ei hi’ora’a, ’ua fa’a’ohipa Paulo i te mau ta’o « mo’ara’a » ’e « ha’amo’ara’a » [i roto i te Bibilia reo peretāne]. E aha te ha’api’ira’a tā ’oe e ’apo nei i roto i te mau pāpa’ira’a a Paulo nō ni’a i te aura’a o teie mau ta’o ? Nāhea te Fa’aora e tauturu ai ia ’oe ’ia rahi atu ā te mo’ara’a ’e ’ia ha’amo’ahia ?

Hi’o ato’a Arata’i nō te mau pāpa’ira’a mo’a, « Mo’a », « Ha’amo’ara’a », scriptures.ChurchofJesusChrist.org.

1 Tesalonia 4:16–18 ; 5:1–10 ; 2 Tesalonia 1:4–10

Mai te mea e ha’apa’o maita’i au ma te vai ara ho’i, e fa’aineinehia ïa vau nō te Tae-Piti-Ra’a mai o te Fa’aora.

I roto i te 1 Tesalonia 5:1–10, ’ua fa’a’ohipa Paulo e rave rahi fa’ahōho’ara’a nō te ha’api’i i te ta’ata nō ni’a i te tau e ho’i fa’ahou mai ai Iesu i te fenua nei. ’Ia tuatāpapa ’oe i teie mau fa’ahōho’ara’a, e pāpa’i i te mau mana’o e tae mai nō ni’a i te Tae-Piti-Ra’a mai o Iesu Mesia :

« Te ’eiā i te pō ra » :
« Te vahine hapū ’ia ro’ohia i te māuiui ra » :
Te tahi atu mau fa’ahōho’ara’a tā ’oe i ’ite mai :

E aha te tahi atu ā parau mau tā ’oe e ’apo nei i roto i te 1 Tesalonia 4:16–18 ; 5:1–10 ; 2 Tesalonia 1:4–10 ? E aha te mea e muhumuhuhia ra ia ’oe ’ia rave nō tē vai ara ’e nō te fa’aineine nō tōna ho’ira’a mai ?

Hi’o ato’a D. Todd Christofferson, « Fa’aineinera’a nō te ho’ira’a mai o te Fatu », Liahona, Mē 2019, 81–84.

2 Tesalonia 2

’Ua tohuhia te parau nō te hō’ē tāivara’a, ’oia ho’i te tāivara’a i te parau mau, nā mua atu i te Tae-Piti-Ra’a mai.

I roto i te mau hāmani-’ino-ra’a rahi, e rave rahi feiā mo’a nō Tesalonia tei ti’aturi ē, e mea fātata te Tae-Piti-Ra’a mai o te Fa’aora. ’Ua ’ite rā Paulo ē, hou Iesu e ho’i mai ai i te fenua nei, e tupu te hō’ē tāivara’a—e ’ōrurehaura’a ’aore rā e « tāivara’a » i te parau mau (hi’o 2 Tesalonia 2:1–4). E nehehene e ha’amāramarama hōhonu atu ā nō ni’a i te Tāivara’a rahi—’e e māuruuru ato’a ho’i nō te Fa’aho’i-Fa’ahou-Ra’a mai—nā roto i te ferurira’a i te tahi o te mau mea i muri nei :

Mau ’īrava e tohu ātea nei i te Tāivara’a : Isaia 24:5 ; Amosa 8:11–12 ; Mataio 24:4–14 ; 2Timoteo 4:3–4
Mau ’īrava e fa’a’ite ra ’ua ha’amata a’ena te Tāivara’a i te tau o Paulo : Te ’Ohipa 20:28–30 ; Galatia 1:6–7 ; 1 Timoteo 1:5–7
Mau parau nō ni’a i te Tāivara’a rahi a te tahi reforomatio keresetiano :

Martin Luther : « ’Aita atu ā tītaura’a nā’u maori rā te fa’atanora’a i te ’Ēkālesia mai te au i te mau pāpa’ira’a mo’a […] Tā’u noa e parau nei, ’oia ho’i, ’ua ’ore te ha’apa’ora’a keresetiano i rotopū i te ta’ata nā rātou te tītaura’a e fa’aherehere i te reira » (i roto E.G. Schweibert, Luther and His Times: The Reformation from a New Perspective [1950], 590).

Roger Williams: « ’Ua […] ha’avi’ivi’i pauroa ho’i te tāivara’a ’e e’ita te reira e nehenehe e matara ē tae roa atu e tono mai te Mesia i te tahi mau ’āpōsetolo ’āpī nō te tanu ’āpī i te mau ’ēkālesia » (i roto Philip Schaff, The Creeds of Christendom [1877], 851).

Hi’o ato’a 2 Nephi 28.

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1 Tesalonia 3:9–13.E aha tā ’outou e fa’ahiahia nei i te mana’o o Paulo nō tōna mau hoa ? Nāhea tātou e « fa’a’ī’ī [ai tātou] i te aroha ’e ’ia mani’i noa ia ’outou iho » ? (’īrava 12).

1 Tesalonia 4:13–18.E aha te mau pereota i roto i teie mau ’īrava nō ni’a i te Ti’afa’ahoura’a ’o tē tāmāhanahana nei ia ’outou ?

1 Tesalonia 5:14–25.’A tai’o ai ’outou i te parau a’o a Paulo i roto i te 1 Tesalonia 5:14–25, ’a ’ani i te melo tāta’itahi o te ’utuāfare ’ia ’imi mai i te hō’ē parau e fa’atumu te ’utuāfare i ni’a iho. ’A feruri i te mau rāve’a au nō te pia i teie mau parau nā roto i te fare ’ei fa’aha’amana’ora’a. ’Ei hi’ora’a, e nehenehe te ta’ata tāta’itahi e ’imi mai i te hōho’a, ’aore rā e pāpa’i mai ’oia i te hōho’a nō te fa’ahōho’a ’aore rā nō te pa’epa’e i te parau tāna i mā’iti.

2 Tesalonia 3:13.Tē « tō’aru’aru [nei ānei tātou] i te ravera’a i te parau maita’i »—nō te teimaha paha o te mau tītaura’a nō te ti’ara’a pipi ? E aha tē tauturu ia tātou ’ia tae ana’e mai terā mana’o ? (Hi’o Galatia 6:9 ; Te Ha’api’ira’a Tumu ’e te mau Fafaura’a 64:33.) Nāhea tātou e tauturu ai te tahi i te tahi ’ia tupu ana’e te reira ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Jésus Christ est mon modèle », Chants pour les enfants, 40–41.

Ha’amaita’i i tā’u iho tuatāpapara’a pāpa’ira’a mo’a

’Imi i te heheura’a i te mau mahana ato’a. Pinepine te heheura’a i te tae mai te « a’o nā ni’a iho i te a’o » (2 Nephi 28:30), e ’ere te tā’āto’ara’a i te hō’ē ā taime […] ’Eiaha e feruri i te [tuatāpapara’a ’evanelia] mai te tahi mea e fa’ata’a ’outou i te hō’ē taime, mai te tahi rā mea tā ’outou e rave tāmau noa » (Ha’api’ira’a mai tā te Fa’aora, 12).