16–22 nō ’Ātopa

1 ’e 2 Tesalonia

« ’Ia fa’ati’a ho’i i tei toe i tō ’outou fa’aro’o »

’A taiʼo ai ’oe nā roto i te pure i te 1 ʼe te 2 Tesalonia ma te haʼamanaʼo i te mau tamariʼi, ʼe ʼite ’oe i te mau parau tumu e tiʼa ia rātou ʼia māramarama.

Tītau i te mana’o

I roto i te haʼapiʼiraʼa i te hepetoma i maʼiri aʼenei, ʼua ani ānei ’oe i te mau tamariʼi ’ia faʼaʼohipa ri’i i te mea tā rātou i haʼapiʼi mai ? E vaiiho i te mau tamariʼi ’ia faʼaʼohipa i te mau minuti mātāmua o te ha’api’ira’a o teie hepetoma nō te fa’a’ite mai i tā rātou i rave.

Ha’api’i i te ha’api’ira’a tumu : Te mau tamari’i ’āpī

1 Tesalonia 5:1–6

ʼIa peʼe anaʼe au i te mau faʼaueraʼa a te Atua, e ineine ïa vau nō te Tae-Piti-Raʼa mai o Iesu Mesia.

’Aita tātou i ’ite ahea te Fa’aora e ho’i fa’ahou mai ai i te fenua nei. Terā rā, e nehenehe tātou e hi’ohi’o iāna ’e e fa’aineine nō tōna taera’a mai.

Te mau ’ātivite e au

• E ani i te hō’ē metua vahine ’ia fa’a’ite poto mai e aha te huru ’ia tīa’i i tāna ’aiū ’ia fānauhia mai. E taiʼo i te 1 Tesalonia 5:2–3, ʼe e parau atu i te mau tamariʼi ē, e ho’i faʼahou mai Iesu Mesia i niʼa i te fenua nei, terā rā ’aita hō’ē ta’ata i ʼite pāpū i te taime—mai te hōʼē metua vahine tei ʼore i ʼite ahea ’oia e fānau mai ai i tāna ’aiū.

• E ani i te mau tamariʼi ʼia paraparau mai nō te hō’ē taime ’ua faʼaineine rātou nō te hōʼē tere ʼaore rā nō te hō’ē ’ohipa e fa’atupuhia. E aha tā rātou i rave nō te fa’aineine ? E hōpoi mai i te hōʼē ʼāfata ta’ita’i ʼahu ʼaore rā hō’ē pūtē ’e e vaiiho i te mau tamariʼi ’ia ha’avare fa’anaho i te reira ’ia ineine nō te hō’ē tere. Nō te tao’a tāta’itahi tā rātou e ha’avare fa’anaho, ’a tauturu i te mau tamari’i ’ia feruri i te hō’ē rāve’a e fa’a’ineine tātou nō te ho’i-fa’ahou-ra’a mai o Iesu Mesia.

• E taiʼo i te 1 Tesalonia 5:6 i te mau tamariʼi, ʼe e fa’ata’a atu ē, mai te mea eʼita tātou e faʼaineine nō te ho’iraʼa mai o Iesu, mai te huru ra ïa ē, ʼua vareʼa tātou i te taʼoto ʼe eʼita ïa tātou e ʼineine nōna. E ani i te mau tamari’i ’ia tāpō i te mata mai te huru ’ua vareʼa rātou i te taʼoto. E tātara atu ē, mai te mea e faʼaʼineine tātou, mai te huru ra ïa ē, ʼua ara tātou ʼe te tīa’i nei iāna. E ani ia rātou ʼia ara.

• Hīmene ’āmui i te hō’ē hīmene nō ni’a i te Tae-Piti-Ra’a mai mai te hīmene « Quand Jésus reviendra » (Chants pour les enfants, 46–47).

2 Tesalonia 2:1–3

ʼUa haʼapiʼi ’o Paulo ē, e tupu te hōʼē tāivara’a hou te ho’i-fa’ahou-ra’a mai o Iesu Mesia.

Te ʼĒkālesia tā Iesu Mesia i haʼamau, ’ua topa ïa i roto i te tāivara’a, ʼoia hoʼi, ʼua rave-’ē-hia atu te ha’amanara’a autahuʼaraʼa ʼe te mau parau mau o te ʼevanelia mai niʼa atu i te fenua. ʼUa tohu Paulo ē ʼe tupu teie tāivara’a, ʼaore rā « ’īriti-ʼē-raʼa-hia », hou te Tae-Piti-Raʼa mai o te Faʼaora.

Te mau ’ātivite e au

• I muri aʼe i te taiʼoraʼa i te 2 Tesalonia 2:3 ʼe te mau tamariʼi, vaiiho ia rātou ’ia tauturu ia ’oe i te patura’a i te hō’ē patu i te hāpaina ’ūrina ʼaore rā i te ʼōfaʼi. E parau atu i te mau tamariʼi ē, tē faʼahōhoʼa nei te mau hāpaina ʼaore rā te mau ʼōfaʼi i te mau tufaʼa faufaʼa rahi o te ʼĒkālesia mau, mai te mau parau tumu o te ʼevanelia, te autahuʼaraʼa, te mau tāʼatiraʼa hiero, ʼe te mau peropheta. I muri aʼe i te poheraʼa o Paulo ʼe te tahi atu mau ʼāpōsetolo, ʼua moʼe teie mau mea, ʼe ʼaita faʼahou te ʼĒkālesia mau i niʼa i te fenua nei e rave rahi matahiti te maoro. E ani i te hōʼē tamariʼi ’ia tūpararī i te pātu, ʼe e fa’ata’a atu ē ʼua parauhia te reira te Tāivara’a ʼaore rā te « ’īriti-’ē-raʼa-hia. » I tō Iesu Mesia faʼahoʼiraʼa mai i tāna ʼĒkālesia, ʼua piʼihia te reira te Faʼahoʼi-fa’ahou-raʼa mai.

• E faʼaʼite i te hō’ē Buka a Moromona ʼe te hōhoʼa nō te peropheta ʼe nō te hōʼē hiero. E ani i te mau tamariʼi ’ia parau « Tāivara’a » ʼia huna anaʼe ’oe i te mau tao’a i roto i te hōʼē pūtē ʼe « Faʼahoʼi-fa’ahou-raʼa » ʼia ʼīriti anaʼe ’oe i te mau tao’a i rāpae’au.

• E hīmene i te mau hīmene ’o tē haʼapiʼi nei i te mau parau mau tei rave-ʼē-hia atu i te tau nō te tāivara’a ʼe tei faʼahoʼi-fa’ahou-hia mai i tō tātou nei tau, mai te mau hīmene « L’Eglise de Jésus-Christ », « La prêtrise rétablie », ʼe « Oh, j’aime voir le temple » (Chants pour les enfants, 48, 60–61, 99).

Ha’api’i i te ha’api’ira’a tumu : Te mau tamari’i pa’ari a’e

1 Tesalonia 5:1–6

ʼIa peʼe anaʼe au i te mau faʼaueraʼa a te Atua, e ineine ïa vau nō te Tae-Piti-Raʼa mai o Iesu Mesia.

E nehenehe te aʼo a Paulo e tauturu ia tātou ʼia ineine ʼe ’ia tīaʼi i taua mahana rahi ra ʼia ho’i faʼahou mai te Faʼaora i niʼa i te fenua nei.

Te mau ’ātivite e au

• E ani i te hōʼē tamariʼi ’ia taiʼo 1 Tesalonia 5:1–6 ’a pe’e mai ai te tahi atu mau tamariʼi. I muri aʼe i te ʼīrava tātaʼitahi, e ani i te hōʼē tamariʼi ʼia haʼapoto mai i tōna mana’o nō ni’a i te mea tā te ʼīrava e parau nei. E hinaʼaro paha ’oe e fa’ata’a ē, « te mahana o te Fatu » ’o te Tae-Piti-Raʼa mai ïa o Iesu Mesia. Nō te aha te Tae-Piti-Raʼa mai i fa’aauhia ai i te hōʼē taʼata ʼeiā i te pō ʼaore rā te hōʼē vahine ’o tē fātata ra i te fānau ?

• E parau atu i te mau tamariʼi ʼia feruri ē e haere mai te Faʼaora i roto i tā rātou piha i te tahi taime i teie mahana. Nāhea tātou e faʼaineine ai ia tātou nō tōna tere fārerei ? E tauturu i te mau tamariri ’ia feruri i te mau mea tā tātou e rave nō te faʼaineine ia tātou iho nō te mahana e hoʼi mai ai Iesu Mesia. Mai teie te huru, e tātarahapa tātou, e faʼaʼore i tā vetahi ʼē hapa, e haʼamaitaʼi i tō tātou mau auraʼa ʼutuāfare, e peʼe i te peropheta, e tītau ’ia fāri’i i te fa’aurura’a a te Vārua Maita’i, ’e e haʼapaʼo i tā tātou mau fafauraʼa. E faʼaitoito i te mau tamariʼi ʼia māʼiti i te mea tā rātou e rave nō te faʼaineine ia rātou iho nō te fāri’i i te Faʼaora i tōna ho’iraʼa mai.

2 Tesalonia 2:1–3

ʼUa haʼapiʼi ’o Paulo ē, e tupu mai te hōʼē tāivara’a hou te ho’i-fa’ahou-ra’a mai o Iesu Mesia.

Mai te mea e taʼa te mau tamariʼi ē, ’ua rave-ʼē-hia te ʼĒkālesia a Iesu Mesia ʼe tāna ʼevanelia mai te fenua atu i te tau o te Tāivaraʼa rahi, ʼe mea māramarama ïa nō rātou te tītaura’a nō te Faʼahoʼi-fa’ahou-raʼa mai.

Te mau ’ātivite e au

• E ani i te hōʼē o te mau tamariʼi ’ia taiʼo i te 2 Tesalonia 2:1–3. Mai te au i teie mau ʼīrava, e aha te ’ohipa e tupu hou « te mahana o te Mesia », ʼoia hoʼi te Tae-Piti-Raʼa mai ? E aha te aura’a nō te parau ra « ’īriti-’ē-ra’a-hia » ? E haʼapāpū ē, ʼua taʼa i te mau tamariʼi ē, ’o te Tāivaraʼa rahi ïa, tei tupu i muri aʼe i te poheraʼa o te mau ʼāpōsetolo a te Faʼaora. E hina’aro paha ’oe e fa’a’ite i te mau ha’amāramaramara’a nō ni’a i te « Tāivara’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org).

• E tauturu i te mau tamariʼi ’ia tāpaʼo i niʼa i te tāpura i te tahi o te mau parau mau ʼe te mau haʼamaitaʼiraʼa tā tātou e fāna’o nei maoti te ʼevanelia. E tūmā hō’ē hō’ē i teie mau mea, ʼe e ani i te mau tamariʼi e nāhea tō rātou oraraʼa e ta’a ’ē ai ’ia ʼore teie nei mau mea. E haʼamāramarama atu ē ʼua moʼe teie mau parau mau i roto i te Tāivaraʼa rahi. Nō te aha e mea faufaʼa te faʼahoʼi-fa’ahou-ra’a-hia mai te ’Ēkālesia a Iesu Mesia i te fenua nei i teie mau mahana hope’a nei ? E ani i te mau tamariʼi ʼia « faʼahoʼi faʼahou mai » ʼaore rā ʼia pāpaʼi faʼahou i te mau parau mau ʼe te mau haʼamaitaʼiraʼa i niʼa i te tāpura .

2 Tesalonia 3:7–13

Tē hinaʼaro nei tō tātou Metua i te ao ra ʼia rave au i te ʼohipa.

Nāhea ’oe e tauturu ai i te mau tamariʼi ʼia hiʼo i te ʼohipa mai te hōʼē haʼamaitaʼiraʼa, ’eiaha rā mai te hō’ē mea e ʼapehia ?

Te mau ’ātivite e au

• E ani i te mau tamariʼi te tahi i muri i te tahi, ’ia taiʼo mai i te mau ʼīrava i roto i te 2 Tesalonia 3:7–13 ʼe e ʼimi i te fifi tā te feiā moʼa i faʼaruru. Nō te aha tō tātou Metua i te ao ra e hinaʼaro nei ʼia rave tātou i te ʼohipa ? E aha tē tupu, mai te mea ē, ’aita roa atu tātou i haʼapiʼi ’ia rave itoito i te ʼohipa ? E vaiiho i te mau tamariʼi, te tahi i muri i te tahi, ’ia rave i te mau ʼohipa riʼi ’ōhie ’a ʼimi ai te tahi atu mau tamariʼi e aha tā rātou e rave ra.

• E ani i te mau tamariʼi ’ia paraparau mai nō niʼa i te hō’ē taime ’a rave itoito ai rātou i te tahi ʼohipa, te hōʼē ʼōpuaraʼa, ʼaore rā te hō’ē fā. E aha tō rātou mana’o nō ni’a ia rātou iho i muri aʼe i te otiraʼa taua ʼohipa ra ? E aha te aura’a o te parau ē « ʼeiaha e tōʼaruʼaru i te raveraʼa i te parau maitaʼi » ? (2 Tesalonia 3:13). E aha te mea e tauturu ia tātou ’ia tāmau noa i te ’ohipa, fifi noa atu ā te ’ohipa ?

Fa’aitoito i te ha’api’ira’a i te fare

E ani i te mau tamariʼi ’ia parau atu i te hōʼē melo o te ʼutuāfare ʼaore rā i te hōʼē hoa, hō’ē tumu i māuruuru ai rātou tē vai nei te ʼevanelia i niʼa i te fenua nei i teie mahana (e nehenehe te ʼapi ’ātivite nō teie hepetoma e hōro’a ia rātou i te mau mana’o).

Ha’amaita’i i tā tātou ha’api’ira’a

Pāturu i te mau metua o te mau tamari’i. « ’O te mau metua te mau ’orometua ha’api’i ’evanelia faufa’a roa a’e nō tā rātou mau tamari’i—tei ia rātou ra te hōpoi’a tumu ’e te mana rahi roa a’e nō te fa’auru i tā rātou mau tamari’i (hi’o Deuteronomi 6:6–7). ’A ha’api’i ai ’oe i te mau tamari’i i te fare purera’a, ’a ’imi nā roto i te pure i te mau rāve’a nō te pāturu i tō rātou mau metua i roto i tō rātou ti’ara’a faufa’a rahi » (Ha’api’ira’a mai tā te Fa’aora, 25).