9–15 nō ’Ātopa

Philipi ; Kolosa

« E ti’a iā’u te mau mea ato’a nei i te Mesia, tei tauturu mai iā’u ra »

E taiʼo i te Philipi ’e te Kolosa, ma te feruri i tā ’oe mau pīahi. E ’imi i te faʼaururaʼa nō ni’a i te rāve’a nō te ha’api’i ia rātou i te mau parau tumu i roto i teie mau ʼepisetole.

Tītau i te mana’o

E ani i te mau tamari’i e aha tā rātou i rave i teie hepetoma i ma’iri a’e nei nō te ’ohipa i ni’a i te hō’ē mea tā rātou i ha’api’i mai i roto i te ha’api’ira’a nō te hepetoma i ma’iri. ’Ei hi’ora’a, ’ua nāhea rātou i te torora’a i te rima i te hō’ē ta’ata tei hina’aro i te hoa ?

Ha’api’i i te ha’api’ira’a tumu : Te mau tamari’i ’āpī

Philipi 1: 3–4 ; Kolosa 1:39

Tē here nei te feiā fa’atere o te ’Ēkālesia iā’u, ’e tē pure nei nōʼu.

Pinepine Paulo i te ha’amata i tāna mau ʼepisetole nā roto i te fa’a’itera’a i tōna here i te mau melo o te ’Ēkālesia ’e te paraura’a ia rātou ē, ’ua pure ’oia nō rātou. E feruri e nāhea ’oe e tauturu ai i te mau tamariʼi ’ia hāro’aro’a ē, tē here nei tō rātou feiā fa’atere ia rātou.

Te mau ’ātivite e au

• E taiʼo pūai i te Philipi 1:3–4 ʼe te Kolosa 1:3, 9 ʼe, e ani i te mau tamariʼi ʼia tūfene i tō rātou rima ʼe ’ia piʼo i tō rātou upoʼo i raro i te mau taime atoʼa e faʼaroʼo rātou i te mau tāʼo pure nei, purera’a, ’e pure. E fa’ata’a ē, ʼua pure te ʼāpōsetolo Paulo nō te mau melo o te ʼĒkālesia, mai tō tātou feiā faʼatere o te ʼĒkālesia e pure nei nō tātou i teie mahana.

• E faʼaʼite i te hōʼē hōhoʼa nō Iesu Mesia, ʼe e tai’o i te tahi mau ’īrava ’o tē fa’a’ite ra ē tē pure ra ’oia nō te hō’ē ta’ata (’ei hi’ora’a, Luka 22:32 ; 3 Nephi 19:21, 23). E aha tā Iesu i ani ’a pure ai ʼoia nō vetahi ʼē ?

• E tauturu i te mau tamariʼi ’ia fa’a’ite mai i te tahi o tō rātou mau taʼata faʼatere nō te ’Ēkālesia, mai te peresideni o te Paraimere, te ’episekōpo ʼe te peresideni o te ʼĒkālesia. E haʼamāramarama atu ē, tē ani nei teie feiā faʼatere i tō tātou Metua i te ao ra ʼia haʼamaitaʼi i te mau tamariʼi ʼe ʼia tauturu ia rātou ’ia ora ma te parautiʼa. E nehenehe e parau atu i te mau tamariʼi e aha tā ’oe e parau nei, ʼia pure anaʼe ’oe nō rātou.

Philipi 4:4, 8

E nehenehe au e ʼoaʼoa i te Fatu.

ʼUa faʼaitoito Paulo i te feiā moʼa ’ia ʼoaʼoa—noa atu ē ʼua faʼaruru rātou i te mau tāmataraʼa rahi ʼe tei roto hoʼi ’o Paulo iho i te fare tāpeʼaraʼa. E nāhea ’oe ’ia tauturu i te mau tamariʼi ʼia ʼite ē, e ’āfa’i mai te pe’era’a ia Iesu Mesia i te ʼoaʼoa ?

Te mau ’ātivite e au

• E ani i te mau tamari’i ’ia fa’aro’o i te hōʼē parau tei fa’ahiti-pinepine-hia ’a tai’o ai i te Philipi 4:4. E ani i te mau tamari’i ’ia fa’a’ite mai ia ’oe e aha tā rātou e rave ’ia ’oa’oa ana’e rātou. E parau i te mau tamari’i nō te aha ’oe e « ’oa’oa ai i te Fatu »—nō te aha ’oe e ’oa’oa ai maoti Iesu Mesia. E vaiiho i te mau tamari’i ’ia fa’a’ite mai i tō rātou mana’o nō ni’a ia Iesu Mesia.

• ’A fa’a’ite i te mau tao’a ’aore rā, te mau hōho’a ’o tē fa’ahōho’a ra i te mau mea ’o tē tauturu ia ’oe ’ia « ’oa’oa i te Fatu » (Philipi 4:4), mai tāna mau hāmanira’a, te hiero, tōna ti’afa’ahoura’a, ’aore rā, te ’utuāfare. E vaiiho i te mau tamariʼi, te tahi i muri i te tahi, ʼia māʼiti i te hōʼē hōhoʼa ʼaore rā taoʼa, ʼe i muri iho, e parau atu ia rātou nō te aha te reira e fa’a’oa’oa nei ia ’oe. E ani ia rātou ’ia faʼaʼite mai i te mau mea ’o tē tauturu ia rātou ʼia ʼoaʼoa i te Fatu.

• E taiʼo ʼāmui i te Philipi 4:8 ʼe e tauturu i te mau tamariʼi ʼia feruri i te mau mea e tano i ni’a i te mau faʼata’ara’a o te ʼīrava (hiʼo atoʼa i Te mau Hīroʼa Faʼaroʼo 1:13). E ani i te mau tamari’i ’ia pāpa’i hōho’a i teie mau mea.

Kolosa 1:23 ; 2:6–7

E tiʼa i tōʼu faʼaroʼo ’ia « aʼahia » i niʼa ia Iesu Mesia.

Mai te mea e nehenehe i te mau tamariʼi ’ia patu i tō rātou oraraʼa ʼe tō rātou faʼaroʼo i niʼa i te Faʼaora, e nehenehe ïa rātou e pātoʼi atu i te mau vero o te oraraʼa nei.

Te mau ’ātivite e au

• E faʼaʼite i te hōhoʼa nō te hōʼē tumu rāʼau i roto i te arata’i ha’api’ira’a o te Mai, pe’e mai—nō te taʼata hō’ē ʼe te ʼutuāfare ’a taiʼo ai ’oe i te mau parau rahi i roto i te Kolosa 1:23 ; 2:6–7 (’aore rā ’a fa’a’ite i te video « Spiritual Whirlwinds [Mau Mataʼi Pū’āhiohio] » i ni’a i te ChurchofJesusChrist.org). E aha tē tupu mai i ni’a i teie tumu rāʼau mai te mea ē, e tupu mai te hōʼē vero ʼe ʼaita tō teie tumu rāʼau e mau aʼa paʼari ? E vaiiho i te mau tamariʼi ’ia tiʼa ʼe ʼia fa’ariro ia rātou ’ei tumu rāʼau ma te mau aʼa paruparu i roto i te hōʼē vero ʼe i muri iho e tumu rāʼau ma te mau aʼa paʼari. Fa’a’ite pāpū ē, nā roto i te fa’aro’o i te Fa’aora e noa’a ia tātou ’ia riro mai te hō’ē tumu rā’au ma te aʼa paʼari. I muri iho e ti’a ai ia tātou ’ia pāto’i i te mau « vero » pae vārua mai te mau fa’ahemara’a ’e te mau taime fifi.

• E ani i te hōʼē tamariʼi ’ia pāpa’i hōho’a i te hōʼē tumu rāʼau i ni’a i te tāpura. E ani i te mau tamari’i ’ia fa’a’ite mai i te tahi mau mea e nehenehe ia rātou e rave ’ia « aʼahia » i niʼa ia Iesu Mesia. I te mau taime ato’a e fa’a’ite mai te hōʼē tamari’i i te hō’ē mea, e ani iāna ’ia tuʼu atu i te hōʼē aʼa i ni’a i te hōhoʼa.

Ha’api’i i te ha’api’ira’a tumu : Te mau tamari’i pa’ari a’e

Philipi 4:4–13

Mai te mea e faʼaroʼo tōʼu ia Iesu Mesia, e nehenehe au e ʼoaʼoa ’e tae noa atu i roto i te mau tau fifi.

ʼUa faʼaʼoromaʼi Paulo i te mau tāmataraʼa e rave rahi, ʼua ʼoaʼoa rā ʼoia nō tōna faʼaroʼo ia Iesu Mesia.

Te mau ’ātivite e au

• E ani i te mau tamariʼi ’ia feruri ē, tei roto rātou i te fare ʼāuri, mai te ʼāpōsetolo Paulo ’a pāpaʼi ai ʼoia i te Episetole i tō Philipi. E taiʼo i te Philipi 4:4–13 ʼe te mau tamariʼi, ʼe e ani ia rātou ’ia ʼimi i teie mau tāʼo « ʼoaʼoa », « hau », ’e « fa’a’oroma’i. » Nō te aha i ti’a ai ia Paulo ’ia ʼoaʼoa ʼe ’ia fāri’i i te hau, roto noa atu ’oia i te fare tāpe’ara’a ? I muri iho, e ani i te mau tamari’i ’ia ’imi i te mau ta’o « Fatu », « Atua », ’e « Mesia » i roto i te mau ʼīrava. E tauturu ia rātou ʼia taʼa ē, maoti te fa’aro’o o Paulo ia Iesu Mesia i ti’a ai iāna ’ia ’oa’oa.

• E ani i te mau tamariʼi ʼia tauturu ia ’oe ’ia faʼahope i te mau pereota mai teie : « E nehenehe au e pārahi i roto i te pōuri ʼe ʼia ʼite noa ā i te mau mea, mai te mea ē, tē vai ra tōʼu . I rāpae au i te mahana veʼaveʼa ʼe haumarū noa ā vau mai te mea tē mau nei au i te hō’ē . E nehenehe tō’u e taime fifi ʼe ēʼite noa rā vau i te ʼoaʼoa mai te mea ē, t vai ra tō’u . » E aha tā Philipi 4:4–13 e parau nei e nehenehe tā tātou e rave nō te ’ite i te ’oa’oa ? E ani i te mau tamari’i ’ia fa’a’ite mai i te tahi mau hīmene ’aore rā mau pāpa’ira’a mo’a nō ni’a ia Iesu ’o tē nehenehe e tauturu ia rātou ’ia fāri’i i te ’oa’oa i roto i te mau taime fifi.

Philippi 4:8

E nehenehe au e « manaʼo i te » mau mea e parau mau, e parautiʼa ʼe e mea mā.

E mea pinepine te mau tamariʼi i te ʼite i te mau mea ʼino ʼe te viʼiviʼi. E nehenehe ’oe e tauturu ia rātou ’ia ’imi i te mau mea e ha’amaita’i i te ta’ata ’e te mea paieti.

Te mau ’ātivite e au

• E ani i te hōʼē tamariʼi ’ia taiʼo pūai mai i te Philipi 4:8 ’a ʼimi ai te tahi atu mau pīahi i te mau ta’o i roto i Te mau Hīroʼa Faʼaroʼo 1:13 mai te reira ato’a ’e ’aore rā hō’ē ā huru. E ani i te hō’ē tamari’i ’ia pāpa’i i teie mau ta’o i ni’a i te tāpura. E ani i te mau tamari’i e aha te aura’a o te mau ta’o, ’e e tauturu ia rātou ’ia fa’ata’a mai i te reira mai te mea e hina’arohia. Nō te aha e tiʼa ai ia tātou ʼia « feruri » i teie mau mea ? Nāhea tātou e nehenehe ai e « ʼimi » i te reira mau mea ?

• E ani i te mau tamariʼi ’ia fa’a’ite mai i te mau mea e tano i te mau fa’ata’ara’a i roto i te Philipi 4:8. E ani ia rātou ’ia tāpeʼa i te hōʼē tāpura i teie hepetoma nō te mau mea atoʼa tā rātou e ʼite ē e tano i ni’a i teie mau fa’ata’ara’a. E faʼaitoito ia rātou ’ia hopoʼi mai i tā rātou mau tāpura i te Paraimere i te hepetoma i muri nei ʼe ’ia faʼaʼite mai i te mea tā rātou i ʼite.

Kolosa 1:23 ; 2:6–7

E tiʼa i tōʼu faʼaroʼo ’ia « aʼahia » i niʼa ia Iesu Mesia.

Tē tāmata nei Sātane i te haʼaparuparu i tō tātou fa’aro’o nā roto i te mau faʼahemaraʼa ʼe te mau haʼapiʼiraʼa hape. Nāhea ’oe e faʼauru ai i te mau tamariʼi ʼia haʼapūai i tō rātou faʼaroʼo i te Faʼaora ʼia ’ore rātou e « ’āueue i te tiʼaturiraʼa o te ʼevanelia » ? (Kolosa 1:23).

Te mau ’ātivite e au

• E ani i te mau tamariʼi ’ia pāpaʼi i te mau hōho’a e faʼahōhoʼa nei i te mau parau mau ’o tā rātou i ʼite i roto i te Kolosa 1:23 ; 2:6–7. E vaiiho ia rātou ’ia faʼaʼite mai i tā rātou mau hōhoʼa i te mau pīahi ʼe ’ia tātara mai i te mau parau mau tā tā rātou mau hōhoʼa e faʼaʼite mai nei.

• E faʼaʼite i te video « Spiritual Whirlwinds [Mau mataʼi pū’āhiohio pae vārua]. » E aha te tahi mau faʼahemaraʼa ʼe mau haʼapiʼiraʼa tumu hape i roto i te ao nei i teie mahana ’o tē nehenehe e haʼaparuparu i tō tātou faʼaroʼo ? E fa’aitoito i te mau tamari’i ’ia pāpa’i i te hō’ē mea tā rātou e nehenehe e rave nō te ha’apūai i tō rātou fa’aro’o ’ia « a’ahia » rātou (Kolosa 2:7) i roto ia Iesu Mesia. E ani ia rātou ’ia pia i te reira i te hō’ē vāhi e ’ite ai rātou i te mau mahana ato’a.

Fa’aitoito i te ha’api’ira’a i te fare

E ani i te mau tamari’i ’ia fa’a’ite i tō rātou ’utuāfare e aha tā rātou i ’apo mai nō ni’a Iesu Mesia. E nehenehe rātou e faʼaʼohipa i te ʼapi ’ātivite nō teie hepetoma ʼaore rā te hōʼē pāpaʼiraʼa moʼa tā rātou i taiʼo i roto i te piha i teie mahana.

Ha’amaita’i i tā tātou ha’api’ira’a

E mea ui māere te mau tamariʼi ʼe e ha’api’i rātou nā roto i te mau ’ohipa ’āpī ’e te rau. E fa’a’ohipa i te mau ’ātivite ’o tē tauturu i te mau tamari’i ’ia hāhaere, ’ia fa’a’ohipa i tō rātou mau ’itetino ato’a, ’ia tuatāpapa ’e ’ia tāmata i te mau mea ’āpī. E nehenehe te mau manaʼo i roto i te « Pāhono i te mau hina’aro o te mau tamari’i ri’i » i te ʼōmuaraʼa o teie buka, e tauturu. (Hi’o ato’a Ha’api’ira’a mai tā te Fa’aora, 25–26.)