e toru vahine e hāhaere ra nā rāpae i te hiero

23–29 nō ’Ātopa

1 ’e 2 Timoteo ; Tito ; Philemona

« ’Ei ha’apa’ora’a rā ’oe nā tei fa’aro’o ra »

I te tahi taime e mea au ’ia rave i tā ’outou tuatāpapara’a pāpa’ira’a mo’a ma te hō’ē uira’a i te ferurira’a, ’aore rā rahi atu ā. E ani i te Vārua ’ia arata’i ’ia ’outou i te mau pāhonora’a ’a rave ai i tā ’outou tuatāpapara’a, ’e ’a pāpa’i i te fa’aurura’a ato’a e tae mai.

Pāpa’i i te mau mana’o e tae mai

I roto i te mau ’episetole tā Paulo i pāpa’i ia Timoteo, ia Tito ’e ia Philemona, tē huru ’ite ri’i ra tātou i te ’ā’au o te hō’ē tāvini a te Fatu. Ta’a ’ē i te tahi atu mau ’episetole i te mau ’āmuira’a, ’ua pāpa’ihia teie mau rata i te tahi ta’ata ta’a ’ē—e mau hoa rahi ’e e mau ’āpiti i roto i te ’ohipa a te Atua—’e mai te huru te tai’ora’a i te reira i te ’āparaura’a i roto e piti ta’ata. Tē ’ite ra tātou ia Paulo i te fa’aitoitora’a ia Timoteo ’e ia Tito, e piti ho’i ta’ata fa’atere ’āmuira’a, i roto i tā rāua ’ohipa tāvinira’a i te ’Ēkālesia. Tē ’ite ra tātou iāna i te tāparura’a i tōna hoa Philemona ’ia fa’a’ore i te hapa o te hoa feiā mo’a ’e ’ia rave maita’i iāna mai te hō’ē taea’e i roto i te ’evanelia. ’Aita te mau parau a Paulo i pāpa’ihia nō tātou, ’e ’aita paha ’oia i mana’o ē, e rave rahi ta’ata tē tai’o i te reira ’āraua’e. Tē ’ite nei rā tātou i roto i teie mau ’episetole i te parau a’o ’e te fa’aitoitora’a nō tātou, ta’a ’ē noa atu tā tātou ’ohipa i roto i te tāvinira’a i te Mesia.

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

’O vai Timoteo ’e ’o Tito ?

’Ua tāvini Timoteo ’e ’o Tito nā muri ia Paulo i roto i te tahi o tōna mau tere misiōnare. I roto i tā rātou ’ohipa, ’ua noa’a mai tō Paulo fa’atura ’e te ti’aturi ia rāua. ’Ua pi’ihia Timoteo i muri mai ’ei ti’a fa’atere nō te ’Ēkālesia i Ephesia, ’e ’o Tito i Kereta. I roto i teie mau ’episetole, ’ua hōro’a Paulo i teie nā feiā fa’atere i te arata’ira’a ’e te fa’aitoitora’a nō ni’a i tā rāua mau hōpoi’a, mai te porora’a i te ’evanelia ’e te pi’ira’a i te mau ta’ata ’ei ’episekōpo.

Hi’o ato’a Arata’i nō te mau pāpa’ira’a mo’a, « ’Episetole a Paulo », « Timoteo », « Tito ».

e piti misiōnare e paraparau ra i te hō’ē ta’ata

« ’Eiaha roa ’ei ta’ata e vahavaha mai i tō ’āpīra’a na, ’ei ha’apa’ora’a rā ’oe nā tei fa’aro’o » (1 Timoteo 4:12).

1 Timoteo 4:10–16

« ’Ei ha’apa’ora’a rā ’oe nā tei fa’aro’o ra »

E mea huru ’āpī Timoteo, ’ua ’ite rā Paulo ē, e nehenehe tāna e riro mai ’ei ti’a fa’atere rahi nō te ’Ēkālesia, noa atu ā tōna ’āpī. E aha te parau a’o tā Paulo i hōro’a ia Timoteo i roto i te 1 Timoteo 4:10–16 ? Nāhea teie parau a’o e tauturu ai ia ’oe ’ia arata’i ia vetahi ’ē i te Fa’aora ’e i tāna ’evanelia ?

Hi’o ato’a Alama 17:11.

2 Timoteo

« E ’ere ho’i i te ’ā’au tauā tā te Atua i hōro’a mai nō tātou, i te ’ā’au itoito rā, ’e te aroha, ’e te ha’apa’o maita’i. »

Tē mana’ohia ra ē, ’o te2 Timoteo te ’episetole hope’a tā Paulo i pāpa’i, ’e e au ē, i ’ite ’oia ē ’ua poto tōna taime i ni’a i te fenua nei (hi’o 2 Timoteo 4:6–8). E aha ra ïa te mana’o o Timoteo i te ’itera’a ē tē fātata ra te taime e ’ere ’oia i tōna fa’aa’o arata’i ’e tōna fa’atere ? E aha tā Paulo i parau nō te fa’aitoito iāna ? E nehenehe ato’a ’oe e tai’o i te reira ma te feruri i tō ’oe iho mau fifi ’e mau mata’u. E aha te poro’i nō te ti’aturira’a ’e te fa’aitoitora’a a te Fatu nō ’outou i roto i te 2 Timoteo ?

Hi’o ato’a Kelly R. Johnson, « Te mana vai noa », Liahona, Nov. 2020, 112–14.

2 Timoteo 3

Maoti te orara’a i te ’evanelia tātou e fāna’o ai i te pāruru i mua i te mau ’ati pae vārua nō te mau mahana hope’a nei.

Tē ora nei tātou i roto i te « ’anotau hope’a » tā Paulo i fa’ahiti, ’e ’ua tae te tau nō te « ’ati rahi » (2 Timoteo 3:1). ’Ia tai’o ’oe i te 2 Timoteo 3, ’a pāpa’i i te mau ’ati o te mau mahana hope’a nei i fa’ahitihia (hi’o ato’a 1 Timoteo 4:1–3) :

E nehenehe ānei tā ’oe e feruri i te tahi mau hi’ora’a nō teie mau ’ati i roto i te ao ’ati a’e ia ’oe—’aore rā i roto i tō ’oe iho orara’a ? E nāhea teie mau ’ati, mai te ta’ata ho’i i fa’ahitihia i roto i te ’īrava 6, i te « fa’aō noa i roto i [tō ’oe] fare, ’e riro atu ra ia [’oe] » ? E aha te parau a’o tā ’oe e ’ite ra i roto i te 2 Timoteo 3, ’e i te tahi ato’a mau vāhi o te ’episetole, ’o tē nehenehe e pāruru ia ’oe ’e tō ’oe ’utuāfare i teie mau ’ati pae vārua ? (hi’o, ’ei hi’ora’a, 1 Timoteo 1:3–11 ; 2 Timoteo 2:15–16 ; Tito 2:1–8).

’O vai Philemona ?

E ta’ata keresetiano ’o Philemona tei fa’afāriuhia i te ’evanelia e Paulo. E tītī tā Philemona, ’o Onesimo te i’oa, tei horo ’ē paha i Roma. I reira Onesimo i te fārereira’a ia Paulo ’e ’ua fa’afāriuhia atu ra i te ’evanelia. ’Ua tono Paulo ia Onesimo ’ia ho’i ma te hō’ē rata e fa’aitoito ra ia Philemona ’ia fāri’i ia Onesimo « ’eiaha rā ’ei tāvini, ’ia hau atu rā ’oia i te tāvini, ’ei taea’e here ra » (Philemona 1:16).

Philemona

Mai te taea’e ’e te tuahine te mau pipi nā Iesu Mesia i ni’a i te tahi ’e te tahi.

’Ia tai’o ’oe i te ’episetole a Paulo ia Philemona ra, ’a feruri e nāhea ’oe e nehenehe ai e fa’a’ohipa i te reira parau a’o i roto i tō ’oe mau tā’amura’a i te ta’ata. Teie i raro nei te tahi mau uira’a tā ’oe e nehenehe e feruri :

• Mau ’īrava 1–7 : E aha tā te mau ta’o ra « hoa rave ’ohipa » ’e « taetaea’e ’aito » e parau nei nō ni’a i te mau tā’amura’a i rotopū i te feiā mo’a ? Ināfea ’oe i te « ’ana’anaea[ra’a] » i te hō’ē taea’e ’aore rā te hō’ē tuahine i roto i te Mesia ?

• Mau ’īrava 8–16 : E aha te aura’a nō te parau « fa’aue » ’e te parau « a’o aroha » ? Nō te aha Paulo i mā’iti ai e a’o aroha ia Philemona ’eiaha rā e fa’aue iāna ? E aha tā Paulo e tīa’i ra e tupu nā roto i te tonora’a ia Onesimo ia Philemona ra ?

• ’Īrava 16 : E aha te aura’a te parau« taea’e [’aore rā tuahine] here […] i te Fatu nei » ? E ta’ata ānei tā ’oe i mātau e tītauhia ’ia fāri’i mai te reira te huru ?

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1 Timoteo 2:9–10.E aha te aura’a te parau « fa’anehenehe […] ma te [’ohipa] maita’i » ? E aha te tahi mau ’ohipa maitata’i tā tō ’outou ’utuāfare e nehenehe e rave i teie hepetoma ? E nehenehe ’outou e hīmene ’āmui i te hō’ē hīmene nō ni’a i te ravera’a i te maita’i, mai te « ’Ana’ana te ’ē’a » (Te mau hīmene, N°137).

1 Timoteo 4:12.Nō te tauturu i te mau melo o te ’utuāfare e fa’atupu i te hina’aro e riro « ’ei ha’apa’ora’a nō tei fa’aro’o ra », e nehenehe e ani ia rātou ’ia pāpa’i i te hōho’a nō te ta’ata tei riro na ’ei hi’ora’a maita’i nō rātou. ’Ua nāhea teie mau ta’ata i te fa’aurura’a ia tātou ’ia pe’e ia Iesu Mesia ? E nehenehe te a’ora’a a te peresideni Thomas S. Monson « ’Ei hi’ora’a ’oe ’e ’ei māramarama » (Liahona, Nov. 2015, 86–88) e hōro’a mai i te tahi mana’o e nāhea i te riro ’ei hi’ora’a nō te ta’ata.

1 Timoteo 6:7–12.I tō ’outou mana’o, nō te aha « ’o te nounou moni ho’i te tumu o te mau ’ino ato’a nei » ? E aha te vāhi ataata nō te rōtahira’a i tō tātou orara’a i ni’a i te moni ’aore rā tā tātou faufa’a ? Nāhea tātou e māuruuru ai i tō tātou mau ha’amaita’ira’a ?

2 Timoteo 3:14–17.’Ia au i teie mau ’īrava, e aha te mau ha’amaita’ira’a o te feiā e ’ite ’e e tuatāpapa i te mau pāpa’ira’a mo’a ? Pēnei a’e e nehenehe te mau melo o te ’utuāfare e fa’a’ite i te tahi mau ’īrava tā rātou i ’ite ē, ’o tei riro ’ei mea « faufa’a ».

Philemona 1:17–21.E aha tā Paulo i ineine e rave nō Onesimo ? E aha te tū’atira’a i te mea tā te Fa’aora i ineine roa e rave ’e i rave ho’i nō tātou ? (Hi’o ato’a 1 Timoteo 2:5–6 ; Te Ha’api’ira’a Tumu ’e te mau Fafaura’a 45:3–5). Nāhea tātou e pe’e ai i te hi’ora’a nō Paulo ’e nō te Fa’aora ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Petite est la lumière en moi », Chants pour les enfants, 96.

Ha’amaita’i i tā tātou ha’api’ira’a

Ha’api’i i te ha’api’ira’a tumu pāpū ’e te ’ōhie. E mea nehenehe te ’evanelia a te Fatu i roto i tōna ’ōhie (hi’o Te Ha’api’ira’a Tumu ’e te mau Fafaura’a 133:57). ’Eiaha e tāmata i te fa’a’ārearea roa i tō ’outou ’utuāfare nā roto i te tahi ha’api’ira’a e tītau rahi i te fa’aineinera’a, e tūtava rā i te ha’api’i i te ha’api’ira’a tumu ateate ’e te ’ōhie (hi’o 1 Timoteo 1:3–7).

E tamari’i e tuatāpapa nei i te mau pāpa’ira’a mo’a

« E mai to tamari’i-ri’i-ra’a mai ā tō ’oe ’ite i te parau mo’a i pāpa’ihia ra, ’o te parau ïa e pa’ari ai ’oe ē tae noa atu i te ora i te fa’aro’o i te Mesia ra ia Iesu » (2 Timoteo 3:15).