te Mesia e ti’a ra ’e te hō’ē tamāhine

Balm of Gilead [Rā’au nō Gileada], nā Annie Henrie

30 nō ’Ātopa–5 nō Novema

Hebera 1–6

Iesu Mesia, te « tumu nō te ora mure ’ore »

Nā te tāpa’opa’ora’a i te mau mana’o a te Vārua e tae mai e tauturu ia ’outou ’ia ’ite e aha tā te Vārua Maita’i e hina’aro ra e ha’api’i ia ’outou. Nā te ’ohipara’a i ni’a i te mau mana’o e tae mai e fa’a’ite i tō ’outou fa’aro’o ē e parau pāpū te reira mau muhumuhu.

Pāpa’i i te mau mana’o e tae mai

E fa’aru’e tātou tāta’itahi i te hō’ē mea nō te fāri’i i te ’evanelia a Iesu Mesia—e peu ’ino ānei, ’aore rā e ti’aturira’a hape, ’aore rā e hoara’a au ’ore, ’aore rā e mea ’ē atu ā. Nō te mau ’Ētene i roto i te ’Ēkālesia keresetiano mātāmua, pinepine te fa’afāriura’a i te fa’aru’era’a i te mau atua hape. Nō te mau Hebera rā (te mau ’āti Iuda) te fa’afāriura’a, mai te peu ’aita i te mea fifi roa, e mea rave ’atā ri’i ïa. Inaha ho’i, e mea poihere rātou i tō rātou mau ti’aturira’a ’e tā rātou mau peu tei a’ahia i roto i te ha’amorira’a i te Atua mau ’e te mau ha’api’ira’a a te mau peropheta, erā ’ē te tauasinira’a matahiti. Teie rā, ’ua ha’api’i te mau ’āpōsetolo ē, ’ua fa’atupuhia te ture a Mose i roto ia Iesu Mesia ’e tē vai ra i teienei te hō’ē ture teitei a’e ’ei fa’aturera’a nō te feiā ti’aturi. E riro ānei ïa ē, ’ua fāri’i tō Hebera i te ha’apa’ora’a keresetiano ra, ’ua fa’aru’e ato’a ïa i tā rātou mau ti’aturira’a mātāmua ’e tō rātou ’ā’ai ? Tē ’imi nei te ’episetole i te mau Hebera ra i te pāhono i teie mau huru uira’a nā roto i te ha’api’ira’a i te ta’ata ē, e mea faufa’a rahi te ture a Mose, te mau peropheta ’e te mau ’ōro’a, e mea faufa’a rahi atu ā rā Iesu Mesia (hi’o Hebera 1:1–4 ; 3:1–6 ; 7:23–28). Inaha ho’i, tē fa’atoro pauroa nei te reira mau mea i ni’a i te Mesia, ma te fa’a’ite pāpū nōna ’ei Tamaiti nā te Atua ’e te Mesia ho’i i parauhia ’e ’o tā te mau ’āti Iuda i tīa’i noa na.

Te fa’afāriura’a, i terā mau mahana mātāmua ra ’e i teie nei mahana, ’o te fa’arirora’a ïa ia Iesu Mesia ’ei tumu nō tā tātou ha’amorira’a ’e nō tō tātou orara’a. ’O te tāpe’a-pāpū-ra’a ïa i te parau mau ’e te fa’aru’era’a i te mau mea e fa’anevaneva ia tātou mai ni’a atu iāna, ’oia ho’i te « tumu nō te ora mure ’ore nō te feiā ato’a e fa’aro’o iāna ra » (Hebera 5:9).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Nā vai i pāpa’i i te ’episetole i te mau Hebera ra ?

Tē uiui ra te mana’o o te tahi mau ’aivāna’a ē, nā Paulo mau ānei i pāpa’i i te ’episetole i te mau Hebera ra. E mea ’ē ri’i te huru pāpa’ira’a o te Hebera i te tahi atu mau rata a Paulo, ’e ’aita ho’i te mau pūharara’a mātāmua nō te reira i fa’ahiti i te i’oa o te ta’ata pāpa’i. Nō te mea rā ē, e mea tū’ati te mau mana’o i roto i te Hebera i te tahi atu mau ha’api’ira’a a Paulo, ’ua fāri’i te rahira’a o te feiā mo’a, mai te tahi atu mau keresetiano ē, ’ua tauturu a’e ’o Paulo i te pāpa’i i teie ’episetole.

Hi’o ato’a Arata’i nō te mau pāpa’ira’a mo’a, « ’Episetole a Paulo. »

Hebera 1–5

’O Iesu Mesia « te hōho’a mau » o te Metua i te ao ra.

E rave rahi ’āti Iuda tei tāfifi i te fāri’i ia Iesu Mesia ’ei Tamaiti a te Atua. ’A hi’o na rā tē nāhea ra te ’episetole i te mau Hebera ra i te fa’a’ite pāpū nōna. ’Ei hi’ora’a, ’ia tai’o ’oe i nā pene mātāmua e pae nō te Hebera, e nehenehe tā ’oe e hāmani i te hō’ē tāpura nō te mau tōro’a o Iesu Mesia, tōna mau ti’ara’a, tōna huru ’e tāna mau ’ohipa tā ’oe e ’ite i te fa’ahitira’ahia. E aha tā teie mau mea e ha’api’i nei nō ni’a i te Fa’aora ? E aha tā teie mau mea e ha’api’i nei nō ni’a i te Metua i te ao ra ?

E aha tā te fa’ahitira’a a Elder Jeffrey R. Holland i muri nei e ha’amāramarama nei ia ’oe nō ni’a i te mau ha’api’ira’a i roto i teie mau pene ? « I haere mai [Iesu] nō te ha’amaita’i a’e […] i tō te ta’ata nei ferurira’a i te huru o te Atua, ’e nō te ani mai ia rātou ’ia here i tō rātou Metua i te ao ra mai tāna i here mai ia rātou […] Nō reira, i tō te Mesia fa’a’amura’a i te feiā po’ia, i te fa’aorara’a i tei ma’ihia, i te ’āvaura’a i te feiā ha’avare, i te tāparura’a i te ta’ata ’ia vai te fa’aro’o, tē fa’a’ite ra ïa te Mesia ia tātou i te haere’a o te Metua » (« The Grandeur of God », Liahona, Nov. 2003, 72).

Hebera 2:9–18 ; 4:12–16 ; 5:7–8

’Ua māuiui Iesu Mesia i te mau mea ato’a ’ia ti’a iāna ’ia ta’a ’e ’ia tauturu iā’u e māuiui nei.

Tē vai ra ānei terā mana’o ē, e nehenehe tā ’oe e « fa’afātata noa atu […] i te terono o te aroha mau ra » ’e ’ia tītau i te aroha ra ? (Hebera 4:16). Hō’ē poro’i i roto i te ’episetole i te mau Hebera ra, ’oia ho’i ïa, noa atu ā tā tātou mau hara ’e mau paruparu, e nehenehe e ha’afātata i te Atua ’e e tae i tōna ra aroha. E aha tā ’oe e ’ite ra i roto i te Hebera 2:9–18 ; 4:12–16 ; 5:7–8 ’o tē ha’apūai nei i tō ’oe ti’aturi ē, e tauturu mai Iesu Mesia ia ’oe i roto i tō ’oe mau tāmatara’a tāhuti nei ? E nehenehe e pāpa’i i roto i te hō’ē buka tāmahana i te mana’o nō tō ’oe ferurira’a ’e nō tō ’oe ’ā’au, nō ni’a i te mea tā te Fa’aora i rave nō ’oe.

Hi’o ato’a Mosia 3:7–11 ; Alama 7:11–13 ; 34 ; Matthew S. Holland, « Te hōro’a maita’i roa a te Tamaiti », Liahona, Nov. 2020, 45–47.

Hebera 3:7–4:11

E noa’a te mau ha’amaita’ira’a a te Atua i te mau ta’ata ’o tē ’ore « e fa’aīīta i tō [rātou] ’ā’au. »

Nā roto i te fa’ati’a-fa’ahou-ra’a i te ’ā’amu nō ’Īserā’ela tahito ra, ’ua mana’o Paulo e tauturu i te mau ’āti Iuda ’eiaha rātou ’ia hape mai tō rātou mau tupuna ra—i te pāto’ira’a i te mau ha’amaita’ira’a a te Atua nō tō rātou ti’aturi-’ore-ra’a. (E nehenehe tā ’oe e tai’o i te ’ā’amu tā Paulo i fa’ahiti i roto i te Nūmera 14:1–12, 26–35.)

E feruri nāhea te Hebera 3:7–4:11 e nehenehe ai e tano ia ’oe. Nō te reira, e nehenehe e feruri i te tahi mau uira’a mai teie :

• ’Ua nāhea tō ’Īserā’ela i te fa’ao’ō’ora’a i te Fatu ? (hi’o Hebera 3:8–11). E aha te mau hope’ara’a nō te ’ā’au fa’aīīta ?

• Ināfea ra tō’u vaiihora’a i tō’u ’ā’au ’ia fa’aīīta ? E mau ha’amaita’ira’a ānei tā te Atua e hina’aro e hōro’a iā’u ’o tā’u e fāri’i ’ore nei nō te ’erera’a vau i te fa’aro’o ?

• E aha tā’u e nehenehe e rave nō te fa’atupu i te ’ā’au marū ’e te tātarahapa ? (hi’o Etera 4:15 ; Maseli 3:5–6 ; Alama 5:14–15).

Hi’o ato’a 1 Nephi 2:16 ; 15:6–11 ; Iakoba 1:7–8 ; Alama 12:33–36 ; Neill F. Marriott, « Auraro tō tātou ’ā’au i te Atua », Liahona, Nov. 2015, 30–32.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Hebera 1:8–9.E aha tā Iesu i rave nō te fa’a’ite ē e mea au nāna te parauti’a ’e e mea au ’ore nāna te ’ohipa ’ino ? Mai te peu e mau hia’ai parauti’a ’ore tō tātou, e aha tā tātou e nehenehe e rave nō te taui i te reira ?

Hebera 2:1–4.E nehenehe ānei e feruri i te hō’ē ha’api’ira’a tao’a ’ei tauturura’a i te ’utuāfare ’ia māramarama e aha te aura’a te tāpe’a-māite-ra’a i ni’a i te mau parau mau o te ’evanelia « tā tātou i fa’aro’o a’enei » ? E nehenehe e fa’ahōho’a i te reira ma te hō’ē tao’a huru pa’ari ’ia tāpe’a i te rima. E aha te tū’atira’a i roto i tā tātou tauto’ora’a e tāpe’a i tō tātou ’itera’a pāpū ’e te harura’a ’e te tāpe’ara’a i te reira tao’a ? Nāhea tātou e ha’apāpū ai ē e’ita « te mau parau tā tātou i fa’aro’o a’enei » ’ia « ma’iri noa atu » i te ātea ia tātou ? (’īrava 1).

Hebera 2:9–10.Nō te tuatāpapa i te parau nō « te [ra’atira] o tō rātou ora », e nehenehe e ha’amata nā ni’a i te parau ra’atira, e aha tāna e rave. E aha te aura’a nō terā parau ē ora ? Mai te aha te huru e ra’atira Iesu Mesia nō tātou ’e nō tō tātou ora ?

Hebera 5:1–5.E nehenehe teie mau ’īrava e tauturu ia ’outou ’ia tuatāpapa i te aura’a nō terā parau ē pi’ihia e te Atua e te hō’ē ta’ata e ha’amanara’a tōna. E aha te ha’api’ira’a tā tātou e nehenehe e ’apo mai i roto i te hi’ora’a o Iesu Mesia nō ni’a i te fāri’ira’a ’e te ravera’a i te mau pi’ira’a ?

te fa’atōro’ara’a Mose ia Aarona

« ’Aore roa e ta’ata e rave noa i teie nei tura nōna iho, maori rā ’o tei parauhia e te Atua, mai ia Aarona ra » (Hebera 5:4). Moses Calls Aaron to the Ministry [Tē pi’i ra Mose ia Aarona i te tāvinira’a], nā Harry Anderson

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Hina’aro vau ia ’oe », Te mau hīmene, N°50.

Ha’amaita’i i tā’u iho tuatāpapara’a pāpa’ira’a mo’a

Tāmata i te tahi mau arata’ira’a ’ē. ’Eiaha na e vai noa i ni’a i te hō’ē noa huru tuatāpapara’a pāpa’ira’a mo’a, e feruri rā i te tahi atu mau rāve’a. Nō te tahi atu mau mana’o, hi’o « Mau mana’o nō te ha’amaita’i i tā ’oe iho tuatāpapara’a pāpa’ira’a mo’a » i te ha’amatara’a nō teie mātēria.

Iesu Mesia

Light of the World [Māramarama o te ao]], nā Walter Rane