Tē poro ra Iesu Mesia i te ’evanelia i roto i te ao vārua

Christ Preaching in the Spirit World [Tē poro ra ’o Iesu Mesia i te ’evanelia i roto i te Ao Vārua], nā Robert T. Barrett

20–26 nō Novema

1 ’e 2 Petero

« E ’oa’oa na i te ’oa’oa e’ita e ti’a ’ia parau ra, ’e te ’ī ho’i i te maita’i »

’Ia tai’o ’outou i te ’Episetole a Petero, e riro te mau mana’o pae vārua e tae mai. ’A pāpa’i ’oi’oi roa i te reira « ’a vai noa ai [’outou] i roto i te Vārua ra » (Te Ha’api’ira’a Tumu ’e te mau Fafaura’a 76:80) ’ia ti’a ia ’outou ’ia pāpa’i pāpū i te mea tā te Atua i ha’api’i ia ’outou.

Pāpa’i i te mau mana’o e tae mai

I muri noa iho i tōna ti’afa’ahoura’a, ’ua parau tohu te Fa’aora i te hō’ē mea tei fa’atapitapi i te mana’o o Petero. ’Ua tohu oia ē, e maratirihia Petero nō tōna fa’aro’o, ’e e hōpoihia ’oia « i te vāhi hina’aro-’ore-hia e [’oia] ’ei fa’a’itera’a atu iāna i te huru o tōna pohe e maita’i ai te Atua » (Ioane 21:18–19). Tau matahiti i muri mai, i tō Petero pāpa’ira’a i teie mau ’episetole, ’ua ’ite ’oia ē tē fātata mai ra terā maratiri i tohuhia : « ’Ua fātata vau i te ha’apae i teie nei ti’ahapa, tā tō tātou Fatu tā Iesu Mesia i fa’a’ite mai iā’u ra » (2 Petero 1:14). Noa atu rā te reira, ’aita tāna mau parau i ’ī i te mata’u ’e te mana’o ha’aparuparu. ’Aita, ’ua ha’api’i rā ’oia i te feiā mo’a ’ia « rahi [te] ’oa’oa », noa atu ā « taiā poto noa ā [rātou] i te mau pohe ’ē’ē ra ». ’Ua a’o ’oia ia rātou ’ia ha’amana’o ē, e riro « te tāmatara’a o tō [rātou] fa’aro’o » i te fa’ahope’a atu « ’ei ha’amaita’i, ’e ’ei tura, ’e ’ei maita’i i te fāra’a mai o Iesu Mesia ra » ’e i « te ora o tō [rātou] mau vārua » (1 Petero 1:6–7, 9). Pāpū ē e mea tāmāhanahana te fa’aro’o o Petero i terā nau feiā mo’a mātāmua, mai te feiā mo’a i teienei, ’oia ho’i « tē rave ato’a ra [tātou] i te mau pohe o te Mesia ; ’e ’ia fa’a’itehia mai tōna hanahana, ’ia hiemate’oa [tātou] ma te ’oa’oa rahi » (1 Petero 4:13).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

1 Petero 1:3–9 ; 2:19–24 ; 3:14–17 ; 4:12–19

E nehenehe tā’u e ’ite i te ’oa’oa i te taime tāmatara’a ’e te māuiui.

Te pu’e tau i muri mai i te fa’asātaurora’a o te Mesia e ’ere ïa i te mea ’ōhie nō te hō’ē keresetiano, e tē fa’a’ite nei te ’episetole mātāmua a Petero i te reira. I roto i nā pene mātāmua e maha, e ’ite ’oe i te mau ta’o ’e te mau parau e fa’ata’a nei i te mau tāfifira’a : taiā, pohe, ’oto, ’e hāmani ’ino ’ū’ana (hi’o 1 Petero 1:6 ; 2:19 ; 4:12–13). E ’ite ato’a rā ’oe i te tahi mau ta’o nō te ’oa’oa—e nehenehe e tāpura mai i te mea tā ’oe e ’ite mai. ’Ei hi’ora’a, ’ia tai’o ’oe i te 1 Petero 1:3–9 ; 2:19–24 ; 3:14–17 ; ’e 4:12–19, e aha tē fa’atupu i te tīa’ira’a ē e nehenehe e noa’a te ’oa’oa noa atu ā te vaira’a fifi ?

E nehenehe ato’a e tai’o i te a’ora’a a te peresideni Russell M. Nelson, « Te ’oa’oa ’e te oraora pae vārua » (Liahona, Nov. 2016, 81–84) ma te hi’o mai i te mau tū’atira’a i roto i te ha’api’ira’a a Petero ’e te ha’api’ira’a a te peresideni Nelson. E aha te mea i roto i te fa’anahora’a nō te fa’aorara’a ’e te ’evanelia a Iesu Mesia e fa’atupu i tō ’oe ’oa’oa ?

Hi’o ato’a Ricardo P. Giménez, « Te ’imira’a i te ha’apūra’a i roto i te mau vero o te orara’a », Liahona, Mē 2020, 101–3.

1 Petero 3:18–20 ; 4:1–6

Tē porohia nei te ’evanelia i te feiā pohe ’ia ha’avā-ti’a-hia rātou.

’Ia tae i te hō’ē mahana e ti’a te ta’ata tāta’itahi i mua i te ha’avāra’a nō te « fā’i […] i te parau iāna, i tei ineine i te ha’avā mai i tei ora ’e tei pohe » (1 Petero 4:5). Nāhea pa’i te Atua e ha’avā tano ai i te mau ta’ata ato’a inaha e mea ta’a ’ē tō terā ’e terā ta’ata fāna’ora’a ’ia māramarama ’e ’ia ora i te ’evanelia ? ’A hi’o i te huru pāhonora’a a te ha’api’ira’a tumu tā Petero i ha’api’i i roto i te 1 Petero 3:18–20 ; 4:6 i teie uira’a. E nāhea teie mau ’īrava i te ha’apūai i tō ’oe fa’aro’o i te maita’i ’e te parauti’a o te Atua ?

Nō te tuatāpapa rahi atu ā i te reira ha’api’ira’a tumu, ’a hi’o i Te Ha’api’ira’a Tumu ’e te mau Fafaura’a 138, e heheura’a tā te peresideni Joseph F. Smith i fāri’i i tōna ferurira’a i te mau pāpa’ira’a a Petero. E aha te tahi atu ā mau parau mau tā te peresideni Smith i ’apo mai ?

2 Petero 1:1–11

Nā roto i te mana o Iesu Mesia e ti’a ai iā’u ’ia fa’atupu i tō’u nātura hanahana.

’Ua tupu a’enei ānei te mana’o ē, e’ita e nehenehe e riro mai ia Iesu Mesia ’e e’ita e nehenehe e fa’atupu i tōna hīro’a i roto iā’u ? ’Ua hōro’a Elder Robert D. Hales i teie mana’o fa’aitoito nō ni’a i te huru e fa’atupu i te hīro’a o te Mesia : « Te mau huru o te Fa’aora […] e mau huru […] tei rara’ahia te tahi i ni’a i te tahi, ’āpitihia te tahi i te tahi, ’o tē hotu i roto ia tātou ma te ’ohipa ’āmui. E nehenehe e parau ē, e’ita e roa’a ia tātou te hō’ē huru Mesia ma te ’ore e roa’a ato’a mai ’e e fa’auru ato’a ho’i i te tahi atu mau pu’era’a. ’Ia pa’ari te hō’ē huru [Mesia], e pa’ari ato’a te tahi atu e rave rahi » (« ’Ia riro ’ei pipi nā tō tātou Fatu ’o Iesu Mesia », Liahona, Mē 2017, 46).

e hōho’a tei ha’une-māite-hia

Te huru Mesia tāta’itahi tā tātou e fa’atupu, e tauturu ïa ia tātou ’ia ha’une i te hō’ē vauvau pae vārua nō te ti’ara’a pipi.

’Ia tai’o ’oe i te 2 Petero 1:1–11, ’a feruri i te mau huru nō te « nātura hanahana » i tāpurahia i roto i teie mau īrava. ’Ia au i te mau ’ohipa i tupu nō ’oe, mai te aha te huru te reira i te « rara’ahia », mai tā Elder Hales i fa’ata’a mai ? E nāhea te reira i te hāmanira’ahia nā ni’a i te tahi ’e te tahi ? E aha atu ā te ha’api’ira’a tā ’oe e ’apo nei i roto i teie mau ’īrava nō ni’a i te ’ohipa tau maoro nō te rirora’a mai te Mesia te huru ?

E nehenehe ato’a e feruri i te « maita’i rahi roa i parauhia mai ra » a te Atua i tōna feiā mo’a—’e tae noa atu ia ’oe (2 Petero 1:4). E nehenehe te a’ora’a a Elder David A. Bednar « Te maita’i rahi roa i parauhia mai ra » (Liahona, Nov. 2017, 90–93) e tauturu ia ’oe ’ia māramarama e aha te reira mau mea i parauhia mai ’e e nāhea i te fāri’i i te reira.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1 Petero 2:5–10.’Ia tai’o ’outou i teie mau ’īrava ’e tō ’outou ’utuāfare, e nehenehe e fa’a’ohipa i te tahi ’ōfa’i ’ia ti’a i te mau melo o te ’utuāfare ’ia ’ite i te hi’ora’a nō te mau ha’api’ira’a a Petero ē, ’o te Fa’aora tō tātou « ’ōfa’i tihi ». Mai te aha te huru tātou ’oia ato’a ïa te mau « ’ōfa’i ora ra » tā te Atua e fa’a’ohipa nei nō te patu i tōna bāsileia ? E aha te ha’api’ira’a tā tātou e ’apo nei mai roto ia Petero nō ni’a i te Fa’aora ’e tā tātou hōpoi’a i roto i tōna bāsileia ? E aha te poro’i a Petero i tō ’outou ’utuāfare ?

1 Petero 3:8–17.Nāhea tātou e « vai ineine [ai] ’ia parau atu i te ta’ata » ’o tē ani mai ia tātou nō ni’a i tō tātou fa’aro’o ? E au mai paha te ’utuāfare ’ia ha’uti ta’ata ora i te mau huru taime e haere mai te ta’ata e uiui ia rātou nō ni’a i te ’evanelia.

1 Petero 3:18–20 ; 4:6.E aha tā te ’utuāfare e nehenehe e rave ’ia vai te mana’o tū’ati i tō ’outou mau tupuna ? E nehenehe paha ïa e fa’ahanahana i te mahana fānaura’a o te mau tupuna pohe nā roto i te fa’aineinera’a i tā rātou mā’a au roa a’e, nā roto i te māta’ita’ira’a i te mau hōho’a ’aore rā te fa’ati’ara’a i tō rātou ’ā’amu. Mai te peu e ti’a, e nehenehe ato’a tā ’outou e rave i te mau ’ōro’a nō tō ’outou mau tupuna i roto i te hiero (nō te tauturu, haere i ni’a ia FamilySearch.org).

2 Petero 1:16–21.I roto i teie mau ’īrava, tē fa’aha’amana’o nei Petero i te feiā mo’a i te ’ohipa i tupu i ni’a i te mou’a nō te Fa’ahuru-’ē-ra’a, tei reira ato’a ’oia (hi’o ato’a Mataio 17:1–9). E aha te ha’api’ira’a tā tātou e ’apo nei i roto i teie mau ’īrava nō ni’a i te mau ha’api’ira’a a te mau peropheta ? (hi’o ato’a Te Ha’api’ira’a Tumu ’e te mau Fafaura’a 1:38). E aha te mea e noa’a ai te ti’aturira’a e pe’e i tō tātou peropheta i tō tātou nei ’anotau ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Ma généalogie », Chants pour les enfants, 100.

Ha’amaita’i i tā tātou ha’api’ira’a

« ’Ia vai ineine ā ». E nehenehe te mau taime ’ōpua-’ore-hia nō te ha’api’i i te fare e tae vave mai ’e e reva vave atu, nō reira e mea faufa’a roa ’ia rave mai i te reira mau taime ’ia tupu ana’e mai. Nāhea ’outou e nehenehe ai e tūtava ’ia « vai ineine ā » nō te ha’api’i i te mau melo o te ’utuāfare i te mau parau mau o te ’evanelia, ’e ’ia fa’a’ite atu i « te ti’aturi i roto ia ’outou na » (1 Petero 3:15), ’ia tupu ana’e mai te taime nō te ha’api’i atu ? (Hiʼo Ha’api’ira’a mai tā te Fa’aora, 16.)

Tē ha’api’i ra Petero i te hō’ē pupu ta’ata

Noa atu ā tē fa’aruru ra Petero i te hāmani-’ino-ra’a ’e te pāto’ira’a, ’ua vai ’āueue ’ore noa ’oia i roto i tōna ’itera’a pāpū nō te Mesia.