Perfect Love [Te aroha maita’i roa], nā Del Parson

27 nō Novema–3 nō Tītema

1–3 Ioane ; Iuda

« E aroha ho’i te Atua »

’Ia tai’o ’outou i te mau ’Episetole a Ioane ’e a Iuda, ’a ’imi i te fa’aurura’a nō ni’a i te huru ’outou e fa’a’ite ai i tō ’outou here i te Atua. Pāpa’i i te reira mau mana’o e tae mai ’e ’a rave atu i te reira.

Pāpa’i i te mau mana’o e tae mai

I te pāpa’ira’a Ioane ’e Iuda i tā rāua mau ’episetole, tē ha’amata a’ena ra te ha’api’ira’a tumu hape i te arata’i i te feiā mo’a e rave rahi i roto i te tāivara’a. ’Ua uiui roa ato’a vetahi mau ’orometua ha’avare ē, e parau mau ānei ’ua « haere ta’ata mai » Iesu Mesia (hi’o, ’ei hi’ora’a, 1 Ioane 4:1–3 ; 2 Ioane 1:7). E aha pa’i tā te hō’ē ti’a fa’atere nō te ’Ēkālesia e nehenehe e rave i terā huru taime ? ’Ua pāhono atu te ’āpōsetolo Ioane ma te fa’a’ite i tōna iho ’itera’a nō te Fa’aora : « ’O te ’itera’a pāpū teie tā mātou e hōro’a nei nō tei vai i te mātāmua ra, ’o tā mātou i fa’aro’o a’enei, ’o tā mātou i ’ite a’enei i tō mātou mata, ’o tā mātou i hi’o pāpū atu ’e ’o tā mātou i ’ōmiri noa i tō mātou rima, nō te Logo ra o te ora » (’Īritira’a a Iosepha Semita, 1 Ioane 1:1). ’Ei reira tō Ioane ha’api’ira’a i te ta’ata nō ni’a i te here : te here o te Atua ia tātou ’e te here tei tītau-roa-hia ia tātou ’ia fa’atupu nōna ’e nō tāna mau tamari’i ato’a. Inaha e ’ite ato’a ho’i ’o Ioane nō te reira. I ’ite ’oia iho i te here o te Fa’aora (hi’o Ioane 13:23 ; 20:2), ’e i hina’aro ho’i ’oia i te feiā mo’a ’ia ’ite ato’a i te reira here. E mea tītau-ato’a-hia te ’itera’a pāpū ’e te mau ha’api’ira’a a Ioane nō ni’a i te here i teie mahana, inaha, tē fē’a’a nei te ta’ata i te fa’aro’o ia Iesu Mesia ’e ’ua pu’e noa te mau ha’api’ira’a hape. E nehenehe te tai’ora’a i te mau ’episetole a Ioane e tauturu ia tātou ’ia fa’aruru i te mau ’ati nō teie ’anotau ma te itoito, inaha « ’aore o te aroha ra e mata’u ; e pe’e te mata’u i te aroha ti’a mau ra » (1 Ioane 4:18).

Mau mana’o nō tā’u iho tuatāpapara’a pāpa’ira’a mo’a

1 Ioane ; 2 Ioane

E māramarama te Atua ’e e here ho’i.

’Āhani e mā’iti ’oe i te hō’ē ta’o ’aore rā e piti ta’o nō te fa’a’ite i te parau nō te Atua, e aha ïa te reira ? I roto i tāna mau ’episetole, e mea pinepine tō Ioane fa’a’ohipara’a i nā ta’o « māramarama » ’e « aroha » (hi’o ’ei hi’ora’a, 1 Ioane 1:5 ; 2:8–11 ; 3:16, 23–24 ; 4:7–21). ’Ia tai’o ’oe i nā ’episetole mātāmua e piti a Ioane, ’a feruri i te mau ’ohipa i tupu nō Ioane nō ni’a i te māramarama ’e te here o te Fa’aora. ’Ei hi’ora’a, ’a hi’o i te ha’api’ira’a tā Ioane i ’apo mai i roto i te mau ha’api’ira’a a Iesu i roto i te Ioane 3:16–17 ; 12:35–36, 46 ; 15:9–14 ; 19:25–27. Tē ’ite ra ānei ’oe i te mau tū’atira’a i rotopū i teie mau ha’api’ira’a ’e te mau ha’api’ira’a i roto i te 1 Ioane nō ni’a i te māramarama ’e te here o te Atua ? E aha te mau ’ohipa i tupu nō ’oe i ’ite ai ’oe ē, e māramarama ’e e here te Atua ?

1 Ioane 2–4 ; 2 Ioane

« Tē aroha nei tātou ia tātou ihora, tē pārahi nei te Atua i roto ia tātou. »

E ’ite ato’a mai ’oe i te mau parau ra « vai » ’e « pārahi » i roto i te mau ’episetole a Ioane. ’A hi’o mai i teie nau parau, i roto iho ā rā i te 1 Ioane 2–4 ’e te 2 Ioane. I tō ’oe mana’o, e aha te aura’a ’ia « vai » ’e ’ia « pārahi » i roto i te Atua ’e tāna ha’api’ira’a tumu ? (hi’o 2 Ioane 1:9). E aha te aura’a ia ’oe ’ia « vai » ’aore rā ’ia « pārahi » te Atua i roto ia tātou ?

1 Ioane 2:24–3:3

E nehenehe tā’u e riro mai ia Iesu Mesia te huru.

E mea teitei roa ānei nō ’oe te fā ’ia riro mai te Mesia te huru ? E feruri i te parau fa’aitoito a Ioane : « E au mau tamari’i ra, e ’ati atu ā ’outou iāna ; ’ia itoito tātou ’ia fā mai ’oia ra […] e riro tātou mai iāna ato’a te huru » (1 Ioane 2:28 ; 3:2). E aha tā ’oe e ’ite ra i roto i te 1 Ioane 2:24–3:3 ’o tē fa’atupu i te ti’aturi ’e te tāmāhanahana ’ei pipi nā Iesu Mesia ? ’Ia tuatāpapa ’oe i te mau ’episetole a Ioane, e hi’o i te tahi atu mau parau tumu ’aore rā mau parau a’o ’o tē nehenehe e tauturu ia ’oe i roto i tā ’oe tauto’ora’a nō te riro rahi atu ā mai te Mesia te huru.

Hi’o ato’a Moroni 7:48 ; Te Ha’api’ira’a Tumu ’e te mau Fafaura’a 88:67–68 ; Scott D. Whiting, « Riro mai iāna te huru », Liahona, Nov. 2020, 12–14.

1 Ioane 4:12

’Aita ānei ā « e ta’ata i hi’o i te Atua » ?

Tē ha’apāpū nei te ’Īritira’a a Iosepha Semita nō 1 Ioane 4:12 mai teie « ’Aita e ta’ata i hi’o atu i te Atua, maori rā ’o rātou ’o tei ti’aturi iāna » (hi’o ato’a Ioane 6:46 ; 3 Ioane 1:11). Tē vai nei i roto i te mau pāpa’ira’a mo’a e rave rahi taime tō te Atua te Metua fa’a’itera’a iāna i te ta’ata fa’aro’o, mai ia Ioane ato’a (hi’o Apokalupo 4 ; hi’o ato’a Te ’Ohipa 7:55–56 ; 1 Nephi 1:8 ; Te Ha’api’ira’a Tumu ’e te mau Fafaura’a 76:23 ; Iosepha Semita—’Ā’amu 1:16–17).

1 Ioane 5

’Ia fa’a’ohipa vau i te fa’aro’o ia Iesu Mesia ’e ’ia fānau-fa’ahou-hia vau, e ti’a ïa iā’u ’ia upo’oti’a i ni’a i te ao.

’Ia tai’o ’oe i te 1 Ioane 5, e ’imi i te mea e ti’a ia tātou ’ia rave nō te upo’oti’a i ni’a i te ao, ’ia roa’a te ora mure ’ore. E aha ra te upo’oti’ara’a i ni’a i te ao i roto i tō ’oe orara’a ? E nehenehe ato’a e ’ite mai i te pāhonora’a ’e te tahi mau mana’o i roto i te a’ora’a a Elder NeilL. Andersen « ’Ia upo’oti’a i ni’a i te ao » (Liahona, Mē 2017, 58–62).

Iuda 1

« [Fa’atupu] ia ’outou iho i tō ’outou fa’aro’o mo’a rahi ra ».

E aha tā te Iuda 1:10–19 e ha’api’i nei ia ’oe nō ni’a i te feiā e ’aro nei i te Atua ’e i tāna ’ohipa ? E aha te ha’api’ira’a tā ’oe e ’apo nei i roto i te mau ’īrava 20–25 nō ni’a i te tāpe’ara’a i tō ’oe fa’aro’o ia Iesu Mesia ’ei mea pūai noa ?

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1 Ioane 2:8–11.’Ei tauturura’a i te ’utuāfare ’ia feruri i te mau ha’api’ira’a a Ioane, e ha’aputuputu ia ’outou i roto i te hō’ē piha pōiri ’ia ti’a i te mau melo o te ’utuāfare ’ia ’ite i te ta’a-’ē-ra’a i roto i te haerera’a nā roto i te « pōiri » ’e te haerera’a nā roto i te « māramarama ». E nāhea te tāiroiro i te fa’ahaere ia tātou nā roto i te pōiri ’a turori atu ai ? E nāhea te herera’a ia vetahi ’ē i te fa’atae mai i te māramarama i roto i tō tātou orara’a ?

1 Ioane 3:21–22.E aha te mea i roto i teie mau ’īrava e fa’arahi ai i tō tātou « ti’aturi » i ni’a i te Atua ’e i roto i tō tātou ’aravihi ’ia fāri’i i te pāhonora’a i tā tātou mau pure ?

Nā te ha’apa’ora’a i te mau fa’auera’a a te Atua e tauturu ia tātou ’ia upo’oti’a i ni’a i te ao.

1 Ioane 5:2–3.E mau fa’auera’a ānei tā tātou e hi’o nei ’ei mea « teimaha » ’e te mea fifi ’ia pe’e ? E nāhea tō tātou here i te Atua i te taui i tō tātou hi’ora’a i tāna mau fa’auera’a ?

3 Ioane 1:4.E aha te aura’a nō tē parau « ha’apa’o […] i te parau mau » ? E nehenehe e rave i terā taime nō te parau i te mau melo o te ’utuāfare e aha tā ’outou i ’ite ia rātou i te ha’apa’ora’a i te parau mau, ’ei reira e ’āparau ai nō te ’oa’oa nō te reira. E au paha te mau melo o te ’utuāfare ’ia pāpa’i ’aore rā ’ia pāpa’i hōho’a, i ni’a i te tahi hōho’a ’āvae pāpie, i te mau parau mau tā rātou i ’apo mai, ’a fa’a’ohipa ai i te reira nō te hāmani i te hō’ē ē’a tā te ’utuāfare e pe’e āmui.

Iuda 1:3–4.Tē vai ra ānei te mau ataatara’a pae vārua tei « fa’aō ’ōmo’e » mai i roto i tō tātou orara’a ’e tō tātou ’utuāfare ? (Iuda 1:4). Nāhea tātou e pe’e ai i te a’ora’a a Iuda e « mārō māite atu i te fa’aro’o » ’e e pāto’i i teie mau ’ati ? (Iuda 1:3). E aha tā ’outou e nehenehe e rave nō te ha’apāpū mai ē, « ’ia rahi mai ā te hau, ’e te [here] » i roto i tō tātou ’utuāfare ? (Iuda 1:2).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « C’est l’amour », Chants pour les enfants, 76-77.

Ha’amaita’i i tā’u iho tuatāpapara’a pāpa’ira’a mo’a

’Ite mai i te here o te Atua. ’Ua ha’api’i te peresideni M.Russell Ballard ē : « [Te] ’evanelia, e ’evanelia ïa nō te here—te here nō te Atua ’e te here nō te tahi ’e te tahi » (« God’s Love for His Children », Ensign, Mē 1988, 59). ’Ia tai’o ’outou i te mau pāpa’ira’a mo’a, ’a pāpa’i i te mau fa’a’itera’a nō te here o te Atua.

Walk with Me [Haere mai nā muri iho iā’u], nā Greg K. Olsen