e ’aiū fānau ’āpī

Little Lamb [Fānau’a māmoe iti], nā Jenedy Paige

18–24 nō Tītema

Noera

« E parau maita’i ’o te riro ’ei ’oa’oara’a rahi »

’A feruri e nāhea te ferurira’a i te fānaura’a ’e te misiōni a te Fa’aora e tauturu ai i te fa’atupu i te mana’o hau ’e te mo’a i roto i te pu’e tau Noera.

Pāpa’i i te mau mana’o e tae mai

Nō te aha te fānaura’a o te hō’ē ’aiū e fa’atupu ai i taua ’oa’oara’a rahi ra ? Pēnei a’e e tāpa’o te ’aiū ’āpī nō te tīa’ira’a. Tē vai nei te tahi mea ta’a ’ē i roto i te hō’ē orara’a ha’amata ’āpī ma te ananahi huru rau, ’o tē tītau manihini nei ia tātou ’ia feruri e aha te ananahi nō terā tamari’i ’e e aha te mau ’ohipa fa’ahiahia tāna e rave atu. ’Aita e hi’ora’a tano a’e nō te reira maori rā te fānaura’a o te Tamaiti a te Atua, ’o Iesu Mesia. ’Aita e ti’aturira’a rahi a’e i tu’uhia i ni’a i te hō’ē tamari’i, ’e ’aita a’enei e tama i fānauhia tei tu’u-rahi-hia te parau fafau i ni’a iāna.

I te anira’a te melahi i te mau tīa’i māmoe ’ia haere e ’imi i te ’aiū fānau ’āpī i roto i te phātene, ’ua hōro’a ato’a ’oia i te hō’ē poro’i nō ni’a i terā tamari’i. E poro’i nō te tīa’ira’a ē—’ua tae mai teie ’aiū i ni’a i te fenua nei nō te rave i te hō’ē misiōni mo’a. ’Ua haere te mau tīa’i māmoe ’e « ’ua fa’a’ite hua atu ra […] ’e te feiā ato’a i fa’aro’o ra, māere ana’e ihora i te mau parau i parauhia mai ’e te mau tīa’i māmoe ia rātou ra. Ha’apa’o māite atu ra rā Maria i taua mau parau ra, i te feruri-māite-ra’a i roto i tōna ’ā’au » (Luka 2:17–19). Pēnei a’e e mea maita’i ’ia pe’e i te hi’ora’a o Maria i teie Noera : ’oia ho’i e feruri māite i roto i tō ’outou ’ā’au i te mau ha’api’ira’a tā ’outou i ’apo mai nō ni’a i te Fa’aora i teie matahiti. ’Ua nāhea ’oia i te fa’atupura’a i tāna misiōni fa’aora i roto i te mau fa’ati’ara’a tā ’outou i tai’o ? ’E te mea faufa’a roa atu, ’ua nāhea tāna misiōni i te tauira’a i tō ’outou orara’a ? ’Ei reira paha ïa e tae mai ai te fa’aurura’a e pe’e i te hi’ora’a o te mau tīa’i māmoe : e nāhea ’outou ’ia « fa’a’ite hua atu » i te mea tā Iesu Mesia i rave nō ’outou ?

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 1:18–25 ; 2:1–12 ; Luka 1:26–38 ; 2:1–20

’Ua ti’a ia Iesu Mesia ’ia fānauhia i rotopū ia tātou i ni’a i te fenua nei.

Noa atu pa’i ’ua tai’o ’aore rā ’ua fa’aro’o ’oe i te ’ā’amu nō te fānaura’a o Iesu Mesia e rave rahi taime, ’a tuatāpapa i te reira i teie taime ma teie mana’o i te ferurira’a : « E ’ere te Noera i te fa’ahanahana-noa-ra’a i te huru taera’a mai o Iesu i ni’a i te fenua nei, ’o te ’itera’a ato’a rā ’o vai ’oia—’o tō tātou Fatu ’e Fa’aora Iesu Mesia—’e nō te aha ’oia i tae mai ai » (Craig C. Christensen, « The Fulness of the Story of Christmas » [Purera’a Noera a te Peresidenira’a Mātāmua, 4 nō Tītema 2016], broadcasts.ChurchofJesusChrist.org).

E aha tā ’oe i ’ite nō ni’a ia Iesu Mesia hou tōna fānaura’a ? (hi’o, ’ei hi’ora’a, Ioane 17:5 ; Mosia 3:5 ; Te Ha’api’ira’a Tumu ’e te mau Fafaura’a 76:13–14, 20–24 ; Mose 4:2). I teie ’ite, e aha tē taui i roto i tō ’oe mana’o ’a tai’o ai i te parau nō tōna fānaura’a ?

E aha tā ’oe i ’ite nō ni’a i te tumu Iesu Mesia i haere mai ai i ni’a i te fenua nei ? (hi’o ’ei hi’ora’a, Luka 4:16–21 ; Ioane 3:16–17 ; 3 Nephi 27:13–16 ; Te Ha’api’ira’a Tumu ’e te mau Fafaura’a 20:20–28). I teie ’ite, e aha tē taui i roto i tō ’oe mana’o nō ni’a i te Fa’aora ? E aha tē taui i roto i tō ’oe orara’a ?

Hi’o ato’a 2 Korinetia 8:9 ; Hebera 2:7–18 ; 1 Nephi 11:13–33 ; Alama 7:10–13 ; « The Nativity [Te fānaura’a o Iesu] » (video), ChurchofJesusChrist.org.

1 Korinetia 15:21–26 ; Kolosa 1:12–22 ; 1 Petero 2:21–25

’Ua rave fa’aoti Iesu Mesia i tāna misiōni ’e maoti ho’i te reira e rāve’a tā’u ’ia noa’a te ora mure ’ore.

Noa atu ā te mau temeio tei hā’ati i te ’ā’amu nō te fānaura’a o te Mesia, e fānaura’a mai te tahi noa atu ïa tamari’i tōna ’āhani ’aita terā ’ohipa rahi tāna i rave a muri a’e i roto i tōna orara’a. Mai tā te peresideni Gordon B. Hinckley i parau : « Te ’aiū ra Iesu nō Betelehema, e ’aiū noa ïa mai te tahi atu pēpe ’āhani ’aita te Mesia tāra’ehara i Getesemane ’e i Kalavari, ’e tae noa atu te parau hura nō te Ti’afa’ahoura’a » (« The Wondrous and True Story of Christmas », Ensign, Tītema 2000, 5).

tē tūturi ra Iesu i roto i te ’ō nō Getesemane

Gethsemane [Getesemane], nā J. Kirk Richards

E ’itehia te mau fa’a’itera’a nō te misiōni hanahana a te Fa’aora ’e nō tōna here rahi i te ta’ata i roto i te tā’āto’ara’a o te Faufa’a ’Āpī. E aha te mau ’īrava ’aore rā te mau fa’ati’ara’a tā ’oe e ha’amana’o ra ? E nehenehe e hōho’i i roto i teie mātēria ’aore rā i roto i tā ’oe buka tuatāpapara’a nō te hi’o fa’ahou i te tahi mau mana’o i tae mai ’e ’o tā ’oe i pāpa’i. E nehenehe ato’a e tai’o i te 1 Korinetia 15:21–26 ; Kolosa 1:12–22 ; 1 Petero 2:21–25 ’a feruri atu ai ’ua nāhea te Fa’aora ’e tāna ’ohipa i te ha’amaita’ira’a i tō ’oe orara’a. E aha tā ’oe e mana’o ra e taui i roto i tō ’oe orara’a ? E nāhea ’oe ’ia tītau i te mana o te Fa’aora ?

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 1:18–25 ; 2:1–12 ; Luka 1:26–38 ; 2:1–20.Nāhea ’outou te ’utuāfare e fa’ahanahana ai i te fānaura’a o Iesu Mesia ? Teie te tahi mana’o iti, ’aore rā e nehenehe ’outou e tu’u mai i tō ’outou iho mana’o :

• Tai’o ’aore rā ha’uti ta’ata ora i te tahi tuha’a o te ’ā’amu nō te Fānaura’a.

• Māta’ita’i i te video « The Christ Child [Te tama Mesia] » (ChurchofJesusChrist.org).

• E hi’o i te tahi mau mātēria i roto i te tuha’a « Iesu Mesia » o te Vaira’a buka ’evanelia, terā iho ā rā tuha’a « Tōna mahana fānaura’a (Noera) ».

• E māta’ita’i i te hō’ē purera’a Noera a te Peresidenira’a Mātāmua (broadcasts.ChurchofJesusChrist.org).

• E hīmene ’āmui i te mau hīmene Noera, ’aore rā e mā’iti i te tahi ta’ata tupu ’aore rā te tahi hoa nō te hāhaere ia rātou ’e nō te hīmene nō rātou (hi’o Te mau hīmene, N°118–28).

• Haere e tauturu i te tahi ta’ata.

• E ani i te mau melo o te ’utuāfare ’ia hi’o i te tahi parau ta’a ’ē i roto i te ’ā’amu nō te Fānaura’a ’ia noa’a mai te tahi mana’o nō te mau fa’anehenehera’a e nehenehe e hāmani ’ei ha’amana’ora’a ia Iesu Mesia.

1 Korinetia 15:21–26 ; Kolosa 1:12–22 ; 1 Petero 2:21–25.Nō te aha tātou e māuruuru nei i te fānaura’a o Iesu Mesia ? E aha te mau hōro’a tāna i hōro’a mai ia tātou ? Nāhea tātou e fa’a’ite ai iāna i tō tātou māuruuru ? E nehenehe te ’utuāfare e hīmene i te hō’ē hīmene e parau ra nō tāna misiōni, mai te hīmene « Il envoya son Fils aimé » (Chants pour les enfants, 20–21).

« Te Mesia ora : Te ’itera’a pāpū o te mau ’āpōsetolo. »Mai te mea ’ua hina’aro ’outou e tauturu i te ’utuāfare ’ia rōtahi i ni’a i te Fa’aora i te pu’e tau Noera, pēnei a’e e nehenehe tā ’outou e fa’ata’a i te tahi taime nō te tai’o ’e nō te tuatāpapa ’āmui i « Te Mesia ora : Te ’itera’a pāpū o te mau ’āpōsetolo » (ChurchofJesusChrist.org). Pēnei a’e e nehenehe e tāmau ’ā’au i te tahi mau tuha’a nō « Te Mesia Ora » ’aore rā e ’imi i te mau fa’a’itera’a nō te orara’a o te Fa’aora i roto i te Faufa’a ’Āpī e turu nei i te mau parau i roto i Te Mesia Ora. E nehenehe ato’a tā ’outou e ani i te melo tāta’itahi o te ’utuāfare ’ia pāpa’i i tōna iho ’itera’a pāpū nō Iesu Mesia, ’e mai te peu e fa’auruhia, e tai’o i te reira i te ’utuāfare.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Un jour dans une humble étable », Chants pour les enfants, 25.

Ha’amaita’i i tā’u iho tuatāpapara’a pāpa’ira’a mo’a

’Imi ia Iesu Mesia. Tē ha’api’i nei te mau pāpa’ira’a mo’a ia tātou ē, tē fa’a’ite pāpū nei te mau mea ato’a nō Iesu Mesia (hi’o Mose 6:62–63), nō reira e ’imi tātou iāna i roto i te mau mea ato’a. ’Ia tai’o ’oe i te mau pā’pa’ira’a mo’a, e nehenehe e tāpa’o ’aore rā e fa’a’ū i te mau ’īrava e ha’api’i nei nō ni’a iāna. Rave i te tahi taime i te mau mahana nā mua atu i te Noera nō te hi’o i te mau mea ’ati a’e ia ’oe ’o tē fa’a’ite pāpū nei nō Iesu Mesia.

’O Maria, Iosepha ’e te mau tīa’i māmoe ’e te ’aiū Iesu

The Nativity [Te Fānaura’a], nā Brian Call