fanau’a māmoe i ni’a i te ’aihere

4–10 nō Tītema

Apokalupo 1–5

« Te hanahana, ’e te mana… ’ei te Arenio, ē a muri noa atu »

E nehenehe e pāpa’i i tā ’outou mau uira’a nō ni’a i te mea tā ’outou e tai’o i roto i te Apokalupo. I muri iho, e nehenehe e mā’imi i te pāhonora’a i tā ’outou mau uira’a ’aore rā e ’āparau i te reira ’e te tahi melo o te ’utuāfare ’aore rā i roto i te piha ha’api’ira’a i te fare purera’a.

Pāpa’i i te mau mana’o e tae mai

’Ua fifi a’ena ānei ’outou i te fa’a’ite atu i te ta’ata i te mea tā ’outou i putapū i roto i te hō’ē ’ohipa pae vārua pūai mau ? ’Aita paha e tano roa te mau parau tā tātou i mātau nō te fa’a’ite i te mana’o o te ’ā’au ’e te mana’o e tae mai. ’O te tumu paha ïa Ioane i fa’a’ohipa rahi ai i te mau tāpa’o ’e te mau fa’ahōho’ara’a nō te fa’a’ite i tāna heheura’a hanahana i fāri’i. ’Ua nehenehe noa iāna e parau noa ē, ’ua ’ite ’oia ia Iesu Mesia, nō te tauturu rā ia tātou ’ia māramarama i te ’ohipa i tupu, ’ua vauvau ’oia i te hōho’a o te Fa’aora ma te fa’a’ohipa i te mau parau mai teie : « Mai te ura auahi ra ’ōna mata », « te hō’ē ’o’e ’o’oi mata piti ra mai roto atu i tōna vaha » ’e « tōna mata mai te mahana ra ïa e ’ana’ana mai i te avatea ra » (Apokalupo 1:14–16). ’Ia tai’o ’outou i te buka Apukalupo, e tāmata i te ’apo mai i te mau poro’i tā Ioane i hina’aro ’ia ’outou ’ia ’apo mai ’e ’ia putapū, noa atu ā ’aita ’outou e ta’a ra i te aura’a o te mau tāpa’o ato’a. Nō te aha pa’i ’oia i fa’aau ai i te mau ’āmuira’a o te ’Ēkālesia i te mau lamepa ra, ia Sātane i te hō’ē teni ’e ia Iesu Mesia i te hō’ē ’ārenio ? I te hope’a roa, ’aita i tītauhia ’ia māramarama i te mau tāpa’o ato’a i roto i te Apokalupo nō te māramarama i tō te reira mau tumu parau rahi, mai te tumu parau rahi hope ra ē : ’o Iesu Mesia ’e tōna mau ta’ata ’āpe’e tē upo’oti’a i ni’a i te mau bāsileia o te ta’ata ’e o Sātane.

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Tē ha’api’i nei te ’ōrama a Ioane nō ni’a i te fa’anahora’a a te Metua i te ao ra nō te fa’aora i tāna mau tamari’i.

E riro paha ē, e mea fifi ’ia māramarama i te buka Apokalupo, ’eiaha rā e ha’aparuparu i te mana’o. Pēnei a’e i teie parau fafau a Ioane ’oe e tāmau noa ai i te tāmata : « E ao tō rātou ’o tē tai’o, ’e tō te feiā e fa’aro’o ’e e māramarama i te mau parau nō teie tohura’a, ’e tē ha’apa’o i taua mau mea i pāpa’ihia i roto ra, nō te mea ’ua fātata roa te taime nō te taera’a mai o te Fatu » (’Īritira’a a Iosepha Semita, Apokalupo 1:3, reta tei fa’ahuru-’ē-hia).

Hō’ē rāve’a nō te tuatāpapa i te Apokalupo, ’o te hi’ora’a ïa i te mau tū’atira’a i te fa’anahora’a nō te fa’aorara’a. E nehenehe teie hi’ora’a rere ā manu nō te tā’āto’ara’a e tauturu ia ’oe :

• Tē fa’ata’a nei te mau pene 5 ’e 12 i te mau ’ohipa i te orara’a hou i te tāhuti nei.

• Tē fa’ata’a nei te mau pene 6–11, 13–14, 16–19 i te orara’a tāhuti nei ’e te mau ’ohipa i tupu i roto i te ’ā’ai o te fenua nei.

• Tē fa’ata’a nei te mau pene 2–3, 15, 20–22 i te Ha’avāra’a hope’a ’e te hanahana e tīa’i nei i te feiā ha’apa’o maita’i.

’A tai’o ai ’oe, ’a ui ia ’oe iho : « E aha tā teie e ha’api’i mai nei nō ni’a i te fa’anahora’a a te Atua ? E aha tā te Atua i rave nō te tauturu iā’u ’ia upo’oti’a i ni’a i te ’ino ’e ’ia ho’i iāna ra ? E aha tāna mau parau fafau i te feiā ha’apa’o maita’i ? »

E mea maita’i ato’a ’ia ’ite ē, tē fa’ata’a nei Te Ha’api’ira’a Tumu ’e te mau Fafaura’a 77 i te tahi o te mau tāpa’o nō te Apokalupo. Hau atu, tē ha’apāpū nei te ’Īritira’a a Iosepha Semita i te mau ’īrava e rave rahi o te Apokalupo, ’a hi’o pinepine ïa i te Arata’i nō te mau pāpa’ira’a mo’a.

Hi’o ato’a Arata’i nō te mau pāpa’ira’a mo’a, « Ioane, tamaiti a Zebede », « Apokalupo a Ioane ».

Apokalupo 1

’O Iesu Mesia te Tamaiti ora a te Atua ora.

Tē fa’a’ite nei te pene mātāmua nō te Apokalupo i te fāra’a Iesu Mesia ia Ioane i roto i te hō’ē ’ōrama. Pēnei a’e e nehenehe tā ’oe e hāmani i te hō’ē tāpura nō te mau mea ato’a tā teie pene e parau nei nō ni’a ia Iesu Mesia, mai te parau ē ’o vai ’oia, e aha tāna e rave ra nō tātou ’e mai te aha ’oia.

Te tahi ha’api’ira’a tā ’oe e ’apo mai, nō roto mai ïa i te mau tāpa’o. ’A feruri e aha tā te Fatu e tāmata nei i te ha’api’i ia ’oe nō ni’a iāna nā roto i teie mau tāpa’o. ’Ei hi’ora’a, tē pi’i nei te Fa’aora iāna iho « te mātāmeha’i ’e te fa’ahope’a » ’e « te mātāmua ’e te fa’ahope’a ». I tō ’oe mana’o, nō te aha e aura’a faufa’a rahi tō teie mau pi’ira’a ? E aha tā teie mau pi’ira’a e ha’api’i nei nō ni’a i te Fa’aora ?

Apokalupo 2–3

’Ua ’ite roa Iesu Mesia iā’u ’e e tauturu mai ’oia ’ia upo’oti’a i tā’u mau tāmatara’a.

Tē fa’a’ite nei te mau parau a te Fa’aora i roto i te Apokalupo 2–3 ē, ’ua ta’a iāna te mau manuiara’a ’e te mau fifi hō’ē roa a te mau ’āma’a tāta’itahi o te ’Ēkālesia i te ’anotau o Ioane ra. ’Ua parau ’ārue ’oia i te mau tauto’ora’a a te feiā mo’a ’e ’ua fa’aara ato’a ia rātou i te mau mea tei tītauhia ia rātou ’ia taui. E aha te ha’api’ira’a tā ’oe e ’apo nei i roto i te parau ’āruera’a ’e te parau fa’aarara’a a te Fa’aora ?

’Ua ta’a ato’a i te Fa’aora tō ’oe mau manuiara’a ’e tō ’oe mau fifi, ’e tē hina’aro nei ’oia ’ia tauturu ia ’oe. E hi’o maita’i na i te mau parau fafau tāna e parau nei i te feiā e upo’oti’a mai. E aha te mana’o e tae mai nō ni’a i te reira mau parau fafau ? E aha te mea tā te Fatu e hina’aro nei ia ’oe ’ia upo’oti’a mai ? E aha te mea tā ’oe e nehenehe e rave nō te fāri’i i tāna tauturu ?

Apokalupo 4–5

Ia Iesu Mesia ana’e i oti ai te fa’anahora’a a te Metua i te ao ra.

E aha te ha’api’ira’a tā ’oe e ’apo nei nō ni’a i te Metua i te ao ra i roto i te Apokalupo 4 ’e nō ni’a ia Iesu Mesia i roto i te Apokalupo 5 ? ’A feruri na e aha ra ïa tō tātou mana’o i te ’itera’a tātou pā’āto’a ē maoti Iesu Mesia (te « Ārenio ») e oti ai te fa’anahora’a a te Metua i te ao ra (’ua noa’a i te Fa’aora ’ia « heheu i taua buka ra, ’e te vāhi ho’i i nā tāpa’o e hitu ra » [Apokalupo 5:5]). Nō te aha nā Iesu Mesia noa e nehenehe e rave i te reira ? Nāhea ’oe e fa’a’ite ai i tō ’oe fa’aro’o iāna ’ei Fa’aora nō ’oe ?

Hi’o ato’a Ioba 38:4–7 ; Te Ha’api’ira’a Tumu ’e te mau Fafaura’a 77:1–7.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Apokalupo 1:20.Nō te aha Iesu i fa’aau ai i tāna ’Ēkālesia i te mau lamepa ? (hi’o Mataio 5:14–16). E hīmene i te hō’ē hīmene nō ni’a i te huru tātou e riro ai mai te hō’ē māramarama i ni’a i te hō’ē lamepa, mai te hīmene ra « Petite est la lumière en moi » (Chants pour les enfants, 96).

Apokalupo 2–3.’Āhani pa’i e hōro’a Ioane i te hō’ē poro’i i tō ’outou ’utuāfare mai tāna i hōro’a i te mau ’ēkālesia i tōna ra tau. E aha tāna e parau mai ē, tē haere maita’i ra ? Nāhea ’outou e nehenehe ai e ha’amaita’i atu ā ?

Apokalupo 3:15–16.I muri iho i te tai’ora’a i teie mau ’īrava, e nehenehe te ’utuāfare e inu i te hō’ē mea pūmāhanahana noa, e mea au a’e rā ’ia ve’ave’a maita’i ’aore rā ’ia to’eto’e maita’i. E aha te aura’a te parau pūmāhanahana noa i te pae vārua ?

Apokalupo 3:20.’A fa’a’ite i te hōho’a nō te Fa’aora e pātōtō ra i te ’ūputa (hi’o i te hope’a o teie arata’i ha’api’ira’a) ’a tai’o ai te ’utuāfare i te Apokalupo 3:20. Nō te aha Iesu e pātōtō ai, ’aita rā i tomo noa mai i roto ? E nehenehe te mau melo o te ’utuāfare e fa’a’ohu nō te pātōtō i te ’ōpani. I muri iho e hōro’a mai te tahi atu ta’ata o te ’utuāfare i te hō’ē rāve’a nō te « ’īriti i te ’ōpani ra » i te Fa’aora, ’e e tu’uhia terā melo e pātōtō ra ’ia tomo mai. E aha te mana’o e tupu ’ia ti’a mai te Fa’aora i roto i tō tātou fare ?

Apokalupo 4:10–11.E aha te aura’a te parau e ha’amori i te Metua i te ao ra ? E aha te mea tā tātou i ’ite nōna ’o tē fa’atupu i te hina’aro ’ia ha’amori iāna ?

Apokalupo 5:6, 12–13.Nō te aha Iesu Mesia i parauhia ai te « ’Ārenio » ? E aha tā teie pi’ira’a e ha’api’i nei ia tātou nō ni’a iāna ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Iesu tei fānauhia ra », Te mau hīmene, N°113.

Ha’amaita’i i tā tātou ha’api’ira’a

Fa’aitoito i te mau uira’a. E fa’a’itera’a te mau uira’a nō te ineinera’a te mau melo o te ’utuāfare ’ia ’apo mai ’e ’ia fa’ahi’o mai tē nāhea ra rātou i te pāhono i te mea tē ha’api’ihia ra rātou. Ha’api’i i tō ’outou ’utuāfare e nāhea i te ’imi i te mau pāhonora’a i roto i te mau pāpa’ira’a mo’a. (Hi’o Ha’api’ira’a mai tā te Fa’aora, 25–26.)

Tē pātōtō ra te Mesia i te ’ōpani

Let Him In [’A tu’u iāna ’ia tomo mai], nā Greg K. Olsen