« 4–10 nō Tītema. ’Āpōkalupo 1–5 : ‘Te hanahana, ’e te mana, ’ei… te ’Ārenio ē a muri noa atu’ », Mai, pe’e mai—nō te Paraimere : Faufa’a ’Āpī 2023 (2021)
« 4–10 nō Tītema. ’Āpōkalupo 1–5 », Mai, pe’e mai—nō te Paraimere : 2023
4–10 nō Titema
’Āpōkalupo 1–5
«Te hanahana, ’e te mana, ’ei… te ’Ārenio ē a muri noa atu »
E nehenehe te buka ’Āpōkalupo e riro ’ei buka fifi nō te mau tamari’i ’ia hāro’aro’a, tē vai atoʼa ra rā i reira te haʼapiʼiraʼa tumu faufa’a ’e te nehenehe ʼe te ʼōhie.
Tītau i te mana’o
E ani i te mau tamariʼi ’ia faʼaʼite mai e aha tō rātou huru mai te mea e ʼite rātou ia Iesu Mesia i roto i te hōʼē ʼōrama. E ani ia rātou ’ia fa’a’ite mai i te mau mea ato’a tā rātou i ’ite nō ni’a i te ’ōrama a Ioane nō ni’a ia Iesu i roto i te buka ’Āpōkalupo.
Ha’api’i i te ha’api’ira’a tumu : Te mau tamari’i ’āpī
E nehenehe au e ’ana’ana i te māramarama o te Fa’aora.
I roto i te ’Āpōkalupo 1:20, ’ua fa’aau te Fa’aora i tāna ’Ēkālesia i te mau vaira’a mōrī. E tauturu i te mau tamari’i ’ia hāro’aro’a ē, e nehenehe rātou e ’ana’ana i te māramarama o te Fa’aora nā roto i te orara’a i tāna mau ha’api’ira’a.
Te mau ’ātivite e au
-
’A fa’a’ite i te mau tamari’i i te hōho’a nō te mau tao’a e hōro’a i te māramarama, mai te mōrī, te mōrī hinu, ’e te mahana. ’A tai’o ai ’oe i « Nā lamepa e hitu tā ’oe e hi’o nei, ’oia nā ’ēkalesia e hitu ra » (’Āpōkalupo 1:20), ’a ani i te mau tamari’i ’ia fa’atoro i te rima i ni’a i te hōho’a o te māramarama i fa’ahitihia i roto i teie īrava. E tauturu i te mau tamari’i ’ia ’āparau e nāhea tātou, ’ei melo nō te ’Ēkālesia a Iesu, e nehenehe ai e riro mai te māramarama o te hō’ē mōrī hinu—’ei hi’ora’a, ’ia rave ana’e tātou i te mau mea maita’i nō vetahi ’ē.
-
E hīmene i te hō’ē hīmene nō ni’a i te rirora’a ’ei māramarama nō vetahi ’ē, mai te hīmene « Brillant pour lui » (Chants pour les enfants, 38). E fa’a’ite i te mau rāve’a ’a ’ite ai ’oe i te mau tamari’i i te orara’a i te ’evanelia a Iesu Mesia ’e te rirora’a ’ei māramarama nō te feiā ’ati a’e ia rātou. Fa’a’ite nāhea te rirora’a ’ei māramarama nō vetahi ’ē i tauturura’a ia ’oe ’ia ha’afātata atu ā i tō tātou Metua i te ao ra ’e ia Iesu Mesia.
E nehenehe au e ani ia Iesu Mesia ’ia tomo mai i roto i tō’u orara’a.
E nehenehe te parabole nō Iesu e tiʼa ra i te ʼūputa ʼe tē pātoto ra, e tauturu i te mau tamariʼi ʼia hāro’aro’a ē, tē hinaʼaro nei ʼoia i te haʼafātata atu ia rātou.
Te mau ’ātivite e au
-
’Ia tai’o ana’e ’oe i te ’Āpōkalupo 3:20, e fa’a’ite i te hōho’a o te Fa’aora i te ’ūputa i roto i te arata’i ha’api’ira’a nō teie hepetoma o te Mai, pe’e mai—nō te ta’ata hō’ē ’e te ’utuāfare. E ani i te mau tamariʼi ’ia feruri ē, tē pātōtō ra Iesu i te ʼūputa o tō rātou fare. ’A vaiiho ia rātou ’ia paraparau mai i te mau mea ta rātou e rave.
-
E ani i te mau tamariʼi ʼia fa’ati’a mai i te hō’ē taime ’ua tīaʼi rātou i te tahi taʼata ’o tē haere mai i tō rātou fare ʼe tō rātou ʼoaʼoa rahi ’ia ʼite atu iāna. E aha te huru te tīaʼiraʼa i taua taʼata ra ʼia pātōtō i te ’ōpani ? ’E mai te mea eʼita roa atu tātou e vaiiho i taua taʼata ra ’ia tomo mai ? E taiʼo i te ’Āpōkalupo 3:20, ʼe e vaiiho i te mau tamariʼi, te tahi i muri i te tahi, ’ia tāpeʼa i te hōʼē hōhoʼa nō Iesu ’e ’ia ha’avare pātōtō i ni’a i te ʼōpani. E nehenehe te tahi atu mau pīahi e ha’avare ’īriti i te ʼopani. E aha tā tātou e nehenehe e rave nō te vaiiho ia Iesu ’ia tāpiri mai ia tātou, noa atu eʼita e nehenehe ia tātou ʼia ʼite atu iāna ?
ʼO Iesu Mesia anaʼe te taʼata tiʼamā nō te riro ʼei Faʼaora nōʼu.
ʼUa haʼapiʼi mai ’o Ioane mai roto mai i tāna ʼōrama ē ’o Iesu Mesia anaʼe (’o te ʼārenio ïa) ’o tē nehenehe e riro ʼei Faʼaora nō tātou ʼe ’o tē nehenehe e faʼatupu i te ʼōpuaraʼa a tō tātou Metua (’o te buka ïa tei tāʼatihia).
Te mau ’ātivite e au
-
Hou te ha’api’ira’a, e pū’ohu i te hō’ē Buka hōho’a nō te ’evanelia ma te fa’a’ohipa i te pāpie ’aore rā te taura. Ma te faʼaʼohipa i te tahi mau parau rahi i roto i te ’Āpōkalupo 5:1–10, e faʼati’a i te ʼōrama tā Ioane i ʼite. E faʼaʼite atu i te buka i te mau tamariʼi, ʼe e parau atu ia rātou ē hōʼē anaʼe rāveʼa nō te ʼīriti i te buka ’o te ʼimiraʼa ïa i te hōhoʼa nō Iesu tā ʼoe i huna i roto i te piha. ’Ia ’itehia ia rātou te hōho’a, e ’īriti i te buka ’e e fa’a’ite i te mau tamari’i i te tahi mau hōho’a i roto i te buka ’o tē fa’ahōho’a ra i te mau ha’amaita’ira’a e roa’a maoti te tāra’ehara a Iesu Mesia (mai te hō’ē hiero, te bāpetizora’a ’e te mau ’utuāfare). E faʼaʼite pāpū atu ē ’o te Faʼaora anaʼe te taʼata e nehenehe e faʼatupu i taua mau mea ra.
-
E haʼapoto i te ʼōrama tei faʼaʼitehia i roto i te Apokalupo 5:1–10, ʼe e ani i te mau tamariʼi ʼia haʼuti mai i te mea tā Ioane ʼe tā te tahi atu mau taʼata i ʼite i roto i te mau tuhaʼa rau o te ʼōrama. ʼEi hiʼoraʼa, e nehenehe rātou e ha’avare taʼi ’ia ʼore anaʼe e nehenehe i te hōʼē ’ia ʼīriti i te buka, ʼaore rā ʼia poupou ’ia ʼīriti anaʼe te Faʼaora i te reira.
Ha’api’i i te ha’api’ira’a tumu : Te mau tamari’i pa’ari a’e
Mai te mea e ha’apa’o vau i te ’evanelia a te Fa’aora, e fāri’i au i te mau ha’amaita’ira’a rarahi i te ra’i ra.
E aha te aura’a nō ’oe ’ia riro ’ei mea « pūmahana, e ’ere i te mea to’eto’e e ’ere i te mea ve’ave’a » ? ’A feruri i te mau rāve’a nō te tauturu i te mau tamari’i ’eiaha ’ia pae i te pūmahana—’ia ’ana’anatae rā i tā rātou fafaura’a i te Fa’aora ’e i tāna ’evanelia.
Te mau ’ātivite e au
-
E tai’o ’āmui i te ’Āpōkalupo 3:5, 12, 21, ’e fa’ata’a i te mau parau ato’a ’aita te mau tamari’i i ’ite. E aha te aura’a « ’o tē riro te rē » ? E ani i te mau tamari’i ’ia pāpa’i hōho’a i te hō’ē o te mau ha’amaita’ira’a tei fafauhia i roto i teie mau ’īrava ’e ’ia fa’a’ite i te reira i tō te piha ha’api’ira’a.
-
E tai’o ’āmui i te ’Āpōkalupo 3:15–16. ’A ani i te mau tamari’i ’ia paraparau mai nō ni’a i te mau mea tano a’e ’e ’aore rā, e mea au a’e ’ia ve’ave’a (mai te tihopu) ’aore rā, te mea au a’e ’ia to’eto’e (mai te pape pa’ari ice cream). Nāhea te rirora’a ’ei mea pūmahana i te Fa’aora i te fa’a’ere ia tātou i te mau ha’amaita’ira’a i fafauhia i roto i te mau ’īrava 5, 12, ’e 21 ?
-
’A pāpa’i i ni’a i te tāpura pūmahana, ’e te tahi mau ta’o hō’ē ā aura’a, mai te ’ā’au fē’a’a piti, pae ’ore, ’aore rā peu ’ore. E fa’a’ohipa i teie mau ta’o nō te tauturu i te mau tamari’i ’ia hāro’aro’a nō te aha ’aita te Fatu e hina’aro ia tātou ’ia riro ’ei feiā pūmahana. E aha te mau parau tā tātou e nehenehe e feruri nō te fa’ata’a i te huru tāna e hina’aro ’ia riro mai tātou ? E fa’a’ite nō te aha ’oe e hina’aro ai e fafau hope roa i te Fa’aora, ’e e ani i te mau tamari’i ’ia fa’a’ite ato’a mai i tō rātou mau mana’o.
E nehenehe au e māʼiti ʼia fāri’i ia Iesu Mesia ʼei tuha’a nō tōʼu oraraʼa.
Nāhea ’oe ʼia tauturu i tā ’oe mau pīahi ʼia ʼīriti i tō rātou ʼāʼau ʼe tō rātou oraraʼa i te mana ʼe i te fa’aurura’a a Iesu Mesia ?
Te mau ’ātivite e au
-
’Ia tai’o ana’e ’oe i te ’Āpōkalupo 3:20, e fa’a’ite i te hōho’a o te Fa’aora i te ’ūputa i roto i te arata’i ha’api’ira’a nō teie hepetoma o te Mai, pe’e mai—nō te ta’ata hō’ē ’e te ’utuāfare. Nō te tauturu i te mau tamari’i ʼia ʼīriti mai i te auraʼa o te hōhoʼa, e ani ia rātou ’ia ’ohipa ’āpipiti nō te pāhono i te mau uiraʼa mai teie : I tō ’oe manaʼo, nō te aha Iesu e pātōtō ai i te ʼūputa ? Nō te aha ʼaita e tāpe’araʼa ʼopani i rāpae’au i te ʼōpani ? E aha te auraʼa ’ia vaiiho ’ia Iesu ʼia tomo mai i roto i tō tātou oraraʼa ?
-
E ani i te mau tamariʼi ’ia pāpaʼi i niʼa i te tāpura i te mau rāveʼa rau nō te « ʼīriti i te ʼopani » ia Iesu. Teie te tahi mau hi’ora’a, te tāvinira’a ïa ia vetahi ’ē, te tai’ora’a i te mau pāpa’ira’a mo’a, te ha’apa’ora’a i te mau fafaura’a tā tātou e rave i te bāpetizora’a ’e te ravera’a i te ’ōro’a mo’a.
ʼO Iesu Mesia anaʼe te taʼata tiʼamā nō te riro ʼei Faʼaora nōʼu.
Te ʼōrama tei faʼata’ahia i roto i te ’Āpōkalupo 5 tē ha’api’i mai nei te reira ē, ’o Iesu Mesia anaʼe tei tiʼamā nō te rave i te Tāraʼehara ʼe ʼia faʼaʼora ia tātou i te hara.
Te mau ’ātivite e au
-
E ani i te mau tamariʼi ’ia faʼatiʼa mai i te hōʼē taime ʼua hinaʼaro rātou i te tahi taʼata nō te rave i te tahi mea eʼita e nehenehe ia rātou ʼia rave nō rātou iho. E ani ia rātou ʼia taiʼo i te ’Āpōkalupo 5:1–10 ʼe ’ia ’imi e aha tei tītauhia ʼia rave, ’o te hōʼē noa rā taʼata ta’a ’ē tē nehenehe e rave (ʼa fa’ata’a atu ē ’o Iesu Mesia te ʼĀrēnio, ʼe tē fa’ahōho’a nei te buka i te ʼōpuaraʼa a te Atua). E aha tā Iesu i rave nō tātou tē ʼore roa e nehenehe i te hō’ē noa atu ’ia rave ?
-
Fa’aitoito i te ha’api’ira’a i te fare
E ani i te mau tamariʼi ’ia faʼaʼite i tō rātou ʼutuāfare te mau rāveʼa e nehenehe ai rātou ʼia ani i te fa’aurura’a o te Faʼaora i roto i tō rātou ʼutuāfare.
Ha’amaita’i i tā tātou ha’api’ira’a
Fa’aitoito i te fa’aturara’a. Te hō’ē mea faufa’a roa nō te fa’aturara’a, ’o te ferurira’a ïa nō ni’a i tō tātou Metua i te ao ra ’e ia Iesu Mesia. E fa’aha’amana’o ’oe i te mau tamari’i ’ia fa’atura nā roto i te hīmene-marū-ra’a ’e ’aore rā, te hīmenemenera’a i te hō’ē hīmene, ’e ’aore rā, te fa’a’itera’a i te hō’ē hōho’a nō Iesu.