« 27 nō Novema–3 nō Tītema. 1–3 Ioane ; Iuda : ‘E aroha hoʼi te Atua’ », Mai, pe’e mai—nō te Paraimere : Faufa’a ’Āpī 2023 (2021)
« 27 nō Novema–3 nō Tītema. 1–3 Ioane ; Iuda », Mai, pe’e mai—nō te Paraimere : 2023
Perfect Love [Te aroha maita’i roa], nā Del Parson
27 nō Novema–3 nō Tītema
1–3 Ioane ; Iuda
« E aroha hoʼi te Atua »
Tē haʼapiʼi mai nei te mau Episetole a Ioane ’e a Iuda nō ni’a i te aroha ’e te māramarama o tō tātou Metua i te ao ra. ’A tuatāpapa ai ’oe i teie hepetoma, e feruri nō te aha tā ’oe mau pīahi e hinaʼaro ai i tōna māramarama ʼe te here i roto i tō rātou oraraʼa. E haʼamanaʼo i te hiʼo atu i te mau ’ātivite atoʼa i roto i teie arata’i ha’api’ira’a, ʼeiaha te mau ’ātivite noa tei tāpurahia nō te fāito matahiti ’o tā ’oe e haʼapiʼi nei.
Tītau i te mana’o
E ani i te mau tamari’i ’ia fa’a’ite mai e mea nāhea tō rātou ’itera’a i te here o tō tātou Metua i te ao ra ’e o Iesu ’e ’aore rā, nō te aha rātou e mana’o nei ē, ’ua riro tō tātou Metua i te ao ra ’e ’o Iesu mai te hō’ē māramarama nō tātou.
Ha’api’i i te ha’api’ira’a tumu : Te mau tamari’i ’āpī
E ’āfaʼi mai te peʼeraʼa ia Iesu i te māramarama i roto i tōʼu oraraʼa.
’Ua pāpa’i Ioane nō ni’a i te māramarama, nō te ha’api’i nō ni’a i te fa’aurura’a a tō tātou Metua i te ao ra ’e a Iesu i roto i tō tātou orara’a. ’A feruri nāhea ’oe e tauturu ai i te mau tamari’i ’ia ha’api’i mai i te parau nō te māramarama tā rāua e pūpū nei.
Te mau ’ātivite e au
-
E ani i te mau tamari’i ’ia fa’ahiti mai i te mau mea ’o tē hōro’a mai nei i te māramarama. E tauturu ia rātou ʼia taʼa i te mau maitaʼi o te māramarama, mai te tautururaʼa i te mau rāʼau tanu ʼia tupu, te noa’araʼa ia tātou ʼia ʼite, ʼe te hōroʼaraʼa mai i te māhanahana. Nō te hāro’aro’a e mea nāhea Iesu i te hōpoi mai i te māramarama i roto ia tātou, e nehenehe rātou, te tahi i muri i te tahi, ’ia fa’a’ama i te hō’ē mōrī i ni’a i te hoho’a o Iesu Mesia ’a parau ai rātou ē, « e māramarama te Atua » (1 Ioane 1:5). E faʼaʼite pāpū atu ē, e nehenehe tā tō tātou Metua i te ao ra ʼe tā Iesu Mesia e ’āfa’i mai i te māramarama i roto i tō tātou oraraʼa ’ia tāmata ana’e tātou i te haʼapaʼo i te mau mea tā rāua i parau mai.
-
E ani i te mau tamari’i te tahi i muri mai i te tahi ’ia tāpe’a i te hōho’a nō te hō’ē mōrī ’aore rā te hō’ē mōrī hinu. ’A tāpe’a noa ai te tamari’i tāta’itahi i te hōho’a, ’a tauturu iāna ’ia feruri i te hō’ē rāve’a e nehenehe ai tātou ’ia āfa’i mai i te māramarama o Iesu Mesia i roto i tō tātou orara’a.
Tē fa’a’ite nei au i tō’u here i tō tātou Metua i te ao ra ’ia fa’a’ite ana’e au i te here ia vetahi ’ē.
E tauturu i te mau tamariʼi ’ia ʼite i te tūʼatiraʼa i roto i tō rātou here nō tō tātou Metua i te ao ra ʼe te here tā rāua e faʼaʼite i tāna mau tamariʼi.
Te mau ’ātivite e au
-
E taiʼo i te 1 Ioane 4:11 i te mau tamariʼi, ʼe e hīmene i te hōʼē hīmene nō niʼa i te here o te Atua, mai te hīmene « Mon Père Céleste m’aime » (Chants pour les enfants, 16). E ani i te tahi mau tamariʼi ’ia faʼaʼite mai e mea nāhea tō rātou ʼiteraʼa ē, tē here nei tō tātou Metua i te ao ra ia rātou. I muri aʼe i te pāhonoraʼa tātaʼitahi, e ani i te mau tamariʼi ’ia tauahi ia rātou iho ma te parau ē, « E aroha hoʼi te Atua, ʼe tē here nei te Atua iāʼu. »
-
E taiʼo i te 1 Ioane 4:21 i te mau tamariʼi. E ani ia rātou ʼia faʼaʼite mai ʼaore rā ’ia haʼuti mai i te mau huru rāveʼa e nehenehe ai ia rātou ʼia faʼaʼite i te aroha i te hōʼē hoa, mai te tauahiraʼa ʼaore rā te pāpaʼiraʼa i te hōʼē tāreta. E aha te mea e tupu mai i roto i tō tātou mau hoa nā roto i te raveraʼa i teie mau mea ? E aha te huru o tō tātou Metua i te ao ra ’ia hāmani maitaʼi anaʼe tātou ia vetahi ʼē ?
E fa’a’ite au i tō’u here i te Atua ’ia haʼapaʼo anaʼe au i tāna mau fa’auera’a.
’Ua ha’api’i Ioane ē, « e ’ere ho’i tāna parau i te mea teimaha » (1 Ioane 5:3). Maori rā, te pe’era’a i te mau fa’auera’a, ’o te hō’ē ïa rāve’a nō te fa’a’ite i te here iāna.
Te mau ’ātivite e au
-
E taiʼo i te 1 Ioane 5:3, ʼe e ani i te mau tamariʼi ʼia faʼaroʼo e aha tā teie ʼīrava e parau mai nei nō ni’a i te huru tātou e faʼaʼite ai ē, tē here nei tātou i te Atua. E ani i te mau tamariʼi ’ia faʼahiti mai i te mau faʼaueraʼa ato’a tā rātou e nehenehe e fa’a’ite. E aha te mana’o i roto ia tātou ’ia ha’apa’o ana’e tātou i te mau fa’auera’a a tō tātou Metua i te ao ra ?
-
E ani i te mau tamari’i ’ia pāpa’i i te hō’ē hōho’a e fa’a’ite ra i te hō’ē rāve’a e nehenehe ai rātou ’ia fa’a’ite i tō tātou Metua i te ao ra ē, tē here nei rātou iāna. ʼEi hiʼoraʼa, ʼe pāpa’i rātou i te hōhoʼa nō rātou iho e haʼapaʼo ra i te hōʼē o te mau faʼaueraʼa.
-
E hīmene ʼāmui i te hōʼē hīmene nō niʼa i te haʼapaʼo, mai te hīmene « Choisir le bien » (Chants pour les enfants, 82). E aha tō tātou huru ’ia ha’apa’o ana’e tātou ?
Ha’api’i i te ha’api’ira’a tumu : Te mau tamari’i pa’ari a’e
1 Ioane 2:8–11 ; 4:7–8, 20– 21
Tē fa’a’ite nei au i tō’u here i tō tātou Metua i te ao ra ’ia fa’a’ite ana’e au i te here ia vetahi ’ē.
Nāhea ’oe e tauturu ai i te mau tamariʼi ʼia ’ite ē, te hereraʼa i te Atua ’o te hereraʼa ïa i te mau taʼata nā pīha’i iho ia tātou—’e tae noa atu tei ta’a ’ē ia tātou ʼaore rā e mea fifi i te here atu ?
Te mau ’ātivite e au
-
E ani i te mau tamariʼi ’ia feruri ē ʼua haʼamata te tahi tamariʼi ʼāpī i te haere atu i tā rātou fare haʼapiʼiraʼa ʼaore rā pāroita ʼe ʼaita ā i matau i te taʼata i reira. E aha ra ïa te mana’o i roto iāna ? E ani i te hōʼē tamariʼi ʼia taʼio mai i te 1 Ioane 4:7–8. E aha tā teie ʼīrava e parau mai nei nō niʼa i tō tātou huru i niʼa i teie nei taʼata ? E faʼaʼite i te tahi mau hiʼoraʼa mai te reira te huru, ʼaore rā e ani i te mau tamariʼi ʼia feruri i te mau taime e fāna’o ai rātou i te rāveʼa nō te faʼaʼite atu i te here.
-
E ani i te mau tamariʼi ʼia taiʼo i te 1 Ioane 4:7–8, 20–21, ʼe e ani ia rātou ʼia pāpaʼi tātaʼitahi mai i te hōʼē pereota nō te haʼapoto i te haʼapiʼiraʼa faufaʼa rahi roa i roto i teie mau ʼīrava, i tō rātou manaʼo. E ani i te mau tamari’i ’ia fa’a’ite mai i tō rātou iho mau hi’ora’a. Nāhea tātou e fa’a’ite ai i te here i te ta’ata ’ati a’e ia tātou ?
1 Ioane 2:3–6 ; 4:17–18 ; 5:2–5
E fa’a’ite au i tō’u here i te Atua ’ia haʼapaʼo anaʼe au i tāna mau fa’auera’a.
E nehenehe te haʼapaʼoraʼa i te mau faʼaueraʼa e ʼōhie mai ’ia māramarama tātou te mau parau mau tei haʼapiʼihia i roto i te 1 Ioane 5:3. Nāhea ’oe e tauturu ai i te mau tamariʼi ʼia hiʼo i te mau faʼaueraʼa ʼeiaha mai te mau hōpoiʼa, mai te mau rāveʼa rā nō te faʼaʼite i tō rātou here i te Atua ?
Te mau ’ātivite e au
-
E ani i te mau tamariʼi ’ia pāpaʼi i niʼa i te tāpura i te mau rāveʼa e nehenehe ai rātou e faʼaʼite i te Atua ē, tē here nei rātou iāna. E taiʼo ʼāmui i muri iho i te 1 Ioane 2:5–6 ; 5:2–5 nō te tahi atu ā mau manaʼo. Nāhea te haʼapaʼoraʼa i te mau faʼaueraʼa i te faʼaʼite ē tē here nei tātou i tō tātou Metua i te ao ra ?
Nā te ha’apa’ora’a i te mau fa’auera’a a te Atua e tauturu ia tātou ’ia upo’oti’a i ni’a i te ao.
-
E taiʼo i te 1 Ioane 4:17, ʼe e haʼamāramarama atu i te mau tamariʼi ē te « mātaʼu-ʼore-raʼa ’ia tae i te mahana haʼavāraʼa ra » ’o te tiʼaturiraʼa ïa ’e te fāriʼiraʼa i te hau i te taime e tiʼa atu ai rātou i mua i te Atua ʼia haʼavāhia. E aha tā teie ʼīrava e haʼapiʼi nei e aha tei tītauhia ʼia rave nō te fāriʼi i teie tiʼaturiraʼa ? E aha te tahi mau mea e nehenehe tā tātou e rave i teienei nō te tiʼa atu ma te tiʼaturi i mua i te Atua ?
E nehenehe iāʼu ’ia haʼapaʼo noa, noa atu e faʼaoʼō’o mai vetahi iāʼu.
Nō te mea ho’i ē e mau pipi tātou nā Iesu Mesia, tē fa’ao’ō’o nei vetahi ia tātou i te tahi taime nō tō tātou mau ti’aturira’a ’aore rā nō te huru o tō tātou orara’a. Tei roto i teie mau ʼīrava te aʼo a Iuda e nāhea i te faʼaea itoito noa i roto i taua huru vairaʼa ra.
Te mau ’ātivite e au
-
E ani i te mau tamari’i ’ia fa’a’ite mai i te mau taime ’a fa’ao’ō’o ai vetahi ’ē ia rātou ’aore rā, ’a fa’ao’ō’o ai i te hō’ē ta’ata tā rātou i mātau, nō te mea ’ua rave rātou i te mea ti’a. E ani i te mau tamariʼi ’ia taiʼo i te Iuda 1:18–22 ʼe ʼia ʼimi e nāhea tātou e fa’aitoito ai noa atu e faʼaoʼō’ohia tātou ʼaore rā ʼe tāhitohitohia. E pāpaʼi i te mea tā rātou i ʼite i niʼa i te ’iri pāpa’ira’a, ʼe e tuatāpapa i te mau rāveʼa e pe’e ai rātou i teie aʼo.
-
E haʼapoto i te moemoeā o Lehi (hiʼo 1 Nephi 8:1–35), ma te ani i te tahi nau tamariʼi ʼia taiʼo i te mau ʼīrava i roto i te 1 Nephi 8:26–28, 33. E tāu’aparau i te hōho’ara’a te mau taʼata i roto i te fare rahi ʼe te ʼāʼano mai te feiā faʼaoʼō’o tā Iuda i faʼahiti. E nāhea pa’i tātou ʼia ʼore tātou ’ia fati i mua i te mau taʼata e faʼaoʼō’o nei ia tātou ʼaore rā e ʼore e fāriʼi nei i te mea tā tātou e tiʼaturi nei ?(hi’o 1 Nephi 8:30, 33).
Fa’aitoito i te ha’api’ira’a i te fare
E faʼaitoito i te mau tamariʼi ’ia ha’amau i te ʼōpuaraʼa e rave i te tahi mea nō te faʼaʼite i tō rātou māramarama i tō rātou ʼutuāfare.
Ha’amaita’i i tā tātou ha’api’ira’a
E mea pe’epe’e te mau tamari’i. I te tahi taime e feruri paha ’oe ē, ’ua riro te ha’uti a te mau tamari’i ’ei ha’afifira’a nō te raupā i te ’ite. E nehenehe rā ’oe e patu i ni’a i tō rātou huru pe’epe’e maoti te anira’a ia rātou ʼia ’ohipa, ’ia pāpaʼi hōho’a, ʼaore rā ʼia hīmene i te hīmene nō niʼa i te hōʼē parau tumu o te ʼevanelia. (Hi’o Ha’api’ira’a mai tā te Fa’aora, 25–26.)