’Āno’ira’a hōho’a tīpe’e nā Eric Johnsen : The Grand Council [Te ’Āpo’ora’a rahi], nā Robert T. Barrett ; ha’aputura’a feti’a tei hō-mai-hia e te Pū o te reva nō Europa

11–17 nō Tītema

’Āpōkalupo 6–14

« Pohe atu ra rā… rātou i te toto o te ’Ārenio »

’A tai’o ai ’oe i te ’Āpōkalupo 6–14, ’a feruri i te mau tamari’i tā ’oe e ha’api’i nei. E nehenehe te Vārua Maita’i e tauturu ia ’oe ’ia ’imi i te mau parau mau e tano nō rātou.

Tītau i te mana’o

E fa’a’ite i te tahi mau hōho’a ’o tē tauturu i te mau tamari’i ’ia ha’amana’o i te mau mea tā rātou i ha’api’i mai ’aita i maoro a’e nei i te fare ’aore rā i te Paraimere. ’A ani i te mau tamari’i ’ia fa’a’ite mai i te mau mea tā rātou i ’ite nō ni’a i te mau hoho’a.

Ha’api’i i te ha’api’ira’a tumu : Te mau tamari’i ’āpī

’Āpōkalupo 7:9, 13–14

E tauturu Iesu Mesia iāʼu ʼia mā.

ʼUa ʼite Ioane e rave rahi taʼata tei ʼahuhia i te mau ʼahu « ʼe ua teatea, i te toto o te ʼĀrēnio ra » (ʼīrava 14). E feruri e nāhea teie ʼōrama i te tauturu i te mau tamariʼi ’ia hāro’aro’a i te faufaʼa ’ia tāmāhia nā roto i te Tāraʼehara a Iesu Mesia.

Te mau ’ātivite e au

• Fa’a’ite i te mau tamari’i i te tahi mau ’ahu ’uo’uo (’e ’aore rā te hō’ē hōho’a nō te reira) ’e hō’ē hōho’a nō Iesu. E taiʼo i te ’Āpōkalupo 7:9, 13–14 i te mau tamariʼi, ʼe e ani ia rātou ʼia faʼatoro atu i niʼa i te hōhoʼa ʼe te mau ʼahu i te mau taime atoʼa e faʼaroʼo rātou i te tāʼo ʼuoʼuo. E tātara atu ē, tē faʼahōhoʼa nei te mau ʼahu ʼuoʼuo i te mā ʼe te faʼahaʼamanaʼo mai nei te reira ia tātou ē, e nehenehe Iesu Mesia e tāmā ia tātou i tā tātou mau hape.

• E faʼaʼite atu i te mau tamariʼi i te hōʼē huʼahuʼa ʼahu ʼuoʼuo, ’aore rā i te hō’ē hu’ahu’a pāpie, ʼe e vaiiho ia rātou ʼia faʼarepo i te reira ma te pāpaʼi i te hōʼē pēni tara ʼaore rā te tuʼuraʼa i te repo i niʼa iho. E fa’ata’a ē, ’ia ha’apa’o ’ore ana’e tātou i te mau fa’auera’a, e au ra e mea repo i ni’a i tō tātou ’ahu. E faʼaʼite i te hōʼē hōhoʼa nō Iesu i Getesemane (mai te Buka hōho’a nō te ’evanelia, N°56), e tuʼu atu i te ʼahu repo ’aore rā te pāpie repo i te hiti ʼe e faʼaʼite atu ia rātou i te hōʼē ʼahu mā. ’A fa’a’ite pāpū ē, e tauturu Iesu Mesia ia tātou ’ia mā.

• E hīmene i te hōʼē hīmene nō niʼa i te bāpetizoraʼa, mai te hīmene « Le jour de mon baptême » (Chants pour les enfants, 53), ʼe e fa’a’ite pāpū ē, e tauturu Iesu ia tātou ’ia mā ’ia bāpetizo-ana’e-hia tātou.

’Āpōkalupo 12:7–11

’Ua faʼaʼite au i tō’u faʼaroʼo ia Iesu Mesia i roto i te oraraʼa hou te tāhuti nei.

I roto i te tamaʼi i te raʼi, ʼua upoʼotiʼa te mau tamariʼi haʼapaʼo a te Atua i niʼa ia Sātane nā roto i « te parau tā rātou i faʼaʼite ra » ʼe nā roto i te faʼaʼiteraʼa i te faʼaroʼo ia Iesu Mesia (’Āpōkalupo 12:11). Tē tāmau noa nei rātou i te nā reira i teie mahana.

Te mau ’ātivite e au

• Nō te tauturu i te mau tamariʼi ʼia hāro’aro’a i te auraʼa ʼia peʼe i te hiʼoraʼa o te tahi taʼata, ʼa māʼiti i te hōʼē tamariʼi ia riro ʼei « arataʼi », ʼe ʼa ani i te tahi atu mau tamariʼi ia peʼe atu iāna ma te rave i te mau mea atoʼa tāna e rave. I muri iho, e vaiiho i te tahi atu mau tamariʼi ʼia riro ’ei arataʼi. E taiʼo i te ’Āpōkalupo 12:7–11 i te mau tamariʼi ʼe e haʼamāramarama atu ē, hou tātou i fānauhia ai, ʼua māʼiti tātou ʼia peʼe ia Iesu ʼeiaha ia Sātane.

• E hīmene ʼāmui i te hīmene nō niʼa i te oraraʼa hou te tāhuti nei, mai te hīmene « Je veux suivre le plan de Dieu » (Chants pour les enfants, 86). ’A ui i te mau uira’a mai teie, « E aha tei tupu i te ra’i hou tātou ’a fānauhia mai ai ? » ’e « E aha tā tātou i mā’iti e rave ? » (Hiʼo atoʼa « ʼŌmuaraʼa : Te ʼōpuaraʼa a tō tātou Metua i te ao ra » i roto i Te mau ʼāʼamu nō te Faufaʼa ʼĀpī, 1–5, ʼaore rā te video e tano i niʼa i te ChurchofJesusChrist.org.)

’Āpōkalupo 14:6–7

’Ua fa’aho’ihia mai te ’evanelia i tō tātou nei ’anotau.

’Ua pāpa’i Ioane nō ni’a i te hō’ē melahi ’o tē hōpoi mai i « te ’evanelia mure ’ore » (’Āpōkalupo 14:6). E hōro’a mai te āparaura’a i te ’Āpōkalupo 14:6–7 i te hō’ē rāve’a nō ’oe nō te fa’a’ite pāpū i te fa’aho’i-fa’ahou-ra’a-hia mai te ’evanelia a Iesu Mesia i tō tātou nei ’anotau.

Te mau ’ātivite e au

• E fa’a’ite i te mau tamari’i i te hō’ē hōho’a nō Moroni e paraparau ra ia Iosepha Semita ’a tai’o ai ’oe i te ’Āpōkalupo 14:6 (hi’o Buka hōho’a nō te ’evanelia, N°91). ’A ani i te mau tamari’i ’ia fa’ata’a mai e aha tē tupu nei i roto i te hōho’a. ’A fa’a’ite ia rātou i te ā’amu nō te tere o Moroni (’a hi’o « Pene 3 : Te melahi Moroni ’e te mau ’api ’auro », i roto i Te mau ’ā’amu o te Ha’api’ira’a tumu ’e te mau Parau Fafau, 13–17, ’e ’aore rā, te video e tano i ni’a ia ChurchofJesusChrist.org).

• E ani i te mau tamari’i ’ia ha’uti mai i te ’ā’amu nō tō Moroni haerera’a e fārerei ia Iosepha Semita (hi’o Iosepha Semita—Ā’amu 1:29–35). E tauturu ia rātou ’ia fa’a’ite mai i te tahi mau ha’amaita’ira’a tā tātou e fāna’o nō te mea ’ua fa’aho’i-fa’ahou-hia mai te ’evanelia a Iesu Mesia. ’A fa’a’ite i tō ’oe ’itera’a pāpū nō ni’a i te fa’aho’i-fa’ahou-ra’a mai.

Ha’api’i i te ha’api’ira’a tumu : Te mau tamari’i pa’ari a’e

’Āpōkalupo 9:1–2

E nehenehe te ʼevanelia e tauturu iāʼu ’ia upo’oti’a i ni’a i te faʼahemaraʼa.

Te au auahi tei haʼapōuri i te mataʼi i roto i te ’Āpōkalupo 9:2 e faʼaauhia ïa i te mau faʼahemaraʼa (hiʼo 1 Nephi 12:17).

Te mau ’ātivite e au

• E pāpaʼi i te mau hōhoʼa o te mahana ʼe te ata pōuri, ʼe e tāpūpū i te reira. E ani i te mau tamariʼi ’ia taiʼo i te ’Āpōkalupo 9:2 ʼe te 1 Nephi 12:17 ʼe e pāpaʼi i niʼa i te ata pōuri e aha tā te au auahi ʼaore rā te mau mahu i roto i teie mau ʼīrava e fa’ahōho’a nei. E tuʼu i te ata pōuri i niʼa i te tāpura, ʼe e ani i te mau tamariʼi ʼia pāpa’i i te mau faʼahemaraʼa e faʼaruruhia nei e te mau tamari’i nō tō rātou fāito matahiti. I muri iho, e tu’u i te mahana i niʼa i te tāpura ʼe e ani ia rātou ʼia pāpa’i i te mau mauhaʼa tā tō tātou Metua i te ao ra i hōroʼa mai ia tātou nō te upo’oti’a i ni’a i te pōuri i roto i te ao nei.

• Nāhea tātou e tauturu ai ia vetahi ’ē i roto i te pōuri pae vārua ? Nō te tauturu i te mau tamari’i ’ia feruri i teie uira’a, ’a fa’a’ite i te hō’ē tuha’a o te video « Mā’iti i te māramarama » (ChurchofJesusChrist.org), te ’āfara’a hope’a iho ā rā o te video. Nāhea tātou e riro ai mai te ta’ata tei tauturu i te ta’ata ta’ahi i roto i arapao ?

’Āpōkalupo 12:7–11

ʼUa faʼaʼite au i tō’u faʼaroʼo ia Iesu Mesia i roto i te oraraʼa hou te tāhuti nei.

Tei niʼa i te fenua nei te mau tamariʼi tā ’oe e haʼapiʼi nei nō te mea e faʼaroʼo tō rātou ia Iesu Mesia i roto i te oraraʼa hou te tāhuti nei ’e ʼua māʼiti hoʼi rātou ʼia peʼe atu iāna.

Te mau ’ātivite e au

• E taiʼo ʼāmui i te ’Āpōkalupo 12:7–11,ʼe e pāpaʼi i niʼa i te tāpura i te mau tāʼo teni, Tāma’i i te ra’i, ti’avaruhia, ’itera’a pāpū, ’e ’Ārenio. E ani i te mau tamari’i ʼia haʼapoto mai i teie mau ʼīrava ma te faʼaʼohipa i te mau tāʼo i ni’a i te tāpura . E aha tā tātou e ha’api’i mai nei nō ni’a ia Iesu Mesia (te ʼĀrēnio) mai roto mai i teie mau ʼīrava ? E aha tā tātou e haʼapiʼi mai nei nō niʼa i te mau māʼitiraʼa tā tātou i rave i roto i te oraraʼa hou te tāhuti nei ?

• E hāmani e toru ’ānaʼiraʼa i niʼa i te tāpura ʼe e pāpaʼi atu Hou teie ʼoraraʼa, I roto i teie nei oraraʼa,ʼe I roto i nā ao e piti. E faʼaineine i te mau tuha’a ʼapi parau ’o tē faʼaʼite i te mau parau mau nō niʼa i te oraraʼa hou te tāhuti nei ’e nō ni’a i te orara’a tahuti nei, mai teie, E tino tō tātou, ’Aita tō tātou ʼe tino, E ora tātou i pīha’i iho i te Atua, Tē tamaʼi nei tātou ʼe ’o Sātane, E faʼaʼohipa tātou i te faʼaroʼo ia Iesu Mesia, ’e Tē peʼe nei tātou i te ʼōpuaraʼa a te Atua. E vaiiho i te mau tamariʼi ia rave i te hōʼē ʼapi parau ’ia tae i tō rātou taime ʼe ʼia māʼiti i tei hea ʼānaʼiraʼa e tuʼu ai i te reira. E faʼaʼite i tō ’oe tiʼaturi ē, e nehenehe te mau tamariʼi ’ia tāmau i te faʼaʼite i tō rātou faʼaroʼo i te Mesia.

’Āpōkalupo 14:6–7

’Ei tuha’a nō te Fa’aho’i-fa’ahou-ra’a mai, e porohia te ’evanelia i tō te ao ato’a nei.

E e tauturu tā ’oe mau pīahi i te porora’a i te ’evanelia « i te mau fenua ato’a, ’e te mau ’ōpū ato’a, ’e te mau reo ato’a, ’e te mau nūna’a ato’a » (’Āpōkalupo14:6).

Te mau ’ātivite e au

• E ani i te mau tamari’i ’ia tai’o i te ’Āpōkalupo 14:6–7 ’e ’ia pāpa’i i ni’a i te tāpura i te mau ta’o ’aore rā te mau pereota nō roto mai i teie mau ’īrava tei riro ’ei mea faufa’a nō rātou. E ani ia rātou ’ia parau mai nō te aha rātou i mā’iti ai i terā mau ta’o ’aore rā mau pereota. E fa’ata’a ē, tē tātara nei teie mau ’īrava i te fa’aho’i-fa’ahou-ra’a mai o te ’evanelia i tō tātou nei ’anotau. ’A ani ia rātou e nāhea rātou ’ia ’āmui i roto i te ’ohipa porora’a ’evanelia i tō te ao nei.

• E ani i te mau tamari’i ’ia tai’o i te ’Āpōkalupo 14:7 ’e ’ia fa’ahiti fa’ahou nā roto i tā rātou iho mau parau i te poro’i a te melahi nō tō te ao nei. ’Aore rā, e ani ia rātou ’ia pāpa’i i te hō’ē hōho’a e fa’ahōho’a ra i te poro’i a te melahi. E aha tā tātou e nehenehe e fa’a’ite ia vetahi ’ē nō ni’a i te ’evanelia a Iesu Mesia ?

Fa’aitoito i te ha’api’ira’a i te fare

E tauturu i te mau tamari’i ’ia pāpa’i i te hō’ē ta’o ’aore rā, hō’ē pereota ’o tē tauturu ia rātou ’ia ha’amana’o i te hō’ē mea tā rātou i ha’api’i mai i roto i te piha ha’api’ira’a i teie mahana. E ani ia rātou ’ia fa’a’ite mai e aha tā rātou i pāpa’i i te hō’ē ta’ata i te fare ’e ’ia fa’a’ite mai i te mea tā rātou i ha’api’i mai.

Ha’amaita’i i tā tātou ha’api’ira’a

Ha’api’i i te ha’api’ira’a tumu nā roto i te hīmene. E nehenehe te hīmenera’a i te mau hīmene ’e te mau tamari’i e ha’apūai i te ha’api’ira’a tumu tā ’oe e ha’api’i ra i roto i te mau pāpa’ira’a mo’a. Nō te mau mana’o, ’a hi’o « Fa’a’ohipa i te pehe nō te ha’api’i i te ha’api’ira’a tumu » i roto i te tuha’a tei pi’ihia « Mau arata’ira’a nō te taime hīmenera’a ’e te fa’anahora’a a te mau tamari’i i te purera’a ōro’a », i te hope’a o teie buka ha’api’ira’a.