The City Eternal [Te ’oire mure ’ore], nā Keith Larson

25–31 nō Titema

’Āpōkalupo 15–22

« ’O tē riro iāna te rē ra, nōna te mau mea ato’a ra »

ʼA faʼaineine ai ’oe i te haʼapiʼi, e faʼaohipa i tō ’oe ʼite i te tuatāpapara’a i te ’Āpōkalupo 15–22 ’oe iho, ʼaore rā ʼe tō ’oe ʼutuāfare. E aha te mea tei puta mai i roto ia ’oe ? E aha te mau manaʼo tā ’oe i fāriʼi ? E haʼamanaʼo ē, e nehenehe te mau ’ātivite ato’a tei hōroʼahia mai i ’ō nei e faʼatanohia i niʼa i te mau tamariʼi nō te mau fāito matahiti atoʼa.

Tītau i te mana’o

E ani i te mau tamariʼi ’ia faʼaʼite mai ē, nō te aha rātou e hinaʼaro ai ʼia ora faʼahou i pīha’i iho i tō tātou Metua i te ao ra. I te roara’a o te ha’api’ira’a, e tauturu ia rātou ’ia ’imi i te mau mea e nehenehe rātou e rave nō te faʼaineine ’ia hoʼi atu iāna ra.

Ha’api’i i te ha’api’ira’a tumu : Te mau tamari’i ’āpī

’Āpōkalupo 15:2–4

E nehenehe au e ’ārue i te Atua nā roto i te hīmene.

’Ua hīmene te feiā mo’a tā Ioane i fa’a’ite mai i roto i te ’Āpōkalupo15:2–4 i te mau ’āruera’a i te Atua nō tōna maita’i. E aha te mau hīmene ’āruera’a tē tauturu i te mau tamari’i ’ia fa’a’ite i tō rātou here i tō tātou Metua i te ao ra ’e ia Iesu Mesia ?

Te mau ’ātivite e au

• ’Ia tai’o pūai ana’e ’oe i te mau tuha’a o te ’Āpōkalupo 15:2–4, e ani i te mau tamari’i ’ia rave i te mau ’ohipa ma te ha’avare ha’uti i te hō’ē tīnura ’e ’aore rā, i te arata’i i te hō’ē pupu hīmene. E aha tō tātou mana’o ’ia hīmene ana’e tātou nō ni’a ia Iesu ?

• E ani i te mau tamari’i ’ia fa’a’ite mai i te tahi o tā rātou mau hīmene au roa a’e nō ni’a i tō tātou Metua i te ao ra ’e ia Iesu Mesia. ’A hīmene ’āmui i te tahi o te mau hīmene, ’e ’a tauturu i te mau tamari’i ’ia hāro’aro’a e aha tā te mau hīmene e ha’api’i nei ia tātou nō ni’a i tō tātou Metua i te ao ra ’e te Fa’aora.

’Āpōkalupo 19:7

E nehenehe au e fa’aineine nō te Tae-Piti-Ra’a mai o Iesu Mesia nā roto i te mā’itira’a i te maita’i.

Nāhea ’oe e tauturu ai i te mau tamariʼi ’ia hāro’aro’a ē, e ’ohipa ’oa’oa nō tātou te Tae-Piti-Raʼa mai, mai te mea e haʼapaʼo tātou i te mau faʼaueraʼa a Iesu ?

Te mau ’ātivite e au

• E ani i te mau tamariʼi ē, ʼua haere aʼena ānei rātou i te hōʼē faʼaipoiporaʼa. E aha ra te huru ? Nō te aha te ta’ata e ’oa’oa ai i te hō’ē fa’aipoipora’a ? E fa’a’ite i te hōho’a o te tae-piti-ra’a mai o te Fa’aora i roto i te arata’i ha’api’ira’a nō teie hepetoma o te Mai, pe’e mai—nō te ta’ata hō’ē ’e te ’utuāfare, ʼe e taiʼo i te ’Āpōkalupo19:7. E haʼamāramarama ē, tē faʼahōhoʼa nei te « faʼaipoiporaʼa o te ʼĀrēnio » i te Tae-Piti-Raʼa mai o Iesu Mesia. Nō te aha tātou e ’oa’oa ai ’ia ho’i fa’ahou mai te Fa’aora ? Tauturu i te mau tamari’i ’ia fa’aau i te ’oa’oa o te hō’ē fa’aipoipora’a i te ’oa’oa nō te ho’ira’a mai o te Fa’aora.

• E faʼaʼite i te mau tamariʼi nō te aha ’oe e tīaʼi ai i te Tae-Piti-Raʼa mai o Iesu. E nehenehe ato’a ’outou e hīmene ʼāmui i te hōʼē hīmene nō niʼa i te Tae-Piti-Raʼa mai, mai te hīmene « Quand Jésus reviendra » (Chants pour les enfants, 46–47).

• E ani i te mau tamariʼi ’ia faʼaʼite mai e aha tā rātou e rave nō te faʼaʼineine ia rātou nō te pureraʼa i te Sābati. Nō te aha tātou e rave ai i teie mau mea hou tātou ’a haere ai i te pureraʼa ? Nō te aha e mea ti’a ia tātou ’ia fa’aineine nō te Tae-Piti-Raʼa mai o te Mesia ? I niʼa i te ʼapi ’ātivite nō teie hepetoma, e vaiiho i te mau tamariʼi ʼia pāpaʼi i te mea e nehenehe rātou e rave nō te faʼaineine nō te Tae-Piti-Raʼa mai.

’Āpōkalupo 21:1, 3–4, 22–27 ; 22:1–2

Tē hinaʼaro nei tō tātou Metua i te ao ra ’ia ora vau i pīha’i iho iāna i roto i te bāsileia tīrētiēra.

I roto i nā pene hopeʼa e piti nō te ’Āpōkalupo, ʼua faʼaʼohipa Ioane i te reo nehenehe nō te faʼata’a i te huru o te hanahana tīrētiēra tā te feiā haʼapaʼo e fanaʼo.

Te mau ’ātivite e au

• E tauturu i te mau tamariʼi ’ia pāpaʼi i te hoho’a nō te tumu rāʼau tei faʼaʼitehia i roto i te ’Āpōkalupo 22:2 i niʼa i te tāpura. E haʼamāramarama atu ē, teie tumu rāʼau ’o te tumu rāʼau ïa nō te ora, ʼe te mau māʼa hotu e faʼahōhoʼaraʼa ïa i te aroha o te Atua (hiʼo 1 Nephi 11:21–22). E hōroʼa i te mau tamariʼi i te mau huʼahuʼa parau tei pāʼotihia mai te māʼa hotu, ʼe e ani ia rātou ’ia pāpaʼi i niʼa i te ʼapi parau i te tahi mea ’o tē tauturu ia rātou ʼia ʼite i te aroha o tō tātou Metua i te ao ra. E fa’ata’a ē, ’o rātou ’o tē here ’e ’o tē ha’apa’o i te parau a tō tātou Metua i te ao ra, e ora ïa rātou i pīha’i iho iāna i roto i te bāsileia tīrētiēra.

• E faʼaʼite atu i te mau tamariʼi i te tahi mau hōhoʼa ’aore rā faʼaʼiteraʼa tā Ioane i faʼaʼohipa nō te faʼaʼite mai i te hanahana tīrētiēra ra (hiʼo i te ’Āpōkalupo 21:1, 3–4, 22–27 ; 22:1–2),ʼe e ani i te mau tamariʼi ʼia pāpaʼi i te mau hōhoʼa nō teie mau mea.

• E hīmene ʼāmui i te hōʼē hīmene ’o tē haʼapiʼi mai e nāhea tātou e fa’aineine ai nō te ho’i i mua i te ’aro o te Atua, mai te hīmene « Je veux suivre le plan de Dieu » (Chants pour les enfants, 86–87). E ani i te mau tamariʼi ’ia faʼaʼite mai i te mea e nehenehe ia rātou e rave nō te ora faʼahou i pīha’i iho i tō tātou Metua i te ao ra.

Ha’api’i i te ha’api’ira’a tumu : Te mau tamari’i pa’ari a’e

’Āpōkalupo 19:7–8

E nehenehe au e fa’aineine nō te Tae-Piti-Ra’a mai o Iesu Mesia nā roto i te mā’itira’a i te maita’i.

Nāhea ’oe e tauturu ai i tā ’oe mau pīahi ʼia taʼa ē, ʼe taime ʼoaʼoa te Tae-Piti-Raʼa mai o Iesu Mesia, nō te feiā parautiʼa ?

Te mau ’ātivite e au

• E taiʼo ʼāmui i te ’Āpōkalupo 19:7–8, ʼe e tauturu i te mau tamariʼi ʼia ta’a i te taipe i roto i teie mau ʼīrava—te faʼaipoiporaʼa ’o te Tae-Piti-Raʼa mai ïa o te Faʼaora, te ʼĀrēnio ’o te Faʼaora ïa, ʼe tāna vahine faʼaʼipoipo ’o te ʼĒkālesia ïa (ʼaore rā tātou pāʼātoʼa). E aha te mau mea tā tātou e rave nō te fa’aineine i te ho’i-fa’ahou-ra’a mai o te Fa’aora ?

• E taiʼo faʼahou ʼe e tāmau ʼāʼau i Te mau Hīroʼa Faʼaroʼo 1:10 ʼe te mau tamariʼi. E haʼamāramarama atu ē, tē faʼaʼite mai nei teie Hīroʼa Faʼaroʼo i te mau ʼōroʼa ʼoaʼoa ʼe te hanahana ’o tē tupu mai ’ia ho’i faʼahou mai Iesu. E faʼaʼiteʼite i te hoho’a nō te Tae-Piti-Ra’a mai o Iesu i roto i te Mai, pe’e mai—nō te ta’ata hō’ē ’e te ’utuāfare, ’e e ani i te mau tamariʼi ʼia pāpaʼi e aha tō rātou mana’o nō ni’a i te huru o te Tae-Piti-Raʼa mai o Iesu.

’Āpōkalupo 22:18–19

E ha’avāhia vau e te Atua.

I te hō’ē mahana e ti’a atu tātou pā’āto’a i mua i te aro o te Atua ’ia ha’avāhia tātou. E nehenehe ’oe e tauturu i te mau tamari’i ia hāro’aro’a ē, e riro tāna ha’avāra’a ’ei mea parauti’a ’e te au maita’i ’e te aroha.

Te mau ’ātivite e au

• ’A pāpa’i i ni’a i te tāpura E aha te huru o te mahana ha’avāra’a ? E ani i te mau tamari’i ’ia ’imi i te mau pāhonora’a i te uira’a i roto i te ’Āpōkalupo 20:12–13 ’e i roto i te « Ha’avāra’a, te hope’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org). E aha tā te Fa’aora i rave ’ia riro te mahana ha’avāra’a ’ei mahana ’oa’oa ? (hi’o Te mau Hīro’a Fa’aro’o 1:3–4). E aha tā tātou e rave ’ia riro te reira ’ei mahana ’oa’oa nō tātou ?

  

  The Last Judgement [Te ha’avāra’a hope’a], nā John Scott

• Hōpoi mai i roto i te piha ha’api’ira’a i te hō’ē buka ’ei fa’ahoho’ara’a i te « buka ora » (’Āpōkalupo 20:12), i reira tō ’oe pāpa’ira’a i te tahi huru o te Mesia ’e te mau ’ohipa maita’i a te mau tamari’i i roto i tā ’oe piha ha’api’ira’a. ’A tai’o atu i te mau tamari’i i te mau mea tā ’oe i pāpa’i, ’e ’a ani ia rātou ’ia paraparau mai nō ni’a i te huru o te Mesia ’o tā rātou i ’ite i roto i te tahi ’e te tahi. E fa’a’ite i tō ’oe ’itera’a pāpū ē, e tauturu Iesu Mesia ia tātou ’ia riro mai iāna te huru, ’e e hōro’a mai ’oia i te hō’ē rāve’a nō tātou nō te tātarahapa ’e nō te upo’oti’a i ni’a i te hara.

’Āpōkalupo 21:1, 3–4, 22–27 ; 22:1–2,17

Tē hinaʼaro nei tō tātou Metua i te ao ra ’ia ora vau i pīha’i iho iāna i roto i te bāsileia tīrētiēra.

’A tai’o ai ’oe i te fa’ata’ara’a a Ioane nō ni’a i te hanahana tīrētiēra i roto i te ’Āpōkalupo21–22, e aha tā ’oe e ’ite nei ? E aha tei fa’auruhia ia ’oe ’ia fa’a’ite i te mau tamari’i ’o tā ’oe e ha’api’i nei ?

Te mau ’ātivite e au

• E ani i te mau tamariʼi ’ia māʼimi i roto i teie mau ʼīrava i te tahi mau ta’o ʼaore rā mau pereota tā Ioane i faʼaʼohipa nō te faʼata’a i te huru o te hanahana tīrētiēra : ’Āpōkalupo 21:1, 3–4, 22–27 ; 22:1–2. E vaiiho ia rātou ʼia māʼiti i te hōʼē mea i roto i teie mau ’īrava tā rātou e hinaʼaro i te pāpaʼi hoho’a. I muri iho, e nehenehe rātou e paraparau nō ni’a i tā rātou mau hoho’a i tō te piha ha’api’ira’a. E faʼaitoito ia rātou ’ia faʼa’ite i tā rātou mau hōho’a papa’i i tō te ʼutuāfare iō rātou ra.

• E taiʼo ʼāmui i te ’Āpōkalupo 22:17, ʼe e haʼamāramarama atu ē, te vahine faʼaʼipoipo e parau nei ē « haere mai » ’o te ʼĒkālesia ïa. ’O vai tā tātou, te mau melo nō te ’Ēkālesia, e hina’aro nei ’ia ani ia vetahi ’ē ’ia « haere mai » ? (Hi’o Moroni 10:30–33). E aha tā te feiā ’ati a’e ia tātou e « po’ihā » nei ? E aha te tahi mau rāveʼa maitaʼi nō te ani i te mau taʼata ’ia « haere mai » ?

Fa’aitoito i te ha’api’ira’a i te fare

E tauturu i te mau tamariʼi ’ia faʼaineine i te taiʼo i te Buka a Moromona i teie matahiti i mua ma te parau ia rātou ʼia ani i te hōʼē melo o te ʼutuāfare ʼaore rā i te hō’ē hoa ’ia faʼaʼite mai i te hōʼē ʼīrava ʼaore rā te hō’ē ʼāʼamu au-roa-hia e rātou i roto i te Buka a Moromona.

Ha’amaita’i i tā tātou ha’api’ira’a

E ha’api’i i te mau tamari’i ’ia pāpa’i i te mau mana’o e tae mai. Mai te mea e ha’api’i te mau tamari’i ’ia mātau i te pāpa’i i tō rātou mau mana’o, e tauturu te reira ia rātou ʼia ʼite ʼe ʼia pe’e i te Vārua. E pāpa’i te mau tamari’i i te mau mana’o e tupu mai nā roto i te tāpa’ora’a i te mau pāpa’ira’a mo’a, te pāpa’i-hōho’a-ra’a, ’e ’aore rā, te pāpa’ira’a i te reira i roto i te hō’ē buka ’ā’amu. (Hi’o Ha’api’ira’a mai tā te Fa’aora, 30.)