« 18–24 nō Tītema. Noera : ‘E parau maita’i ’o tē riro ’ei ’oa’oara’a’ », Mai, pe’e mai—nō te Paraimere : Faufa’a ’Āpī 2023 (2021)
« 18–24 nō Tītema. Noera », Mai, pe’e mai—nō te Paraimere : 2023
Little Lamb [Te ’Ārenio iti], nā Jenedy Paige
18–24 nō Titema
Noera
« E parau maita’i ’o tē riro ’ei ’oa’oara’a »
E riro teie haʼapiʼiraʼa ’ei rāveʼa nō te tauturu i tā ’oe mau pīahi ’ia faʼahanahana i te fānauraʼa, te oraraʼa, ʼe te misiōni a te Faʼaora i te tau Noera. E haʼamanaʼo i te reira ’a faʼaʼineine ai ’oe i te haʼapiʼi.
Tītau i te mana’o
E fa’a’ite i te hōho’a nō roto mai i te arata’i ha’api’ira’a nō teie hepetoma i roto i te Mai, peʼe mai—nō te ta’ata hō’ē ’e te ’utuāfare, ’e e ani i te mau tamari’i ’ia fa’a’ite mai e aha tā rātou i ’ite nō ni’a i te fānauraʼa o te Faʼaora.
Ha’api’i i te ha’api’ira’a tumu : Te mau tamari’i ’āpī
ʼUa tae mai Iesu Mesia i niʼa i te fenua nei ’ei ʼaiū.
E mea au roa nā te mau tamari’i te ā’amu o te fānaura’a o Iesu Mesia. E aha te mau haʼapiʼiraʼa tumu tā ’oe e ʼite nei i roto i teie ʼāʼamu tā ’oe e mana’o nei ē, e tiʼa i te mau tamariʼi ʼia hāro’aro’a ?
Te mau ’ātivite e au
-
E taiʼo i te Luka 2:1–14 i te mau tamariʼi, ʼaore rā e faʼaʼite i te mau mea tei tupu i roto i teie mau ʼīrava nā roto i te faʼahororaʼa i ni’a i te « Pene 5 : ʼUa fānauhia Iesu Mesia » (i roto i Te mau ʼā’amu nō te Faufaʼa ʼĀpī, 13–15, ʼaore rā te video e tano atu i niʼa i te ChurchofJesusChrist.org). E ani i te mau tamariʼi ʼia pāpaʼi i te mau hōhoʼa nō teie mau ʼohipa i tupu ʼe e faʼaʼohipa i te mau hōhoʼa ’e na rātou iho e faʼatiʼa i te ʼāʼamu. Nō te aha tātou e ’oa’oa nei ē ’ua fānauhia Iesu Mesia ?
-
E ani i te mau tamariʼi ’ia faʼatiʼa mai ia ’oe i te ʼāʼamu o te mau Taʼata Paʼari tei peʼe i te fetiʼa nō te ʼimi ia Iesu. Mai te mea e hina’aro rātou ʼia faʼahaʼamanaʼohia nō niʼa i te ʼāʼamu, e hiʼo i te Mataio 2:1–12 ʼaore rā te « Pene 7 : Te Feiā Paʼari » (i roto i Te mau ʼāʼamu o te Faufaʼa ʼĀpī, 18, ʼaore rā te video e tano atu i niʼa i te ChurchofJesusChrist.org). E huna i te hōʼē hōhoʼa nō Iesu i roto i te piha. E pāpa’i ’e ’aore rā e tāpūpū i te hōʼē fetiʼa pāpie ʼe e tāpeʼa i te reira i niʼa. E ani i te mau tamariʼi ʼia fa’ariro ia rātou ʼei taʼata paʼari e ’āfaʼi ra i te mau taoʼa aroha, ʼe e arataʼi atu ia rātou nā roto i te piha nō te ʼimi ia Iesu. E tauturu i te mau tamari’i ’ia feruri i te tahi mau tao’a hōro’a tā tātou e nehenehe e hōro’a nā Iesu.
-
’A hīmene ’e te mau tamari’i i te tahi mau hīmene purera’a noera ’aore rā te tahi mau hīmene (’a hi’o Te mau hīmene, N°118 ; Chants pour les enfants, 20). E ani ia rātou ’ia fa’a’ite mai i te hō’ē mea tā te hīmene tāta’itahi e ha’api’i nei ’e tā rātou e mana’o nei ē, e mea faufa’a ’ia ’ite.
Gethsemane [Getesemane], nā J. Kirk Richards
Maoti Iesu Mesia e ti’a ai iāʼu ʼia ora faʼahou i pīha’i iho i tōʼu Metua i te ao ra, ’ia tae i te hōʼē mahana.
ʼUa taʼa ānei i tā ’oe mau pīahi nō te aha Iesu Mesia i haere mai ai i niʼa i te fenua nei ? E rave i te taime nō te feruri i te mea tā te Faʼaora i rave nō ’oe iho ’e nāhea ’oe e tauturu ai i te mau tamariʼi ʼia taʼa e aha tāna i rave nō rātou.
Te mau ’ātivite e au
-
ʼĀfaʼi mai i te hōʼē taoʼa aroha tei pūʼohuhia ’aore rā hō’ē ’āfata i roto i te piha ha’api’ira’a ’e te hōʼē hōhoʼa nō Iesu Mesia i roto. E tā’amu i te hō’ē tāreta ma te pāpa’ihia i ni’a iho « Ioane 3:16 » ʼe e parau atu i te mau tamariʼi ē, teie te hōʼē tāpaʼo faʼaʼite e aha rā te taoʼa aroha. E taiʼo i te Ioane 3:16 ʼe te mau tamariʼi, ʼe e ani atu ia rātou ’ia ʼimi e aha ra te taoʼa aroha ʼe e tātatara atu i te reira. Nō te aha te Atua i tōno mai ai i tāna Tamaiti ?
-
E tauturu i te mau tamariʼi ’ia faʼaoti i teie pereota : « ʼUa haere mai Iesu Mesia i te fenua nei nō te . » E faʼaʼite i muri iho i te mau hōhoʼa e au i te tusia tāraʼehara, te pohe, ʼe te tiʼafaʼahouraʼa o te Faʼaora (hiʼo Buka hōho’a nō te ’evanelia, N°56–59), ʼe e parau poto noa mai nō niʼa i teie mau ʼohipa i tupu. E nehenehe ato’a ’outou e hīmene i te hō’ē hīmene nō ni’a i te tumu Iesu i haere mai ai i te fenua nei, mai te hīmene « Il envoya son fils aimé » (Chants pour les enfants, 20–21). ’A fa’a’ite i tō ’oe ’itera’a pāpū nō ni’a ia Iesu Mesia ’e nō te mea tāna i rave nō ’oe.
Ha’api’i i te ha’api’ira’a tumu : Te mau tamari’i pa’ari a’e
Mataio 1:18–25 ; 2:1–12 ; Luka 1:26–38 ; 2:1–20
ʼUa haere mai Iesu Mesia i niʼa i te fenua nei mai te hōʼē ʼaiū.
Nāhea ’oe e nehenehe ai e tauturu i te mau tamariʼi ’ia faʼatumu atu i niʼa ia Iesu Mesia i te Noera ?
Te mau ’ātivite e au
-
E ani i te hōʼē o te mau tamariʼi ʼia taiʼo nō niʼa i te mau ʼohipa tei tupu i te fānauraʼa o te Faʼaora (’a hi’o i te Mataio 1:18–25 ; 2:1–12 ; Luka 1:26–38 ; 2:1–20). E ani i te tahi atu mau tamariʼi, te tahi i muri i te tahi, ’ia pāpaʼi i te mau hōhoʼa i niʼa i te tāpura nō te mau mea tā te mau pāpaʼiraʼa moʼa e faʼaʼite mai ra. E aha tā teie mau ʼāʼamu e haʼapiʼi mai nei ia tātou nō niʼa ia Iesu Mesia ?
-
E ani i te mau tamariʼi ʼia pāpaʼi mai i niʼa i te mau ʼapi parau i te mau mea e nehenehe tā rātou e rave nō te tauturu ia rātou ʼia faʼatumu i niʼa i te Faʼaora i te tau Noera. (E nehenehe rātou e fāri’i i te mau mana’o nō roto mai i te video « Good Tidings of Great Joy: The Birth of Jesus Christ [E parau maita’i ’o tē riro ’ei oa’oara’a : Te fānaura’a o Iesu Mesia] » i ni’a ia ChurchofJesusChrist.org.) ’A ani ia rātou ’ia fa’a’ite mai i tā rātou i pāpa’i. E fa’aitoito i te mau tamari’i ’ia ’āfa’i i te mau ’api parau i te fare ’e ’ia rave ’e tō rātou ’utuāfare i te mau mana’o tā rātou i pāpa’i i ni’a i te mau ’api parau.
-
E hīmene i te mau hīmene Noera nō niʼa i te Faʼaora (hiʼo Chants pour les enfants, 36–54 ; Te mau hīmene, N°118–121), ʼe e ani i te mau tamariʼi ’ia faʼaʼite mai i te hōʼē rēni ʼaore rā hō’ē pereota au-roa-hia e rātou i roto i te mau hīmene.
Maoti Iesu Mesia e ti’a ai iāʼu ʼia ora faʼahou i pīha’i iho i tōʼu Metua i te ao ra, ’ia tae i te hōʼē mahana.
Nāhea ’oe e tauturu ai i te mau tamariʼi ’ia hiʼo i te mea tā rātou i haʼapiʼi mai i teie matahiti ʼe ’ia hāro’aro’a nō te aha e tītauhia Iesu Mesia i roto i tō rātou oraraʼa ?
Te mau ’ātivite e au
-
E pāpaʼi i niʼa i te hō’ē tuha’a ’api parau ʼO vai ’o Iesu Mesia ? ʼe i ni’a i te tahi atu Nō te aha ʼoia i haere mai ai i te fenua nei ? ʼe e tāʼamu haere i te reira i niʼa i te mau papaʼi ato’a o te piha haʼapiʼiraʼa. E ani i te tamariʼi tātaʼitahi ’ia taiʼo i te hōʼē o teie mau pāpaʼiraʼa moʼa : Mataio16:15–16 ; Ioane 3:16 ; 1 Nephi 10:4 ; Mosia 3:8 ; Alama 7:10–13 ; 3 Nephi 27:14–15. E ani i te mau tamari’i ’ia ’imi i te mau pāhonora’a, i roto i te mau pāpa’ira’a mo’a tā rātou i tai’o, nō nā uira’a e piti i ni’a i te mau papa’i. E ani ia rātou ʼia pāpaʼi i tā rātou mau pāhonoraʼa ʼe ʼia tāʼamu i te reira i niʼa i te papaʼi i pīha’i iho i te uiraʼa tano. Nāhea tātou e fa’a’ite ai i tō tātou māuruuru nō te mea tā te Fa’aora i rave nō tātou ?
-
E ani i te mau tamariʼi ʼia pāpaʼi i niʼa i te tāpura i te mau iʼoa ʼe ’aore rā te mau tiʼaraʼa atoʼa o Iesu ’o tā rātou e nehenehe e feruri mai (hiʼo i te Arata’i nō te mau pāpa’ira’a mo’a, « Iesu Mesia »). E aha tā teie mau iʼoa e haʼapiʼi mai nei ia tātou nō niʼa ia Iesu Mesia ʼe tāna misiōni ? Nō te aha tātou e hinaʼaro ai ia Iesu Mesia i roto i tō tātou oraraʼa ? Nō te tauturu ʼia pāhono i teie uiraʼa, e faʼaʼite i te video « Why We Need a Savior—A Christmas Message about Our Savior Jesus Christ [Nō te aha tātou e hinaʼaro ai i te hōʼē Faʼaora—E poroʼi Noera nō niʼa i tō tātou Faʼaora ’o Iesu Mesia] » (ChurchofJesusChrist.org).
Fa’aitoito i te ha’api’ira’a i te fare
E faʼaitoito i te mau tamariʼi ’ia ʼimi hōʼē aʼe rāveʼa nō te tāvini i te tahi ta’ata ʼē ʼaore rā ’ia haʼafātata atu ia Iesu Mesia i teie Noera.
Ha’amaita’i i tā tātou ha’api’ira’a
E ani i te mau tamari’i ’ia fa’a’ite mai i te mea tā rātou e ha’api’i nei. E nehenehe te mau tamari’i e fa’atupu i te hō’ē fa’aurura’a pūai nō te maita’i i roto i tō rātou ’utuāfare. E fa’aitoito i te mau tamariʼi tā ’oe e haʼapiʼi ra ’ia faʼaʼite i tō rātou ʼutuāfare i te hō’ē mea tā rātou i ʼapo mai i te Paraimere. (Hi’o Ha’api’ira’a mai tā te Fa’aora, 30.)