Christ Preaching in the Spirit World [Tē poro ra ’o Iesu Mesia i te ’evanelia i roto i te Ao Vārua], nā Robert T. Barrett

20–26 nō Novema

1 ’e 2 Petero

« E ’oa’oa na i te ’oa’oa e’ita e ti’a ’ia parau ra, ’e te ’ī ho’i i te maita’i »

E haʼamata i tā ’oe tuatāpapara’a i te 1 ’e te 2 Petero nā roto i te pure. E haʼamanaʼo ē, tā ’oe faʼaineineraʼa maitaʼi roa aʼe nō te haʼapiʼi e tae mai ïa nā roto i tā ’oe iho taiʼoraʼa ʼe te taiʼoraʼa e tō te ʼutuāfare.

Tītau i te mana’o

E fa’a’ite i te hōhoʼa nō Petero i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare, ’e e ani i te mau tamari’i ’ia faʼaʼite mai ia ’oe i te tahi mea tā rātou i ʼite nō ni’a ia Petero. E faʼahaʼamanaʼo ia rātou ē, ’o Petero te faʼatere o te ʼĒkālesia i muri aʼe i tō Iesu tiʼafaʼahouraʼa mai, ʼe e tātara atu ē, te 1 Petero ’e te 2 Petero e mau rata ïa nāna i te mau melo o te ʼĒkālesia i tōna ra tau.

Ha’api’i i te ha’api’ira’a tumu : Te mau tamari’i ’āpī

1 Petero 1:6–7 ; 3:14

E nehenehe tāʼu ʼe ʼoaʼoa i roto i te mau tau fifi.

E feruri e nāhea ’oe i te haʼapiʼi i teie mau ʼīrava ’o tē tauturu i te mau tamariʼi ’ia fāriu atu i te Faʼaora ’ia faʼaruru anaʼe rātou i te ’ati.

Te mau ’ātivite e au

• E tauturu i te mau tamari’i ’ia feruri i te hi’ora’a nō te mau ’ohipa rave ’atā tā Iesu i fa’aruru, mai te fa’ao’ō’ora’ahia. E haʼamāramarama atu ē e faʼaruru tātou i te mau taime fifi i roto i tō tātou oraraʼa. E taiʼo ʼāmui i te 1 Petero 1:6–7 ; 3:14 ʼe e faʼaʼite atu i te hō’ē ’ohipa i tupu ’a faʼaruru ai ’oe i te hōʼē « tāmataraʼa nō tō ʼoutou faʼaroʼo » ’e ’ua tauturu te Fa’aora ia ’oe ’ia ’ite i te ’oa’oa. ʼAore rā e nehenehe ’oe e faʼaʼite atu i te pure a Iosepha Semita i roto i te fare tāpe’ara’a nō Liberty ʼe te tāmāhanahanaraʼa tā te Atua i fa’atae i ni’a iāna (hiʼo Te Haʼapiʼiraʼa Tumu ʼe te mau Fafaura’a 121:1–8 ; 123:17).

Joseph Smith in Liberty Jail [Iosepha Semita i roto i te fare tāpe’ara’a nō Liberty], nā Greg K. Olsen

• E fa’a’ite i te hō’ē hōho’a e fa’a’ite ra ia Iesu ’e i te tahi atu mau ta’ata (e rave rahi i roto i te Buka hōho’a nō te ’evanelia mai te reira ato’a i roto i te Mai, pe’e mai—nō te ta’ata hō’ē ’e te ’utuāfare). E ani i te mau tamari’i ’ia ’imi ia Iesu i roto i te hōho’a. ’A fa’a’ite pāpū ē, mai te mea e hi’o tātou i ni’a i te Fa’aora, e nehenehe tāna e tauturu ia tātou ’ia ’ite i te ’oa’oa i roto i tō tātou orara’a.

1 Petero 2:9–12

Tē hina’aro nei tō tātou Metua i te ao ra ’ia riro vau ’ei hi’ora’a maita’i nō vetahi ’ē.

ʼUa haʼapiʼi mai ’o Petero ē e « nunaʼa tātou nā te Atua » ʼe e nehenehe tā tātou mau ʼohipa maita’i e « ’ārue i te Atua. »

Te mau ’ātivite e au

• E faʼaʼite i te parau nō te tahi mau mea ta’a ē roa i te tahi atu mau mea e pātuatini nei ia rātou, ʼaore rā e fa’a’ite i te hōhoʼa nō taua mau mea ra. ʼEi hiʼoraʼa, e mea ta’a ’ē roa te hōʼē hiero i te mau fare atoʼa nā pīha’i iho ʼaore rā te hōʼē mouʼa ’o tē tiʼa mai i i roto i te ’āfa’a. E haʼamāramarama ē, ’ia haʼapaʼo anaʼe tātou i te mau faʼaueraʼa, e tiʼa ta’a ’ē mai tātou ʼe e nehenehe te tahi atu mau taʼata e ʼite i tō tātou hiʼoraʼa. E paraparau i te tahi « mau ʼohipa maitaʼi » tā ’oe i ʼite i te mau tamariʼi i te raveraʼa. E haʼamāramarama ē, e « ’ārue te mau ʼohipa maitaʼi i te Atua »—e tauturu rātou ia vetahi ’ē ʼia ha’apuai i tō rātou here i te Atua ʼe ’ia hia’ai e tāvini iāna.

• E rave i te ’api ’ātivite ’e te mau tamari’i. E aha te huru o te mau taʼata tā rātou i ʼite i roto i te hōhoʼa i te ’ārueraʼa i te Atua ?

1 Petero 3:18–20 ; 4:6

E haʼapiʼi mai te mau vārua i te ao vārua i te ʼevanelia.

I muri aʼe i tōna poheraʼa, ʼua haere tiʼa atu Iesu i te ao vārua ʼe ʼua tono atu i te mau vārua parautiʼa nō te haʼapiʼi i te tahi atu mau vārua tei ʼore ā i fāriʼi i te ʼevanelia.

Te mau ’ātivite e au

• E faʼaʼite atu i te mau tamariʼi nō ni’a i te hō’ē ta’ata tā ’oe i ’ite ē ’ua pohe. E haʼamāramarama atu ē ’ia pohe anaʼe te taʼata, e faʼaruʼe tō rātou vārua i tō rātou tino ʼe haere atu ai i roto i te ao vārua. E taiʼo i te 1 Petero 3:19 ʼe e haʼamāramarama ē i te taime i pohe ai Iesu, ʼua haere atu ’oia i roto i te ao vārua. I reira, ʼua ani ʼoia i te mau vārua parautiʼa ’ia haʼapiʼi i te ʼevanelia i te tahi atu mau vārua tei ʼore ā i fāriʼi i te ʼevanelia (hiʼo Te Haʼapiʼiraʼa Tumu ʼe te mau Fafaura’a 138:30).

• ’A fa’a’ite i te hoho’a nō te hō’ē hiero. ’A fa’ata’a i te mau tamari’i ē, ’ia pa’ari ana’e rātou, e nehenehe rātou e haere i te hiero ’e ’ia bāpetizohia nō tō rātou mau tupuna tei ’ore i bāpetizohia ’a ora ai rātou i ni’a i te fenua nei. E tauturu i te mau tamariʼi ’ia faʼaʼī i te hōʼē tumu rāʼau ’utuāfare ’ōhie (hiʼo i te hōʼē hōhoʼa i roto i te « Mau ’api fa’a’ū nō te ’ā’amu ’utuāfare », ChurchofJesusChrist.org).

Ha’api’i i te ha’api’ira’a tumu : Te mau tamari’i pa’ari a’e

1 Petero 3:12–17 ; 4:13–14, 16

E nehenehe tāʼu e ʼite i te ʼoaʼoa ʼe te hau noa atu e tau fifi.

ʼUa fa’aruru paha tā ’oe mau pīahi i te tahi huru tāhitohitoraʼa ʼaore rā faʼaoʼōʼoraʼa nō te mau mea tā rātou e tiʼaturi ra. E tauturu teie mau ʼīrava ia rātou i roto i taua mau taime ra.

Te mau ’ātivite e au

• E haʼapoto i te tahi mau ʼāʼamu nō niʼa i tō Iesu hāmani-ʼino-raʼa-hia, ʼaore rā e ani i te mau tamari’i ’ia tai’o i te reira—ʼa hiʼo, ʼei hiʼoraʼa, Mataio 12:9–14 ʼaore rā Luka 22:47–54. E ani i te mau tamariʼi ē, ʼua tāhitohitohia a’enei rātou ʼaore rā ʼua faʼaʼoʼōʼohia nō te mea tē ora ra rātou i te mau haʼapiʼiraʼa a Iesu Mesia. E aha te mana’o i tupu mai ? E taiʼo ʼāmui i muri iho i te 1 Petero 3:12–14 ; 4:13–14,16, ʼe e ani i te mau tamariʼi ’ia imi i te mea tā Petero i parau nō niʼa i te māuiuiraʼa « nō te maitaʼi o te parautiʼa. » Nō te aha e nehenehe noa tātou ’ia ʼoaʼoa noa atu ē tē faʼaoʼō’o ra te taʼata ia tātou nō te raveraʼa i te mea tiʼa ?

• E faʼaʼite i te hōʼē ’ohipa i tupu ē ’ua ʼite ’oe i te ʼoaʼoa ʼaore rā i te hau i roto i te hōʼē tāmataraʼa, ʼaore rā e faʼaʼite e mea nāhea tō te peropheta Iosepha Semita ʼiteraʼa i te hau ’a vai ai ʼoia i roto i te fare tāpeʼaraʼa nō Liberty (hiʼo i te Te Ha’api’ira’a Tumu ’e te mau Fafaura’a 121:1–8 ; 123:17). Nāhea tātou e ʼite ai i te ’oa’oa ’e te hau i roto i te Mesia i roto i tō tātou mau tāmatara’a ?

1 Petero 3:15

E nehenehe au e vai ineine noa nō te faʼaʼite atu i te ʼevanelia.

E fāri’i te mau tamariʼi tā ’oe e haʼapiʼi nei i te mau taime e rave rahi i roto i tō rātou oraraʼa nō te pāhono atu i te mau uiraʼa a te taʼata nō niʼa i tō rātou faʼaroʼo. E feruri e aha tā ’oe e rave nō te tauturu ia rātou « ’ia vai ineine i te mau taime ato’a nō te hōro’a i te hōʼē pāhonoraʼa. »

Te mau ’ātivite e au

• E faʼaʼite atu i te taime ʼua ani mai te tahi taʼata ia ʼoe i te hōʼē uiraʼa nō niʼa i te ʼĒkālesia, ʼe e faʼaʼite ato’a ē ’ua ’ite ānei ’oe ē ʼua ineine ānei nō te pāhono atu. E ani i te mau tamariʼi ’ia paraparau i te mau taime i ani mai ai te mau taʼata ia rātou i te mau uiraʼa nō niʼa i te ʼĒkālesia. E taiʼo ʼāmui i te 1 Petero 3:15. Nāhea tātou e peʼe ai i te aʼo a Petero i roto i teie nei ʼīrava ?

• E tauturu i te mau tamari’i ’ia feruri i te tahi mau uira’a tā te mau ta’ata e nehenehe e ui nō ni’a ia Iesu Mesia, ’aore rā nō ni’a i tāna ’Ēkālesia. E vaiiho i te mau tamariʼi, te tahi i muri i te tahi, ’ia tātara mai e nāhea rātou i te pāhono atu i teie mau uiraʼa ’ia nehenehe rātou « ’ia vai ineine noa. » E hōro’a mai te mau Hīro’a Fa’aro’o i te mau parau mau pāpū tā te mau tamari’i e nehenehe e fa’a’ohipa nō te pāhono i te mau uira’a nō ni’a i te Ēkālesia.

1 Petero 3:18–20 ; 4:6

E haʼapiʼi mai te mau vārua i te ao vārua i te ʼevanelia.

’Ia pohe ana’e te feiā parauti’a, e haere rātou i roto i te ao vārua nō te ha’api’i i te ’evanelia i te feiā tei ’ore i fāri’i i te reira ’a ora ai rātou i ni’a i te fenua nei.

Te mau ’ātivite e au

• E pāpaʼi i niʼa i te tāpura i te hōʼē menemeneraʼa ’e te hōʼe rēni nā rōpū. E pāpaʼi Paradaiso nō te vārua i niʼa i te hōʼē ʼāfaraʼa o te menemenera’a ’e Fare tāpe’ara’a nō te vārua i ni’a i te tahi atu ʼāfaraʼa. E ani i te hōʼē tamariʼi ʼia taiʼo i te 1 Petero 3:18–20 ; 4:6 (hiʼo 1 Petero 4:6, faʼahororaʼa a, nō te mau tauiraʼa i roto i te ’Īritiraʼa a Iosepha Semita). E haʼamāramarama atu ē i te taime i pohe ai Iesu, ʼua haere atu ʼoia i te paradaiso nō te vārua. ʼUa faʼaue ʼoia i te mau vārua parautiʼa i reira ’ia haʼapiʼi atu i te ʼevanelia i te mau vārua i te fare tāpeʼaraʼa vārua.

• E ani i te hōʼē metua ʼaore rā i te hōʼē taeaʼe paʼari aʼe o te hōʼē tamariʼi ’ia faʼaʼite mai nō niʼa i te haereraʼa i te hiero ʼe te raveraʼa i te mau ’ōro’a nō te hōʼē o tō rātou mau tupuna.

• E ani i te mau tamariʼi ’ia faʼaʼī i te hōʼē tumu rāʼau ʼutuāfare ’ōhie (hiʼo i te hōʼē hōhoʼa i roto i te « Mau ’api fa’a’ū nō te ’ā’amu ’utuāfare », ChurchofJesusChrist.org).

Fa’aitoito i te ha’api’ira’a i te fare

E ani i te mau tamariʼi ʼia faʼaʼite i tā rātou tumu rāʼau ʼutuāfare i te mau melo o tō rātou ʼutuāfare ʼe e ani ia rātou ’ia tauturu i te tuʼu atu i te mau iʼoa i niʼa i te reira tumu rā’au.

Ha’amaita’i i tā tātou ha’api’ira’a

’A ’imi ’ia hāro’aro’a i tā ’oe mau pīahi. ʼUa mātau ’oe i tā ’oe mau pīahi, nō reira e taui i te mau manaʼo i roto i teie arata’i ha’api’ira’a mai te mea e tītauhia, nō te pāhono atu i tō rātou mau hinaʼaro. E nehenehe ’outou e faʼa’ohipa i te mau huru ’ātivite ato’a tei hōroʼahia i roto i teie arata’i ha’api’ira’a, e ʼere te mau ’ātivite noa tei pāpaʼihia nō te fāito matahiti tā ’oe e haʼapiʼi nei. (Hi’o Ha’api’ira’a mai tā te Fa’aora, 7.)