Iesu e paraparau ra i te hōʼē tamariʼiriʼi

18–24 nō Tetepa

2 Korinetia 8–13

« ’O te ta’ata hōro’a noa tā te Atua e hina’aro »

E riro te pāpa’ira’a i te mau mana’o pae vārua e tae mai ’ei tauturura’a nō te ha’amana’o i tā ’outou e ha’api’i mai i roto i te tuatāpapara’a pāpa’ira’a mo’a. E nehenehe e hāmani i te hō’ē buka tuatāpapara’a, e tāpa’o i te tahi mau parau i te hiti ’api o te mau pāpa’ira’a mo’a, e tu’u i te tahi parau i roto i tā ’outou fa’anahora’a vaira’a buka ’evanelia ’aore rā e haruharu roa i tō ’outou mau mana’o.

Pāpa’i i te mau mana’o e tae mai

E aha tā ’outou e rave ’āhani tē fa’aro’o ra ’outou ē, te fifi ra te tahi ’āmuira’a feiā mo’a nō te hō’ē vāhi i te veve ? ’O te ’ohipa ïa tā Paulo i fa’ata’a mai i te feiā mo’a nō Korinetia i roto i te 2 Korinetia 8–9. ’Ua vai tōna tīa’ira’a ē, e haere iāna e ani i te feiā mo’a nō Korinetia ’ia hōro’a i te tahi pae o tā rātou ’auhune i te feiā mo’a i roto i te ’ati. Ta’a ’ē noa atu te tītaura’a ’ia hōro’a, tē vai nei i roto i te mau parau a Paulo i te parau mau rahi nō ni’a i te ’ohipa hōro’a : « E hōro’a te ta’ata ato’a i tāna i ’ōpua i roto i tōna ’ā’au, ’eiaha ma te nounou, ’e mai te mea ē nō te tītau : ’o te ta’ata hōro’a [noa] ho’i tā te Atua i hina’aro » (2 Korinetia 9:7). I tō tātou nei ’anotau, tē vai noa nei ā te feiā mo’a nā te ao nei i hina’aro i te tauturu. I te tahi taime, te mea rahi roa a’e tā tātou e nehenehe e rave nō rātou, ’o te ha’apaera’a ïa i te mā’a ’e te hōro’ara’a i te ō ha’apaera’a mā’a. I te tahi taime, e nehenehe tā tātou e hōro’a roa atu i roto i te rima. Ta’a ’ē noa atu tā tātou huru fa’atusiara’a, e mea maita’i ’ia hi’opo’a tātou i te mau mana’o e tūra’i nei ia tātou ’ia hōro’a. E fa’a’itera’a ānei tā tātou mau fa’atusiara’a nō tō tātou here ? Inaha ho’i, nā te here e fa’ariro nei i te hō’ē ta’ata hōro’a ’ei ta’ata ’oa’oa.

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

2 Korinetia 8:1–15 ; 9:5–15

E nehenehe tā’u e ’ōpere ma te ’oa’oa i tā’u ra, nō te ha’amaita’i i te feiā veve ’e te nava’i ’ore.

E rave rahi roa ho’i ta’ata nava’i ’ore nā te ao nei. Nāhea pa’i tātou e roa’a ai i te fa’atupu i te hō’ē mea ta’a ’ē mau ? ’Ua hōro’a Elder Jeffrey R. Holland i teie parau a’o : « E ta’ata moni tātou ’e ’aore rā e ta’ata veve, e ti’a ia tātou ’ia ‘rave i te vāhi e ti’a ia tātou’, ’ia nava’i ’ore ana’e te tahi ta’ata [hi’o Mareko 14:6, 8] […] E tauturu mai [te Atua] ’e e arata’i mai ’oia ia ’outou i roto i te mau ’ohipa aroha nō te ti’ara’a pipi, mai te mea ē, e hina’aro mau ’outou, e pure ’outou ’e e ’imi ho’i ’outou i te mau rāve’a nō te ha’apa’o i te hō’ē fa’auera’a tāna i hōro’a mai ia tātou, fa’ahou ’e fa’ahou ā » (« E ’ere ānei tātou pā’āto’a e mau ta’ata tao’a ’ore ra ? », Liahona, Novema 2014, 41).

E tai’o i te 2 Korinetia 8:1–15 ; 9:6–15, ma te tāpa’o i te mau parau tumu tā Paulo i ha’api’i nō ni’a i te aupurura’a i te feiā veve ’e te nava’i ’ore. E aha te mana’o e tae mai ia ’oe nō ni’a i te parau a Paulo ? E nehenehe tā ’oe e pure nō te arata’ira’a nō ni’a i te mea tā ’oe e nehenehe e rave nō te ha’amaita’i i te tahi ta’ata nava’i ’ore. E hi’o maita’i ē, e pāpa’i ’oe i te mau mana’o ato’a e tae mai ’e e ’ohipa ’oe mai te au i te reira.

Hi’o ato’a Mosia 4:16–27 ; Alama 34:27–29 ; Russell M. Nelson, « Te piti o te ture rahi », Liahona, Nov. 2019, 96–100 ; Henry B. Eyring, « E ’ere ānei teie i te ha’apaera’a mā’a hina’aro nā’u ra ? », Liahona, Mē 2015, 22–25.

2 Korinetia 11:1–6, 13–15 ; 13:5–9

« E ’imi māite ia ’outou iho i tō ’outou fa’aro’o ».

I teie mahana, mai i te tau o Paulo, e mau mea e ’imi nei i te arata’i ’ē ’ia tātou i « te rōtahi noa e au i te Mesia nei » (2 Korinetia 11:3). Nō reira, e mea faufa’a rahi mau ’ia rave mai tā Paulo i parau : « E ’imi māite ia ’outou iho i tō ’outou fa’aro’o » (2 Korinetia 13:5). E nehenehe e ha’amata i teie ’ohipa nā roto i te ferurira’a i te aura’a nō te parau « ’outou iho i tō ’outou fa’aro’o ». E nāhea ’oe i te ’ite ē, tei roto ’oe i te fa’aro’o ? ’A ’imi i te mau rāve’a nō ’oe nō te hi’opo’a ia ’oe iho.

I roto i tā ’oe hi’opo’ara’a, e nehenehe ato’a ’oe e feruri i te parau nō « te rōtahi noa e au i te Mesia nei » (2 Korinetia 11:3). ’Ua nāhea ’oe i te ’itera’a i te ’ōhie i roto i te Mesia ’e tāna ’evanelia ? Nāhea tō ’oe ferurira’a e nehenehe ai e « fa’a’inohia […] ’ia ’ore atu te rōtahi noa » ? E aha te parau tauturu tā ’oe e ’ite ra i roto i te 2 Korinetia 11:1–6, 13–15 ?

E hi’o ato’a i teie parau a’o a te peresideni Dieter F. Uchtdorf : « Mai te peu tē mana’o ra ’outou ē, ’aita te ’evanelia e haere maita’i ra nō ’outou, tē ani manihini nei au ia ’outou ’ia ho’i i muri, hi’o i tō ’outou orara’a mai te hō’ē vāhi teitei a’e e fa’a’ōhie i tō ’outou hi’oraa i te ti’ara’a pipi. ’A fa’atumu i ni’a i te mau ha’api’ira’a tumu, te mau parau tumu ’e te fa’a’ohipara’a ’ōhie o te ’evanelia. Tē parau fafau nei au ē, e arata’i ’e e ha’amaita’i mai te Atua ia ’outou i ni’a i tō ’outou ’ē’a ’ia tae i te orara’a hope roa, ’e e haere maita’i roa te ’evanelia nō ’outou » (« Tē haere maita’i roa ra ! », Liahona, Nov. 2015, 22).

2 Korinetia 12:5–10

’Ua nava’i te maita’i rahi o te Fa’aora nō te tauturu iā’u ’ia ’ite i te pūai i roto i tō’u paruparu.

’Aita tātou i ite e aha te « tara i roto i [te] tino » tā Paulo i parau, e mau tara rā tō tātou pā’āto’a ’o tā tātou i hina’aro i te Atua ’ia tātara mai roto atu i tō tātou orara’a. ’A feruri i tō ’oe mau tara ’a tai’o ai i te 2 Korinetia 12:5–10, ’e ’a feruri i te mea tā ’oe e ha’api’i ra nō ni’a ia Iesu Mesia i roto i teie mau ’īrava. E aha tā Paulo i ha’api’i i roto i teie mau ’īrava nō ni’a i te mau tāmatara’a ’e te paruparu ? E aha te aura’a nō ’oe te parau ē, « tō’u nei maita’i ’ātīrē ïa tā ’oe » ?

Hi’o ato’a Mosia 23:21–24 ; 24:10–15 ; Etera 12:27 ; Moroni 10:32–33.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

2 Korinetia 8–9.E aha tā tātou e ’ite ra i roto i teie mau pene e fa’auru nei ia tātou ’ia toro i te rima i te feiā veve ’e te nava’i ’ore ? E taime tano paha ïa nō te fa’aineine te ’utuāfare i te hō’ē ’ohipa haere tauturu i te tahi ta’ata nava’i ’ore.

2 Korinetia 9:6–7.’Ua mātau ānei tō ’outou ’utuāfare i te hō’ē ta’ata e nehenehe e parau ē, e « ta’ata hōro’a noa ho’i » ? Nāhea tātou e fa’ariro ai i tā tātou tāvinira’a ta’ata ’ei ’ohipa ’oa’oa atu ā ? E nehenehe te mau tamari’i o te ’utuāfare e hāmani i te tahi mau tāreta e parau ra « e ta’ata hōro’a noa vau ». E nehenehe ’outou e ha’afeti’a i te mau melo o te ’utuāfare i teie mau tāreta i te mau taime ato’a e ’ite ’outou ia rātou i te tāvinira’a i te ta’ata ma te ’oa’oa.

2 Korinetia 10:3–7.Nāhea ’outou i te ha’api’i i tō ’outou ’utuāfare nō ni’a i tā tātou « tama’i » i te ’ino ? E au ānei tō ’outou ’utuāfare e patu i te hō’ē papa’i ’aore rā hō’ē pare ma te tahi pārahira’a ’e te tahi ’ahu ta’oto ? E nehenehe te reira e fa’atupu i te ’āparaura’a nō ni’a i te rāve’a e vaiiho ai i te mau mea e arata’i ’ē nei ia tātou i te Atua, ’e te « fa’atītīra’a atu i te mau mana’o ato’a i te fa’aro’o i te Mesia ra ». E aha te mau « mauiha’a tama’i » pae vārua tā tātou e fa’a’ohipa nei nō te ha’avī i tō tātou nei mau mana’o ? (hi’o Ephesia 6:11–18).

2 Korinetia 11:3.E aha tā tō ’outou ’utuāfare e nehenehe e rave nō te fa’atumu rahi atu ā i ni’a i te « rōtahi noa e au i te Mesia nei » ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ‘Donne’, dit le ruisseau », Chant pour les enfants, 116.

Ha’amaita’i i tā’u iho tuatāpapara’a pāpa’ira’a mo’a

Tāpa’o i te mau mana’o e tae mai. ’Ua nā ’ō Elder Richard G. Scott : « Te ’ite i tāpa’o-maita’i-hia e ’ite ïa e vai noa mai i te taime e hina’arohia […] [Nā te tāpa’ora’a i te mau arata’ira’a pae vārua] e riro ai ’outou i te fāri’i i te tahi atu ā māramarama » (« Acquiring Spiritual Knowledge », Ensign, Nov. 1993, 88 ; hi’o ato’a Ha’api’ira’a mai tā te Fa’aora, 12, 30).

e feiā ’āpī e rave ra i te hō’ē ’ohipa tōtauturu

« E hōro’a te ta’ata ato’a i tāna i ’ōpua i roto i tōna ’ā’au, ’eiaha ma te nounou, ’e mai te mea ē nō te tītau : ’o te ta’ata hōro’a noa ho’i tā te Atua e hina’aro » (2 Korinetia 9:7).