4–10 nō Tetepa

1 Korinetia 14–16

« E ʼere ho’i te Atua i te tumu nō te ʼāno’i noa, nō te hau rā »

Pāpa’i i te mau mana’o e tae mai ’a tai’o ai ’outou i te 1 Korinetia 14–16. E pure nō ni’a i te mea tā te Vārua i ha’api’i ia ’outou ma te ui i te Metua i te ao ra ē, tē vai ra ānei te tahi atu mea tāna e hina’aro ia ’outou ’ia ha’api’i mai.

Pāpa’i i te mau mana’o e tae mai

Nō te mea ho’i ē e mea huru ’āpī te ’Ēkālesia ’e tō te reira mau ha’api’ira’a tumu i Korinetia, e nehenehe iho ā ïa e feruri ē, ’ua fa’aruru ato’a te feiā mo’a nō Korinetia i te ta’a ’ore. ’Ua ha’api’i Paulo ia rātou i te parau mau niu nō te ’evanelia : « I pohe te Mesia i tā tātou nei hara […] ’e i tanuhia ho’i ’oia, e ti’a fa’ahou mai ra i te ru’i toru » (1 Korinetia 15:3–4). ’Āre’a rā ’oi’oi roa te tahi mau melo i te ha’amata i te ha’api’i atu ē, « ’aore e ti’afa’ahoura’a tō tei pohe » (1 Korinetia 15:12). ’Ua tāparu hua atu Paulo ia rātou ’ia « tāpe’a māite ā » i te mau parau mau tei ha’api’ihia ia rātou (1 Korinetia 15:2). ’Ia fa’aruru tātou i te titotitora’a mana’o nō ni’a i te mau parau mau o te ’evanelia, e mea maita’i ’ia ha’amana’o tātou ē : « E ’ere ho’i te Atua i te tumu nō te ’āno’i noa, nō te hau rā » (1 Korinetia 14:33). Nā te fa’aro’ora’a i te mau tāvini tā te Fatu i fa’ata’a ’e te tāpe’a-noa-ra’a i te mau parau mau ’ōhie tā rātou e ha’api’i tāmau nei e tauturu ia tātou ’ia ’ite i te hau ’e ’ia « mau pāpū i te fa’aro’o » (1 Korinetia 16:13).

Mau mana’o nō tā’u iho tuatāpapara’a pāpa’ira’a mo’a

1 Korinetia 14

E nehenehe tā’u ’ia tītau i te hōro’a nō te tohura’a.

E aha te hōro’a nō te tohura’a ? E ’aravihi ānei nō te tohu i te ananahi ? Nā te mau peropheta noa ānei te reira ? ’Aore rā ’o te mau ta’ata ato’a tē nehenehe e fāri’i i te reira hōro’a ?

’A feruri i teie mau uira’a ’a tuatāpapa ai i te 1 Korinetia 14: 3, 31, 39–40. E nehenehe ato’a ’oe e tai’o i te Apokalupo 19:10 ’e te « Parau tohu, ’ia tohu » i roto i te Arata’i nō te mau pāpa’ira’a mo’a (scriptures.ChurchofJesusChrist.org). ’Ia au i te ha’api’ira’a tā ’oe i ’apo mai, e aha te hōro’a nō te parau tohu nā ’oe ? E aha te aura’a o te parau a Paulo i tōna anira’a i tō Korinetia « ’ia rahi tō [rātou] hina’aro i te [parau tohu] » ? (1 Korinetia 14:39). Nāhea ’oe i te pe’e i teie anira’a ?

Hi’o ato’a Ioela 2:28–29 ; Alama 17:3 ; Te Ha’api’ira’a Tumu ’e te mau Parau Fafau 11:23–28.

1 Korinetia 14:34–35

E aha te parau nō terā fa’ahitira’a nō ni’a i te mau vahine i roto i teie mau ’īrava, i teie mahana ?

I te tau o Paulo, e mea ta’a ’ē te parau nō te ’āmuira’a te mau vahine i roto i te mau ’ohipa o te sōtaiete, nā reira ato’a te mau rurura’a a te ’Ēkālesia. Ta’a ’ē noa atu te aura’a o te mau ha’api’ira’a i roto i te 1 Korinetia 14:34–35 i te tau o Paulo ra, ’eiaha e mana’ohia ē ’aita tā te vahine parau i roto i te mau ’āparaura’a ’e te fa’aterera’a i roto i te ’Ēkālesia i teie mahana. ’Ua parau Russell M. Nelson i te mau vahine o te ’Ēkālesia i teie mahana : « Tē tītau nei mātou i tō ’outou pūai, tō ’outou fa’afāriura’a, tō ’outou ti’aturi, tō ’outou ’aravihi, tō ’outou pa’ari, ’e tō ’outou reo. E’ita te bāsileia o te Atua e hope ti’a roa ’ia ’ore te mau vahine ’o tē rave i te mau fafaura’a mo’a, ’e ’o tē ha’apa’o i te reira, e mau vahine ’o tē nehenehe e paraparau ma te pūai ’e te mana o te Atua ! » (« E reo tāparu i tō’u mau tuahine », Liahona, Novema 2015, 96).

1 Korinetia 15:1–34, 53–58

’Ua noa’a ia Iesu Mesia te rē i ni’a i te pohe.

E parau niu te ti’afa’ahoura’a o Iesu Mesia i roto i te ao keresetiano, e parau te tahi ē, ’āhani ’aita te reira ’aita e ao keresetiano—mai te au i te parau a Paulo, « e ha’avare mau [ïa] tā mātou e a’o nei, ’e e ha’avare ato’a tō ’outou fa’aro’o » (1 Korinetia 15:14). Teie noa rā, e feiā mo’a i Korinetia e ha’api’i ra ē, « ’aore e ti’afa’ahoura’a tō tei pohe » (1 Korinetia 15:12). ’Ia tai’o ’oe i te pāhonora’a a Paulo i roto i te 1 Korinetia 15, ’a rave i te tahi taime nō te feruri e aha te ta’a-’ē-ra’a i roto i tō ’oe orara’a ’āhiri ’aita ’oe i ti’aturi i te Ti’afa’ahoura’a (hi’o 2 Nephi 9:6–19 ; Alama 40:19–23 ; Te Ha’api’ira’a Tumu ’e te mau Fafaura’a 93:33–34). E aha te aura’a o terā parau « ’aita ho’i te Mesia i fa’ati’ahia ra, e mea faufa’a ’ore tō ’outou fa’aro’o » ? (’īrava 17).

E mea tano ato’a ’ia fa’a’ite ē, tē parau nei Paulo nō te bāpetizora’a nō te feiā pohe ’ei tāpa’o fa’a’ite nō te pāpūra’a o te ti’afa’ahoura’a (hi’o 1 Korinetia 15:29). ’Ua nāhea te ’ohipa hiero ’e te ’ā’amu ’utuāfare i te ha’apūaira’a i tō ’oe fa’aro’o i roto i te ha’api’ira’a tumu nō te ti’afa’ahoura’a ?

Hi’o ato’a Te Ha’api’ira’a Tumu ’e te mau Fafaura’a 138:11–37.

1 Korinetia 15:35–54

E mea ta’a ’ē te tino ti’afa’ahou i te tino tāhuti.

’Ua uiui a’enei tō ’oe mana’o ē mai te aha te huru te tino ti’afa’ahou ? Mai tei pāpa’ihia i roto i te 1 Korinetia 15:35, ’ua uiui vetahi nō Korinetia nō ni’a i te reira. E tai’o i te pāhonora’a a Paulo i roto i te mau ’īrava 36–54, ’e e pāpa’i i te mau ta’o ’e te mau parau e fa’ata’a nei i te ta’a-’ē-ra’a i roto i te tino tāhuti ’e te tino ti’afa’ahou. ’A nā reira ai ’oe, e nehenehe e fa’aau i te mau ’īrava 40–42 i Te Ha’api’ira’a Tumu ’e te mau Fafaura’a 76:50–112. E aha te ’āpī o teie heheura’a i te peropheta Iosepha Semita ra, nō tō ’oe māramaramara’a ? (hi’o ato’a ’Īritira’a a Iosepha Semita, 1 Korinetia 15:40). Nō te aha e mea faufa’a teie mau parau mau nō ’oe ?

Hi’o ato’a Luka 24:39 ; Alama 11:43–45 ; Te Ha’api’ira’a Tumu ’e te mau Fafaura’a 88:14–33.

« E ’ana’ana ’ē tō te mahana » (1 Korinetia 15:41).

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1 Korinetia 15:29.Tē ha’api’i nei tātou i roto i te ’īrava29 ē, ’ua rave te feiā keresetiano i tahito ra i te mau bāpetizora’a nō te feiā pohe, mai tā tātou e rave nei. E nāhea tātou i te fa’ata’a atu ia vetahi ’ē i te tumu tātou e bāpetizohia nei nō tō tātou mau tupuna ? (hi’o « What Are Baptisms for the Dead ? [E aha te bāpetizora’a nō te feiā pohe ?] », [video], ChurchofJesusChrist.org). E aha tā tātou, te ’utuāfare, e rave nei nō te fa’afāna’o i te mau ’ōro’a nō te hiero i tō tātou mau tupuna i pohe, e mau ’ōro’a ho’i tei tītauhia nō rātou ?

1 Korinetia 15:35–54.E aha te mau tao’a ’aore rā te mau hōho’a e nehenehe e fa’a’ite i te ’utuāfare nō te tauturu ia rātou ’ia māramarama i te tahi mau parau a Paulo nō ni’a i te ta’a-’ē-ra’a i roto i te tino tāhuti ’e te tino ti’afa’ahou ? ’Ei hi’ora’a, nō te fa’ata’a i te ta’a-’ē-ra’a i roto i te tino tāhuti ’e te tino tāhuti ’ore (hi’o i te mau ’īrava 52–54) e nehenehe e fa’a’ite i te mētara tei tūtae-’āuri-hia ’e te tahi mētara e’ita e tūtae ’āuri. ’Aore rā e nehenehe e fa’aau i te hō’ē mea paruparu i te hō’ē mea pūai (hi’o i te ’īrava 43).

1 Korinetia 15:55–57.E mea au te ’āparaura’a nō ni’a i teie mau ’īrava mai te peu ’ua mātau te ’utuāfare i te hō’ē ta’ata tei fa’aru’e mai. E nehenehe te mau melo o te ’utuāfare e hōro’a i tō rātou ’itera’a pāpū nō te rave-’ē-ra’a Iesu Mesia i « tō te pohe nei tara » (’īrava 56).

1 Korinetia 16:13.’Ei tauturura’a i tō ’outou ’utuāfare e fa’aau ia rātou i teie ’īrava, e nehenehe e pāpa’i i te hō’ē menemene i raro i te repo ’e e parau i te hō’ē melo o te ’utuāfare ’ia « ti’a pāpū » i roto ’a tāpōhia ai tōna mata. I muri iho e tāmata te tahi mau pu’era’a i te tūra’i iāna ’e i te huti mai iāna i rāpae i te menemene. E aha te ta’a-’ē-ra’a mai te peu ’aita te ta’ata i roto i te menemene e tāpōhia te mata ’e ’ua nehenehe iāna « e ara » ? E nāhea tātou nō te « mau pāpū » ’ia fa’ahemahia ana’e tātou ’ia rave i te mau mā’itira’a hape (hi’o ato’a « Stay in the Boat and Hold On ! [’A fa’aea i roto i te pahī ’e ’a tāpe’a maita’i !] », [video], ChurchofJesusChrist.org).

Nō te mau mana’o hau atu nō te ha’api’ira’a i te mau tamari’i, ’a hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’Ua ti’a mai te Fatu ! », Te mau hīmene, N°116.

Ha’amaita’i i tā’u iho tuatāpapara’a pāpa’ira’a mo’a

’Imi i te mau hōho’a. I roto i te mau pāpa’ira’a mo’a e ’ite mai tātou i te mau hōho’a e fa’a’ite mai nāhea te Fatu i te rave i tāna ’ohipa. E aha te mau hōho’a ’ohipa e ’itehia i roto i te 1 Korinetia 14 ’o tē tauturu ia tātou ’ia māramarama e nāhea i te fa’atupu i te maita’i te tahi i ni’a i te tahi ?

Why Weepest Thou [E aha ’oe i ’oto ai], © Simon Dewey 2021. Fa’a’ohipahia ma te parau fa’ati’a a Altus Fine Art/www.altusfineart.com