28 nō ’Ātete–3 nō Tetepa

1 Korinetia 8–13

« ’O te tino ’outou nō te Mesia »

’Ia tai’o ’outou ma te pure i te 1 Korinetia 8–13, e paraparau te Vārua Maita’i ia ’outou ma te rāve’a au (hi’o 1 Ari’i 19:11–12). E riro te pāpa’ira’a i teie mau mana’o e tae mai ’ei tauturura’a nō te ha’amana’o i te mana’o i te ’ā’au ’e te mana’o i te ferurira’a, i roto i tā ’outou tuatāpapara’a.

Pāpa’i i te mau mana’o e tae mai

I te tau o Paulo, e ’oire tapiho’ora’a rahi ’e te moni rahi ho’i ’o Korinetia, ’e te feiā e noho i reira, mea nā te mau fenua ato’a ïa o te hau ’ēmēpera Roma. Nō te rau te mau peu ’e te mau ha’apa’ora’a fa’aro’o i reira, ’ua fifi te mau melo o te ’Ēkālesia i Korinetia i te vai hō’ē noa, nō reira Paulo i ’imi ai i te rāve’a nō te tauturu ia rātou ’ia ’ite i te hō’ēra’a i roto i tō rātou ti’aturira’a i te Mesia. ’Ua hau atu teie hō’ēra’a i te vai-hau-noa-ra’a te tahi i te tahi ; ’aita ’o Paulo e ani noa ra ia rātou ’ia fa’a’oroma’i i tō te tahi ’e tō te tahi ta’a-’ē-ra’a. ’Aita, tē ha’api’i nei rā ’oia ē, i te taime e tomo ’outou i roto i te ’Ēkālesia a Iesu Mesia, ’ua « bāpetizohia ho’i [’outou] i roto i te tino hō’ē ra » ’e ’ua tītauhia ho’i te melo tāta’itahi o te tino (1 Korinetia 12:13). ’Ia mo’e te hō’ē melo ra, mai te mo’era’a ïa i te hō’ē melo o te tino, ’ua paruparu fa’ahou atu ïa te tino. ’Ia māuiui te hō’ē melo ra, ’ia māuiui ato’a ïa tātou pā’āto’a e ti’a ai, ’e ’ia rave ho’i tātou i tā tātou tuha’a nō te tāmarū i te reira. I roto i teie huru hō’ēra’a, ’aita te mau ta’a-’ē-ra’a e fā’i-noa-hia, e poihere-ato’a-hia rā te reira, i te mea ho’i ē, ’aita ana’e te mau melo tārēni rau ’e te ’āravihi rau, ’ua ’ere ïa tō tātou nei tino i te tahi mau mea. Nō reira, mai te mea ’ua riro noa na te ’Ēkālesia nō ’outou mai tō ’outou iho fare, ’aore rā, tē uiui ra te mana’o ē, terā mau ānei te vāhi nō ’outou, teie te poro’i a Paulo ia ’outou, e ’ere te hō’ēra’a i te hō’ē ā hōho’a te tā’āto’ara’a. E hina’aro ’outou i tō ’outou hoa feiā mo’a, ’e e hina’aro tō ’outou hoa feiā mo’a ia ’outou.

Mau mana’o nō tā’u iho tuatāpapara’a pāpa’ira’a mo’a

1 Korinetia 10:1–13

E fa’afāna’o te Atua i te rāve’a nō te horo ’ē i te fa’ahemara’a.

’Aita te mau ’ohipa pae vārua, nā reira ato’a te mau temeio, e ha’apae ia tātou i te mau fa’ahemara’a « mai tā te ta’ata nei ā » (1 Korinetia 10:13). ’O te hō’ē paha ïa tumu Paulo i pāpa’i ai nō ni’a i te huru te ’āti ’Īserā’ela i tāfifi na i te fa’ahemara’a i te tau o Mose, noa atu ā te mau temeio rārahi tā rātou i ’ite mata roa (hi’o Exodo 13:21 ; 14:13–31). ’Ia tai’o ’oe i te 1 Korinetia 10:1–13, e aha te mau fa’aarara’a i tupu nō te mau ’āti ’Īserā’ela e tano nō ’oe ? E aha te mau huru « ha’apūra’a » i te fa’ahemara’a tā te Metua i te ao ra i fa’afāna’o nō ’oe ? (hi’o ato’a Alama 13:27–30 ; 3 Nephi 18:18–19).

1 Korinetia 10:16–17 ; 11:16–30

E fa’atāhō’ē te ’ōro’a ia tātou ’ei melo nō te ’Ēkālesia a te Mesia.

Noa atu ā te ’ōro’a e fafaura’a i rotopū i te ta’ata ’e te Fatu, e ’ohipa ato’a rā tā ’oe e rave ’āmui ’e vetahi ’ē. Pinepine tātou i te rave ’āmui i te ’ōro’a, ’ei tino feiā mo’a. E tai’o i tā Paulo i ha’api’i nō ni’a i te ’ōro’a ’e e feruri nāhea teie ’ōro’a mo’a e nehenehe ai e tauturu i te « rave rahi » ’ia riro ’ei « hō’ē » i roto i te Mesia (1 Korinetia 10:17). E nāhea te ravera’a i te ’ōro’a mo’a i te tauturu ia ’oe ’ia ha’afātata atu ā i te Mesia ’e i te tahi atu feiā fa’aro’o ? E nāhea teie mau ’īrava i te fa’auru i tō ’oe ’ā’au nō ni’a i te ’ōro’a mo’a ’e te huru ’oe e fa’aineine nei nō te reira ?

1 Korinetia 11:11

I roto i te fa’anahora’a a te Atua, tītauhia te tāne nō te vahine ’e te vahine nō te tāne.

I roto i te 1 Korinetia 11:4–15, tē fa’ahiti ra Paulo i te parau nō te tahi mau peu ’aita i tō teie ’anotau. Tē ha’api’i ato’a nei rā Paulo i te hō’ē parau mau faufa’a rahi e tano nō te tau mure ’ore, tei ’itehia i roto i te ’īrava 11. E aha te aura’a ia ’outou teie ’īrava, ’e nō te aha e mea faufa’a te reira ? ’Ua ha’api’i Elder David A. Bednar : « ’Ua fa’ata’ahia te tāne ’e te vahine ’ia ha’api’i, ’ia fa’aitoito, ’ia ha’amaita’i ’e ’ia fa’ananea te tahi i te tahi » (« Tē ti’aturi nei mātou ē, e mea ti’a i te ta’ata ’ia ora ma te vi’ivi’i ’ore », Liahona, Mē 2013, 42). I teie parau mau e aha te ’ohipa e tīa’ihia ra i roto i te hō’ē fa’aipoipora’a ? E aha ato’a te ’ohipa e tīa’ihia ra ’ia tupu i roto i tā tātou tāvinira’a i roto i te ’Ēkālesia ?

Hi’o ato’a Jean B. Bingham, « Tāhō’ē i roto i te fa’aotira’a i te ’ohipa a te Atua », Liahona, Mē 2020, 60–63.

1 Korinetia 12–13

’Ua hōro’ahia te mau hōro’a pae vārua ’ei maita’i nō te tā’āto’ara’a o te mau tamari’i a te Metua i te ao ra.

’Aita te tāpura nō te mau hōro’a pae vārua i roto i te 1 Korinetia 12–13 i hope roa. E vāhi maita’i rā nō te ha’amata, nō te hi’o ’e nō te feruri i te mau hōro’a pae vārua tā te Metua i te ao ra i hōro’a ia ’oe. ’Ia tai’o ’oe i te tāpura nō te mau hōro’a tā Paulo i fa’ahiti, e nehenehe tā ’oe e tu’u atu i te tahi atu mau mea tā ’oe i ’ite i roto ia vetahi ’ē, i roto ia ’oe iho ’aore rā i roto i te mau ta’ata o te mau pāpa’ira’a mo’a. Mai te mea e ha’amaita’ira’a patereareha tō ’oe, ’ua fa’ahiti-ato’a-hia paha ïa te tahi i reira. E nāhea teie mau hōro’a i te tauturu ia ’oe ’ia ha’amaita’i ia vetahi ’ē ? ’A feruri ē nāhea ’oe e ’imi ai i « te mau [hōro’a] rahi ra » (1 Korinetia 12:31).

Hi’o ato’a 1 Korinetia 14 ; Moroni 10:8–21, 30 ; Te Ha’api’ira’a Tumu ’e te mau Fafaura’a 46:8–26 ; Hīro’a fa’aro’o 1:7.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1 Korinetia 9:24–27.Nō te mea ’ua fa’ahōho’a ’o Paulo i te orara’a i te ’evanelia mai te hō’ē horora’a, e nehenehe ’outou te ’utuāfare e fa’atupu i te hō’ē horora’a ’ei fa’ahōho’ara’a i teie ha’api’ira’a. E hōro’a i te hō’ē korōna i te ta’ata ato’a e tāpae i te hope’a, ’ei reira e paraparau ai i te huru e noa’a i te mau ta’ata ato’a e fa’aitoito roa i te ’āpe’era’a ia Iesu Mesia i roto i teie orara’a, te rē « tāhuti ’ore » (1 Korinetia 9:25 ; hi’o ato’a 2 Timoteo 4:7–8). E aha te mau mea tā te hō’ē ta’ata horo e rave nō te fa’aineine iāna nō te horora’a ? E nāhea tātou nō te fa’aineine nō te ho’i atu i te Metua i te ao ra ?

’Ua fa’aau Paulo i te orara’a ’evanelia i te hō’ē horora’a ?

1 Korinetia 12:1–11.I muri iho i te tai’o-’āmui-ra’a i teie mau ’īrava, e nehenehe e hōro’a i te hō’ē pāpie ma te i’oa o te tahi atu melo o te ’utuāfare i ni’a roa. E ani i te ta’ata tāta’itahi ’ia pāpa’i i te mau hōro’a pae vārua o terā ta’ata. I muri iho, e nehenehe e fa’a’ohu i te mau pāpie ’ia pāpa’i pauroa mai te ta’ata i te mau hōro’a nō te tahi atu ta’ata.

1 Korinetia 12:3.Nō te aha e mea tītauhia te Vārua Maita’i ’ia noa’a mai te ’itera’a pāpū nō Iesu Mesia ? E nāhea tātou nō te tītau i te Vārua Maita’i, nō te ha’apūai i tō tātou ’itera’a pāpū nōna ?

1 Korinetia 12:12–27.E nehenehe te fa’aaura’a a Paulo nō te tino e riro ’ei ’āparaura’a e ha’amana’o-maoro-hia nō ni’a i te tāhō’ēra’a ’utuāfare. ’Ei hi’ora’a, e nehenehe te mau melo o te ’utuāfare e tāmata i te pāpa’i i te hōho’a nō te hō’ē tino e mata noa ’aore rā e tari’a noa (hi’o i te ’īrava 17). E aha tā teie mau ’īrava e parau nei nō ni’a i te huru e rave i te tahi ’e te tahi, ’ei melo nō te ’utuāfare ?

1 Korinetia 13:4–8.E nehenehe te tātarara’a a Paulo i te aroha mau ’ia riro ’ei tumu parau fa’auru mau nō tō ’outou ’utuāfare. E nehenehe e fa’ata’a nō te melo tāta’itahi o te ’utuāfare i te hō’ē parau i roto i te mau ’īrava 4–8, ’ia tuatāpapa ’e ’ia ha’api’i i te toe’a o te ’utuāfare e aha tōna aura’a, ma te fa’a’ohipa i te tahi mau tātarara’a parau, te tahi mau hi’ora’a ’e te mau ’ohipa i tupu nō rātou iho. Mai te aha te huru e hi’ora’a te Fa’aora nō teie mau maita’i ? E nehenehe ato’a tā ’outou e hāmani ’āmui i te ’api pia nō te parau tāta’itahi, ’e ’ia pia haere i te reira i roto i te fare. E feruri i te hōho’a au nō te reira !

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Ces mots d’amour », Chants pour les enfants, 102–03.

Ha’amaita’i i tā tātou ha’api’ira’a

Pia i te hō’ē ’īrava. E pia i te hō’ē ’īrava faufa’a rahi nō ’outou i te hō’ē vāhi e ’ite pinepine mai te mau melo o te ’utuāfare. E ani i te tahi atu mau melo o te ’utuāfare e fa’a’ohu nō te mā’itira’a i te ’īrava e pia.

« Te pāne tā tātou e ’ōfene nei, e ’ere ānei i te ’āmuira’a i te tino o te Mesia ra ? Nō te mea hō’ē ā pāne, tātou ato’a e rave rahi nei hō’ē ā ïa tino » (1 Korinetia 10:16–17).