28 nō ’Ātete–3 nō Tetepa

1 Korinetia 8–13

« ’O te tino ’outou nō te Mesia »

’A taiʼo ai ’oe i te 1 Korinetia 8–13, e faʼaroʼo i te mau muhumuhuraʼa a te Vārua nō ni’a i te huru e ha’api’i ai ’oe i te mau parau tumu i roto i teie mau pene. E haʼamanaʼo ē, e nehenehe te mau huru manaʼo nō te ʼohiparaʼa e faʼatanohia nō te mau tamariʼi paʼari a’e ʼe te mau tamariʼi ʼāpī.

Tītau i te mana’o

E ani i te mau tamariʼi ’ia faʼaʼite mai i te tahi mea tā rātou i rave i roto i te pureraʼa ʼōroʼa i teie mahana nō te manaʼo ia Iesu.

Ha’api’i i te ha’api’ira’a tumu : Te mau tamari’i ’āpī

1 Korinetia 10:13

E tauturu tō tātou Metua i te ao ra iāʼu ’ia rave i te mau māʼitiraʼa parautiʼa.

E ’ere i te mea ōhie i te mau taime ato’a ’ia mā’iti i te maita’i, ’e ’ua ’ite tō tātou Metua i te ao ra i te reira. ’Ia ani ana’e tātou, e tauturu mai ’oia nō te mea tē hina’aro nei ’oia ’ia manuia tātou.

Te mau ’ātivite e au

• E taiʼo i te 1 Korinetia 10:13 i te mau tamariʼi, ma te ani atu ia rātou ’ia ueue i tō rātou upo’o ’ia faʼaroʼo anaʼe rātou i te mau tāʼo « faʼahemahia » ʼaore rā « faʼahemaraʼa. » ’A fa’ata’a e aha te aura’a o teie ’īrava nō ’oe.

• E faʼatiʼa i te tahi mau ʼāʼamu poto nō ni’a i te mau taʼata ’o tē fātata i te rave i te mau māʼitiraʼa hape. ’A faʼaroʼo ai te mau tamariʼi, e ani ia rātou ’ia ’āfaʼi i tō rātou rima i ni’a, ’aore rā e fa’a’ite i te hō’ē parau pia e tāpa’o fa’aea tō ni’a ’ia rave anaʼe te taʼata i roto i te ʼāʼamu i te hōʼē māʼitiraʼa hape. E aha ïa te māʼitiraʼa tiʼa ? E faʼaʼite pāpū ē, e tauturu tō tātou Metua i te ao ra ia tātou ʼia māʼiti i te mea tiʼa.

• E faʼaʼite i te hōʼē hōhoʼa nō Iesu, ʼe e hīmene ʼe te mau tamariʼi i te hōʼē hīmene nō niʼa iāna, mai te hīmene « Jésus-Christ est mon modèle » (Chants pour les enfants, 40–41). ’A paraparau nāhea te ha’amana’ora’a ia Iesu i te tauturu ia ’oe ’ia rave i te mau mā’itira’a maita’i. E faʼaʼite i te mau hōhoʼa nō te tahi atu mau mea ’o tē tauturu ia tātou ’ia rave i te mau māʼitiraʼa maitaʼi, mai te mau metua ʼaore rā te mau pāpaʼiraʼa moʼa. E ani i te mau tamariʼi e aha tē tauturu ia rātou ’ia rave i te mau māʼitiraʼa maitaʼi.

1 Korinetia 12:4, 7–12

ʼUa haʼamaitaʼi mai tō tātou Metua i te ao ra iāʼu i te mau hōroʼa pae vārua.

ʼUa hōroʼa tō tātou Metua i te ao ra i tāna mau tamariʼi atoʼa te mau hōroʼa pae vārua. E aha te mau hōroʼa pae vārua tā ’oe e ʼite nei i roto i tā ’oe mau pīahi ?

Te mau ’ātivite e au

• E ani i te mau tamariʼi ’ia pāpaʼi i te hōhoʼa nō te hōʼē taoʼa aroha au-roa-hia i hōro’ahia mai nō rātou. E tātara atu ē, e hōroʼa mai tō tātou Metua i te ao ra ia tātou i te mau hōroʼa pae vārua nō te haʼapūai i tō tātou faʼaroʼo ʼe nō te tauturu ia tātou ʼia haʼamaitaʼi ’ia vetahi ʼē. E fa’a’ite i te mau tamari’i i te tahi o te mau hōro’a pae vārua i fa’a’itehia i roto i te 1 Korinetia 12:7–11.

• E pāpaʼi i te hōʼē rata iti nā te tamariʼi tātaʼitahi, ma te faʼaʼite i te hōʼē hōroʼa pae vārua tā ’oe i ʼite i roto iāna (ʼaore rā e nehenehe ’oe e ani i te mau metua ʼia pāpaʼi i teie mau rata iti). Tu’u i te mau rata i roto i te mau vehi rata. E vaiiho i te mau tamariʼi ’ia ’īriti i te vehi rata, ʼe ’a tauturu ia rātou ’ia taiʼo i tō rātou mau hōroʼa pae vārua.

ʼUa hōroʼa tō tātou Metua i te ao ra i tāna mau tamariʼi atoʼa te mau hōroʼa pae vārua.

1 Korinetia 13

E nehenehe au e here ia vetahi ʼē.

Tē haʼapiʼi mai nei te mau pāpaʼiraʼa moʼa ē, te aroha ’o te « here mau ïa o te Mesia » (Moroni 7:47). Nāhea ’oe e tauturu ai i te mau tamariʼi ’ia faʼatupu ʼe ’ia faʼaʼite i te here mai tō te Mesia ?

Te mau ’ātivite e au

• E taiʼo i te 1 Korinetia 13:8 ʼe te Moroni 7:47, ʼe e tauturu i te mau tamariʼi ’ia fa’ahiti fa’ahou i te pereota « Te aroha mau ’o te here ateate ïa o te Mesia » E faʼaʼite i te mau hōhoʼa nō Iesu Mesia tē aroha ra ʼe tē hāmani maitaʼi ra, ʼe e ui i te mau tamariʼi ’ua nāhea ʼoia i te faʼaʼitera’a i te here ia vetahi ʼē (hiʼo Buka hōho’a nō te ’evanelia nō te mau manaʼo).

• E hīmene i te hōʼē hīmene nō niʼa i te herera’a ia vetahi ʼē, mai te hīmene « Aimez chacun » ʼaore rā « Aimez vos frères » (Chants pour les enfants, 39, 74), ʼe te mau tamariʼi. E faʼaʼite i te mau hōhoʼa nō te mau taʼata huru rau (mai te hōʼē metua, te taea’e, te ʼorometua haʼapiʼi, ʼaore rā te hoa), ʼe e ani i te mau tamariʼi ʼia faʼaʼite mai e nāhea rātou e nehenehe ai e tāvini i taua taʼata ra. E ani i te mau tamariʼi ʼia feruri i te hō’ē taʼata e nehenehe tā rātou e tāvini atu ʼe i muri iho, e pāpaʼi i te hōʼē rata iti ʼaore rā e pāpaʼi i te hōʼē hōhoʼa nō te hōroʼa atu i taua taʼata ra. Mai te mea e hinaʼaro rātou i te tahi atu mau manaʼo nō ni’a i te huru nō te tāvinira’a, ’a fa’a’ite i te video « Pass It On [E faʼaʼite atu i te reira] » (ChurchofJesusChrist.org).

Ha’api’i i te ha’api’ira’a tumu : Te mau tamari’i pa’ari a’e

1 Korinetia 10:13

E tauturu tō tātou Metua i te ao ra iāʼu ʼia pātoʼi i te faʼahemaraʼa.

E nehenehe te mau fafaura’a i roto i teie ’īrava e hōro’a i te mau tamari’i i te ti’aturira’a ē, e nehenehe rātou e pāto’i i te fa’ahemara’a nā roto i te tauturu a tō tātou Metua i te ao ra.

Te mau ’ātivite e au

• E ani i te mau tamariʼi ’ia taiʼo ’āpipiti i te 1 Korinetia 10:13 ʼe ʼia haʼapoto mai i te ʼīrava nā roto i tā rātou iho mau parau. E ani i te mau tamariʼi ’ia faʼaʼite mai i te hōʼē taime ’a tauturu mai ai tō tātou Metua i te ao ra ia rātou ’ia ʼape ʼaore rā ʼia pāto’i i te faʼahemaraʼa. E aha tē ti’a ia tātou ’ia rave nō te tūru’i i ni’a i tō tātou Metua i te ao ra ʼia faʼahema-anaʼe-hia tātou ?

• E pāpaʼi i niʼa i te mau ʼapi parau i te mau faʼahemaraʼa tā te mau tamariʼi e nehenehe e faʼaruru atu i teie mahana. E ani i te mau tamariʼi ʼia māʼiti tātaʼitahi i te hōʼē parau ʼe ʼia faʼaʼite mai e aha tā tō tātou Metua i te ao ra i hōroʼa mai nō te tauturu ia tātou ’ia ʼape ʼaore rā ʼia pātoʼi atu i teie mau faʼahemaraʼa. Nō te tahi mau manaʼo, e taiʼo ia Alama 13:28–29.

1 Korinetia 11:23–2

I te taime nō te ʼōroʼa, e nehenehe au e feruri i te huru nō tā’u pe’era’a i te Fa’aora.

E tauturu i te mau tamari’i tā ’oe e ha’api’i ra ’ia ’ite ē, ’ua riro te ’ōro’a mo’a ’ei rāve’a nō te « hi’opo’a » ia rātou iho ’e nō te fa’a’āpī i tā rātou fafaura’a nō te bāpetizora’a ’ia tāvini i te Fatu ’e ’ia ha’apa’o i tāna mau fa’auera’a (1Korinetia 11:28).

Te mau ’ātivite e au

• E ani i te hō’ē tamari’i ’ia tai’o i te 1 Korinetia 11:28. E aha te auraʼa ʼia « hiʼopoʼa » ia tātou hou e ʼāmu ai i te ʼōroʼa mo’a ? E ani i te mau tamariʼi ’ia feruri i te tahi atu mau taʼata ’o tē hiʼopoʼa i te mau mea, mai te mau taote, te mau mutoʼi, ʼaore rā te mau ʼaivānaʼa (ʼei hiʼoraʼa, ʼe hiʼopoʼa te mau taote ia tātou nō te ha’apāpū ē, e tino maita’i tō tātou). ’Ia rave ana’e tātou i te ōro’a mo’a, e aha tē nehenehe e rave nō te hi’opo’a i tā tātou ha’apa’ora’a i tā tātou mau fafaura’a nō te bāpetizora’a ?

• E ani i te mau tamariʼi ’ia hāmani i te hōʼē tāpura nō te mau mea e nehenehe e feruri ’ia ʼāmu anaʼe rātou i te ʼōroʼa mo’a. E ani ia rātou ’ia faʼaʼohipa i tā rātou mau tāpura ʼei faʼahaʼamanaʼoraʼa ’ia hiʼopoʼa ia rātou iho i roto i te ʼōroʼa.

1 Korinetia 12:4, 7–12, 31 ; 13:1–8

E mau hōro’a pae vārua tāʼu.

ʼUa haʼapiʼi Paulo ē, ʼua « hōroʼahia i te taʼata atoʼa » te mau hōroʼa o te vārua (1 Korinetia 12:7). E tauturu teie parau tumu i te mau tamariʼi ʼia haʼamau i tō rātou manaʼo faufaʼa ’ia rātou iho, i te taime iho ā rā e faʼaʼohipa rātou i tō rātou mau hōroʼa nō te haʼamaitaʼi ia vetahi ʼē.

Te mau ’ātivite e au

• E ani i te mau tamariʼi ’ia pāpaʼi i niʼa i te tāpura i te mau hōro’a pae vārua tā rātou e ’ite i roto i te 1 Korinetia 12:7–11 ; 13:2. E ani ia rātou ’ia ʼimi i te tahi atu ā mau hōroʼa tei faʼahitihia i roto i te Moroni 10:8–18 ʼe Te Haʼapiʼiraʼa Tumu ʼe te mau Fafaura’a 46:13–26. E faʼaʼite ia rātou i te tahi atu ā mau hōroʼa pae vārua tei faʼahitihia e Elder Marvin J. Ashton : « Te hōroʼa nō te ani ; te hōroʼa nō te faʼaroʼo… te hōroʼa nō te ʼaperaʼa i te marōraʼa… te hōroʼa nō te ʼimi i te mea parautiʼa ; te hōroʼa nō te ʼore e faʼahapa ; te hōroʼa nō te ʼimi i te Atua nō te arataʼiraʼa… te hōroʼa nō te utuuturaʼa ia vetahi ʼē… te hōroʼa nō te pūpūraʼa i te pure ; te hōroʼa nō te faʼaʼite i te hōʼē ʼiteraʼa pāpū pūai » (« There Are Many Gifts », Ensign, Novema 1987, 20). E ani i te mau tamariʼi ’ia parau mai nō niʼa i te mau hōroʼa pae vārua tā rātou i ʼite i roto i te tahi ʼe te tahi.

• Hou te haʼapiʼiraʼa, e ani i te mau metua o tā ’oe mau pīahi, nō niʼa i te mau hōroʼa tā rātou e ʼite nei i roto i tā rātou mau tamariʼi, ʼaore rā ’ia feruri ’oe iho i te mau hōro’a o te mau tamari’i. E parau i te mau tamari’i nō ni’a i teie mau hōro’a. E ani i te mau tamariʼi ’ia pāpaʼi i te hōʼē rāveʼa e faʼaʼohipa ai rātou i tō rātou mau hōroʼa nō te haʼamaitaʼi i te hō’ē taʼata i teie hepetoma.

• E faʼaʼite i te mau huru e rave rahi i reira e ti’a ai i te ta’ata ’ia fa’a’ohipa i te hō’ē hōro’a pae vārua i te roto i te 1 Korinetia 12:7–10. E ani i te mau tamariʼi ʼia ʼite i te mau hōroʼa pae vārua e nehenehe e faʼaʼohipahia i roto i te hiʼoraʼa tātaʼitahi.

Fa’aitoito i te ha’api’ira’a i te fare

’A parau i te mau tamari’i ’ia ’āparau i tō rātou ’utuāfare i te hō’ē mea tā ’oe i paraparau i roto i te piha ha’api’ira’a. ’Ei hi’ora’a, e ani i te mau tamari’i ’ia fa’a’ite i tō rātou mau hōro’a pae vārua i tō rātou ’utuāfare, ’e e ani i te mau melo o tō rātou ’utuāfare e aha tō rātou mau hōro’a.

Ha’amaita’i i tā tātou ha’api’ira’a

Tu’u i te mau anira’a ’o tē fa’atura i te ti’amāra’a ’ia mā’iti. ’A ani ai ’oe i te mau tamariʼi ’ia fa’a’ohipa i te mau mea tā rātou e ha’api’i mai nei, ’a feruri i te mau rāve’a nō te fa’atura i tō rātou ti’amāra’a. ’Eiaha e fa’atae i te mau anira’a ta’a ’ē, e feruri rā i te ani ia rātou ’ia feruri i tā rātou iho mau rāve’a nō te fa’a’ohipa i te mau mea tā rātou i ’apo mai.