11–17 nō Tetepa

2 Korinetia 1–7

« E fa’afaite ’outou i te Atua »

E haʼamata i tā ’oe faʼaineineraʼa nā roto i te taiʼoraʼa i te 2 Korinetia 1–7. E nehenehe te Mai, pe’e mai—nō te ta’ata hō’ē ’e te ’utuāfare e tauturu ia ’outou ’ia tuatāpapa i teie mau pene, ’e e nehenehe teie arata’i ha’api’ira’a e hōro’a mai ia ’outou i te mau mana’o nō te ha’api’ira’a.

Tītau i te mana’o

’Ua pāpa’i paha te tahi o tā ’oe mau pīahi i te mau rata i teie hepetoma nō ni’a i te huru e riro ai te hō’ē melo o te utuāfare ei hi’ora’a maita’i nō te hō’ē pipi a Iesu Mesia (hi’o te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). Mai te mea ē, ʼua nā reira rātou, e ani ia rātou nā mua roa ʼia faʼaʼite mai i te hōʼē rata i roto i te piha ha’api’ira’a. ʼAore rā, e ani ia rātou ’ia faʼaʼite mai i te tahi mea tā rātou i ʼapo mai.

Ha’api’i i te ha’api’ira’a tumu : Te mau tamari’i ’āpī

2 Korinetia 1:3–4

E tāmāhanahana mai tō tātou Metua i te ao ra iāʼu, ʼe e nehenehe tāʼu e tāmāhanahana ia vetahi ʼē.

Nāhea ’oe ʼia hōroʼa i te mau tamariʼi i te tiʼaturiraʼa ē, e tāmāhanahana mai tō tātou Metua i te ao ra ia rātou ? Nāhea ’outou e fa’aitoito ai ia rātou ’ia tāmāhanahana ia vetahi ’ē ?

Te mau ’ātivite e au

• E fa’a’ite i te mau tamari’i i te tahi mau mea ’o tē hōroʼa mai i te tāmāhanahanaraʼa, mai te hōʼē ʼahu taʼoto ʼaore rā te hōʼē ’ahu tā’amu. ’A ani i te mau tamariʼi e aha tē mea e tāmāhanahana ia rātou ʼia ʼoto ʼaore rā ʼia riʼariʼa anaʼe rātou ʼaore rā ’ia fa’aruru ana’e rātou i te tahi atu mau fifi. ’A tai’o i te 2 Korinetia 1:3–4 ʼe te mau tamariʼi, ʼe e tātara atu ē te « pohe » ’o te tahi atu ïa parau nō te mau fifi rarahi. E fa’a’ite i te tahi mau rāveʼa i tāmāhanahana ai tō tātou Metua i te ao ra ia ’oe, ʼe e faʼaʼite pāpū atu ē, e tāmāhanahana atoʼa ʼoia i te mau tamariʼi.

• E fa’a’ite i te hōho’a nō te mau ta’ata e bāpetizohia ra (hi’o Buka hōho’a nō te ’evanelia, N°103–4) ’a tai’o ai i te 2 Korinetia 1:4 i te mau tamari’i. E fa’ata’a atu ē ’ia bāpetizo-ana’e-hia tātou, e tapu tātou ’ia tāmāhanahana ia vetahi ’ē. Nāhea tātou ’ia peʼe i te aʼo a Paulo ’ia « ha’amāhanahana i te feiā i roʼohia i te pohe ra » ?

2 Korinetia 2:7–8,10

E nehenehe au e faʼaʼore i te hapa a vetahi ʼē.

E māʼiti i roto i teie mau ’ātivite—ʼaore rā e ’āfaʼi mai i tā ’oe iho—nō te tauturu i te haʼapūai i te hinaʼaro o te mau tamariʼi ’ia faʼaʼore i te hapa a vetahi ʼē.

Te mau ’ātivite e au

• E fa’ata’a atu i te mau tamariʼi ē, ʼua hinaʼaro Paulo ʼia faʼaʼore te feiā moʼa nō Korinetia i te hara a te taʼata tei hara mai. E taiʼo i te 2 Korinetia 2:7–8, 10, ʼe ’a ani i te mau tamariʼi ’ia tuʼu i tō rātou rima i niʼa i tō rātou māfatu i te mau taime atoʼa e faʼaroʼo rātou i te mau tāʼo e faʼaʼore ʼe ʼua faʼaʼore.

• E ani i te mau tamariʼi ’ia haʼuti mai e nāhea rātou ʼia pāhono atu i roto i te mau hete ʼua rave te hō’ē taʼata i te hō’ē ’ohipa ʼino. E vaiiho ia rātou, te tahi i muri i te tahi, ’ia parau « Tē tātarahapa nei au » ʼe « Tē faʼaʼore nei au i tā ʼoe hapa. » Nāhea tātou i te tauturu i te taʼata ʼia ʼite ē, tē faʼaʼore nei tātou i tā rātou mau hapa ? E fa’ata’a atu ē, te hōʼē rāveʼa ’o te « faʼaʼite-pāpu-ra’a ïa i tō ʼoutou here », ʼaore rā te faʼaʼiteraʼa i te here ia rātou (2 Korinetia 2:8).

2 Korinetia 4:1–2

Tē ti’aturi nei au ’ia riro ’ei mea ha’avare ’ore.

ʼUa haʼapiʼi Paulo no ni’a i te mau tāvini a te Mesia ʼua « faʼaru’e i te peu riʼi moʼe ha’amā ra. » E feruri i te mau rāveʼa e haʼapūai ai ’outou i te hinaʼaro o te mau tamariʼi ’ia riro ’ei mea parautiʼa i roto i te mau mea atoʼa.

Te mau ’ātivite e au

• E tauturu i te mau tamariʼi ʼia tāmau ʼāʼau i te pereota « Tē tiʼaturi nei mātou e mea tiʼa ’ia ora ma te parautiʼa » (Te mau Hīroʼa Faʼaroʼo 1:13). E pāpaʼi i teie pereota i niʼa i te mau tāhere rima pāpie ’o tā te mau tamariʼi e faʼaʼunaʼuna ʼe e ʼōʼomo. E fa’ata’a atu ē, te auraʼa nō te ora ma te parautiʼa ’o te parauraʼa ïa i te parau mau.

• E ani i te mau tamariʼi ʼia ʼāfaʼi i tō rātou rima i niʼa ’ia parau anaʼe ’oe i te tahi mea e parau mau, ʼe ʼia tuʼu i raro ʼia parau anaʼe ’oe i te tahi mea ʼe ʼere i te parau mau. E parau i te mau faʼahitiraʼa parau ʼōhie ʼe te pāpū mai teie « E sābati teie mahana » ʼaore rā « E toru tōʼu ihu. » E tāpiti i teie ’ātivite maʼa taime ri’i ma te vaiiho i te mau tamariʼi, te tahi i muri i te tahi, ’ia riro ’ei ta’ata fa’ahiti i te mau parau mau ʼe te mau parau hape. Nō te aha tō tātou Metua i te ao ra e hinaʼaro nei ʼia fa’a’ite tātou i te parau mau ?

• Fa’a’ite i te video « A Visit with Elder Ulisses Soares [Hō’ē tere fārereira’a ia Elder Ulisses Soares] » (ChurchofJesusChrist.org). E aha tā Elder Soares i ha’api’i mai i tōna ’āpira’a nō ni’a i te ha’avare ’ore ? E fa’aitoito i te mau tamari’i ’ia fa’aineine i tā rātou fafaura’a nō te bāpetizora’a nā roto i te orara’a ma te parauti’a.

Ha’api’i i te ha’api’ira’a tumu : Te mau tamari’i pa’ari a’e

2 Korinetia 1:3–4

E tāmāhanahana mai tō tātou Metua i te ao ra iāʼu, ʼe e nehenehe tāʼu e tāmāhanahana ia vetahi ʼē.

Te haʼamanaʼoraʼa e mea nāhea tō te Atua tāmāhanahanaraʼa ia tātou, e faʼauru te reira ia tātou ’ia tāmāhanahana ia vetahi ʼē.

Te mau ’ātivite e au

• ’A taiʼo ai ’oe i te 2 Korinetia 1:3–4, e ani i te mau tamariʼi ʼia faʼaroʼo i te hōʼē pāhonoraʼa i te uiraʼa « E aha tā te Atua e rave ra nō tātou ? » E tauturu i te mau tamariʼi ’ia tāpura i te mau rāveʼa e tāmāhanahana ai te Atua ia tātou. E ani i te mau tamariʼi ’ia faʼaʼite mai i te ’ohipa i tupu i tō rātou ʼotora’a, ʼaore rā peʼapeʼara’a ʼaore rā mataʼura’a ’e ʼua tāmāhanahana mai te Atua ia rātou.

• E ani i te mau tamari’i ’ia mātutu mai i te mau rāve’a e ha’apa’o ai tātou i tā tātou fafaura’a nō te bāpetizora’a ’ia tāmāhanahana ia vetahi ’ē (hi’o Mosia 18:9). E hōroʼa atu i te taime ia rātou ’ia feruri i te tahi ta’ata ’o tā rātou i mātau ’o tē hinaʼaro nei i te tāmāhanahanaraʼa ʼe e faʼanaho i te hōʼē ʼōpuaraʼa nō te haere atu e fārerei iāna.

2 Korinetia 2:5–11

E nehenehe au e faʼaʼore i te hapa a vetahi ʼē.

E nehenehe te faʼaʼoreraʼa i te hapa a vetahi ʼē e riro ’ei mea paʼari ’ia hāmani-ʼino-anaʼe-hia tātou. E ʼite rā tā ’oe mau pīahi i te here, te hau ʼe te ʼoaʼoa ʼia haʼapiʼi anaʼe rātou i te faʼaʼore i te hapa.

Te mau ’ātivite e au

• E parau atu i te mau tamariʼi ē, ʼua hara te tahi taʼata i Korinetia ʼe « ’ua faʼatupu i te ʼoto » i roto i te feiā moʼa (hiʼo i te 2 Korinetia 2:5). E ani i te mau tamariʼi ’ia māʼimi i te 2 Korinetia 2:7–8 nō te ʼite e aha tā Paulo i hinaʼaro i te feiā moʼa ʼia rave.

• E faʼaʼite atu i te hōʼē taime ’a faʼaʼore ai ’oe i te hapa a te tahi taʼata—ʼaore rā ʼua faʼaʼore mai te tahi taʼata i tā ’oe ra hapa—ʼe ’a fa’ata’a e aha tō ’oe huru i muri iho. ’Aore rā ’a fa’a’ite i te video « The Goal: A Story of Faith, Friendship and Forgiveness [Te fā : Hō’ē ā’amu nō te fa’aro’o, te auhoara’a e te fa’a’orera’a hapa] » (ChurchofJesusChrist.org). E ani i te mau tamari’i ’ia fa’a’ite mai i tō rātou ’itera’a nō ni’a i te fa’a’orera’a hapa.

2 Korinetia 5:6–7

Tō’u te « haereʼa faʼaroʼo, e ʼere i te haereʼa ʼite mata. »

E feruri e nāhea ’oe e faʼaitoito ai i te mau tamariʼi ʼia haʼapaʼo i te mau faʼaueraʼa a te Atua noa atu ’aita rātou e ʼite i te mau haʼamaitaʼiraʼa tā rātou e hinaʼaro ra i te reira iho ā taime.

Te mau ’ātivite e au

• E taiʼo i te 2 Korinetia 5:6–7 ʼe te Alama 32:21 ’e te mau tamariʼi, ʼe e ani ia rātou ʼia ʼimi i te mau tāʼo ʼe te mau pereota ’o tē tauturu i te tātarara’a i te auraʼa nō te faʼaroʼo. E ani ia rātou ’ia pāpa’i i tā rātou tātarara’a ’e ’ia fa’a’ite i te reira i te tahi ’e te tahi.

• E ani i te hōʼē o te mau tamariʼi, ’ia tāpō i tōna mata, ʼe e ani i te tahi atu mau tamariʼi ʼia hōroʼa i te mau arataʼiraʼa nō te tauturu iāna ’ia rave faʼaoti i te tahi ʼohipa, mai te hāmaniraʼa i te hōʼē patu ʼōfaʼi, ʼaore rā te haereraʼa nā roto i te piha. Nāhea teie ’ātivite i te tauturu ia tātou ’ia hāro’aro’a i te aura’a ʼia « haere ma te faʼaroʼo » i roto i te Atua ra ?

• Fa’a’ite i te video « Reunited by Faith [Tāhō’ē-fa’ahou-hia e te fa’aro’o] » (ChurchofJesusChrist.org), ’e e ani i te mau tamari’i nāhea te taure’are’a tamāroa i roto i te video i te hāhaerera’a nā roto i te fa’aro’o. E fa’a’ite i te ’ohipa i tupu nō ’oe ’a haere ai ’oe ma te fa’aro’o, ’e ’a fa’aitoito i te mau tamari’i ’ia fa’a’ite ato’a mai i te ’ohipa i tupu nō rātou.

2 Korinetia 7:8–10

Nā te ʼoto e au i te Atua e arata’i iāʼu ’ia tātarahapa.

E mea mātarohia ’ia haʼamā ʼaore rā ’ia huru ’ē ’ia ʼite-anaʼe-hia tātou i te raveraʼa i te tahi ’ohipa hape. E tauturu i te mau tamari’i ’ia faʼataʼa ʼē i teie mau manaʼo i te ʼoto e au i te Atua, ’o tē arataʼi atu i te tātarahaparaʼa.

Te mau ’ātivite e au

• E fa’ata’a ē, i roto i te 2 Korinetia 7:8–10,ʼua faʼahiti Paulo i te hōʼē rata tāna i pāpaʼi aʼena i te feiā moʼa, ma te faʼaara taiā ʼore ia rātou nō niʼa i tā rātou mau hara. E taiʼo ʼāmui i teie mau ʼīrava. Nō te aha Paulo i ʼoa’oa ai i te ʼoto o te feiā moʼa ? E faʼaʼite atu ē, ʼua piʼihia teie huru ʼoto, te ʼoto e au i te Atua.

• E ani i te mau tamariʼi ’ia feruri i te hōʼē taime ’a rave ai rātou i te tahi ʼohipa hape ʼe ʼua ʼoto rātou nō te reira. E ani ia rātou ’ia ui ia rātou iho, « Nō te aha vau i ’oto ai ? » ’e i muri iho, ’a fa’a’ite mai i tā rātou mau pāhonora’a. ’A pāpa’i i tā rātou mau pāhonora’a i ni’a i te tāpura (’ei hi’ora’a, « ’Ua mata’u vau ’o te topa vau i roto i te fifi » ’aore rā « ’Ua ’ite au ē, ’ua ha’amā’ino’ino vau i tō tātou Metua i te ao ra » ’aore rā « ’Ua fa’ata’i au i te hō’ē ta’ata »). E aha te mau pāhonoraʼa i niʼa i te tāpura e au i te ’oto o « te Atua » ? (2 Korinetia 7:10). Nō te aha te ʼoto e au i te Atua e riro ai ʼei mea maitaʼi aʼe i te tahi atu mau huru ʼoto ’o tā tātou e ʼite i muri aʼe i te raveraʼa i te tahi ’ohipa hape ?

Fa’aitoito i te ha’api’ira’a i te fare

E ani i te mau tamari’i ’ia fa’a’ite i tō rātou ’utuāfare i te hō’ē o te mau ’ātivite a te piha ha’api’ira’a nō teie mahana, pēnei a’e i te taime nō te pō utuāfare.

Ha’amaita’i i tā tātou ha’api’ira’a

Pia i te hō’ē pāpa’ira’a mo’a. E mā’iti i te hō’ē pāpa’ira’a mo’a faufa’a rahi nō ’oe ’e e pia i te reira i roto i tā ’oe piha ha’api’ira’a i te vāhi e ’ite pinepine te mau pīahi. E nehenehe paha te mau tamari’i, te tahi i muri i te tahi, e mā’iti i te hō’ē pāpa’ira’a moa nō te pia atu.