“7–13 Fēpueli. Sēnesi 12–17; ʻĒpalahame 1–2: ‘Ke Hoko ko ha Tokotaha ʻOku Muimui Lahi Ange ki he Māʻoniʻoní,’” Haʻu ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“7–13 Fēpueli. Sēnesi 12–17; ʻĒpalahame 1–2,” Haʻu, ʻo Muimui ʻIate Au—Maʻá e Palaimelí: 2022
Tā fakatātā ʻo ʻĒpalahame mo Sela, tā ʻa Dilleen Marsh
7–13 Fēpueli
Sēnesi 12–17; ʻĒpalahame 1–2
“Ke Hoko ko ha Tokotaha ʻOku Muimui Lahi Ange ki he Māʻoniʻoní”
Manatuʻi ʻoku ʻikai fie maʻu—pe malava—ke akoʻi e meʻa kotoa pē ʻi he lēsoni ko ʻení. Tuku ke tataki koe ʻe he Laumālié ki he ngaahi tefitoʻi moʻoni mo e ʻekitivitī ʻe ʻuhingamālie taha ki he fānau ʻokú ke akoʻí.
Lekooti Hoʻo Ngaahi Ongó
Fakaafeʻi e Feʻinasiʻakí
Naʻe fakaafeʻi ʻe ngaahi fāmili ʻo e fānau ʻokú ke akoʻí ke nau ako fekauʻaki mo ʻĒpalahame mo Sela ʻi he uike ko ʻeni kuo ʻosí. Tuku ha faingamālie ki he fānaú ke nau vahevahe ha meʻa ʻoku nau ʻilo fekauʻaki mo ʻĒpalahame mo Sela.
Akoʻi e Tokāteliné: Fānau Iiki Angé
ʻE lava ke tataki au ʻe Sīsū Kalaisi ʻaki hoku nimá.
Naʻe fakaʻamu ʻa ʻĒpalahame ke ne māʻoniʻoni neongo naʻe faiangahala ʻa e kau mēmipa ʻo hono fāmilí. Naʻe folofola ʻa e ʻEikí ʻo pehē, “Te u tataki koe ʻaki hoku nimá” (ʻĒpalahame 1:18). Hangē pē ko e talaʻofa ʻe he ʻOtuá ke Ne tokoniʻi ʻa ʻĒpalahamé, te Ne lava ʻo tataki e fānau ʻokú ke akoʻí ʻi he taimi ʻoku nau fakaʻamu ai ke fili ki he totonú.
Ngaahi ʻEkitivitī ʻe Ala Fakahokó
-
Lau ki he fānaú ʻa e ʻĒpalahame 1:18 mo e 2:8, pea fakaafeʻi e fānaú ke nau fakafanongo ki ha konga ʻo e sinó ʻoku lave ki ai ʻi he ongo vēsí fakatouʻosi. Ko e hā nai ʻetau ongo ʻo ka tataki kitautolu ʻe Sīsū Kalaisi ʻi hotau nimá pe ke hanga ʻe Hono toʻukupú ʻo maluʻi kitautolu? Fakamoʻoni ange ʻoku tataki e Sīsū kitautolu ʻaki ʻEne fakahinohinoʻi kitautolu ʻo fakafou ʻi Hono Laumālié.
-
Fakaʻaongaʻi ʻa e “ʻĒpalahame” (ʻi he Ngaahi Talanoa mei he Fuakava Motuʻá) ke tokoni ke mahino ki he fānaú naʻe faihala e kakai ne feohi mo ʻĒpalahamé, ka naʻe fakaʻamu ʻe ʻĒpalahame ke ne fai e meʻa naʻe totonú pea naʻe tokoniʻi ia ʻe he ʻEikí. ʻOku tokoniʻi fēfē kitautolu ʻe he Tamai Hēvaní mo Sīsū Kalaisi ʻi he taimi ʻoku tau feinga ai ke fili ki he totonú? Hivaʻi ha foʻi hiva fekauʻaki mo e tefitoʻi moʻoni ko ʻení, hangē ko e “Akoʻi Au Ke u ʻEva he Māmá” (Tohi Hiva ʻa e Fānaú, 70).
-
Fakaʻaliʻali ha ʻū fakatātā ʻo e Fakamoʻuí (vakai, Tohi Fakatātā ʻo e Ongoongoleleí, fika 38, 39, 40, mo e 41), pea tokoniʻi e fānaú ke nau mamata ki he ngaahi meʻa naʻá Ne fai ʻaki Hono toʻukupú. Ko e hā ha meʻa te tau lava ʻo fai ʻaki hotau ongo nimá ke tokoni ki he niʻihi kehé?
ʻE lava ke u hoko ko ha taha faʻa fakalelei.
ʻI he taimi ne fetōkehekeheʻaki ai e kau tauhimanu ʻa ʻĒpalahamé mo e kau tauhimanu ʻa Loté koeʻuhí ko e ngaahi feituʻu ne kaikai ai e fanga monumanú, ne fokotuʻu ange ʻe ʻĒpalahame ha solovaʻanga ne tupu ai ha melino. Te ke lava ʻo fakaʻaongaʻi ʻa e sīpinga ko ʻení ke fakalotoʻi e fānaú ke nau hoko ko e kau faʻa fakalelei.
Ngaahi ʻEkitivitī ʻe Ala Fakahokó
-
Vahevahe mo e fānaú ʻa e talanoa mei he Sēnesi 13:5–12, pea fakaafeʻi ke nau fakatātaaʻi ia. Tuku ki he fānaú ke nau taufetongi ʻi he fakangalingali ko ʻĒpalahame kinautolú, ko hono ʻilamutu ko Loté pea mo e kau tauhimanú. Fokotuʻu ha ngaahi founga ʻe lava ke nau muimui ai ki he sīpinga ʻa ʻĒpalahame ke hoko ko ha tokotaha faʻa fakaleleí, hangē ko e taufetongi ʻi he vaʻinga ʻaki ha meʻavaʻinga mo ha kaungāmeʻá. Fakaafeʻi ke nau fakatātaaʻi ʻa e ngaahi sīpinga ko ʻení.
-
Lau ʻa e Mātiu 5:9, pea fakamatalaʻi ʻoku finangalo ʻa Sīsū ke tau hoko ko ha kakai ʻoku faʻa fakalelei. Tokoni ki he fānaú ke nau fakakaukau pe ko e hā ha meʻa te nau fai ke hoko ai ko ha niʻihi ʻoku faʻa fakalelei ʻi ʻapi pe mo e ngaahi kaungāmeʻá. Fakaafeʻi kinautolu ke nau tā ha fakatātā ʻo ʻenau hoko ko ha kakai ʻoku faʻa fakalelei. Kole ki he fānaú ke nau vahevahe ʻenau ongo ʻi he taimi ʻoku nau hoko ai ko ha kakai ʻoku faʻa fakalelei hangē ko Sīsū Kalaisí.
Sēnesi 15:1–6; 17:1–8; ʻĒpalahame 2:9–11
ʻOku mahuʻinga ke tauhi ʻeku ngaahi palōmesí.
ʻE ala tokoni ʻa e ako fekauʻaki mo e fuakava naʻe fai ʻe he ʻOtuá pea mo ʻĒpalahame mo Selá ke mahino ki he fānaú ʻa e ʻuhinga ke tauhi e ngaahi palōmesí. ʻE ala tokoni foki ia ke nau mateuteu ke fakahoko mo tauhi ʻa e ngaahi fuakavá.
Ngaahi ʻEkitivitī ʻe Ala Fakahokó
-
Fehuʻi ki he fānaú pe ʻoku nau ʻiloʻi pe ko e hā ʻa e palōmesi pe fuakava. Fakaafeʻi ke nau vahevahe ha ngaahi aʻusia naʻa nau fai ai ha palōmesi pe fai ʻe ha taha ha palōmesi kiate kinautolu. Kapau ʻe ala tokoni, vahevahe ha ngaahi aʻusia pē ʻaʻau. Tokoni ke mahino ki he fānaú naʻe palōmesi ʻe ʻĒpalahame mo Sela te na talangofua ki he ʻOtuá. Fili ha ngaahi kupuʻi lea mei he Sēnesi 15:1–6; 17:1–8; ʻĒpalahame 2:9–11 ke vahevahe ha niʻihi ʻo e ngaahi tāpuaki ne palōmesi ʻe he ʻOtuá maʻanauá. ʻE lava ke kau heni ʻa e “ʻOua naʻá ke manavahē ʻEpalame: ko ho ungaʻangá au,” “Te ke hoko ko e tamai ki he ngaahi puleʻanga lahi,” pe “ʻE tāpuekina ʻa e ngaahi faʻahinga kotoa pē ʻo e māmaní.”
-
Ko e hā ha ngaahi palōmesi faingofua ʻe lava ke fai mo tauhi ʻe he fānaú lolotonga e kalasí? Hangē ko ʻení, kole ange ke nau palōmesi ke nofo maʻu ʻi honau nofoʻangá ʻi ha kiʻi taimi siʻi pe fokotuʻutuʻu ʻenau ʻū seá ʻi he fakaʻosinga e kalasí. Vahevahe ange ha taimi naʻá ke fai ai ha palōmesi peá ke tauhi ia, pea fakaafeʻi ke nau vahevahe ha faʻahinga aʻusia kuo nau maʻu. Tokoni ke mahino kiate kinautolu te nau fai ha ngaahi palōmesi mo e Tamai Hēvaní ʻi he taimi te nau papitaiso aí pea mo e taimi te nau ʻalu ai ki he temipalé.
Akoʻi e Tokāteliné: Fānau Lalahi Angé
ʻOku fanongoa mo tali ʻe he Tamai Hēvaní ʻa ʻeku ngaahi lotú.
Ko e taimi naʻe ʻi ha tuʻunga fakatuʻutāmaki ai ʻa e moʻui ʻa ʻĒpalahamé, naʻá ne lotu ki he ʻOtuá pea naʻe fakahaofi ia. ʻE lava ke maʻu ʻe he fānau ʻokú ke akoʻí haʻanau ngaahi aʻusia pē ʻanautolu ʻi he lotú ʻe lava ke nau vahevahe.
Ngaahi ʻEkitivitī ʻe Ala Fakahokó
-
Fakaʻaliʻali ʻa e fakatātā An Angel Saves Abraham [Fakahaofi ʻe ha ʻĀngelo ʻa ʻĒpalahame] (ChurchofJesusChrist.org), pea fakaafeʻi ʻa e fānaú ke nau vahevahe ʻa e meʻa ʻoku nau ʻilo fekauʻaki mo e talanoa ʻokú ne fakatātāʻí, ʻoku hā ʻi he ʻĒpalahame 1:12, 15–17. Kole ki he fānaú ke nau lau ʻa e ngaahi veesi ko ʻení pea vahevahe ha ngaahi meʻa ʻoku nau ako fekauʻaki mo e lotú.
-
Fakaafeʻi e fānaú ke nau vahevahe ha ngaahi aʻusia ne tali ai ʻe he Tamai Hevaní ʻenau ngaahi lotú, pea vahevahe ha taha ʻo hoʻo ngaahi aʻusiá.
ʻE lava ke u hoko ko ha taha faʻa fakalelei.
ʻOku tau fehangahangai kotoa pē mo ha ngaahi tūkunga ʻoku ʻahiʻahiʻi ai kitautolu ke tau loto-mamahi mo fakakikihi. Fakakaukau ki he founga ʻe lava ke tokoniʻi ai ʻa e fānaú ʻe he talanoa kia ʻĒpalahame mo Loté, ke nau hoko ko ha kau faʻa fakalelei ʻi he ngaahi tūkunga peheé.
Ngaahi ʻEkitivitī ʻe Ala Fakahokó
-
Tohiʻi ʻa e Niʻihi ʻoku Fai Ki Ai e Talanoá, Feituʻu, Palopalema, mo e Solovaʻanga ʻi he palakipoé. Fakaafeʻi e fānaú ke nau lau ʻa e Sēnesi 13:5–12 pea fakahaaʻi ʻa e ngaahi konga ʻo e talanoá ʻoku hiki ʻi he palakipoé. Tokoni ki he fānaú ke nau fakakaukau ki ha ngaahi tūkunga ʻe lava ke nau hoko ai ko ha kau faʻa fakalelei, hangē ko e taimi ʻoku kē ai ha taha pe ʻoho ke fuhu. Hili iá pea fakaafeʻi leva ke nau fakatātaaʻi ʻa e founga ʻe lava ke nau hoko ai ko ha kau faʻa fakalelei ʻi he ngaahi tūkunga peheé.
-
Tokoni ki he fānaú ke nau fekumi ki he ngaahi tefito ko e “Melino” mo e “Tokotaha Faʻa Fakalelei” ʻi he Fakahinohino ki he Ngaahi Folofolá (scriptures.ChurchofJesusChrist.org). Fakaafeʻi ʻa e fānau takitaha ke nau fili ha potufolofola fekauʻaki mo e melinó pea vahevahe mo e kalasí ʻa e meʻa ʻokú ne akó. Tokoni ke nau fakakaukau ki ha ngaahi sīpinga ʻe niʻihi ʻo e hoko ʻa e Fakamoʻuí ko ha taha faʻa fakaleleí, hangē ko ia ʻoku hā ʻi he Luke 22:50–51. Te tau muimui fēfē ki Heʻene tā sīpingá?
ʻĪmisiLote mo ʻĒpalahame mo e tākanga monumanuLot’s Choice, [Ko e Fili ʻa Loté] © Providence Collection/licensed mei he goodsalt.com
Sēnesi 17:1–8; ʻĒpalahame 2:8–11
Te u lava ʻo tauhi ʻa e ngaahi fuakava ʻoku ou fai mo e Tamai Hēvaní.
ʻE ala tokoni ʻa hono akoʻi ki he fānaú ʻa e fuakava naʻe fai ʻe he ʻOtuá pea mo ʻĒpalahame mo Selá, ke nau fakakaukau ai ki heʻenau ngaahi fuakava ʻanautolú.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau ʻa e Sēnesi 17:1–8 mo e ʻĒpalahame 2:8–11 pea faʻu ha lisi ʻe ua: ko e meʻa naʻe kole kia ʻĒpalahame ke ne faí pea mo e meʻa naʻe palōmesi ange ʻe he ʻEikí kiate iá. Ko e hā ʻoku tau ako fekauʻaki mo e ʻEikí mei he ngaahi veesi ko ʻení?
-
Fakaʻaliʻali ha fakatātā ʻo ha taha ʻoku papitaiso (vakai, Tohi Fakatātā ʻo e Ongoongoleleí, fika 103, 104). Kole ki he fānaú ke nau lisi ha ngaahi palōmesi ʻoku fai ʻe ha taha ʻi he papitaisó pea mo e ngaahi palōmesi ʻoku fai ʻe he ʻOtuá ko hano fetongí. Fokotuʻu ange ke fekumi ʻe he fānaú ʻi he Mōsaia 18:10; Tokāteline mo e Ngaahi Fuakava 20:37, 77, 79 ki ha tokoni. Ko e hā te tau lava ʻo fai ke tauhi e ngaahi fuakava naʻa tau fai ʻi he papitaisó?
Poupouʻi e Ako ʻi ʻApí
ʻAve ha kiʻi tohi ke ō mo e fānaú ki ʻapi ke poupouʻi e kau mēmipa honau fāmilí ke nau fakatokangaʻi ʻa e taimi ʻoku hoko ai ʻa e fānaú ko ha kau faʻa fakaleleí, tauhi e ngaahi palōmesí, pe fai ha meʻa kehe ne mou talanoa ki ai ʻi he kalasí.
Fakatupulaki ʻEtau Founga Akoʻí
ʻOku longomoʻui ʻa e fānaú. Ko e ngaahi taimi ʻe niʻihi ʻoku hangē ʻoku hanga ʻe he ivi taʻe-mapuleʻi ʻa e fānaú ʻo tohoakiʻi kinautolu mei he akó, ka te ke lava ʻo fakaʻaongaʻi ʻa honau iví ko ha konga ʻo ʻenau akó. Fakaafeʻi ke nau fakatātaaʻi ha foʻi talanoa pe fakatātaaʻi ha ngaahi fakalea ʻo ha foʻi hiva pe potufolofola. (Vakai, Ko e Faiako ʻi he Founga ʻa e Fakamoʻuí, 25–26.)