“Juļae 4–10. 2 Kiin̄ Ro 2–7: ‘Ewōr Juon Rikanaan ilo Israel,’” Itok, Ļoor Eō—N̄an Būraimere: Kallim̧ur M̧oktal 2022 (2021)
“Juļae 4–10. 3 Nipai 2–7,” Itok, Ļoor Eō—N̄an Būraimere: 2022
Kōmeļeļein an Ilaisha kwaļo̧k n̄an ro karejeran kijeek im jariot ko, © Review & Herald Publishing/licensed from goodsalt.com
Juļae 4–10
2 Kiin̄ Ro 2–7
“Ewōr Juon Rikanaan ilo Israel”
Makūtkūt ko ilo laajrakin in ewōr tokjeer n̄an ejaake make ļōmņak ko am. Kōn lukkuun ekkatak ilo jar, kwomaron̄ bōk im̧we n̄an tōpar aikuj ko an ajri ro kwoj katakin er.
Je En̄jake ko Rej Im̧we Eok
Kajjitōk bwe ren Kwaļo̧k
N̄an rōjan̄ ajri ro n̄an kwaļo̧k ta eo rejeļā kake kōn rikanaan Ilaisha, kajjitōk ippāer n̄an jin̄aik juon pija in juon men rekar kōm̧m̧ane.
Katakin Katak eo: Ajri ro Reddikļo̧k
Anij emaron̄ jerbale kabwilōn̄lōn̄ ko ilo mour eo aō.
Kōn rikanaan Ilaisha, Irooj eaar kōjeraam̧m̧an elōn̄ armej ilo wāween ko rekabwilōn̄lōn̄. Jipan̄ ajri ro kile kabwilōn̄lōn̄ ko an Irooj ilo mour ko aer.
M̧akūtkūt ko Maron̄ Kōm̧m̧ani
-
Kwaļo̧k juon ak elōn̄ļo̧k kabwilōn̄lōn̄ ko kar je ilo 2 Kiin̄ 4–5 (lale “Elisha the Prophet” im “Elisha Heals Naaman” ilo Old Testament Stories). Kajjitōk ippān ajri ro n̄an kwaļo̧k ta eo rejeļā kōn bwebwenato kein. Kajjitōk ippāer n̄an bar kwaļo̧k bwebwenato n̄an doon.
-
Kam̧ool bwe Irooj emaron̄ kōjerbal An kajoor n̄an kōm̧m̧ani men ko reļļap n̄an jipan̄ kōj. Jej ņaetan men kein kabwilōn̄lōn̄. Kwaļo̧k elmen an Irooj kar kwaļo̧k An iakwe n̄an eok ilo wāween ko me reļļap im reddik. Al ippān doon juon al eo kōn iakwe eo an Anij, āinwōt “My Heavenly Father Loves MeChildren’s Songbook, 228–29). Kajjitōk ippān ajri ro n̄an kwaļo̧k ekōjkan aer jeļā bwe Anij ej iakwe er.
Imaron̄ kālet n̄an kōm̧m̧ane ta eo Anij en kean̄ jen rikanaan eo An.
Naaman ekar pen an pokake ke rikanaan Ilaisha ekar jiron̄ e elmen an naaj mour jen lōba. Ļōmņake elmen am̧ maron̄ jipan̄ ajri ro meļeļe kōn kōjeraam̧m̧an ko me rej itok jen pokake.
M̧akūtkūt ko Maron̄ Kōm̧m̧ani
-
Kwaļo̧k bwebwenato eo kōn Naaman (lale 2 Kiin̄ Ro 5:9–14; “Elisha Heals Naaman” in Old Testament Stories; bar lale pijain Naaman ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Kwaļo̧k bwe ilo jinoin Naaman ekar jab kōņaan tutu ilo Reba Jordan, men̄e Ilaisha ekar jiron̄ e ke menin enaaj kōmouri jen nan̄inmej eo an. Jiron̄ļo̧k er kōn juon tōre ke kwaar jab lukkuun kōņaan kōm̧m̧ane men eo jim̧we, im jipan̄ ajri ro ļōmņake waanjon̄ak ko aer make. Innām kwaļo̧k elmen an Naaman kar jeraam̧m̧an ke ekar kōm̧m̧ane kālet eo ejim̧we.
-
Riiti 2 Kiin̄ ro 5:13 n̄an ajri ro, im kōmeļeļeik bwe rijerbal eo an Naaman ekar jipan̄ e kālet n̄an pokake rikanaan Ilaisha. Jipan̄ ajri ro ļōmņak wāween ko remaron̄ jipan̄ ro m̧ōttaer ak ro uwaan baam̧le eo ron̄jake im pokake rikanaan eo.
Irooj ej emejraake eō.
Ke rijerbal eo an Ilaisha ekar lo jarin tariņae eo an Syrian jepooļ er, ekar lukkuun mijak. Ijoke, Ilaisha ekar jiron̄ e “jab mijak” kōnke Irooj ekar pād ippāer (2 Kiin̄ Ro 6:16).
M̧akūtkūt ko Maron̄ Kōm̧m̧ani
-
Riiti 2 Kiin̄ Ro 6:15 n̄an ajri ro, ak kōmeļeļeik bwe ren meļeļe. Kajjitōk ippān ajr ro n̄an katen wōt n̄e raar jepooļ jen juon jarlepju in ritariņae kōn o̧o̧j ko im jariot ko, āinwōt eo rikarejeran Ilaisha. Elmen kar aer en̄jake? Ta eo renaaj kar ba? Kajjitōk ippāer n̄an kiil mejeer ilo am̧ riiti 2 Kiin̄ 6:16–17 n̄an er. N̄e kwepaake naan eo “kōppeļo̧k mejen,” kajjitōk ippān ajri ro n̄an kōppeļo̧k mejeer. Kōmeļeļeik n̄an er ta eo rikarejar eo ekar loe n̄an kōjparok e im Ilaisha. Kwaļo̧k elmen am̧ jeļā bw Irooj ej oņake kōj.
-
Al juon al ippān doon kōn an Anij kōjparok kōj, āinwōt eoon eo jinion “Dearest Children, God Is Near You” (Hymns, no. 96). Bōk jikin naan ilo ilo al eo kōn etan ajri ro im kwaļo̧k bwe Anij ej oņake er.
Katakin Katak eo: Ajri ro Rerūttoļo̧k
Anij emaron̄ jerbale kabwilōn̄lōn̄ ko ilo mour eo aō.
Ilo jerbal in kwaļo̧k eo an, Ilaisha eaar kōmour im kar kōjeraam̧m̧an elōn̄ armej. Elmen an kabwilōn̄lōn̄ ko maron̄ ilo 2 Kiin̄ Ro 4–5 jipan̄ ajri ro kile pein Jemedwōj Ilan̄ ilo mour ko aer?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an je ioon boot eo elōn̄ kabwilōn̄lōn̄ ko me remaron̄ keememej jān jeje ko rekwojarjar. Innām leļo̧k iien n̄an aer etali 2 Kiin̄ Ro 4–5 im kanneļo̧k laajrak eo aer (lale 2 Kiin̄ Ro 4:1–7, 14–17, 32–35, 38–41, 42–44; 5:10–14). Ta eo kabwilōn̄lōn̄ kein rej katakin kōn elmen an Jemedwōj Ilan̄ en̄jake kōn kōj?
-
Kajjitōk ippān ajri ro n̄an kōnono kake ta in kabwilōn̄lōn̄. N̄e rej aikuj jipan̄, remaron̄ lale “Kabwilōn̄lōn̄” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org). Kajjitōk ippāer n̄an kwaļo̧k jet iaan kabwilōn̄lōn̄ ko me Jisōs ekar kōm̧m̧ani. Kōļmenļo̧kjeņ elmen am lo An lo̧mo̧o̧ren ekajoor ilo mour eo am. Kwomaron̄ bar kobaik kabwilōn̄lōn̄ ko kajjojo raan āinwōt en̄jake ko an aenōm̧m̧an, menin letok eo an mour kajjojo raan, ak jipan̄ ilo aolep jerbal. Kajjitōk ippān ajri ro n̄an kōnono kake kōn kabwilōn̄lōn̄ ko ilo mour ko aer, reļļap ak reddik jim̧or.
Imaron̄ kālet n̄an tiljek, ettā, im pokake.
Naaman eaar kōņaan bwe en mour jen lōba eo an, ak ekar jab kōņaan ļoor kapilōk eo an Ilaisha n̄an e: “Kwōn ilen tutuilo Jordan jiljilimjuon alen” (2 Kiin̄ Ro 5:10). Ļōmņake elmen am̧ maron̄ kōjerbal bwebwenato in n̄an katakin ajri ro kōn tōmak ilo Jisōs Kraist ettā, im pokake.
M̧akūtkūt ko Maron̄ Kōm̧m̧ani
-
Je tōmak, ettā, im pokake ioon boot eo, im kajjitōk ippān ajri ro ta meļeļe naan ko True to the Faith, 54–56, 86–87, 108–9). Kajjitōk ippān ajri ro n̄an riiti 2 Kiin̄ Ro 5:9–14. Kwomaron̄ kwaļo̧k jidikin video eo kōn “Naaman and Elisha” (ChurchofJesusChrist.org). Elmen an kar Naaman kwaļo̧k tōmak ilo Irooj, ettā, im pokake? Etke eaorōk n̄an kōj n̄an būki m̧wil kein?
-
Kajitōk ippān ajri ro n̄an jiron̄ eok kōn juon tōre ke juon m̧ōttāer ekar jipan̄ er kālet jim̧we eo. Ak kwaļo̧k juon am̧ make en̄jake. Riit ippān doon 2 Kiin̄ Ro 5:10–13 n̄an ekkatak elmen an eo rikarejeran Naaman kar jipan̄ e kālet n̄an pokake rikanaan eo. Ta eo jemaron̄ kōm̧m̧ane n̄an jipan̄ doon ļoor rikanaan eo ad rainin?
-
Kajjitōk ippān ajri ro n̄an kadedeļo̧k peij in m̧akūtkūt eo im kwaļo̧k ̄n̄an ro uwaan baam̧le ak m̧ōttam̧ jet men rekar ekkatak jān bwebwenatoin Naaman ilo 2 Kiin̄ Ro 5:1–15.
Ijjaba make iaaō.
Ajri ro kwoj katakin er remaron̄ jet iien en̄jake āinwōt eo karejeran Ilaisha—jab jeļā elmen ioon apan̄ ko im̧aer. Kwomaron̄ kōjerbal bwebwenato in ilo 2 Kiin̄ Ro 6:8–17 n̄an katakin er n̄an “jab mijak” kōnke Irooj ejamin bwe ren make iaer.
M̧akūtkūt ko Maron̄ Kōm̧m̧ani
-
Riit ippān doon 2 Kiin̄ Ro 6:15–17. Kajjitōk ippān juon iaan ajri ro n̄an katen wōt n̄e e rikajeran Ilaisha ilo an ajri ro jet kajjitōk kajjitōk ko kōn en̄jake eo an, āinwōt elmen an kar en̄jake ke jarin ritariņae ro an Syrain raar jepooļ jikin ak kain rot n̄an lo ritariņae ro an Anij. Kōnono ippān ajri ro kōn tōre ko ke raar en̄jake ajimakeke n̄an kajjieon̄ in mour kake gospel in. Elmen an Irooj jipan̄ kōj jeļā bw jejjab make iaad?
-
Al juon al kōn pedped ioon Irooj, āinwōt “When Faith Endures” (Hymns, no. 128). Ta eo al in ej katakin kōj kōn leke Irooj?
Kōketak Ekkatak ilo M̧weo
Kajjitōk ippān ajri ro n̄an kwaļo̧k en̄jake ko aer ippān baam̧le ko ilo aer ke raar kile pein Irooj ilo mour ko aer. Rōjan̄ er n̄an kajjitōk ippān ro uwaan baam̧le eo n̄an kwaļo̧k ejja en̄jake in.
Kōkōm̧anm̧anļo̧k Ad Katakin
Ajri ro rej ekkatak ilo elōn̄ kain wāween ko. “Kijejeto ko am̧ n̄an katakin er enaaj lukkuun em̧m̧an ilo am̧ kōjerbal bun̄tōn ko reoktak jān doon,” ekoba bwebwenato, pija ko, im al (Teaching in the Savior’s Way,25).