Ilaija ej jutak iturin lokatok eo euruur

Elijah Jum̧aik Pris ro an Baal, jān Jerry Harston

Juun 27–Juļae 3

1 Kiin̄ Ro 17–19

“Eļan̄n̄e Irooj ej Anij, Kom̧win Ļoor E”

Em̧m̧an bwebwenato ippān ajri ro. Jipan̄ ajri ro jeļā m̧ool ilo bwebwenato ko loi ilo 1 Kiin̄ Ro 17–19 me enaaj kōkajoorļo̧k aer tōmak ilo Jisōs Kraist.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kwaļo̧k n̄an ajri ro pija ko ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Kajjitōk ippāer n̄an kwaļo̧k ta eo rejeļā kake kōn bwebwenato ko rewaļo̧k ilo pija ko. Ta eo jej katak jān bwebwenato kein?

pija ej bōk jikin katakin

Katakin Katak eo: Ajri ro Reddikļo̧k

1 Kiin̄ Ro 17

Irooj ej kōjeraam̧m̧an ro ewōr aer tōmak.

1 Kiin̄ Ro 17 ej lo̧o̧ke jet waanjon̄ak in tōmak eļap. Āinwōt juon tōprak in bōk tōmak eļap, Ilaija ekar m̧ōn̄ā bao reven ko ilo iien n̄ūta eo, juon kōrā emej ļeo pāleen im ļaddik eo nejin eaar lōn̄ kijeer m̧ōn̄ā, im Ilaija eaar kōjerkak ļaddik eo nejin kōrā eo emej ļeo pāleen.

M̧akūtkūt ko Maron̄ Kōm̧m̧ani

• Kwaļo̧k pija ko ak kein katak in ko me ej iokļo̧k bwebwenato ko ilo 1 Kiin̄ Ro 17, āinwōt bao, pilawe, ak juon ļaddi. Kwaļo̧k bwebwenato ko n̄an ajri ro (“Elijah the Prophet” in Old Testament Stories emaron̄ jipan̄), im kajjitōk ippāer n̄an pukot pija ko ak kein katak ko me rej iokļo̧k kajjojo katak. Kwaļo̧k bwe Ilaija im kōrā eo emej pāleen raar tōmak ilo Jisōs Kraist im kar bōk eļap kōjeraam̧m̧an ko.

• Jipan̄ ajri ro ļōmņaki wāween ko remaron̄ kwaļo̧ki me raar bōk tōmak ilo Jemedwōj Ilan̄ im Jisōs Kraist, meļeļein bwe rej tōmak ilo Er im leke Er. Al ippāer juon al kōn tōmak, āinwt “I Know My Father Lives” (Children’s Songbook, 5).

1 Kiin̄ Ro 19:17–39

Imaron̄ kālet n̄an ļoor Jisōs Kraist.

Ilaija eaar kipel armej in Israel n̄an kōm̧m̧an kālet n̄an ļoor Jisōs Kraist. Jipan̄ ajri ro n̄an lo bwe remaron̄ kōm̧m̧ani ejja kālet in wōt.

M̧akūtkūt ko Maron̄ Kōm̧m̧ani

• Kōmeļeļeik n̄an ajri ro bwe armej ro ilo tōre eo an Ilaija raar jab jeļā n̄e rekōņaan ļoor Irooj. Kwaļo̧k bwebwenato eo elmen an Ilaija kar kajjitōk ippāer n̄an kālet n̄an ļoor Irooj, loe ilo 1 Kiin̄ Ro 18:17–39 (bar lale “Elijah and the Priests of Baal” in Old Testament Stories). Jiron̄ļo̧k ajri ro etke kwoj kālet n̄an ļoor Jisōs Kraist, im kajjitōk ippāer etke rej kālet n̄an ļoor E.

• Riit n̄an ajri ro ta eo Ilaija ekar ba n̄an armej ro: “Eļan̄n̄e Irooj ej Anij, Kom̧win Ļoor E” (1 Kings 18:21). Ta meļeļein n̄an ļoor Jisōs Kraist? Jipan̄ ajri ro ļōmņaki men ko renaaj kōm̧m̧ani n̄an ļoor Jisōs Kraist, im kajjitōk ippāer n̄an jin̄aiki pijain aer make kōm̧m̧ane men kein.

  juon ļaddikk

  Jemaron̄ kālet n̄an ļoor Jisōs Kraist.

1 Kiin̄ Ro 19:9–12

Jetōb Kwojarjar ej kōnono n̄an eō ilo ainikien edik, im mera.

Kōn tōl, ajri ro reddikļo̧k remaron̄ kile im̧we eo an Jetōb Kwojarjar ilo mour ko aer. Kōļmenļo̧kjeņ elmen am̧ maron̄ jipan̄ er.

M̧akūtkūt ko Maron̄ Kōm̧m̧ani

• Kōmeļeļeik n̄an ajri ro bwebwenato eo loe ilo 1 Kiin̄ Ro 19:9–12, im riiti eoon 11–12. Kajjitōk ippāer n̄an jerbale n̄an pinej jenkwan kōto ekajoor, m̧akūtkūt in laļ, im kijeek. Innām kajjitōk ippāer n̄an jijet wōt ilo am̧ riiti jemļo̧kin eoon 12 kōn juon ainikien emera: “ālikin kijeek eo, juon ainikien edik.” Kajjitōk ippāer n̄an kajjieon̄ in kōnono ilo juon ainikien eo emera, im edik. Jiron̄ļo̧k er kōn iien ko ke kwaar en̄jake im̧we jān Jetōb Kwojarjar.

• Jipan̄ ajri ro kile n̄e raar en̄jake im̧we an Jetōb Kwojarjar. N̄an waanjon̄ak, kōjan̄jan̄ ak al juon al kōn Jisōs, im kajjitōk ippān ajri ro elmen aer en̄jake n̄e rej ļōmņak kōn E. Kajjitōk ippāer elmen aer en̄jake ilo m̧akūtkūt ko jet, āinwōt jar ippān baam̧le ko aer ak bōk m̧ōttan kwojkwoj eo. Kōmeļeļeik bwe en̄jake kein rej itok jen Jetōb Kwojarjar. Jiron̄ ajri ro elmen an kajoor eo an Jetōb Kwojarjar kar kōjeraam̧m̧an mour eo am̧.

pija ej bōk jikin katakin

Katakin Katak eo: Ajri ro Rerūttoļo̧k

1 Kiin̄ Ro 17:8–16

Ke Irooj ej kajjitōk bwe in katok, imaron̄ ke pokake ilo tōmak.

Kōrā eo emej pāleen Zarephath eaar leke Irooj im rikanaan eo An, men̄e kar kajjitōk bwe en kōm̧m̧ane juon katok eļap. Bwebwenato in emaron̄ jipan̄ ajri ro ke Irooj ej kajjitōk ippāer n̄an kōm̧m̧ane juon wūjlepļo̧k eļap.

M̧akūtkūt ko Maron̄ Kōm̧m̧ani

• Riit ļo̧k n̄an ajri ro 1 Kiin̄ Ro 17:8–16. Kajjitōk ippāer n̄an jerbale bwebwenato eo ilo am riiti kein karuo. Bōjrak jidik im kajjitōk ippāer elmen aer en̄jake n̄e ren kar Ilaija ak kōrā eo emej pāleen. Kajjitōk ippāer n̄an kwaļo̧k ta eo rej ekkatak jān bwebwenato in.

• Kajjitōk ippān juon ajri n̄an jin̄a ioon boot eo juon pija in ta eo Irooj eaar kajjitōk ippān kōrā eo emej pāleen n̄an leļo̧k n̄an Ilaija (lale 1 Kiin̄ Ro 17:12–13). Kajjitōk ippān ajri ro n̄an jin̄ai ta eo kōrā eo emej pāleen ekar bōke ilo kam̧oolol (lale 1 Kiin̄ Ro 17:15–16). Ta jet iaan men ko Irooj ej kajjitōk ippād n̄an wūjleplo̧k? Kajjitōk ippān ajri ro n̄an kwaļo̧k ta eo raar jeraam̧m̧an kake ilo aer kōm̧m̧ani wūjlepļo̧k ko.

1 Kiin̄ Ro 18:17–39

Imaron̄ kālet n̄an ļoor Jisōs Kraist.

RiIsrael ro raar mijak in ļoor Irooj. Kejōkļo̧kjeņ kōn wāween am̧ maron̄ im̧we ajri ro n̄an wūjlepļo̧k ilo aer rikaļooraņ.

M̧akūtkūt ko Maron̄ Kōm̧m̧ani

• Jitōn̄ kajjojo ajri n̄an riiti jet eoon jān 1 Kiin̄ Ro 18:17–39 im jin̄aik juon pija in ta eo eoon eo ej kōmeļeļeiki. Jipan̄ ajri ro meļeļe eoon ko n̄e reaikuj jipan̄. Innām kōtļo̧k aer kōjerbal pija ko aer n̄an kwaļo̧k bwebwenato eo. Ta eo bwebwenato in ej katakin kōj kōn Irooj?

• Kajjitōk ippān ajri ro n̄an kōnono kōn tōre ko rekar kālet ikōtaan ruo men ko reoktak. Ta eo ekar jipan̄ er kālet? Jipan̄ er ļōmņaki jekjek ko ke rekar aikuj jipan̄ n̄an kālet n̄e ak jab ļoor Jisōs Kraist. Ta m̧ool ko jān bwebwenato in 1 Kiin̄ Ro 18:17–39 emaron̄ jipan̄ er kālet?

1 Kiin̄ Ro 19:9–12

Jetōb Kwojarjar ej kōnono n̄an eō ilo ainikien edik, im mera.

Laļ in eobrak kōn ainikien ko rej me ej kōm̧m̧an bwe en pen n̄an ron̄ ainikien eo edik, im emera an Jetōb. Elmen am̧ naaj jipan̄ ajri ro ron̄jake?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an lukkuun ron̄jake ilo am riiti 1 Kiin̄ Ro 19:11–12 dikdik n̄an er. Kajjitōk ippāer n̄an lale 1 Kiin̄ Ro 19 n̄an eoon ko kwoj riiti im ekkatak ta eo Ilaija ekar kōm̧m̧ane. Kōnono kake ta eo raar kōm̧m̧ane n̄an ron̄ ta eo kwaar ba, im jipan̄ er keidi menin n̄an ta o jaar kōm̧m̧ane n̄an ron̄ “ainikien eo edik” an Jetōb. Kōtļo̧k an ajri ro bōk kūņaer riiti eoon ko jān 1 Kiin̄ Ro 19 ilo an ajri ro jet pukot eoon ko ilo jeje ko rekwojarjar.

• Kwaļo̧k n̄an ajri ro jet bar eoon in me ej kōmeļeļeik elmen an Jetōb kōnono n̄an jetōd eo ad, “Inspiration, Inspire,” scriptures.ChurchofJesusChrist.org). Kajjitōk ippān ajri ro n̄an kōnono kōn tōre ko rekar en̄jake Jetōb Kwojarjar tōl er ak kam̧ool n̄an er. Ta eo raar kōm̧m̧ane? Ta eo emaron̄ kōm̧ad kōj jān kile Jetōb? Riit ippān doon Moronai 4:3, im rōjan̄ ajri ro n̄an kālet juon me renaaj kōm̧m̧ane bwe ren i“ien otemjej bōk Jetōb eo An ippāer.”

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an ļōmņak kōn men ko remaron̄ kōņaan kōm̧m̧ane kōnke ta eo rekar ekkatak kake rainin. N̄an waanjon̄ak, remaron̄ karōk mour in jetōb, jeļāļo̧kjeņ, ānbwin, ak kōttōbar n̄an erom̧ eļapļo̧k āinwōt Jisōs Kraist.

Kōkm̧anm̧anļo̧k Ad Katakin

Jipan̄ ajri ro kile Jetōb eo. “Juon iaan men ko raorōk kwomaron̄ kōm̧m̧ani āinwōt juon rikaki ej n̄an jipan̄ ro kwoj katakin kile im̧we eo an Jetōb Kwojarjar. … Jipan̄ [ajri ro] leļo̧k en̄jake ko aer ilo mour in jetōb ippān im̧we eo an Jetōb Kwojarjar.” (Teaching in the Savior’s Way, 11.)

peij in m̧akūtkūt: Ke Irooj ej kajjitōk bwe in wūjlepļo̧k, imaron̄ ke pokake ilo tōmak