’O Iehova tō’u tīa’i, nā Yongsung Kim, havenlight.com

8–14 nō ’Ātete

Salamo 1–2 ; 8 ; 19–33 ; 40 ; 46

« ’O Iehova tō’u tīa’i »

Tē fa’a’ite nei teie arata’i i te tahi mau tuha’a parau nehenehe i roto i te Salamo ’o tē ha’amaita’i i te mau tamari’i, ’eiaha rā e ha’apa’o noa i teie ana’e. E pe’e i te arata’ira’a a te Vārua.

Pāpa’i i te mau mana’o e tae mai

Tītau i te mana’o

Tau mahana nā mua roa, ’a ani i te tahi mau tamari’i ’ia hōpoi mai i roto i te piha ha’api’ira’a i te mau hōho’a pāpa’i ’o tē fa’ahōho’a i te mau mea tā rātou ’e tō rātou ’utuāfare i tai’o i roto i te Salamo i teie hepetoma, mai te hō’ē tīa’i (hi’o Salamo 23:1, te hō’ē ’āu’a (hi’o Salamo 23:5), ’aore rā, hō’ē ’ā’au (hi’o Salamo 24:4). ’A ani ia rātou ’ia paraparau mai nō ni’a i tā rātou mau hōho’a pāpa’i ’e hō’ē ’īrava nō roto mai i te Salamo e fa’ahiti ra i te reira.

Ha’api’i i te ha’api’ira’a tumu : Te mau tamari’i ’āpī a’e

Salamo 19:1 ; 33:5

« Tē parau hua nei te mau ra’i i te hanahana ’o te Atua ».

Tē ha’api’i nei te Salamo 19 ’e te 33 ē, e nehenehe tātou e ’ite i te fa’a’itera’a pāpū o te hanahana ’e te maita’i ’o te Atua ’ati a’e ia tātou i roto i tāna mau mea nehenehe i poiete. E tauturu i te mau tamari’i ’ia ha’api’i mai ’ia ’ite i te rima o te Atua i roto i te ao e hā’ati nei ia rātou.

Mau ’ohipafri’i e nehenehe e rave

• ’A fa’a’ite i te mau tamari’i i te tahi mau hōho’a ’o te mau mea nehenehe tā te Atua i poiete, ’aore rā, a hi’o ’āmui i rāpae i te ha’amāramarama nō te ’ite i teie mau mea. ’A ani i te mau tamari’i e aha tā rātou e au i roto i te mau mea i poietehia e te Metua i te Ao ra. ’A tai’o i te Salamo 19:1 ’aore rā 33:5, ’e ’a ani i te mau tamari’i e aha tō rātou mana’o nō ni’a i te Metua i te Ao ra ’ia hi’o ana’e rātou i tāna mau mea i poiete.

• ’A hīmene ’āmui i te hō’ē hīmene nō ni’a i te mau mea tā te Atua i poiete, mai te « The World Is So Lovely ao nei » (Children’s Songbook, 233). E ani i te mau tamari’i ’ia rave i te hō’ē mea tā te Atua i poiete (mai te hō’ē mea tei fa’ahitihia i roto i te hīmene) ’e e pāpa’i i te hō’ē hōho’a o te reira nō te fa’a’ite i tō rātou ’utuāfare.

Salamo 23

« ’O Iehova tō’u tīa’i »

Mai te mea e nehenehe te mau tamari’i e ha’api’i mai i te ’āpī-roa-ra’a ē, ’o Iehova tō rātou tīa’i, e rahi atu ïa tō rātou hina’aro e pe’e Iiāna « nā te ’ē’a tītī’aifaro ».

Mau ’ohipari’i e nehenehe e rave

• ’A hōro’a i te tamari’i tāta’itahi i te hō’ē hōho’a ’o te ’api ’ohipara’a nō teie hepetoma, ’aore rā, a hōro’a ia rātou tāta’itahi i te hō’ē hōho’a nō roto mai i te ’api ’ohipara’a. ’A ani ia rātou ’ia fa’aro’o ’a tai’o ai ’outou i te Salamo 23. ’A ani ia rātou ’ia fa’atoro i ni’a iho i te hō’ē hōho’a ’aore rā, ’ia ’āfa’i i te hōho’a i ni’a ’ia fa’aro’o ana’e rātou ’ia fa’ahitihia te reira i roto i te Salamo. ’A fa’a’ite i tō ’outou ’itera’a pāpū ē, te ha’apa’o nei Iesu ia tātou, mai te hō’ē tīa’i e ha’apa’o i tāna mau māmoe.

• A parau i te mau tamari’i i te tahi mau rāve’a tā ’outou i ’ite ē, te here nei te Fa’aora ia ’outou. ’A ani i te mau tamari’i ’ia ti’a i ni’a, te tahi i muri i te tahi, ’e ’ia fa’a’ite mai i te tahi mau rāve’a tā rātou i ’ite ē, te here nei Iesu ia rātou. ’A hīmene ’āmui i te hō’ē hīmene ’o tē nehenehe e hōro’a mai ia rātou i te mau mana’o, mai te « Je ressens son amour » (Chants pour les enfants, 42–43).

Salamo 30:5

E nehenehe tā Iesu Mesia e taui i te ’oto ’ei ’oa’oa.

’A feruri nāhea ’outou ’ia tauturu i te mau tamari’i ’ia fāri’i i tō rātou iho ’itera’a i te ’oa’oa tā Iesu Mesia e hōro’a mai ia tātou ’ia ’oto ana’e tātou.

Mau ’ohipari’i e nehenehe e rave

• E ani i te mau tamari’i ’ia fa’ahua ta’i ’ia tai’o ana’e ’outou i te Salamo 30:5, « ’ia tāрае noa mai te ’oto i te ahiahi » I muri iho, ’a ani ia rātou ’ia ’oa’oa ’ia tai’o ana’e ’outou, « e riro rā i te ’oa’oa i te po’ipo’i ». ’A fa’ahiti fa’ahou i teie pereota e rave rahi taime, ’e ’a fa’a’ite pāpū i te mau tamari’i ē, maoti Iesu Mesia, e nehenehe te ’oto tā tātou e fāri’i i roto i teie orara’a, e monohia i te ’oa’oa.

• ’A fa’a’ite i te hō’ē hōho’a ’o te Fa’aora, ’e ’a parau i te mau tamari’i nō ni’a i te tahi mau mea tāna i rave nō ’outou ’o tē hōro’a mai i te ’oa’oa ia ’outou. ’A hōro’a i te tamari’i tāta’itahi i te hō’ē taime nō te tāpe’a i te hōho’a ’e ’ia fa’a’ite mai i te ’ohipa tā Iesu i rave ’o tē hōro’a mai ia rātou i te ’oa’oa.

Ha’api’i i te ha’api’ira’a tumu : Te mau tamari’i pa’ari a’e

Salamo 23 ; 27–28 ; 32 ; 46

Tē hōro’a mai nei te Fatu iā’u i te hau, te pūai, ’e te arata’ira’a.

E rave rahi ’o te Salamo e fa’a’ite pāpū nei i te mau ha’amaita’ira’a ’a te Fatu i roto i tō tātou orara’a. E nehenehe ’outou e fa’a’ohipa i te Salamo nō te tauturu i te mau tamari’i ’ia ha’api’i mai i te ti’aturi iāna ’e ’ia fāriu atu i ni’a iāna.

Mau ’ohipari’i e nehenehe e rave

• ’A pāpa’i i ni’a i te tāpura ’ere’ere Te Fatu . ’A vaiiho i te mau tamari’i ’ia mā’iti hō’ē pāpa’ira’a mo’a ’aore rā, hau atu nō te tai’o : Salamo 23:1 ; 27:1 ; 28:1 ; 28:7 ; 32:7 ; 46:1. ’A ani ia rātou ’ia fa’ahope i te pereota i ni’a i te tāpura ’ere’ere ma te fa’a’ohipa i te mea tā rātou i ha’api’i mai i roto i tā rātou pāpa’ira’a mo’a. E tauturu i te mau tamari’i ’ia paraparau i te mea tā teie mau tāpa’o e ha’api’i mai nei ia tātou nō ni’a i te Fatu.

• Fa’a’ite i te mau tamari’i i te hō’ē hōho’a nō te hō’ē ’ārenio. ’A ani ia rātou ’ia fa’a’ite mai i te tahi mau mea tā te ’ārenio e hina’aro nō te pāruru iāna, ’e nō te tino maita’i, ’e ’a fa’aitoito ia rātou ’ia ’imi i roto i te Salamo 23:1–4 i te mau mana’o. ’A fa’a’ite i te hō’ē hōho’a o te hō’ē tamari’i. E aha tā tātou e hina’aro ia pāruruhia tātou i te pae vārua ’e ’ia maita’i te tino ? ’A tai’o ’āmui i te Salamo 23, ’e ’a ani i te mau tamari’i nāhea te mau mea tā te tīa’i e rave ra i roto i teie salamo e nehenehe e fa’aauhia i te mea tā Iesu Mesia e rave nō tātou.

E mea ti’a ia tātou ’ia mā ’e ’ia vi’ivi’i ’ore i te pae vārua nō te tomo i mua i te aro ’o te Fatu.

Salamo 24:3–4

Nō te tomo i roto i te hiero, tītauhia ia tātou « te rima mā, ’e te ’ā’au maita’i ».

’A tīa’i maoro ai te mau tamari’i nō te tomo i roto i te hiero i te hō’ē mahana, ’a tauturu ia rātou ’ia māramarama ē, e nehenehe rātou e fa’aineine nā roto i te rirora’a ’ei mea mā i te pae vārua nā roto i te Tāra’ehara a te Fa’aora.

Mau ’ohipari’i e nehenehe e rave

• ’A fa’a’ite i te mau tamari’i i te hō’ē hōho’a nō te hō’ē hiero. ’A ani ia rātou ’ia tai’o i te Salamo 24:3 ’e ’ia ’imi i te mau parau ’o tē fa’aha’amana’o ia rātou i te hiero. I muri iho ’a tai’o ’āmui i te ’īrava 4 nō te ha’api’i mai ē, ’o vai tē nehenehe e tomo i roto i te hiero (’a tātara i te mau ta’o mātaro-’ore-hia). Nāhea tō tātou mau rima e repohia ai i te pae tino ? Nāhea tō tātou mau rima ’e tō tātou ’ā’au e repohia ai i te pae vārua ? Nāhea tātou i te tāmā i tō tātou mau rima i te pae tino ? Nāhea te Fa’aora i te tauturu ia tātou ’ia tāmā i tō tātou nau rima ’e te ’ā’au i te pae vārua ? (Mai te mea e tauturu te reira, ’a fa’ata’a ē, « rima » i roto i teie ’īrava, e nehenehe e fa’ahōho’ahia i tā tātou mau ’ohipa, ’e « ’ā’au » e nehenehe e fa’ahōho’ahia i tō tātou mau hina’aro).

• ’A hi’o fa’ahou ’e te mau tamari’i i te mau tītaura’a nō te fāri’i i te hō’ē parau fa’ati’a nō te hiero (hi’o Russell M. Nelson « Mau parau ’ōpanira’a », Liahona, Novema 2019, 120–22; ’aore rā, e ani i te hō’ē melo ’o te ’episekōpora’a ’ia paraparau i teie mau tītaura’a i roto i te piha ha’api’ira’a). E ani i te mau tamari’i ïa mā’iti hō’ē mea e fa’auruhia ia rātou ’ia rave nō te fa’aineine ’ia ti’amā nō te tomo i roto i te hiero.

Salamo 46:10

« ’A fa’atupua na, ’ia ’ite mai ē, ’о vau te Atua ».

Te ravera’a i te taime nō te fa’atura ’e nō te fa’atupua, noa atu te rahi o te ’ohipa ’ati a’e ia tātou, e nehenehe te reira e tauturu ia tātou ’ia patu i tō tātou ’itera’a pāpū ē, tē ora nei te Atua.

Mau ’ohipari’i e nehenehe e rave

• E tauturu i te mau tamari’i ’ia tāmau ’ā’au i te rēni mātāmua i roto i te Salamo 46:10 : « ’A fa’atupua na, ’ia ’ite mai ē, ’o vau te Atua ». ’A paraparau ia rātou nō ni’a i te aura’a ’o te parau ra « ’A fa’atupua na », i te pae tino ’e i te pae ’o te ferurira’a. ’A fa’a’ite i te mau tamari’i i te hō’ē ’ohipa i tupu, i reira te « fa’atupuara’a » i ha’apūai ai i tō ’outou ’itera’a pāpū nō te Metua i te Ao ra. ’A ani i te mau tamari’i ’ia fa’a’ite mai i te tahi mau ’ohipa i tupu i ni’a ia rātou. Nō te aha te fa’atupuara’a e riro ai ’ei rāve’a faufa’a nō te ’ite ē, te ora nei te Atua ?

• E ani i te mau tamari’i ’ia hi’o fa’ahou ’e ’o ’outou e aha tā rātou e rave i roto i te hō’ē mahana mātarohia. E tauturu ia rātou ’ia feruri i te mau taime i roto i tō rātou mahana, ’a ti’a ai ia rātou ’ia tāmata ’ia « fa’atupua » ’e ’ia ha’afātata i te Metua i te Ao ra. ’A fa’aitoito ia rātou ’ia ha’amau i te hō’ē ’ōpuara’a nō te fa’a’ohipa i taua mau huru taime ra i roto i te hepetoma i muri nei, nō te ha’apūai i tō rātou ’itera’a pāpū nō ni’a i te Metua i te Ao ra.

• E ani i te mau tamari’i ia tāpura i te tahi mau mea e nehenehe tātou e rave nō te ’ite tātou iho ē, tē vai mau nei te Metua i te Ao ra ’e tē here nei ’oia ia tātou. ’A ani ia rātou ’ia mā’iti i te hō’ē mea i roto i te tāpura, tā rātou e hina’aro e rave.

Fa’aitoito i te ’apora’a mai i te fare

E ani i te mau tamari’i ’ia mā’iti i te hō’ē ’īrava tā rātou e au i roto i te Salamo tā rātou e paraparau i teie mahana. E fa’aitoito ia rātou ’ia fa’a’ite i te reira ’īrava i te hō’ē melo o te ’utuāfare ’aore rā, i te hō’ē hoa.

Ha’amaita’ira’a i tā tātou ha’api’ira’a

’A fa’atumu i ni’a i te mau hina’aro ’o te mau tamari’i. ’Ei ’orometua ha’api’i, tei roto ’outou i te hō’ē ti’ara’a ta’a ’ē roa nō te hāro’aro’a i te mau hina’aro o te feiā tā ’outou e ha’api’i nei. Tō ’outou ’itera’a, tō ’outou mātaura’a i te mau tamari’i, ’e te arata’ira’a a te Vārua, e tauturu te reira ia ’outou ’ia ’ite e aha te mau ’ohipara’a ha’api’ira’a maita’i roa a’e nō te patu i tō rātou fa’aro’o i te Metua i te Ao ra ’e ia Iesu Mesia.