« 15–21 nō ’Ātete. Salamo 49–51 ; 61–66 ; 69–72 ; 77–78 ; 85–86 : ‘Nā’u e fa’a’ite i tāna i rave i tō’u nei Vārua », Mai, pe’e mai—nō te Paraimere : Faufa’a Tahito 2022 (2021)
« 15–21 nō ’Ātete. Salamo 49–51 ; 61–66 ; 69–72 ; 77–78 ; 85–86 », Mai, pe’e mai—nō te Paraimere : 2022
Fa’aorara’a i tei mo’e na, nā Michael T. Malm
15–21 nō ’Ātete
Salamo 49–51 ; 61–66 ; 69–72 ; 77–78 ; 85–86
« Nā’u e fa’a’ite i tāna i rave i tō’u nei Vārua »
E nehenehe tō ’outou hi’ora’a ’ei ta’ata ha’api’i mai i te ’evanelia e fa’auru ma te pūai i te mau tamari’i. ’A fa’a’ite ia rātou i tō ’outou mau ’itera’a pae vārua nā roto i te ha’api’ira’a mai i te ’evanelia.
Pāpa’i i te mau mana’o e tae mai
Tītau i te mana’o
’A fa’a’ite i te mau tamari’i i te hō’ē ’īrava i roto i te Salamo, hō’ē hīmene, ’aore rā, hō’ē hīmene nā te mau tamari’i ’o tē tauturu ia ’outou ’ia ’ite i te here o te Fa’aora. ’A hōro’a i te tamari’i tāta’itahi i te hō’ē taime nō te rave ato’a i te reira.
Ha’api’i i te ha’api’ira’a tumu : Te mau tamari’i ’āpī a’e
’Ia rave ana’e au i te hō’ē mā’itira’a hape, e nehenehe Iesu Mesia e tauturu mai iā’u ’ia taui.
E tauturu i te mau tamari’i ’ia māramarama ē, e tuha’a te mau hape nō te orara’a tāhuti nei, ’e e nehenehe tātou e fāri’i i te tauturu nō ’ō mai ia Iesu Mesia nō te upo’oti’a i ni’a i te reira.
Mau ’ohipari’i e nehenehe e rave
-
’A fa’a’ite i te hō’ē ’ā’amu ’ōhie, nō roto mai i tō ’outou orara’a ’aore rā, nō roto mai i te Hoa ’aore rā i te Liahona, nō ni’a i te hō’ē tamari’i tei rave i te hō’ē mā’itira’a hape terā rā, ’ua fāri’i i te tauturu nā roto mai i te Fa’aora ’ia maita’i a’e ’oia (’ei hi’ora’a, hi’o te video « The Shiny Bicycle [Te pere’o’o ta’ata’ahi ’ana’ana] » i ni’a i te ChurchofJesusChrist.org). ’A tai’o i te Salamo 51:10, ’e ’a fa’a’ite i te ’oa’oa tā ’outou e fāri’i ’ia tauturu ana’e mai te Fa’aora ia ’outou ’ia fāri’i i te « ’ā’au mā » ’e « te vārua ti’a »
-
’A fa’a’ite i te mau tamari’i i te ’api ’ohipara’a nō teie hepetoma. ’A fa’atoro i ni’a i te hōho’a tāta’itahi, ’e ’a ani i te mau tamari’i ’ia fa’ata’a mai i te mea tā rātou e ’ite ra. ’A tai’o i te fa’ahitira’a parau nō te tauturu i te mau tamari’i ’ia ha’api’i mai nō ni’a i te tātarahapa ’e te fa’a’orera’a hara.
E nehenehe au e paraparau ia vetahi ’ē nō ni’a ia Iesu Mesia.
E mana ta’a ’ē tō te mau parau tei ’ī i te fa’aro’o o te hō’ē tamari’i nō te ha’aputapū i te ’ā’au. ’A hōro’a i te mau tamari’i i te mana’o ti’aturi ē, e nehenehe tō rātou ’itera’a pāpū nō ni’a ia Iesu Mesia e tauturu ia vetahi ’ē.
E nehenehe tātou e paraparau ia vetahi ’ē nō ni’a i te ’ohipa tā Iesu i rave nō tātou.
Mau ’ohipari’i e nehenehe e rave
-
’A tai’o i te mau tamari’i i te Salamo 71:8, ’e ’a pāpa’i i te hō’ē vaha rahi i ni’a i te tāpura ’ere’ere. ’A ani ia rātou ’ia tauturu mai ia ’outou ’ia fa’a’ī i te vaha i te mau mea e nehenehe tā tātou e paraparau ia vetahi ’ē nō ni’a ia Iesu Mesia.
-
E hōro’a fa’a’ati i te hō’ē hōho’a nō Iesu Mesia. ’A ani i te mau tamari’i, te tahi i muri mai i te tahi, ’ia tāpe’a i te hōho’a ’e ’ia parau i te hō’ē mea tā rātou i ’ite nō ni’a iāna. E aha tāna i rave nō tātou ? (E nehenehe te mau hōho’a i roto i te Buka hōho’a ’evanelia e hōro’a mai i te tahi mau mana’o).
Tē fa’aro’o nei ’e tē pāhono nei te Metua i te Ao ra i tā’u mau pure.
E rave rahi mau Salamo e au mai te pure i te Atua nō te ani i te tauturu, te arata’ira’a, ’aore rā, te pārurura’a. ’A feruri e nāhea e ti’a ai ia ’outou ’ia tauturu i te mau tamari’i ’ia patu i tō rātou fa’aro’o ē, tē fa’aro’o nei ’e tē pāhono nei te Metua i te Ao ra ia rātou ’ia pure ana’e rātou.
Mau ’ohipari’i e nehenehe e rave
-
’A ani i te mau tamari’i e nāhea rātou i te paraparau i te ta’ata e fa’aea ra i te ātea roa. ’A fa’a’ite ia rātou i te mau mea tā tātou e nehenehe e fa’a’ohipa nō te paraparau, mai te hō’ē niuniu ’aore rā, te hō’ē rata. ’A tai’o ia rātou i te Salamo 86:7. Nāhea tātou ’ia « ti’aoro » i te Metua i te Ao ra ? Nāhea ʼoia ’ia pāhono mai ia tātou ?
-
’A ani i te mau tamari’i ’ia ha’uti mai i te mau mea tā rātou e rave i te mau mahana ato’a, mai te arara’a mai, te tāmā’ara’a i te po’ipo’i, te haerera’a i te ha’api’ira’a, ’aore rā, te haerera’a e ta’oto. E tauturu ia rātou ’ia ’imi i te taime i te roara’a o te mahana e nehenehe ai rātou e pure i te Metua i te Ao ra. ’A fa’a’ite pāpū ē, e nehenehe tā tātou e pure Iāna i te mau taime ato’a, ’e e fa’aro’o mai ’oia ia tātou i te mau taime ato’a.
-
E hīmene ’āmui i te hō’ē hīmene nō ni’a i te pure, mai te « La prière d’un enfant » (Chants pour les enfants, 6–7). ’A parau nō ni’a i te hō’ē taime ’a pāhono mai ai te Atua i tā ’outou mau pure.
« E ha’amana’o na vau i te ’ohipa a Iehova ».
E nehenehe te mau pāpa’ira’a mo’a e patu i tō tātou fa’aro’o ia Iesu Mesia nā roto i te tauturura’a ia tātou ’ia ha’amana’o i tāna « mau ’ohipa ta’a ’ē i tahito ra ».
Mau ’ohipari’i e nehenehe e rave
-
’A tai’o i te mau tamari’i i te Salamo 77:11, ’e ’a parau ia rātou e nāhea ’outou ’ia tāmata i te « ha’amana’o i te ’ohipa a Iehova », tae noa atu i tāna mau ’ohipa i roto i tō ’outou orara’a. E ani i te mau tamari’i ’ia pāpa’i i te mau hōho’a nō te tauturu ia rātou ’ia ha’amana’o i te mau mea rarahi tāna i rave.
-
’A fa’a’ite i te mau hōho’a i roto i teie buka ’aore rā, i roto i te Mai, pe’e mai—nō te ta’ata hō’ē ’e te ’utuāfare nō te fa’aha’amana’o i te mau tamari’i i te mau ’ā’amu tā rātou i ha’api’i mai i roto i te Faufa’a Tahito nō ni’a i te mau mea rarahi tā te Fatu i rave nō tōna nūna’a. ’A ani ia rātou e aha te mau ’ā’amu tā rātou mea au roa a’e, ’e nō te aha.
Ha’api’i i te ha’api’ira’a tumu : Te mau tamari’i pa’ari a’e
Te tātarahapa ’o te hō’ē ïa tauira’a o te ’ā’au.
Tē vai ra i roto i te Salamo 51 e rave rahi mau parau mau nō ni’a i te tātarahapa. Nāhea ’outou i te tauturu i te mau tamari’i ’ia ’ite i teie mau parau mau ?
Mau ’ohipari’i e nehenehe e rave
-
E fa’aue i te tamari’i tāta’itahi ’ia tai’o i te hō’ē ’o te mau ’īrava pāpa’ira’a mo’a i ni’a i te ’api ’ohipara’a nō teie hepetoma. ’A ani ia rātou ’ia ’imi i te mau ta’o e ha’api’i ra ia rātou i te hō’ē mea nō ni’a i te tātarahapa. ’A vaiiho ia rātou ’ia pāpa’i i te mau ta’o i ni’a i te tāpura ’ere’ere. I muri a’e i te fa’a’itera’a te mau ta’ata ato’a, ’a ani i te mau tamari’i nāhea rātou i te pāhono i te hō’ē hoa ’o tē ui mai, « e aha te aura’a ’ia tātarahapa ? »
-
Pāpa’i i te hō’ē māfatu i ni’a i te tāpura ’ere’ere. E ani i te mau tamari’i ’ia fa’ahiti i te tahi mau hara tā Sātane e fa’ahema ia tātou ’ia rave. ’A pāpa’i i te reira mau hara i roto i te māfatu. ’A ani i te mau tamari’i ’ia ’imi i te mau ta’o māfatu i roto i te Salamo 51:10, 17. E aha tā teie mau ’īrava e ha’api’i mai nei ia tātou nō ni’a i te tātarahapa ? (’hi’o ato’a te ’īrava 6). E tauturu i te mau tamari’i ’ia māramarama ē, noa atu ē, e fa’aea tātou i te rave i te hara, tītauhia i tō tātou māfatu ’ia taui ’ia ti’a ia tātou ’ia tātarahapa. ’A ani i te mau tamari’i ’ia tūmā i te mau hara i roto i te māfatu i ni’a i te tāpura ’ere’ere, ’e ’ia pāpa’i i te mau ta’o ’āpī e fa’a’ite ra i te tauira’a i roto i tō tātou māfatu, ’ia tātarahapa ana’e tātou. ’A fa’a’ite i tō ’outou ’itera’a pāpū ē, e nehenehe te Atua « e fa’aau i te ’ā’au mā i roto ia [tātou] » ’ia tātarahapa ana’e tātou (’īrava 10).
Salamo 66:16 ; 77:11 ; 78:7
« E ha’amana’o na vau i te ’ohipa a Iehova ».
’Ua ha’api’i te ’āti ’Īserā’ela i tā rātou mau tamari’i nō ni’a i te mau temeio tā te Atua i rave nō rātou, ’ia ti’a i te mau tamari’i « ’ia ti’aturi rātou i te Atua » (Salamo 78:7).
Mau ’ohipari’i e nehenehe e rave
-
’A ani i te mau tamari’i ’ia fa’a’ite mai ia ’outou i te tahi o tā rātou mau ’ā’amu au roa i roto i te mau pāpa’ira’a mo’a (e nehenehe te mau hōho’a i roto i te Buka hōho’a ’evanlia e tauturu ia rātou ’ia feruri i te mau ’ā’amu). Nō te aha rātou e au ai i teie mau ’ā’amu ? E aha tā teie mau ’ā’amu e ha’api’i mai nei ia tātou nō ni’a i te Fatu ? ’A tai’o ’āmui i te Salamo 77:11 ; 78:7. Nō te aha e mea faufa’a ’ia « ha’amana’o nā i te mau ’ohipa a Iehova ? »
-
’A ani i te mau tamari’i ’ia tai’o i te Salamo 66:16 ’e ’ia feruri ’aore rā, ’ia pāpa’i i te mau pāhonora’a i te uira’a « e aha tā te Fatu i rave nō tō’u vārua ? » I muri iho ’a vaiiho ia rātou ’ia fa’a’ite mai i tā rātou mau pāhonora’a, mai te mea e hina’aro rātou. E aha tā tātou e nehenehe e rave nō te « ha’amana’o tāmau noa » (Moroni 4:3 ; 5:2) i te mea tā te Fatu i rave nō tātou ?
Tē hina’aro nei te Fatu ’ia fa’a’ore i te hara.
’Ia hara ana’e tātou, e hina’aro Sātane ’ia feruri tātou ē, e’ita roa atu te Fatu e fa’a’ore i tā tātou hara. E tauturu i te mau tamari’i ’ia patu i tō rātou fa’aro’o ē, ’ua « ineine te Fatu nō te fa’a’ore mai i te hara nei, ’e te aroha rahi » (Salamo 86:5).
Mau ’ohipari’i e nehenehe e rave
-
’A fa’a’ite i te hō’ē hōho’a nō te Fa’aora (mai te hō’ē i roto i te Mai, pe’e mai—nō te ta’ata hō’ē ’e te ’utuāfare), ’e ’a ani i te mau tamari’i e aha te mau ta’o tā rātou e fa’a’ohipa nō te fa’a’ite iāna. ’A ani ia rātou ’ia ’imi i te mau ta’o e fa’a’ite ra iāna i roto i te Salamo 86:5, 13, 15. Mai te mea e hina’arohia, ’a tauturu ia rātou ’ia tātara i teie mau ta’o. E aha tā tātou e nehenehe e parau i te hō’ē hoa ’o tē mana’o ra ē, e riri te Atua ia rātou ’ia hara ana’e rātou ?
-
’A hīmene ’e te mau tamari’i i te hō’ē hīmene ’o tā ’outou e mana’o ra ē, e tauturu te reira ia rātou ’ia māramarama i te huru fa’a’orera’a hara a te Fa’aora, mai te « Te māere nei au » (Te mau hīmene, no. 111). ’A fa’a’ite i tō ’outou ’itera’a pāpū ē, tē hina’aro nei Iesu Mesia e fa’a’ore i tā tātou hara.
Fa’aitoito i te ’apora’a mai i te fare
’A ani i te tamari’i tāta’itahi ’ia fa’a’ite i te hō’ē tumu i here ai rātou i te Metua i te Ao ra ’e ia Iesu Mesia. ’A fa’aitoito ia rātou ’ia fa’a’ite i te reira tumu i te hō’ē ta’ata i te fare. ’A fa’a’ite pāpū ē, e ha’amaita’i tā rātou mau parau i te reira ta’ata.
Ha’amaita’ira’a i tā tātou ha’api’ira’a
Fa’a’ite i te ti’aturi. « Mai te mea e ’ite te [mau tamari’i] ē, tē ti’aturi ra ’outou ia rātou, e tupu i te rahi tō rātou ti’aturi i tō rātou pūai hanahana. ’A paraparau ma te here ē, ’ua ’ite ’outou e nehenehe rātou e ti’a’au i tā rātou iho ha’api’ira’a mai » (Te ha’api’ira’a mai tā te Fa’aora, 28).