Te mau ha’avāra’a o Ioba, nā Joseph Brickey

1–7 nō ’Ātete

Ioba 1–3 ; 12–14 ; 19 ; 21–24 ; 38–40 ; 42

« E ti’aturi ā rā vau iāna »

’A tuatāpapa ai ’outou i te ’ā’amu ’o Ioba, e aha te mau parau poro’i tei ’itehia ia ’outou nō tō ’outou iho orara’a ? I tō ’outou mana’o, tei hea te reira mau parau poro’i tā te mau tamari’i e ti’a ai ’ia fa’aro’o ?

Pāpa’i i te mau mana’o e tae mai

Tītau i te mana’o

E fa’a’ite i te mau tamari’i i te hō’ē hōho’a nō Ioba (hi’o te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare). ’A ani i te mau tamari’i, i tō rātou mana’ora’a, e aha te mana’o o te ta’ata i ni’a i te hōho’a. ’A ani ia rātou ’ia fa’a’ite mai i te tahi atu mau mea tā rātou i ’ite nō ni’a ia Ioba.

Ha’api’i i te ha’api’ira’a tumu : Te mau tamari’i ’āpī a’e

Ioba 1–2 ; 13:15

E tauturu mai te Metua i te Ao ra ’e Iesu Mesia iā’u i roto i te mau taime fifi, nō te mea e fa’aro’o tō’u ia rāua.

’Ua ti’aturi Ioba i te Atua ’e ’ua ti’a iāna ’ia vai ha’apa’o maita’i noa, noa atu ’ua fa’aruru ’oia i te mau tāmatara’a fifi roa. E nehenehe te ’ā’amu o Ioba e tauturu i te mau tamari’i ’ia ha’apūai i tō rātou fa’aro’o i te Metua i te Ao ra ’e ia Iesu Mesia, ’ia ineine rātou nō te fa’aruru i tō rātou iho mau tāmatara’a fifi.

Mau ’ohipari’i e nehenehe e rave

• E ani i te mau tamari’i ’ia fa’a’ite mai i te mau mea tā rātou i ’ite nō ni’a ia Ioba, ’e ’a tauturu ia rātou ’ia māramarama i te ’ohipa i tupu i ni’a iāna (hi’o Ioba 1–2 ; « Ioba » i roto Te mau ’ā’amu o te Faufa’a Tahito). ’A ani i te mau tamari’i e aha tō rātou mana’o ’āhiri ē, ’o rātou Ioba. O vai tē nehenehe e tauturu ia tātou ’ia tupu ana’e te mau ’ohipa pe’ape’a i roto i tō tātou orara’a ? ’A fa’a’ite i te hō’ē hōho’a nō Iesu Mesia, ’e ’a fa’ata’a ē, ’ua tauturu te fa’aro’o o Ioba i te Fatu iāna i roto tōna mau tāmatara’a (hi’o Ioba 1:21).

• ’A tai’o i mua i te mau tamari’i i te mau parau a Ioba i roto Ioba 13:15 : « e ti’aturi ā rā vau iāna ». Nō te tauturu i te mau tamari’i ’ia māramarama e aha te aura’a e ti’aturi i te Atua, ’a paraparau ia rātou nō ni’a i te tahi atu mau ta’ata tā rātou e ti’aturi nei. ’Ei hi’ora’a, e aha tā tātou e ti’aturi i tō tātou mau metua ? E aha tā tātou e ti’aturi i tō tātou mau ’orometua ha’api’i ? E aha tā tātou e ti’aturi i tō tātou Metua i te Ao ra ’e ia Iesu Mesia ? ’A fa’a’ite i tō ’outou ti’aturi i te Metua i te Ao ra ’e ia Iesu Mesia, ’e ’a tauturu i te mau tamari’i ’ia feruri i te mau rāve’a e nehenehe ai rātou e fa’a’ite ē, tē here nei ’e tē ti’aturi nei rātou ia rāua.

Ioba 19:25

’O Iesu Mesia tō’u Ora.

’Ua ti’a roa ia Ioba ’ia fa’a’oroma’i i tōna mau tāmatara’a ’e tōna māuiui nō tōna fa’aro’o i te Fatu. Nāhea ’outou i te tauturu i te mau tamari’i ’ia ha’amau i tō rātou fa’aro’o ia Iesu Mesia, tō tātou Ora ?

Mau ’ohipari’i e nehenehe e rave

• ’A pia i te hō’ē hōho’a nō Iesu i ni’a i te satāuro ’aore rā, ’ua hunahia i roto i te mēnema (hi’o Buka hōho’a ’o te ’evanelia, no. 57,58). ’A ani i te mau tamari’i ’ia fa’ata’a mai e aha tē tupu nei i roto i te hōho’a. ’A tai’o i mua i te mau tamari’i i te ’itera’a pāpū o Ioba i roto i te Ioba 19:25. ’A pia i te hō’ē hōho’a nō te Fa’aora tei ti’afa’ahou (hi’o Buka hōho’a ’ēvanelia, no. 59,60 ; hi’o ato’a te ’api ’ohipara’a nō teie hepetoma), ’e ’a fa’a’ite pāpū ē, ’ua ti’afa’ahou Iesu Mesia ’e tē ora nei i teie mahana. Nō te aha tātou e māuruuru ai ē, ’ua ti’afa’ahou Iesu ?

• ’A fa’a’ite i te hō’ē hōho’a nō Ioba, ’e ’a fa’ata’a ē, e māuiui rahi tō Ioba nō te mea e tūtu’a tō ni’a iho i tōna ’iri nā te mau vāhi ato’a. ’Ua ’ere ’oia i tōna fare, ’e ’ua pohe tāna mau tamari’i. ’Ua ’ite rā Ioba i te hō’ē mea faufa’a roa tei tāmāhanahana iāna. ’A tai’o i te Ioba 19:25, ’e ’a ani i te mau tamari’i e aha tā Ioba i ’ite. ’A fa’a’ite i te mau tamari’i e mea nāhea ’outou i ’ite ai ē, tē ora nei Iesu Mesia, ’e ’a ani ia rātou ’ia fa’a’ite mai i tō rātou ’itera’a pāpū nō ni’a iāna.

  

  Ioba, nā Gary L. Kapp

• E ani i te mau tamari’i ’ia pēni i te ’api ’ohipara’a nō teie hepetoma. ’A nā reira ai rātou, ’a ha’uti ’aore rā, ’a hīmene i te hō’ē hīmene nō ni’a i te ti’afa’ahoura’a o Iesu, mai te « Jésus est-il réssucité ? » ’aore rā « Jésus est ressuscité » (Chants pour les enfants, 45, 44). ’A ani ia rātou ’ia fa’a’ite mai i tō rātou mana’o nō ni’a ia Iesu, ’e ’a tauturu ia rātou ’ia māramarama ē, e nehenehe tātou e fāri’i i te mau mana’o maita’i nō ’ō mai i te Vārua Maita’i ra nō te tauturu ia tātou ’ia ’ite ē, te vai mau nei Iesu Mesia.

Ha’api’i i te ha’api’ira’a tumu : Te mau tamari’i pa’ari a’e

Ioba 1–2 ; 12 ; 19

E tauturu mai te Metua i te Ao ra ’e ’o Iesu Mesia iā’u ’ia upo’oti’a i ni’a i tō’u mau tāmatara’a mai te mea e fa’aro’o tō’u ia rāua.

E mau mahana fifi tō te mau ta’ata ato’a, ’e tē vai nei te tahi mau ta’ata e vai maoro tō rātou mau tāmatara’a. ’Ua pāturu te fa’aro’o o Ioba i te Atua iāna i roto i tōna mau tāmatara’a. ’A feruri nāhea tōna ’ā’amu e nehenehe ai e tauturu i te mau tamari’i ’ia ha’amau i tō rātou fa’aro’o i roto i te Metua i te Ao ra ’e ia Iesu Mesia ’ia ti’a ho’i ia rātou ’ia fa’aruru i tō rātou mau tāmatara’a, i teie nei ’e a muri a’e.

Mau ’ohipari’i e nehenehe e rave

• ’A ani i te mau tamari’i ’ia fa’a’ite mai e aha tā rātou i ’ite nō ni‘a i te ’ā’amu o Ioba. E aha tōna huru ta’ata ? E aha tei tupu i ni’a iho iāna ? Nāhea ’oia i te pāhonora’a i tāna mau tāmatara’a ? ’A fa’atoro ia rātou i ni’a i te mau ’īrava i roto ia Ioba 1–2 nō te tauturu ia rātou ’ia fa’ati’a mai i te ’ā’amu (hi’o Ioba 1:1, 13–22 ; 2:7–10 ; hi’o ato’a « Ioba » i roto Te mau ’ā’amu o te Faufa’a Tahito). E ani i te mau tamari’i ’ia fa’a’ite mai, i tō rātou mana’ora’a, e aha te parau poro’i tumu o te ’ā’amu o Ioba.

• ’A pia i te tahi mau hōho’a ’o Iesu Mesia te ’ohipa ra i pīha’i iho i te tahi atu mau ta’ata, ’e ’a ani i te mau tamari’i, i tō rātou mana’ora’a, e aha tā teie mau hōho’a e ha’api’i nei ia tātou ē, ’o vai ’o Iesu Mesia, ’e mai te aha tōna huru. E aha atu ā tā tātou i ʼite nō niʼa ia Iesu Mesia ? E ani i te mau tamari’i ’ia tai’o i te tahi o te mau ’īrava i muri nei nō te ’ite mai i te tahi mau mea tā Ioba i ’ite nō ni’a i te Fatu : Ioba 12:10, 13, 16 ; 19:25–27. Nō te aha e mea faufaʼa rahi ’ia ʼite i teie mau mea nō ni’a i te Fa’aora ?

• E ani i te mau tamari’i ’ia tai’o ia Ioba 19:14–19, ’e e ani ia rātou e aha tā teie mau ’īrava e parau nei nō ni’a i te huru ’o te tahi atu mau ta’ata i ni’a ia Ioba. E aha tō tātou mana’o ’āhiri e tupu teie mau mea i ni’a ia tātou ? ’A ani i te mau tamari’i ’ia tai’o ia Ioba 19:23–27 nō te ’ite mea nāhea e ’itehia ai ia Ioba te tāmāhanahana i roto i teie ’ohipa i tupu. E aha tā teie mau ’īrava e ha’api’i mai nei ia tātou nō ni’a i te Fa’aora ? Nō te aha e mea faufa’a ’ia ’ite ē, tē ora nei ’oia ’e tē here nei ia tātou ? (hi’o Ioane 17:3).

• Hīmene ’āmui i te hō’ē hīmene ’o tē fa’a’ite pāpū nei ia Iesu Mesia, mai te « ’Ua ’ite au tē ora nei tō’u Fatu(Te mau hīmene, no.69). E aha tā te hīmene e parau nei nō ni’a nō te aha e mea faufa’a ’ia fāri’i i te hō’ē ’itera’a pāpū ē, tē ora nei Iesu Mesia ? ’A parau i te mau tamari’i e mea nāhea tō ’outou ’itera’a ē, tē ora nei te Fa’aora ’e nō te aha ’outou i māuruuru ai nō tāua ’itera’a ra. ’A fa’aitoito ia rātou ’ia fa’a’ite mai i tō rātou mau mana’o ’e te ’itera’a pāpū.

Ioba 19:13–19 ; 22:5

E fa’ateitei ’e e fa’aitoito te mau hoa maita’i i te tahi ’e te tahi.

I te taime ’a fifi ai Ioba, ’ua parau tōna mau hoa ē, ’ua fa’autu’a te Atua iāna nō te mea ’ua rave ’oia i te hara. E nehenehe teie ’ā’amu e tauturu ia ’outou ’ia ha’api’i i te mau tamari’i i te hō’ē rāve’a maita’i a’e nō te pāhono, mai te mea ’ua fāri’i te hō’ē hoa i te mau tāmatara’a (hi’o Ioba 16:1–5).

Mau ’ohipari’i e nehenehe e rave

• ’A ani i te mau tamari’i ’ia hi’o fa’ahou i te mau ’ohipa teimaha e rave rahi tei tupu i ni’a ia Ioba (hi’o Ioba 1:13–19 ; 2:7). ’A tai’o ’āmui i te Ioba 19:14, 19, ma te ’imi e aha te ’ohipa tā te mau hoa o Ioba i rave i mua i tāna mau tāmatara’a (’a hi’o ato’a Ioba 22:1–5). E ani i te mau tamari’i ’ia feruri ē, ’o rātou te mau hoa o Ioba—nāhea rātou i te tāmata i te tauturu iāna ? ’A fa’aitoito ia rātou ’ia feruri i te hō’ē hoa tei roto paha i te hō’ē taime fifi, ’e ’ia fa’anaho i te hō’ē mea e nehenehe tā rātou e rave nō te fa’a’ite i te here ’e te pāturura’a i tō rātou hoa.

• ’A ani i te mau tamari’i ’ia tāpura i te tahi mau huru maita’i o te hō’ē hoa maita’i ’e ’ia fa’a’ite i te i’oa o te hō’ē hoa e mau ra i teie mau huru maita’i. Fa’a’ite i te hō’ē hōho’a nō Iesu Mesia. I te aha Iesu i riro ai ’ei hoa maita’i nō tātou tāta’itahi ? Nāhea e ti’a ai ia tātou ’ia pe’e i tōna hi’ora’a ?

Fa’aitoito i te ’apora’a mai i te fare

E ani i te mau tamari’i ’ia fa’a’ite i te hō’ē melo o te ’utuāfare ’aore rā, i te hō’ē hoa, i te hō’ē rāve’a e nehenehe i te Metua i te Ao ra ’e ’o Iesu Mesia e tauturu ia rātou ’ia vai ana’e rātou i roto i te hō’ē taime fifi.

Haʼamaitaʼiraʼa i tā tātou haʼapiʼiraʼa

E fa’a’ite pāpū i te mau ha’amaita’ira’a i fafauhia mai. ’Ia hōro’a ana’e mai te Fatu i te hō’ē fa’auera’a, pinepine ’oia i te fafau mai i te mau ha’amaita’ira’a nō te ha’apa’ora’a i taua fa’auera’a ra. ’Ia ani ana’e ’oe i te mau tamari’i nō te Paraimere ’ia ora i te hōʼē parau tumu, ’a faʼaʼite i te mau fafaura’a tā te Atua i parau nā roto i te mau peropheta, i te mau taʼata ’o tē haʼapaʼo i taua parau tumu ra. E nehenehe ato’a ’outou e fa’a’ite i tō ’outou ’itera’a pāpū nō te mau ha’amaita’ira’a tā ’outou i fāri’i nā roto i te orara’a i taua parau tumu ra.