The Judgments of Ioba [Te mau ha’avāra’a i ni’a ia Ioba], nā Joseph Brickey

1–7 nō ’Ātete

Ioba 1–3 ; 12–14 ; 19 ; 21–24 ; 38–40 ; 42

« E ti’aturi ā rā vau iāna »

’A tai’o ai ’outou i te parau nō Ioba, e arata’i te Vārua ia ’outou nō te ’ite mai i te mau parau mau faufa’a rahi nō ’outou. ’A pāpa’i i te mea tā ’outou e ’ite mai ’e ’a feruri nāhea i te fa’a’ohipa i teie mau parau mau nō ’outou.

Pāpa’i i te mau mana’o e tae mai

E uiui iho ā te mana’o ē nō te aha te mau ’ohipa ’ino e tupu nei i ni’a i te ta’ata maita’i—’e ’aore rā, nō te aha te mau mea maita’i e tupu nei i ni’a i te ta’ata ’ino. Nō te aha pa’i te Atua parau ti’a e fa’ati’a ai i te reira ? Tē hōhorahia nei te mau uira’a mai te reira i roto i te mau ’ohipa i tupu nō Ioba, ’oia hō’ē o te mau ta’ata maita’i tei ro’ohia i te mau ’ohipa ’ino. Nō tōna mau fifi, ’ua uiui haere tōna mau hoa ē e ta’ata maita’i mau ānei ’o Ioba. ’Ua parau pāpū atu ’o Ioba i tōna parau ti’a, ’a uiui ato’a ai ē, e ’ohipa ti’a mau ānei tā te Atua. Noa atu rā tōna mamae ’e te mana’o uiui, ’ua tāpe’a noa Ioba i tōna huru parau ti’a ’e tōna fa’aro’o ia Iesu Mesia. I roto i te buka a Ioba, tē uiui ra te mana’o nō ni’a i te fa’aro’o ’e tē tāmatahia ra te reira, ’aita roa atu rā i fa’aru’ehia. ’Aita ato’a rā te mau uira’a ato’a i pāhonohia. Tē ha’api’i nei rā te buka a Ioba ē, e nehenehe te mau uira’a ’e te fa’aro’o ’ia haere to’opiti ē tae noa atu i te taime e pāhonohia te mau uira’a, ’e noa atu ā te mau mea e tupu nā mua a’e i terā taime, e nehenehe tātou e parau nō ni’a i tō tātou Fatu ē : « E ti’aturi ā rā vau iāna » (Ioba 13:15).

Nō te hō’ē hi’ora’a rere ā manu nō te Buka a Ioba, hi’o « Job » i roto i te Arata’i nō te mau pāpa’ira’a mo’a (scriptures.ChurchofJesusChrist.org).

Mau mana’o nō te tuatāpapara’a pāpa’ira’a mo’a a te ta’ata hō’ē

Ioba 1–3 ; 12–13

E nehenehe tō’u ti’aturira’a i te Metua i te Ao ra ’e ia Iesu Mesia e tauturu iā’u ’ia vai ha’apa’o maita’i noa ta’a ’ē noa atu tō’u vaira’a.

’Ua ’ōpuahia te mau pene mātāmua nō Ioba ’ei tūra’ira’a i te parau nō te ’ohipa a Sātane ’ei ’enemi nō tātou ’aore rā ’ei fa’ahapa, e ’ere te fa’a’itera’a e aha te mau ’āparaura’a i rotopū i te Atua ’e Sātane. ’A tai’o ai ’oe i te mau fa’ahitira’a a Sātane nō ni’a ia Ioba (hi’o Ioba 1:9–11 ; 2:4–5), e nehenehe ’oe e feruri ē, e tano ato’a ānei teie mau parau nō ’oe. E nehenehe e ui ia ’oe iho ē, e aha tō’u mau tumu nō te vai ha’apa’o maita’i noa i te Atua ? ’A feruri i te mau fifi tei tu’uhia i ni’a ia Ioba ’e tāna mau pāhonora’a (hi’o Ioba 1:20–22 ; 2:9–10). E aha tā ’oe e ha’api’i ra nō ni’a iāna ’o tē tauturu ia ’oe ’ia pāhono i tā ’oe mau tāmatara’a ?

Noa atu ā i tāmata noa ana Ioba i te vai ha’apa’o maita’i noa, ’ua tāmau noa tāna mau tāmatara’a ’e tōna mamae (e hi’o ato’a i tāna autā i roto i te pene 3). E au ra ē, tē ’ū’ana noa atu ra tōna mamae, tu’u a’enei tōna mau hoa i te mana’o ē tē fa’autu’a ra te Atua iāna (hi’o Ioba 4–5 ; 8 ; 11). ’A tai’o ai ’oe i te tahi mau tuha’a nō te pāhonora’a a Ioba i roto i te mau pene 12–13, ’a feruri i te mea tā Ioba i ’ite nō ni’a i te Atua tei tāpe’a noa i tōna ti’aturi, noa atu ā tōna mamae ’e te mau uira’a pāhono-’ore-hia. E aha tā ’oe i ’ite nō ni’a i te Atua ’o tē tauturu ia ’oe ’ia fa’aruru i te mau tāmatara’a ? Mea nāhea i te noa’ara’a te reira ’ite, ’e e mea nāhea te reira i te ha’apūaira’a i tō ’oe fa’aro’o ?

Ioba 19

’O Iesu Mesia tō’u Tāra’ehara.

I te tahi taime, e heheuhia mai te mau parau mau faufa’a rahi i roto i tō tātou ahoaho rahi roa a’e. ’A feruri i te mau tāmatara’a tā Ioba e fa’ati’a nei i roto i te Ioba 19:1–22 nā reira ato’a te mau parau tāna i fa’ahiti i roto i te Ioba 19:23–27. I muri iho ’a feruri e mea nāhea tō ’oe ’itera’a ē tē ora nei tō Tāra’ehara. E te ’ohipa ta’a ’ē tā teie ’ite e fa’atupu i te taime ’oe e fa’aruru ai i te mau tāmatara’a rahi ?

Hi’o ato’a Te Parau Ha’api’ira’a ’e te mau Parau Fafau 121:1–12 ; 122.

Job [Ioba], nā Gary L. Kapp

Ioba 21–24

« ’Ua tāmatahia vau e ana, e riro vau mai te ’auro mā maita’i ra ».

’Ia tai’o rahi atu ā ’oe i te titotitora’a mana’o i roto ia Ioba ’e tōna mau hoa nō ni’a i te tumu ’oia e mamae nei, e nehenehe e feruri e mea nāhea ’oe i te pāhono i te uira’a rahi o tā rātou ’āparaura’a : Nō te aha pa’i, i te tahi taime, e mamae te feiā parau ti’a ’e e haere noa te feiā ’ino ma te utu’a ’ore ? ’A feruri i te reira ’a tai’o ai ’oe i te Ioba 21–24. E aha te mea tā ’oe i ’ite nō ni’a i te Metua i te Ao ra ’e tāna fa’anahora’a ’o tē nehenehe e hōro’a mai i te tahi pāhonora’a ? Hi’o, ’ei hi’ora’a, 2 Nephi 2:11–13 ; Mosia 23:21–23 ; 24:10–16 ; Aberahama 3:22–26 ; Dallin H. Oaks, « Nā pae e piti i te mau mea ato’a ra », Liahona, Mē 2016, 114–17.

Hi’o ato’a L. Todd Budge, « Te ti’aturira’a tāmau ’e te tupu fa’ahou », Liahona, Novema 2019, 47–49.

Ioba 38 ; 40 ; 42

E hi’ora’a hau a’e tō te Atua i tō’u nei.

Nō tōna ’ino’ino i te mau fa’ahapara’a a tōna mau hoa (hi’o Ioba 16:1–5 ; 19:1–3), ’ua ti’aoro pinepine Ioba i te Atua i te tītaura’a i te tātarara’a nō teie mamae (hi’o Ioba 19:6–7 ; 23:1–9 ; 31). Tē parau nei Elder Neal A. Maxwell ē « ’ia fatimā’ū’ū roa tātou i te taime o te Atua ’ite hope », mai ia Ioba ri’i ho’i te huru, « tē parau pāpū nei tātou ē, e mea ’ite a’e tātou e aha te mea maita’i a’e. E mea ’ē roa ïa, e ’ere ānei—’o tātou nei ho’i ’e tā tātou uāti i ni’a i te rima e tāmata nei i te fa’aa’o iāna e hi’o nei i te mau uāti ’e te mau tārena o te ra’i nui » (« Hope through the Atonement of Jesus Christ », Ensign, Nov. 1998, 63). ’A feruri i teie mau parau ’a tai’o ai ’oe i te pāhonora’a a te Atua ia Ioba i roto i te mau pene 38 ’e te 40. E aha te mau parau tāna e ha’api’i ra ia Ioba ? Nō te aha e mea faufa’a rahi ’ia ’ite tātou i teie mau parau mau ’a tāfifi ai i te mau ’ati ’e i te mau uira’a i’ō nei i te tāhuti nei ? E aha tā ’oe e fa’ahiahia nei i te pāhonora’a a Ioba i roto i te Ioba 42:1–6 ?

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Ioba 1:20–22.Nō te māramarama e aha ra te mana’o o Ioba, mai tei ’itehia i roto i teie mau ’īrava, e nehenehe tō ’outou ’utuāfare e tai’o i te « Ioba » i roto i te Old Testament Stories [Te mau ’ā’amu o te Faufa’a Tahito] ’aore rā e ha’uti ta’ata ’ora i te Ioba 1:13–22. E aha te ha’api’ira’a tā tātou e nehenehe e ’apo mai i roto i te hi’ora’a o Ioba ?

Ioba 14:14.E aha tā tātou e pāhono atu i te uira’a a Ioba i roto i teie ’īrava ? Nāhea te Alama 11:42–44 e nehenehe e tauturu ia tātou ? (Hi’o ato’a i te video « He Lives—Celebrate Easter Because Jesus Christ Lives [Tē ora nei ’oia—fa’ahanahana i te Pāsa nō te mea tē ora nei Iesu Mesia] », ChurchofJesusChrist.org.)

Ioba 16:1–5.’Ua riro ānei tātou mai te mau hoa o Ioba, tei ha’avā ’e tei fa’ahapa ia Ioba i te taime tītauhia te tāmāhanahanara’a ? (hi’o Ioba 16:1–4 ; hi’o ato’a Ioane 7:24). Nāhea tā tātou mau parau e nehenehe e ha’apūai i te ta’ata i roto i tō rātou māuiui ? (hi’o Ioba 16:5).

Ioba 19:23–27.I muri mai i te tai’ora’a i teie mau ’īrava, e nehenehe te mau melo o te ’utuāfare e fa’a’ite mai nāhea rātou i te ’itera’a ē tē ora nei tō tātou Tāra’ehara. E nehenehe ’outou e ’ohipa ’āmui nō te tu’u i tā ’outou mau parau ’e mau ’itera’a pāpū (’aore rā te mau hōho’a pāpa’i nō te Fa’aora) i roto i te hō’ē buka, mai te buka ’ā’amu o te ’utuāfare (hi’o ’īrava 23). E nehenehe ato’a ’outou e hīmene i te hō’ē hīmene e parau pāpū nei nō te Fa’aora, mai te hīmene ra « ’Ua ’ite au tē ora nei tō’u nei Fatu » (Te mau hīmene, N°69), ’a fa’a’ite ai i te mau parau ’o tē ha’apūai i tō ’outou fa’aro’o iāna ra.

Ioba 23:8–11.E aha te aura’a te parau « e riro vau » mai roto atu i tā tātou mau tāmatara’a « mai te ’auro » ? (hi’o ato’a i te video « The Refiner’s Fire », ChurchofJesusChrist.org). ’O vai tā tātou i ’ite tei rave i te reira ? E au paha te mau tamari’i ’ia hāmani i te hō’ē mea ma te parau i roto i te ’īrava 10 e pāpa’ihia i ni’a i te reira. E nehenehe ato’a ’outou e paraparau nāhea tō Iesu Mesia upo’oti’ara’a i ni’a i tōna mau tāmatara’a (hi’o Luka 22:41–44 ; Te Parau Ha’api’ira’a ’e te mau Parau Fafau 19:16–19).

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a nō teie hepetoma i roto Mai, pe’e mai—nō te Paraimere

Hīmene tei mana’ohia : « Tē ora nei tō’u Fa’aora », Te mau hīmene, N°68.

Ha’amaita’ira’a i te tuatāpapara’a pāpa’ira’a mo’a a te ta’ata iho

E feruri. E nehenehe te mau hi’ora’a rahi e tae mai ’a tāmata ai tātou i te hi’o ia tātou i roto i te mau pāpa’ira’a mo’a. ’Ei hi’ora’a, ’ia hi’o ’outou ia ’outou iho i roto i te vaira’a o Ioba, e nehenehe te reira e tauturu ia ’outou ’ia feruri i tō ’outou tā’amura’a ’e te Metua i te Ao ra ’e Iesu Mesia.

Job and His Friends [Ioba ’e tōna mau hoa], nā Ilya Repin