Te Mesia ’e tōna ’ahu ’ute’ute tei fa’a’atihia e te ta’ata tei tūturi i raro

Every Knee Shall Bow [E tu’u te mau turi ato’a i raro], nā J. Kirk Richards

22–28 nō ’Ātete

Salamo 102–103 ; 110 ; 116–119 ; 127–128 ; 135–139 ; 146–150

« ’O tei huti i te aho ra ’ia ha’amaita’i ana’e ïa ia Iehova »

Tē ha’api’i nei te Salamo 119:105 ē ’ua riro te parau a te Atua « ’ei lamepa… i [tō ’outou] nei ’āvae ». ’A tai’o ai ’outou i te Salamo, ’a pāpa’i i te mau pereota ’e te mau mana’o fa’auru, ’o tē tauturu i te tūramarama i tō ’outou ’ē’a ho’ira’a i te Metua i te Ao ra.

Pāpa’i i te mau mana’o e tae mai

Te i’oa mātauhia e te ’āti Iuda nō te Salamo, e ta’o Hebera ïa tōna aura’a « e mau ’ārue ». ’Ua tū’ati ato’a te reira ta’o, ’o Tehillim, i te parau « hallelujah » (te aura’a ra « e ha’amaita’i ia Iehova », ’aore rā « e ’ārue i te Fatu »). Mai te mea e mā’iti ’outou i te hō’ē ta’o nō te pū’ohu i te poro’i rahi o te Salamo, ’o « ’ārue » ïa te ta’o tano. Tē vai ra te tahi salamo e ani ’āfaro nei ’ia « ha’amaita’i i te Fatu » (hi’o ta’a ’ē i te Salamo 146–50), ’e e nehenehe te reira e fa’auru i te mana’o ha’amori ’e te ’ārue. Tē ani nei te Salamo ia tātou ’ia feruri nō ni’a i te mana o te Fatu, nō ni’a i tōna aroha ’e nō ni’a i te mau mea rarahi tāna i rave. E’ita roa atu tā tātou e nehenehe e fa’aho’i i tāna i ’aufau, e nehenehe rā tā tātou e ’ārue iāna nō te reira. E mea ta’a ’ē paha tā te hō’ē ’āruera’a i tā te tahi—penei a’e e hīmene, e pure ’aore rā e hōro’ara’a i te ’itera’a pāpū. E arata’i pinepine te reira i te pūpūra’a hōhonu a’e ia tātou i te Fatu ’e i tāna mau ha’api’ira’a. Ta’a ’ē noa atu tā ’outou huru « ha’amaita’i i te Fatu » i roto i tō ’outou orara’a, e nehenehe e noa’a mai te fa’aurura’a rahi atu ā ’ia rave i te reira nā roto i te tai’ora’a ’e te ferurira’a i te Salamo.

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Salamo 102–3 ; 116

E nehenehe te Fatu e tāmāhanahana iā’u i roto i tō’u mamae.

’A hi’o nāhea te Salamo 102:1–11 e vauvau nei i te mau mana’o ahoaho ’e te ’āta’a ’o tē tae noa mai i roto i te ’ati. Penei a’e ’ua ’ite ’oe i te reira mau mana’o, ’e tē māramarama maita’i a’e ra ’oe i te ’ohipa i tupu maoti teie mau fa’ata’ara’a. ’Aita rā e nehenehe teie mau ’īrava e tauturu ia ’oe ’ia māramarama i te ta’ata e mamae ra.

’A tai’o ai ’oe i te Salamo 102:12–28 ; 103 ; 116, ’a hi’o i te mau pereota e fa’atupu i tō ’oe ti’aturi ē e ti’a ia ’oe ’ia « ti’aoro… i te i’oa o Iehova » (Salamo 116:13). E hina’aro paha ’oe e tāpa’o, ’aore rā e tāmau ’ā’au ’aore rā e fa’a’ite ia vetahi ’ē i te mau pereota e fa’atupu i tō ’oe tīa’ira’a iāna.

Hi’o ato’a Isaia 25:8 ; 2 Korinetia 1:3–7 ; Hebera 2:17–18 ; Alama 7:11–13 ; Evan A. Schmutz, « E horoi te Atua i te mau roimata ato’a », Liahona, Nov. 2016, 116–18.

tē fa’aora ra Iesu i te māuiui

Healing [Te fa’aorara’a i te māuiui], nā J. Kirk Richards

Salamo 110 ; 118

E ti’a i te Salamo ’ia fa’atoro iā’u i ni’a i te Fa’aora.

Tē vai ra i roto i te Salamo te mau ’īrava e fa’atoro i te ta’ata i ni’a i te orara’a ’e te tau tāvinira’a a Iesu Mesia. Teie te tahi mau hi’ora’a :

• Salamo 110:1–4 (hi’o Mataio 22:41–45 ; Hebera 5:4–10 ; 6:20)

• Salamo 118:22 (hi’o Mataio 21:42 ; ’Ohipa 4:10–11 ; 1 Petero 2:7)

• Salamo 118:25–26 (hi’o Mataio 21:9)

E aha tā teie mau pereota e ha’api’i nei ia tātou nō ni’a ia Iesu Mesia ? Mea nāhea te ’itera’a i teie mau parau mau e ha’amaita’i nei ia ’oe ?

’A tai’o ai ’oe i te Salamo i teie hepetoma, ’a tāmau noa i te tāpa’o i te tahi atu mau ’īrava e ha’api’i nei nō ni’a i te Fa’aora. E nehenehe ato’a ’oe e tai’o ’aore rā e fa’aro’o i te tahi hīmene au roa ’o tē tauturu ia ’oe ’ia feruri iāna.

Salamo 119

E tāpe’a te parau a te Atua iā’u i ni’a i tōna ’ē’a.

Tē vai ra i roto i teie salamo e rave rahi pereota e fa’aau nei i tō tātou orara’a i te hō’ē tere ho’ira’a i te Metua i te Ao ra. ’A tai’o ai ’oe i te reira, ’a ’imi i te mau ta’o haere’a, ’ē’a, ’āvae, ’e ’ohipa ’ē. ’A feruri i tō ’oe iho nei tere i roto i te orara’a—nā hea mai ’oe, tei hea ’oe, ’e e aha tā ’oe ’avei’a. E aha te ha’api’ira’a tā ’oe e ’apo nei i roto i teie salamo nō ni’a i tō ’oe tere ho’ira’a i te fare ? ’Ia au i teie nei salamo, e aha tā te Atua i hōro’a mai nō te tauturu ia ’oe ’ia fa’aea noa i ni’a i te ’ē’a ti’a ?

E hina’aro paha ’oe ’ia ’ite ē, nā roto i te reo Hebera tumu, e ha’amata nā ’īrava e va’u mātāmua o te Salamo 119 ma te reta mātāmua o te pī’āpā Hebera. ’E nā va’u nō muri iho, ’o te mau reta nō muri iho ïa, ē hope noa atu te pī’āpā.

Hi’o ato’a Isaia 42:16 ; 2 Nephi 31:17–21 ; Alama 7:19–20.

Salamo 134–36

E mea puai a’e te Fatu i te mau ’īdolo ato’a.

’A hi’o na i te mau tumu i hōro’ahia i roto i te Salamo 135:15–18 nō te ma’ama’ara’a te ti’aturira’a i te mau atua ha’avare. E aha te mau mea e ’umehia ’oe ’ia ti’aturi ’o tē riro mai ’ei ’īdolo mai tei vauvauhia i roto i teie mau ’īrava ?

E nehenehe e fa’ati’a i te hō’ē tāpura nō te mau ’ohipa pūai tā te Fatu e nehenehe e rave, mai tei vauvauhia i roto i te Salamo 134–36. E aha te mau ’ohipa pūai tāna i rave nō ’oe ?

Salamo 146–50

« Ha’amaita’i i te Fatu ».

’A tai’o ai ’oe i teie mau salamo ’āruera’a hope’a, ’a feruri i te mau tumu e ’ārue ai i te Fatu. Nō te aha e mea faufa’a rahi ’ia ’ārue iāna ? E aha te mau rāve’a nō te ’ārue iāna ?

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Salamo 119:105.E nehenehe te ’utuāfare e fa’atārava i te hō’ē ’ē’a ’a haere ai i ni’a iho i roto i te pōiri, ma te fa’a’ohipa i te hō’ē mōrī nō te tūrama i mua ia ’outou. ’A haere ai ’outou i ni’a i te ’ē’a, e nehenehe e ui i te mau uira’a mai teie « E aha ra te pōiri i roto i tō tātou orara’a ? » ’aore rā « Nō te aha mai te hō’ē mōrī tūrama te parau a te Atua ? » E nehenehe e hīmene i te hō’ē hīmene nō ni’a i te māramarama o te Atua, mai te hīmene ra « Ha’api’i iā’u ’ia ’ite i te maita’i » (Te mau hīmene, N°189), e tauturu te reira ia ’outou ’ia ha’apūai i te parau tumu tei ha’api’ihia i roto i te Salamo 119:105.

Salamo 127–28.E aha te aura’a nō te Fatu ’ia tauturu i te « patu i [tō tātou] fare ra » ? (Salamo 127:1). Nāhea tātou i te fa’aō rahi a’e iāna i roto i tā tātou mau tauto’ora’a e ha’amau i te hō’ē fare parauti’a ? Nō te tauturu i tō ’outou ’utuāfare ’ia pāhono i teie uira’a, e nehenehe e pāpa’i i te hōho’a nō te hō’ē fare i ni’a i te pāpie ’a tāpūpū atu ai ’ei piriapu (puzzle). I muri mai i te mau tuha’a tāta’itahi, e nehenehe te mau melo o te ’utuāfare e pāpa’i i te parau ’aore rā te hōho’a nō te mau rāve’a e fa’ariro i te Fatu ’ei tuha’a nō tō ’outou ’utuāfare. ’Ei reira e ’āpapa atu ai i te piriapu. E aha atu ā tā tātou e ’ite nei i roto i teie mau salamo ’o tē fa’auru ia tātou ’ia haere nā te mau haere’a a te Fatu ?

Salamo 139.I muri iho i te tai’ora’a i te mau ’īrava 1–4, e nehenehe te mau melo o te ’utuāfare e paraparau nō ni’a i tō rātou ’itera’a ē ’ua ’ite roa te Atua ia rātou (hi’o ato’a mau ’īrava 14–15, 23–24).

Salamo 146–50.E nehenehe e ani i tō ’outou ’utuāfare ’ia tai’o pūai i te tahi mau ’īrava nō te Salamo 146–50, ma te tāmata i te fa’amāpiha mai i te mana’o o te ta’ata pāpa’i. Nāhea e ti’a ai ia tātou ’ia fa’a’ite i tō tātou mana’o ’ārue i te Fatu ? E au paha te mau melo o te ’utuāfare ’ia pāpa’i i tā rātou iho salamo ’āruera’a nō te fa’a’ite mai i te tahi ’e te tahi.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a nō teie hepetoma i roto Mai, pe’e mai—nō te Paraimere

Hīmene tei mana’ohia : « Ha’api’i iā’u ’ia ’ite i te maita’i », Te mau hīmene, N°189.

Ha’amaita’i i tā tātou hōro’ara’a i te ha’api’ira’a

Fa’a’ohipa i te haruharura’a fa’aro’o. ’A ha’api’i ai ’outou i tō ’outou ’utuāfare, ’a feruri ’ia fa’aro’o i te tai’ora’a fa’aro’o o te mau pāpa’ira’a mo’a, e ’itehia i ni’a i ChurchofJesusChrist.org ’aore rā i roto i te fa’anahora’a ’āfa’ifa’i o te vaira’a buka. E nehenehe te fa’aro’ora’a i te salamo e riro ’ei ’ohipa ta’a ’ē mau nō te mea ’ua fa’ata’ahia te reira ’ia tai’o-pūai-hia.

e ’ē’a i roto i te uru rā’au

« E fa’a’ite mai ’oe iā’u i te ’ē’a ra o tā ’oe parau ; e mea pōpou ho’i nā’u te reira » (Salamo 119:35).