Te Mesia i roto i te ’ahu ’ute’ute tei hā’atihia ’e te mau ta’ata e tūturi ra

E tu’u te mau turi ato’a i raro, nā J. Kirk Richards

22–28 nō ’Ātete

Salamo 102–103 ; 110 ; 116–119 ; 127–128 ; 135–139 ; 146–150

« ’O tei huti i te aho ra ’ia ha’amaita’i ana’e ïa ia Iehova »

Mai te mea e hina’aro ’outou i te tahi atu mau mana’o ’a fa’aineine ai ’outou i te ha’api’i, ’a hi’o « te tahi atu mau rāve’a tauturu nō te ha’api’i i te mau tamari’i » ’e « te pāhonora’a i te mau hina’aro o te mau tamari’i ’āpī » i te ’ōmuara’a o teie rāve’a tauturu.

Pāpa’i i te mau mana’o e tae mai

’ītona fa’a’itera’a

Tītau i te mana’o

E fa’a’ite i te tahi o te mau hōho’a i roto i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare, ’e e ani i te mau tamari’i ’ia paraparau mai nō ni’a i te mau mea tā rātou e ’ite nei i roto i te mau hōho’a. ’A tauturu ia rātou ’ia hi’o i te mau tū’atira’a i rotopū i teie mau hōho’a ’e te mau mea tā rātou i ha’api’i mai i roto i te buka a Salamo.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Salamo 119:105

E au te parau a te Atua mai te hō’ē māramarama.

Tei ni’a te mau tamari’i tā ’outou e ha’api’i nei i te ’ē’a nō te ho’i i pīha’i iho i te Metua i te Ao ra. E nehenehe te parau a te Atua e tauturu ia rātou ’ia vai noa i ni’a i te reira ’ē’a i teie nei ’e i te roara’a ’o to rātou orara’a.

Mau ’ohipari’i e nehenehe e rave

• ’A fa’a’ite i te mau hōho’a o te mau mea tei fa’ahitihia i roto i te Salamo 119:105, ’e ’a ani i te mau tamari’i ’ia tu’u i te mau hōho’a i roto i te ’āna’ira’a ti’a ’a tai’o ai ’outou i te ’īrava. ’A ani i te mau tamari’i ’ia fa’ahiti fa’ahou ’e ’o ’outou i te mau pereota i roto i te ’īrava a fa’atoro ai ’outou i ni’a i te mau hōho’a.

• E ani i te mau tamari’i ’ia paraparau mai nō ni’a i te huru mana’o e tupu mai, ’ia vai ana’e i roto i te pōiri. E aha te mau mea fifi e rave i roto i te pōiri ? E nehenehe ’outou e ani i te hō’ē tamari’i ’ia tāmata i te rave i te hō’ē ’ohipa ma te tāpiri i te mata, mai te pāpa’ira’a i te hō’ē hōho’a. Nō te aha e mea ’ōhie a’e ’ia rave i teie mau ’ohipa mai te mea ē, tē vai ra te māramarama ? E tauturu i te mau tamari’i ’ia māramarama ē, nāhea te parau a te Atua, ’o tē ’itehia i roto i te mau pāpa’ira’a mo’a, ’e te mau parau a te mau peropheta ora, i te tūrama i tō tātou ho’ira’a i pīha’i iho i te Metua i te Ao ra.

Salamo 139:1–3, 23

’Ua ’ite te Metua i te Ao ra ’e ’o Iesu Mesia iā’u, ’e ’ua here iā’u.

I te roara’a o tō tātou orara’a, e ti’a ia tātou ’ia ha’amana’o ē, ’ua ’ite te Metua i te Ao ra ’e ’o Iesu Mesia ia tātou iho. E nehenehe te salamo 139 e tauturu ia ’outou ’ia ha’api’i i te mau tamari’i ē ’ua ’ite rāua ia rātou ’e ’ua here ia rātou.

Mau ’ohipari’i e nehenehe e rave

• ’A hāmani i te mau tāpura poto nō te mau mea tā ’outou i ’ite nō ni’a i te tamari’i tāta’itahi. ’A tai’o ai ’outou i te mau tāpura hō’ē i te taime hō’ē, ’a ani i te mau tamari’i ’ia ’imi ’o vai tā ’outou e parau ra. ’A tai’o i te Salamo 139:1–3, ’e ’a tauturu i te mau tamari’i ’ia māramarama i te mau parau ’aita rātou i ’ite. ’A fa’a’ite pāpū ē, ’ua ’ite maita’i te Metua i te Ao ra ’e ’o Iesu Mesia ia rātou—’ua ’ite rāua i tō rātou i’oa, e aha te fa’a’oa’oa ’e te fa’a’oto ia rātou, ’e i te mau mea tā rātou e rave maita’i.

• ’A tai’o i te Salamo 139:23, ’e ’a ani i te mau tamari’i ’ia tu’u i tō rātou rima i ni’a i tō rātou māfatu ’ia parau ana’e ’outou « māfatu » ’e ’ia tāpe’a i tō rātou upo’o ’ia parau ana’e ’outou « te mau mana’o ». ’A fa’a’ite i te hō’ē taime ’a ’ite ai ’outou ē, ’ua ’ite te Atua i tō ’outou ’ā’au ’e tō ’outou mau mana’o.

Salamo 146:1, 5–9

E nehenehe au e ’ārue i te Fatu.

’Ārue i te Fatu ’oia ho’i, e fa’a’ite i tō tātou māuruuru ’e te here iāna. E tauturu i te mau tamari’i ’ia ha’api’i mai ē, tē ’ārue nei tātou iāna ’ia rave ana’e tātou i te mau ’ohipa mai te hīmene, te pure, ’e te ha’apa’o i tāna mau ha’api’ira’a.

Mau ’ohipari’i e nehenehe e rave

• E ani i te mau tamari’i ’ia fa’a’ite mai i te mau ’itera’a ’a ’ārue ai te hō’ē ta’ata ia rātou ’aore rā, ’a parau ai ia rātou ē, ’ua rave rātou i te hō’ē ’ohipa maita’i. ’A fa’a’ite i te tahi o te mau ’ohipa maita’i i roto i te Salamo 146:6–9 tā te Fatu i rave, ’e ’a ani i te mau tamari’i ’ia paraparau mai nō ni’a i te tahi atu mau ’ohipa tāna i rave nō tātou. ’A tauturu ia rātou ’ia feruri i te mau rāve’a e ti’a ai ia rātou ’ia ’ārue iāna nō tāua mau ’ohipa ra.

• E hīmene ’āmui i te hō’ē hīmene ’ārue, mai te « Beauty Everywhere » (Children’s Songbook, 232). ’A fa’ata’a ē, nō te ’āti ’Īserā’ela, e rā a’e te tau, e au te Salamo mai te mau hīmene tā tātou e hīmene nei i teie mahana nō te ha’amori ’e nō te ’ārue i te Atua.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

Salamo 102:1–2 ; 103

Tē hōro’a mai nei te Fatu iā’u i te tāmāhanahana ’e te ti’aturira’a.

’Ua ’ite te Atua i tō tātou mau tāmatara’a ’e tō tātou mau ’oto, ’e tē hina’aro nei ’oia e tāmāhanahana ’e e fa’aitoito ia tātou. E tauturu i te mau tamari’i ’ia patu i tō rātou fa’aro’o i roto iāna, ’ia ti’a ho’i ia rātou ’ia fāriu i ni’a iāna i te mau taime e tītauhia.

Iesu e fa’aora nei

Fa’aorara’a, nā J. Kirk Richards

Mau ’ohipari’i e nehenehe e rave

• E ani i te hōʼē o te mau tamariʼi ’ia taiʼo i te Salamo 102:1–2. Nāhea e nehenehe ai i te Fatu ’ia tauturu ia tātou i roto i tō tātou mau taime pe’ape’a ? Nāhea tātou i te ani i tāna tauturu ? ’A fa’a’ite i te hō’ē ’itera’a i reira tō ’outou ’itera’a ē, tē fa’aro’o nei te Atua i tā ’outou mau pure i te taime e tītauhia, ’e ’a ani i te mau tamari’i ’ia fa’a’ite mai i tō rātou ’itera’a ’e te ’itera’a pāpū.

• E ani i te mau tamari’i ’ia ’imi i te mau ta’o tāmāhanahana ’e te ti’aturi i roto i te Salamo 103. Nāhea teie mau parau e nehenehe ai e tauturu i te mau ta’ata e fa’aruru nei i te mau tāmatara’a ? ’A fa’aitoito i te mau tamari’i ’ia pāpa’i i te mau pereota faufa’a i tō rātou mana’ora’a, nō te fa’aha’amana’o ia rātou ē, e nehenehe te Fatu e tauturu ia rātou ’ia fāri’i ana’e rātou i te mau tāmatara’a.

Salamo 119:105

Tē tauturu nei te mau parau a te Atua iā’u ’ia pe’e i tōna haere’a.

Noa atu ē, e mea pōiri te ao i te tahi mau taime, e nehenehe te parau a te Atua e tūrama i tō tātou ’ē’a ’e e tauturu ia tātou ’ia ho’i Iiāna ra.

Mau ’ohipari’i e nehenehe e rave

• ’A pāpa’i i ni’a i te tāpura ’ere’ere i te hō’ē hōho’a nō te hō’ē mōrī (mai te hō’ē lamepa) ’e hō’ē hōho’a o te mau pāpa’ira’a mo’a. E ani i te mau tamari’i ’ia tai’o i te Salamo 119:105. Nāhea te māramarama i te tauturu ia tātou ? Nāhea te parau a te Atua i te tauturu ia tātou ? ’A ani i te mau tamari’i ’ia pāpa’i i tā rātou mau pāhonora’a i ni’a i te tāpura ’ere’ere i pīha’i iho i te mau pāpa’ira’a mo’a. Nāhea te parau a te Atua e riro ai mai te hō’ē mōrī ? Nāhea te reira i te tauturu ia tātou ’ia vai noa i ni’a i te ’ē’a e fa’aho’i ia tātou i te Metua i te Ao ra ra.

• ’A vāhi ’āpitipiti i te mau tamari’i, ’e ’a hōro’a i te ’āpiti tāta’itahi i te hō’ē ’o te mau pāpa’ira’a mo’a i muri ne i: Salamo 119:47–48 ; Salamo 119:105 ; 1 Nephi 11:25 ; 2 Nephi 31:20. ’A ani ia rātou ’ia tai’o i te mau ’īrava ’e ’ia ’imi e aha tā te Metua i te Ao ra i hōro’a mai ia tātou nō te tauturu ia tātou ’ia vai noa i ni’a i te ’ē’a nō te ho’i Iāna ra. ’A ani i te mau tamari’i ’ia feruri ’e ’ia fa’a’ite mai e aha tei fa’auruhia ia rātou ’ia rave nō te mea tā rātou i ha’api’i mai.

• ’A hīmene ’āmui i te hō’ē hīmene nō ni’a i te pe’era’a i te ’ē’a o te Atua, mai te « Je marche avec Jésus » (ChurchofJesusChrist.org). E aha tā tātou e ha’api’i nei i roto i teie hīmene nāhea ’ia vai noa i ni’a i te ’ē’a ti’a ?

Salamo 139:23–24

E nehenehe te Metua i te Ao ra ’e ’o Iesu Mesia e tauturu iā’u nāhea ’ia ha’amaita’i.

Tē ha’api’i nei te Salamo 139 ē, ’ua ’ite te Atua i te mau mea ato’a nō ni’a ia tātou, tae noa atu i tō tātou mau pūai ’e te mau paruparu. Mai te mea e fāriu atu tātou i ni’a iāna, e nehenehe tāna e ha’api’i ia tātou i te mea e tītauhia ia tātou ’ia rave nō te riro mai mai iāna te huru.

Mau ’ohipari’i e nehenehe e rave

• ’A pāpa’i i te mau parau ’o te Salamo 139:23 – 24 i ni’a i te tāpura ’ere’ere, ’e a ani i te mau tamari’i ’ia rēni i raro a’e i te mau ta’o e fa’ata’a ra i te mau mea e nehenehe te Atua e rave nō tātou. Nō te aha tātou e hina’aro ai ’ia rave te Atua i teie mau mea ? Nāhea e nehenehe ai ia tātou ’ia ani iāna ’ia « arata’i ia tātou i ni’a i te ’ē’a mure ’ore » ?

• ’A fa’aitoito i te mau tamari’i ’ia « ’imi » i roto i tō rātou iho orara’a i te mau rāve’a nō te ha’amaita’i i roto i nā tuha’a e maha o te fa’anahonahora’a a te mau tamari’i ’e te feiā ’āpī—te pae vārua, te pae tōtiare, te pae tino ’e te pae ferurira’a. E fa’aha’amana’o ia rātou ē, ’ua ’ite te Fatu nāhea e nehenehe ai ia rātou ’ia ha’amaita’i i roto i teie mau tuha’a tāta’itahi, ’e a fa’aitoito ia rātou ’ia ’imi i tāna arata’ira’a.

• ’A hīmene i te hō’ē hīmene nō ni’a i te huru e nehenehe ai i te Metua i te Ao ra e tauturu ia tātou ’ia ha’amaita’i, mai te ’īrava piti o te « Aide moi Père (le repentir), » (Chants pour les enfants, 52). ’A fa’a’ite e mea nāhea te Metua i te Ao ra ’e ’o Iesu Mesia i te tauturu ia ’outou ’ia ha’amaita’i.

ītona ’apora’a mai

Fa’aitoito i te ’apora’a mai i te fare

I te tahi mau taime, e nehenehe ’outou e ani i te mau tamari’i ’e hō’ē ’o te mau melo o tōna ’utuāfare ’ia fa’a’ite mai i te piha ha’api’ira’a e aha tā rātou e rave nei nō te ha’api’i mai i te ’evanelia i te fare. ’A fa’aitoito i te toe’a o te mau tamari’i ’ia fa’a’ite i teie mau mana’o i tō rātou ’utuāfare.

Ha’amaita’ira’a i tā tātou ha’api’ira’a

Fa’a’ohipa i te pehe. E nehenehe te mau hīmene a te Paraimere ’e te mau hīmene purera’a e tauturu i te mau tamari’i ’ia māramarama ’e ’ia fāri’i i te mau parau mau ’o te ’evanelia mā te fa’ahiahia. E nehenehe ato’a te hīmenera’a e fa’aitoito noa i te mau tamari’i ’ia ha’api’i mai. (Hi’o Ha’api’ira’a mai tā te Fa’aora, 22).

’api ’ohipara’a : E au te parau a te Atua mai te hō’ē mōrī