« 8–14 nō ’Ātete. Salamo 1–2 ; 8 ; 19–33 ; 40 ; 46 : ‘’O Iehova tō’u tīa’i’ », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)
« 8–14 nō ’Ātete. Salamo 1–2 ; 8 ; 19–33 ; 40 ; 46 », Mai, pe’e mai—nō te ta’ata hō’ē ’e te ’utuāfare : 2022
The Lord Is My Shepherd [’O Iehova tō’u tīa’i], nā Yongsung Kim, havenlight.com
8–14 nō ’Ātete
Salamo 1–2 ; 8 ; 19–33 ; 40 ; 46
« ’O Iehova tō’u tīa’i māmoe »
’Eiaha e tā’ōti’a noa ia ’outou i te mau Salamo i mā’itihia, ’aore rā i te mau parau tumu i tu’uhia i roto i teie arata’i ha’api’ira’a. ’A vaiiho i te Vārua ’ia arata’i ia ’outou i te mau parau mau e tauturu i te mau mana’o ha’afātata i te Fatu.
Pāpa’i i te mau mana’o e tae mai
’Aita i pāpū roa nā vai i pāpa’i te Salamo. Tē vai ra tei parauhia nā te ari’i Davida, nō te rahira’a rā, ’aita i ’itehia ’o vai te feiā i pāpa’i. Noa atu rā, ’ia tai’o tātou i te Salamo, e tupu mai paha te mana’o ē, ’ua ta’a ia tātou te mana’o o te feiā i pāpa’i i te Salamo, noa atu ’aita tātou i ’ite i tō rātou i’oa. Te mea tā tātou i ’ite, ’oia ho’i, e tuha’a faufa’a rahi te Salamo i roto i te ha’amorira’a a te ’āti ’Īserā’ela, ’e ’ua ’ite tātou ē, ’ua fa’ahiti pinepine te Fa’aora i te reira. I roto i te Salamo, e ha’amāramarama tā tātou nō te hi’o i te vārua o te nūna’a tahito a te Atua. Tē ’ite nei tātou e aha tō rātou mana’o nō ni’a i te Atua, e aha tō rātou mau māna’ona’ora’a ’e mea nāhea rātou te ’itera’a i te hau. ’Ei feiā ti’aturi i teie mahahana ’ati a’e i te ao nei, tē fa’a’ohipa noa nei ā tātou i teie mau parau i roto i tā tātou ha’amorira’a i te Atua. E au ē, ’ua matara te ha’amāramarama o tō tātou vārua i te feiā i pāpa’i i te Salamo, ’e e au ē ’ua noa’a ia rātou te rāve’a nō te fa’ahiti i tō tātou mana’o nō n’i’a i te Atua, nō ni’a i tā tātou mau ha’ape’ape’ara’a ’e nāhea i te ’ite mai i te hau.
Nō te hō’ē hi’ora’a rere ā manu nō te Buka Salamo, hi’o « Psalms » i roto i te Bible Dictionary (Fa’atoro parau nō te Bibilia).
Mau mana’o nō te tuatāpapara’a pāpa’ira’a mo’a a te ta’ata hō’ē
Tē ha’api’i nei te Salamo ia tātou ’ia tu’u i te ti’aturi i ni’a i te Fatu.
E ’ite paha ’oe i te tai’ora’a i te Salamo ē, e mea pinepine te mau ta’ata pāpa’i i te fa’ahiti i te parau nō te mata’u, te ’oto ’e te ahoaho. E tupu iho ā terā mau mana’o noa atu ā e ta’ata fa’aro’o. Te mea fa’auru rā i roto i te Salamo, ’o te mau rāve’a ïa tei pūpūhia mai, mai te ti’aturi-hope-ra’a i te Fatu. ’A feruri i te reira mau poro’i fa’auru ’a tai’o ai ’oe i te Salamo 1 ; 23 ; 26–28 ; 46. ’A hi’o mai i te mau mea i muri nei ’e ’a pāpa’i i te reira :
-
Te mau anira’a ’ia ti’aturi i te Fatu :
-
Te mau parau e fa’a’ite mai te aha te Fatu :
-
Te mau parau e fa’a’ite mai te aha te hau, te pūai ’e te tahi atu mau ha’amaita’ira’a tāna e hōro’a nei :
-
Te mau parau e fa’a’ite mai te aha te feiā e ti’aturi iāna :
Tē fa’afāriu nei te Salamo i tō tātou ferurira’a i ni’a i te orara’a ’e te tāvinira’a a Iesu Mesia.
E rave rahi Salamo e fa’ahiti i te parau nō te orara’a o Iesu Mesia i te tāhuti nei. ’Ua ’ite ato’a te mau keresetiano o te Faufa’a ’Āpī i teie mau tū’atira’a—te tahi hi’ora’a, ’ua ’ite rātou i roto i te Salamo 2 te fa’ahitira’a nō te ha’avāra’a o Iesu i mua i te ari’i Heroda ’e i mua ia Ponoto Pilato (’Ohipa 4:24–30). E nehenehe e tai’o i te Salamo 2 ’e te 22 ’e tae noa atu te Mataio 27:35–46 ; Luka 23:34–35 ; ’e te Ioane 19:23–24. ’A hi’o i te mau tū’atira’a i roto i teie mau parau o te Salamo ’e te orara’a o te Fa’aora, ’e ’a nā reira noa ’a tuatāpapa ai i te buka Salamo i te roara’a o te hepetoma i muri nei.
’A feruri ia ’oe mai te ’āti Iuda i te tau o Iesu tei mātau i te Salamo ’e tei ’ite i te mau tū’atira’a i te orara’a o te Fa’aora. E aha ïa te ha’amaita’ira’a o teie ’ite nō ’oe ?
Hi’o ato’a Salamo 31:5 ; 34:20 ; 41:9 ; Luka 24:44 ; Hebera 2:9–12.
« Tē ’ī nei te fenua i te maita’i a Iehova ».
E nehenehe te tai’ora’a i te Salamo 8 ; 19 ; ’e 33 e fa’auru ia ’oe ’ia feruri i te mau hāmanira’a nehenehe a te Fatu. ’A ha’apa’o maita’i i te mana’o tā ’oe e feruri ’e e putapū ’a nā reira ai. Mea nāhea te mau hāmanira’a a te Fatu e « parau hua nei… i te hanahana o te Atua » i tā ’oe hi’ora’a ?(Salamo 19:1).
E mea pūai te parau a te Fatu « e ’oa’oa ai te ’ā’au ».
I roto i te Salamo, e nehenehe te mau ta’o ra fa’a’ite, ture, parau, ’e fa’aaura’a, e fa’atū’ati i te parau a te Fatu. ’A tāpe’a noa i te reira i roto i te ferurira’a ’a tai’o ai i te Salamo 19:7–11. E aha te mana’o tā teie mau ’īrava e fa’atupu nei nō ni’a i te parau a te Fatu ? E aha tā te Salamo 29 e ha’api’i nei nō ni’a i tōna reo ? ’Ia au i te mea tā ’oe i ’ite, mea nāhea te parau ’aore rā te reo o te Fatu e tū’ati i teie mau fa’ahitira’a.
E mea tītau-roa-hia ’ia vai mā tātou i te pae vārua ’e ’ia vai tāfetafeta ’ore nō te tomo i mua i te aro o te Fatu.
Tītauhia te vi’ivi’i ’ore nō te tomo i mua i te aro o te Fatu.
Nō te mea i patuhia te hiero nō Ierusalema i ni’a i te hō’ē ’āivi, e nehenehe te parau « mou’a o Iehova » (Salamo 24:3) e fa’atoro i ni’a i te hiero ’aore rā te aro o te Atua. E aha te ha’amāramaramara’a ’āpī tā te reira e hōro’a nei nō te Salamo 24 ? E aha nō ’oe te « ta’ata rima mā ra ’e te ’ā’au maita’i » ? (Salamo 24:4).
E aha tā te Salamo 26 ’e te 27 e ha’api’i nei ia ’oe nō ni’a i te fare o te Fatu ?
Hi’o ato’a Salamo 15 ; David A. Bednar, « Rima mā ’e te ’ā’au maita’i », Liahona, Nov. 2007, 80–83.
Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare
-
Salamo 22.’A tai’o ai te hō’ē melo o te ’utuāfare i teie salamo, e nehenehe te tahi mau pu’era’a e hi’o i te mau tū’atira’a ’e te Mataio 27:35–46. I muri iho e fa’a’ite mai rātou i tō rātou mana’o nō ni’a ia Iesu Mesia ’e tōna tusia nō tātou nei.
-
Salamo 23.’Ua riro te Salamo 23 ’ei fa’aurura’a nō te mau hīmene e rave rahi, mai te hīmene ra « ’O Iehova tō’u tīa’i » nā reira ato’a « E fa’aineine te Fatu i te hō’ē vāhi fa’aeara’a nō’u » (Te mau hīmene, N°54, 82). Penei a’e e hina’aro tō ’outou ’utuāfare e hīmene i te hō’ē o teie nā hīmene ma te hi’o i te mau parau tei fa’auru i te hīmene. ’Aita ana’e, e au paha rātou i te pāpa’i i te hōho’a nō te hō’ē mea tā rātou e ’ite mai i roto i te salamo ’aore rā i roto i te hīmene ma te fa’a’imi i te mau melo o te ’utuāfare i te mau ’īrava ’aore rā te mau para e tano i te mau hōho’a. Mea nāhea te Fa’aora mai te hō’ē tīa’i māmoe nō tātou ?
-
Salamo 24:3–5.Nō te tūra’i i te parau nō te faufa’a rahi o te rima mā ’e te ’ā’au maita’i, e nehenehe ’outou e tai’o i te Salamo 24:3–5 ’a horoi ai te mau melo o te ’utuāfare i tō rātou rima. E aha tā te rima e fa’ahōho’a ra i roto i teie salamo ? E aha tā te ’ā’au e fa’ahōho’a ra ? E aha te nehenehe e rave i te pae vārua nō te tāmā i tō tātou rima ’e i tō tātou ’ā’au ?
-
Salamo 30:5, 11.Tē vai nei i roto i te Salamo 30:5 te parau fafau ē « ’Ia tāpae noa mai te ’oto i te ahiahi ; e riro rā i te ’oa’oa ’ia po’ipo’i ». Mea nāhea tō te Fatu tauira’a i tō tātou ’oto ’ei ’oa’oa ? E au paha te tahi mau melo o te ’utuāfare e ha’uti ta’ata ora i tei fa’ahitihia i roto i te ’īrava 11.
-
Salamo 33.’A hi’o e fea taime te ta’o ra ato’a i fa’a’ohipahia i roto i teie salamo. E aha tā tātou e ha’api’i nei nō ni’a i te Fatu i roto i te fa’a’ohipa-tāmau-ra i teie ta’o, i roto iho ā rā i te mau ’īrava 13–15 ?
-
Salamo 46:10.E nehenehe e rave ’āmui i te hō’ē mea e tītau i te mau melo o te ’utuāfare ’ia « fa’atupua ». E aha tā te fa’atupua tauturura’a i te ’itera’a i te Atua ? E aha te mau taime tā tātou e fāna’o nei nō te fa’atupua ’e ’ia ’ite i te Atua ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a nō teie hepetoma i roto Mai, pe’e mai—nō te Paraimere
Hīmene tei mana’ohia « ’O Iehova tō’u tīa’i māmoe », Te mau hīmene, N°54.
Ha’amaita’ira’a i te tuatāpapara’a pāpa’ira’a mo’a a te ta’ata iho
E feruri i te mau rāve’a rau. E mea pinepine te mau pāpa’ira’a mo’a mai te Salamo i te fa’auru i te ta’ata ’ia ’ārue i te Fatu ma te rāve’a rau. Mai te mea e tae mai te mana’o e fa’a’ite i tō ’outou pūpūra’a ia ’outou iho nā roto i te hīmene, te pehepehe, te hōho’a anoihi, ’aore rā te tahi noa atu rāve’a, ’a rave mai te au i terā mana’o. E nehenehe e fa’a’ite i te mea tā ’outou e hāmani nō te tauturu ia vetahi ’ē ’ia patu i tō rātou fa’aro’o i te Metua i te Ao ra ’e ’ia Iesu Mesia.
The Good Shepherd [Te Tīa’i māmoe maita’i], nā Ken Spencer