jeje ko an rikanaan ro etto

Rikanaan Aiseia ej Kanaane Ļotak eo an Kraist, jān Harry Anderson

Jeptōm̧ba 5–11

Aiseia 1–12

“Anij Ej Aō Men in Lo̧mo̧o̧r”

Naan ko an Aiseia remaron̄ in pen n̄an meļeļe. Ilo am̧ ļōmņake elmen n̄an katakin ajri ro kōn Aiseia, pedped wōt ioon m̧ool ko me remaron̄ kōkajoorļo̧k tōmak eo aer ilo Jisōs Kraist.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k men ko rekar kōm̧m̧ane jet iien remootļo̧k n̄an mour kake gospel in, āinwōt jar, kwaļo̧k jouj n̄an juon armej, ak pokake kien ko jet.

pija ej bōk jikin katakin

Katakin Katak eo: Ajri ro Reddikļo̧k

Aiseia 2: 2–3

Ilo tampeļ jej ekkatak kōn Jisōs Kraist.

Aiseia eaar lo ilo juon tōre bwe tampeļ, “toļ in im̧ōn Jeova” enaaj bōktok elōn̄ armej jān “aolep ri aelōn̄ ko.” Komaron̄maron̄ kōjerbal kanaan in n̄an jipan̄ ajri ro reim̧aanļo̧k n̄an raan eo remaron̄ etal n̄an tampeļ.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an jin̄aik juon pija in m̧weeo m̧weer. Innām riit ippān doon Aiseia 2:2, im kajjitōk ippāer n̄an jin̄aik juon pija in “m̧weeo im̧ōn Irooj,” eo ej juon tampeļ. Riiti eoon3 ippān doon, im kajjitōk ippāer n̄an kobaiki n̄an pija eo aer elōn̄ armej itok n̄an tampeļ, koba baam̧le ko aer. Etke jej kōņaan etal n̄an m̧weeo im̧ōn Irooj? Kwaļo̧k naan in kam̧ool eo am̧ kōn kōjeraam̧m̧an ko me rej itok ilo ad ekkatak kōn Irooj ilo Mweeo Im̧ōn.

• Kōtļo̧k an juon ajri jibwe juon pijain juon tampeļ, im kajjitōk ippān ajri ro n̄an kōnono kake ta eo rej loe ilo pija eo. Kajjitōk ippāer ta eo em̧m̧an ippāer kōn tampeļ. Riit ippān doon Aiseia 2:2–3 im kōtļo̧k an ajri ro ron̄jake elōn̄ un ko etke emaron̄ em̧m̧an ippād tampeļ. Kwaļo̧k n̄an ajri ro etke em̧m̧an ippam̧ tampeļ.

• Al ippān ajri ro juon al kōn tampeļ āinwōt “I Love to See the Temple”” (Children’s Songbook,95). Jipan̄ er pukōt naan ko im eoon ko ilo al eo me rej katakin kōn ta in tampeļ im ta eo jej kōm̧m̧ane ijeņ.

• Jin̄aik juon iaļ ioon boot eo, im likūt juon pija in tampeļ ak Rilo̧mo̧o̧r ilo turājet eo juon (lale Personal Development: Children’s Guidebook, 2–3). Kōtļo̧k an ajri ro bōk koņaer jin̄aik aer make etetal ilo iaļ eo. Ilo aer kōm̧m̧ane, kajjitōk ippāer n̄an āliji naan in jān Aisaia 2:3: “Jenaaj etetal ilo iaļ ko An.” Ta eo jemaron̄ kōm̧m̧ane n̄an etetal ilo iaļ ko an Irooj?

an kōrā eo jibwe nin̄nin̄ eo

“Bwe n̄an kōj e ļotak juon Ļaddik, n̄an kōj em̧ōj letok juon Nejid;” (Aiseia 9:6).

Aiseia 9:6

Aiseia ekar kanaan kōn Jisōs Kraist.

Aolep rikanaan ro rej kam̧ool kōn Jisōs Kraist, ekoba ro raar mour m̧okta jen An ļotak, āinwōt Aiseia. Ļōmņake ta eo ajri ro remaron̄ ekkatak kōn Jisōs Kraist jān kanaan eo an Aiseia ilo Aiseia 9:6).

M̧akūtkūt ko Maron̄ Kōm̧m̧ani

• Kwaļo̧k n̄an ajri ro “Rikanaan Aiseia” (ilo Bwebwenato ko jen Kallim̧ur eo M̧okta). Bōjrak emakijkij bwe ajri ro ren maron̄ kōnono kōn ta eo Aiseia ekar jeļā kōn Jisōs Kraist elōn̄ iiō ko m̧okta jen An kar ļotak. Riit n̄an ajri ro Aiseia 9:6, im kajjitōk ippāer n̄an āliji ippam̧ kajjojo “etan” Aiseia ekar ba Jisōs Kraist “naaj ņa etan.”

• Je ioon jidik peba jejjo taitōļ ko an Jisōs Kraist kar loi ilo Aiseia 9:6 (lale peij in m̧akūtkūt eo an wiik in). Kajjitōk ippān kajjojo ajri n̄an bōk juon, im jipan̄ ajri ro riiti taitōļ eo n̄an kūlaaj eo. Kōnono ippān ajri ro kōn ta meļeļe kajjojo taitōļ n̄an eok. Leļo̧k juon pijain Kraist n̄an juon iaan ajri ro, im kajjitōk ippān n̄an kwaļo̧k juon men kōn Jisōs innām leļo̧k pija eo n̄an bar juon ajri. Āliji m̧akūtkūt in m̧ae aolep ajri ro em̧ōj aer bōk koņaer n̄an kwaļo̧k.

pija ej bōk jikin katakin

Katakin Katak eo: Ajri ro Rerūttoļo̧k

Aiseia 1:2–4, 16–19

Kōn Jisōs Kraist, imaron̄ ukweļo̧k im bar erreeo.

Aiseia eaar mour ilo juon tōre ke elōn̄ iaan armej ro an raar oktaļo̧k jān Irooj. Ak Irooj eaar kallim̧uri er bwe jerawiwi ko aer renaaj jako n̄e renaaj ukweļo̧k. E ej barāinwōt kōm̧m̧ane kallim̧ur in n̄an kōj.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Aiseia 1:2–4 im kōnono kōn jet iaan un ko me Irooj ekar jab m̧ōņōņō ippān armej in Juda. Innām riiti Aiseia 1:16–19 ippān doon n̄an jeļā ta eo Irooj ekar kajjitōk ippān armej ro n̄an kōm̧m̧ane. N̄e emenin aikuj, jipan̄ ajri ro meļeļe naan im eoon ko reppen. N̄an jipan̄ er lale eoon18, kwaļo̧k juon men eo erōōj an būrōrō im juon men lukkuun in erreeo an mouj. Ta eo jaar ekkatak kōn tūriam̧o eo an Jisōs Kraist jān eoon kein? Kajjitōk ippān ajri ro n̄an kwaļo̧k elmen aer en̄jake kōn menin letok eo an Jisōs Kraist kōn jeo̧rļo̧k bōd, im bar kwaļo̧k am̧ en̄jake.

• Jipan̄ er kakkilōklōke Aiseia 1:18. Je ioon boot eo, im kajjitōk ippān ajri ro n̄an lale jejjo alen, jereļo̧k juon naan ilo̧k juon m̧ae iien renaaj kemeemejje. Komaron̄ bar kōjerbal peba ko ilo naan jān eoon ko kar je. Etke eaorōk n̄an keememej iien otemjej ta eo eoon in ej katakin? Kōnono elmen an peptaij im bōk m̧ōttan kwojkwoj eo kōm̧m̧an bwe kallim̧ur in en waļo̧k n̄an kōj.

Aiseia 2:2–5

Ilo tampeļ jej ekkatak kōn Jisōs Kraist.

Kanaan eo an Aiseia kōn “toļ in im̧ōn Jeova” ej kwaļo̧k jet iaan kōjeraam̧m̧an ko me rej itok jān kabun̄jar ilo tampeļ, ippānļo̧k kōjeraam̧m̧an ko jet rej itok ilo raan kein āliktata. Ļōmņake ewi wāween am̧ maron̄ im̧we ajri ro n̄an pukot kōjeraam̧m̧an kein.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riit kōn ta eo Aiseia ekar loe ilo Aiseia 2:2–3 im jin̄aik juon pija in ta eo rej ļōmņake emaron̄ in āinwōt. Kōmeļeļeik bwe Aiseia eaar ņa etan tampeļ in “toļ in im̧ōn Jeova.” Etke juon toļ ej juon kōkaļļe em̧m̧an n̄an tampeļ?

• Kajjitōk ippān ajri ro n̄an riit Aiseia 2:2–3,5 im kalikkar kajjojo iaan eoon kein jet me enej im̧we er n̄an etal n̄an tampeļ juon raan. Innām riiti eoon4 ippān doon, im kōnono elmen an tampeļ jipan̄ bōktok aenōm̧m̧an eo kar kōmeļeļeiki ilo eoon in. Jipan̄ ajri ro ļōmņake wāween ko remaron̄ kōppopo n̄an etal n̄an tampeļ juon raan.

Aiseia 7:14; 9:6–7

Aiseia ekar kanaan kōn Jisōs Kraist.

Aiseia ekar kanaan kōn ļotak eo an juon ajri eo enaaj jijet ilo tūroon eo an David im kajutak juon laļ me ejjeļo̧k jem̧ļo̧kin. Ewi wāween am̧ maron̄ jipan̄ ajri ro kwoj katakin meļeļe kōn kanaan kein kōn Jisōs Kraist?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k taitōļ in waanjon̄ak ko ewōr ippān juon armej, āinwōt taitōļ in juon jerbal, juon kūr, juon tiim, ak juon baam̧le. Ta taitōļ kein rej ba kōn armej eo me ewōr an taitōļ? Jipan̄ ajri ro pukot taitōļ ko an Jisōs Kraist ilo Aiseia 7:14 im 9:6–7. Ta eo taitōļ kein rej katakin kōj kōn E? Ta eo jaar bar ekkatak kōn Jisōs Kraist jān eoon kein?

• Riit ippān doon Matu 1:21–23 im Luk 1:31–33, im kōnono elmen an kanaan ko an Aiseia ilo Aiseia 7:14; 9:6–7 kar kūrm̧ool iien eo Jisōs ekar ļotak.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an ļōmņaki men ko raar ekkatak kōn Rilo̧mo̧o̧r me remaron̄ kwaļo̧ke ilo m̧weeo n̄an baam̧le eo aer, āinwōt juon iaan āt ko Etan.

Kōkōm̧anm̧anļo̧k Ad Katakin

Jipan̄ ajri ro kwaļo̧k leke. Jet ajri remaron̄ jab em̧m̧an aer ekkatak kōn gospel in ippāer make. Juon wāween n̄an jipan̄ er kalōk lōke eo ej n̄an nōbar er n̄e rej bōk koņaer ilo kūlaaj. Kallim̧uri ajri ro bwe Jetōb Kwojarjar eo enaaj jipan̄ er ilo aer ekkatak.

peij in m̧akūtkūt: Aiseia ekar kanaan kōn Jisōs Kraist