“Jeptōm̧ba 12–18. Aiseia 13–14; 24–30; 35: ‘Juon Jerbal Men in Bwilōn̄,’” Itok, Ļoor Eō—N̄an Būraimere: Kallim̧ur M̧okta 2022 (2021)
“Jeptōm̧ba 12–18. Aiseia 13–14; 24–30; 35,” Itok, Ļoor Eō—N̄an Būraimere: 2022
Bukwin Wōjke Ekwojarjar, jān Brent Borup
Jeptōm̧ba 12–18
Aiseia 13–14; 24–30;35
“Juon Jerbal Men in Bwilōn̄”
Ālkin lukkuun jar im ekkatak Aiseia 13–14; 24–30;35, karōk m̧akūtkūt ko n̄an jipan̄ ajri ro ekkatak. Ļōmņak in m̧akūtkūt ko ilaļ emaron̄ in jerbal n̄an aolep kurup in iiō.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an jutak n̄e rekōņaan kwaļo̧k ta eo rekar ekkatak ļo̧k m̧okta kōn gospel in ilo m̧weeo ak ilo m̧ōnjar eo. Leļo̧k n̄an kajjojo ajri iien em̧m̧an n̄an kwaļo̧k.
Katakin Katak eo: Ajri ro Reddikļo̧k
Ekar wōr juon tariņae ilo lan̄.
M̧okta jen kar kōm̧anm̧an eo an laļ in, Jemedwōj Ilan̄ eaar kālet Jisōs Kraist bwe en ad Rilo̧mo̧o̧r. Aiseia 14:12–14 ej kōmeļeļeik an Setan utiej bōro ilo kar kweilo̧k eo M̧okta ilo Lan̄.
M̧akūtkūt ko Maron̄ Kōm̧m̧ani
-
Kōjerbal “Introduction: Our Heavenly Father’s Plan” (ilo Bwebwenato ko an Kallim̧ur Ekāāl, 1–3) ak al “I Lived in Heaven” (Children’s Songbook,4) im kwaļo̧k n̄an ajri ro kōn Tariņae eo Lan̄ m̧okta jen ad kar ļotak. (Ilo am̧ kōm̧m̧ane, kobaik naan ko jān Aiseia 14:12–14 me ej kwaļo̧k kadkadin Setan.) Kajjitōk ippān ajri ro n̄an bōk koņaer kwaļo̧k bwebwenato eo n̄an kwe. Kwaļo̧k bwe Jisōs Kraist eaar ļoor karōk eo an Jemedwōj Ilan̄ im kar erom̧ ad Rilo̧mo̧o̧r.
-
Ilo boot eo, jin̄aik juon bōro (love) ippān naan eo Setan im juon mejen būrom̧ōj ilowaan. Kōmeļeļeiki bwe Setan ekar ba ilo būruwōn, “Inaaj lelōn̄ļo̧k aō tūroon ilōn̄in iju ko an Anij” (Aiseia 14:13), meļeļe bwe ekar kōņaan bwe en em̧m̧anļo̧k jen Jemedwōj Ilan̄. Kajjitōk ippān juon ajri n̄an jin̄aiki bar juon bōro (love), menin ippān naan eo Jisōs im juon mejen m̧ōņōņō ilowaan. Jipan̄ ajri ro meļeļe bwe Jisōs ekar kōņaan kōm̧m̧ane ta eo Jemedwōj Ilan̄ ekar kajjitōk bwe En kōm̧m̧ane (lale Moses 4:1–2). Ekōjkan ad maron̄ ļoor waanjon̄ak eo an Jisōs?
“Ear oran̄ļo̧k mej n̄an indeeo” (Aiseia 25:8).
Jisōs Kraist ekar bar jerkakpeje.
Jisōs Kraist emaron̄ kaenōm̧m̧an būrom̧ōj eo jej en̄jake kōn mej. Kōnke E eaar anjo̧ ioon mej, jenaaj bar aolep jerkakpeje.
M̧akūtkūt ko Maron̄ Kōm̧m̧ani
-
Kwaļo̧k juon pija in Jerkakpeje an Jisōs Kraist, im kajjitōk ippān ajri ro n̄an kwaļo̧k juon men rejeļā kōn pija eo. N̄e ekkar, kwaļo̧k ippāer bwebwenatoon an Jisōs jerkakpeje (lale “Jesus Is Risen,” ilo Bwebwenato ko an Kallim̧ur Ekāāl, 139–44). Kōjan̄jan̄ ak al juon al kōn Jerkakpeje, āinwōt “Jesus Has Risen” (Children’s Songbook,70), im kajjitōk ippān ajri ro n̄an kwaļo̧k elmen aer en̄jake n̄an jeļā bwe Jisōs eaar jerkak jān mej.
-
Jiron̄ ajri ro kōn juon eo me kwojeļā em̧ōj an jako. Ewi wāween ad en̄jake n̄e juon eo jej iakwe emej? Kajjitōk ippān ajri ro n̄an jin̄aik juon mejān juon eo ej jan̄. Innām riiti Aiseia 25:8 n̄an er. Ta eo Jisōs enaaj kōm̧m̧an n̄an dānnin kōmjaaļaļ ko ad n̄e jej būrom̧ōj e juon eo em̧ōj an mej? Kajjitōk ippān ajri ro n̄an jin̄aik juon mej lem̧ōņōņō. Kwaļo̧k am̧ naan in kam̧ool bwe Jisōs Kraist ekar jerkakpeje, jemaron̄ bar en̄jake aenōm̧m̧an n̄e juon ej mej im jeļā bwe jenaaj bar aolep jerkakpeje juon raan.
Irooj eaar kōjepļaaktok Kabun̄ in An kōn Josep Smith.
Jepļaaktok eo an gospel in ej “juon jerbal men in bwilōn̄” (Aiseia 29:14). Kwaļo̧k n̄an ajri ro jet men ko rekabwilōn̄lōn̄ Irooj ekar kōm̧m̧ani—im E wōnm̧aanļo̧k wōt im kōm̧m̧ani—n̄an kōjepļaaktok gospel in An ilo tōre in ad.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kwaļo̧k ta eo rejeļā kōn Josep Smith. N̄e ekkar, kwalo̧k ippāer “Visōn eo Moktata an Josep Smith” (ilo Bwebwenato ko an Katak im Bujen Ko, 9–12). Riiti Aiseia 29:12, im kōmeļeļeiki bwe men̄e Josep Smith kar jab kile bwe eļap “jeļā” ippān jen elōn̄ armej, Jisōs Kraist ekar kōjepļaaktok gospel eo An kōn e.
-
Riiti Aiseia 29:14 n̄an ajri ro, im kwaļo̧k n̄an er jet naan ko me āinjuon wōt aer meļeļe āinwōt “menin bwilōn̄” im “bwilōn̄.” Kwaļo̧k men ko me rej pinej jenkwan jet menin bwilōn̄ ko Irooj ej jerbali ilo raan kein āliktata, āinwōt juon pija in Visōn eo M̧oktata an Josep Smith bōk priesthood eo (lale Gospel Art Book, nos. 90, 93,94) ak juon kape in Bok in Mormon. Kajjitōk ippān ajri ro n̄an kālet juon men im kwaļo̧ke etke ej juon menin bwilōn̄ n̄an er.
Katakin Katak eo: Ajri ro Rerūttoļo̧k
Aiseia 24:3–5; 29:7–10; 30:8–14
Bun̄ jān tōmak ej meļeļein oktakļo̧k jān Irooj im rikanaan ro An.
Riit naan in kakkōl ko an Aiseia kōn kauwōtata eo an bun̄ jān tōmak emaron̄ jipan̄ ajri ro jirōk likatōttōt ilo Irooj im ļoor rikanaan ro An.
M̧akūtkūt ko Maron̄ Kōm̧m̧ani
-
Je naan eo bun̄ jān tōmak ioon boot eo. Kajjitōk ippān ajri ro n̄an pukot juon meļeļein “Bun̄ jān Tōmak” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org). Kajjitōk ippāer n̄an riiti Aiseia 24:5; 30:9–11 im je juon laajrak in men ko armej ro rekar kōm̧m̧ani ilo tōre ko an Aiseia me ekar tōlļo̧k er n̄an bun̄ jen tōmak. Innām kajjitōk ippān ajri ro n̄an ukōt men ko ilo laajrak in men ko jemaron̄ kōm̧m̧ani n̄an jirōk likatōttōt wōt ilo Irooj.
-
Kōjeno̧ļo̧k kūlaaj eo ilo m̧ōttan ko, im leļo̧k n̄an kajjojo pea n̄an riiti naan kein ilaļ: Aiseia 24:3–5; Aiseia 29:7–10; ak Aiseia 30:8–14. Kajjitōk ippāer n̄an jin̄aik men eo ej pinej jenkwan ta eo rej riiti. Ilo aer kwaļo̧k jin̄n̄a ko aer, jipan̄ er ekōnono ta naan ko an Aiseia ej katakin kōj etke jej aikuj in jirōk likatōttōt wōt ilo Irooj.
Jepļaaktok eo an gospel eo ej juon “jerbal in menin bwilōn̄.”
Elmen am̧ maron̄ jipan̄ ajri ro meļeļe ke rej m̧ōttan “jerbal in menin bwilōn̄” in an Irooj (Aiseia 29:14) ilo raan kein āliktata?
M̧akūtkūt ko Maron̄ Kōm̧m̧ani
-
Kwaļo̧k jet iaan pija in jerbal in men in bwilōn̄ ko me rekar waļo̧k ilo an gospel kar jepļaaktok (lale Gospel Art Book, nos. 90–95, ak peij in m̧akūtkūt eo an wiik in). Riit ippān doon Aiseia 29:14, 18,24, im kajjitōk ippān ajri ro n̄an pukot naan ko ak eoon ko me reiokļo̧k wōt men ko ilo pija eo. Kajjitōk ippān ajri ro elmen aer maron̄ jipan̄ ilo “jerbal in men in bwilōn̄ ko” an Irooj (eoon14).
-
Kwaļo̧k jidik en̄jake n̄an jipan̄ ajri ro meļeļe ta meļeļein jepļaaktok eo. N̄an waanjon̄ak, kōnono jet men ko me rekar jako im elmen am̧ kar loi. Jipan̄ ajri ro keidi menin n̄an Jepļaaktok eo an gospel in. Ekkar n̄an Aiseia 29:13–15, etke jej aikuji Jepļaaktok eo? Ta jerbal in men in bwilōn̄ ko Irooj ekar kōm̧m̧ani n̄an kōjepļaaktok gospel in An?
Katak ko an Aiseia rej jitōn̄ļo̧k eō n̄an Jisōs Kraist.
Katak ko an Aiseia remaron̄ ba kajjien ajri ro kwoj katakin n̄an Rilo̧mo̧o̧r eo im jipan̄ er keememej men ko E ekar kōm̧m̧ani n̄an er.
M̧akūtkūt ko Maron̄ Kōm̧m̧ani
-
Je eoon in jipan̄ kein ilaļ ioon jidik peba: Aiseia 14:3; Aiseia 25:8; Aiseia 28:16; Matu 11:28–30; 1Korint 15:53–57; Hilamōn 5:12. Leļo̧k n̄an ajri ro peba ko, im kajjitōk ippāer n̄an je ioon peba ko m̧ool ko raar ekkatak jān eoon ko im jerbal ippān doon n̄an keidi eoon ko me rej kwaļo̧k ejja m̧ool ko. Ekkar n̄an eoon kein, ta men ko reļļap Irooj ekar kōm̧m̧ane n̄an kōj?
-
Kajjitōk ippān ajri ro n̄an kālet juon naan jān Aiseia 14:3; 25:8; ak 28:16 me ekakeememej er kōn Jisōs Kraist. Kajjitōk ippāer n̄an je naan eo ioon jidik peba im jin̄aik juon pijain Rilo̧mo̧o̧r me remaron̄ likūti ilo m̧oko im̧weer.
Kōketak Ekkatak ilo M̧weo
Kajjitōk ippān ajri ro n̄an je jidik kakeememej kake ak jin̄aik juon pija in men ko rekar ekkatak ilo kūlaaj rainin. Rōjan̄ er n̄an kwaļo̧k e n̄an baam̧le ko aer ak juon uwaan kūlaaj eo me ekar jab pād ilo Būraimere rainin.
Kōkōm̧anm̧anļo̧k Ad Katakin
Kajjim̧we m̧akūtkūt ko n̄an tōpar aikuj ko an ajri ro ewōr utam̧we ippāer. Kajjim̧we ko redik n̄an m̧akūtkūt ko emaron̄ kōm̧m̧an bwe aolep ajri ro ren ekkatak jāni. N̄an waanjon̄ok, n̄e juon m̧akūtkūt ej ba kwaļo̧k juon pija, komaron̄ al juon al ijjelo̧kin n̄an kobaik ajri ro ewōr jōrrāān in mej ippāer.