“Jeptōm̧ba 19–25. Aiseia 40–49: ‘Kom̧win Kaaenōm̧m̧an ro Aō Ri Aelōn̄,’” Itok, Ļoor Eō—N̄an Būraimere: Kallim̧ur M̧okta 2022 (2021)
“Jeptōm̧ba 19–25. Aiseia 40–49,” Itok, Ļoor Eō—N̄an Būraimere: 2022
Healing the Blind Man[Kōmour Em̧m̧aan eo Epilo], jān Carl Heinrich Bloch
Jeptōm̧ba 19–25
Aiseia 40–49
“Kom̧win Kaaenōm̧m̧an ro Aō Ri Aelōn̄”
Elōn̄ naan ko ilo Aiseia 40–49 emaron̄ jipan̄ ajri ro kōļapļo̧k iakwe eo aer n̄an Irooj im aer tōmak ilo E. Pukot im̧we eo an Jetōb n̄an lo naan ko ilo am ekkatak.
Je En̄jake ko Rej Im̧we Eok
Kajjitōk bwe ren Kwaļo̧k
Riiti Aiseia 40:9 ippān ajri ro, im kajjitōk ippāer n̄an anto̧o̧ne aertallōn̄e “juon toļ e utiej” innām ren bōk kuņaer kwaļo̧k ainikier n̄an kwaļo̧k men ko rekar ekkatak jān eoon ko m̧oktaļo̧k—men̄e ilo m̧weeo ak ilo m̧ōnjar eo.
Katakin Katak eo: Ajri ro Reddikļo̧k
Imaron̄ juon rikam̧ool an Irooj.
Irooj eaar kakeememej Riisrael ro bwe raar kam̧ool elōn̄ men ko reļļap me Eaar kōm̧m̧ani n̄an er. Eaar kōņaan bwe ren (im kōj aolep) jen rikam̧ool ro An, jipan̄ ro jet jeļā kōn kajoor im em̧m̧an eo An.
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro men ko kwaar kam̧ooli. Jipan̄ er ļōmņaki men ko raar en̄jake me remaron̄ ba n̄an doon ak erom̧ juon “rikam̧ool” kake—n̄an waanjon̄ak, juon m̧ōn̄ā eo enno remaron̄ edjon̄e, juon jikin eo raar loļo̧k, ak juon armej rejeļā kajjien. Riit n̄an ajri ro jān Aiseia 43:10: “Kom̧ ri kōnnaan ro Aō, Irooj ej ba, im rikarijera Iar kāālōte.” Kwaļo̧k n̄an ajri ro bwe ke jaar peptaij jej kallim̧ur n̄an erom̧ juon rikam̧ool an Jisōs Kraist (lale Mosaia 18:9). Ta meļeļe in n̄an erom̧ rikam̧ool an Irooj?
-
Kajjitōk ippān ajri ro n̄an kwaļo̧k ta eo rejeļā kōn Jisōs Kraist im gospel eo An. Kwaļo̧k n̄an er pija ko n̄an leļo̧k n̄an er ļōmņak ko (n̄an waanjon̄ak, pija in Jerkakpeje eo an Rilo̧mo̧o̧r, Bok in Mormon, tampeļ eo, im rikanaan eo emour). Kajjitōk ippān n̄an kōnono kake ta eo remaron̄ kwaļo̧ke n̄an ro jet āinwōt rikam̧ool ro an Irooj.
“E bar ejjeļo̧k rilo̧mo̧o̧r ijello̧kō.”
Jisōs Kraist ej E wōt eo emaron̄ lo̧mo̧o̧ren kōj jān jerawiwi im mej. Ļōmņake elmen am̧ maron̄ im̧we ajri ro n̄an likūt aer kōjatdikdik ilo E.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an anto̧o̧ne juon jekjek me remaron̄ pād ilo aikuj (āinwōt nan̄inmej ak pād iien ļap kōto). Kwaļo̧k jet kein katakin (ak pijain kein katakin ko), jet remaron̄ jipan̄ er ilo jekjek eo im ro jet rejjab maron̄. N̄an waanjon̄ak, juon am̧bwirila emaron̄ jipan̄ ilo juon kōto, ak juon kab kūlaaj in dān im juon penjōļ reban. Kajjitōk ippān ajri ro n̄an kālet men eo me emaron̄ jipan̄ ilo jekjek eo. Kwaļo̧k pijain Rilo̧mo̧o̧r eo n̄an jipan̄ ajri ro ekōnono elmen An jipan̄ kōj.
-
Riit n̄an ajri ro Aiseia 43:11, im kajjitōk ippāer bwe ren kwaļo̧k juon pija in Jisōs n̄e rej ron̄ naan eo “rilo̧mo̧o̧r.” Kam̧ool bwe kōnke Jisōs Kraist eaar en̄taan im kar mej kōn kōj im kar jerkakpeje, E wōt eo emaron̄ in lo̧mo̧o̧ren kōj jān jerawiwi ko ad im jān mej.
Jemaron̄ bōk “wānōk āinwōt ņo ko in lo̧meto” (Aiseia 48:18).
Kōjparok kien ko an Anij rej bōktok aenōm̧m̧an.
Irooj ej kallim̧ur kōn aenōm̧m̧an āinwōt “juon river” im wānōk āinwōt “juon ņo ko in lo̧meto” n̄an ro rej kōjparok kien ko An.
M̧akūtkūt ko Maron̄ Kōm̧m̧ani
-
Riit n̄an ajri ro Aiseia 48:18. Kajjitōk ippāer n̄an kōm̧akūt peier āinwōt river im ņo ko. Kōnono kake elmen kōjparok kien ko an Anij kar jipan̄ eok en̄jake aenōm̧m̧an āinwōt juon river ak kajoor āinwōt juon ņo.
-
Jin̄aik juon river ioon boot eo. Jipan̄ ajri ro ļōmņak kōn kien ko Anij ekar litok n̄an kōj. Je kien ko ioon jidik peba (ak jin̄aik er), im kōtļo̧k an ajri ro bōk koņaer kaddāppi kien ko n̄an river eo ioon boot. Jipan̄ ajri ro jeļā elmen kōjparok kien ko bōktok aenōm̧m̧an.
-
Al ippān doon kōn juon al kōn kien ko, eo āinwōt “Keep the Commandments” (Children’s Songbook, 146–47). Ta eo al in ej kwaļo̧k kake etke jej aikuj kōjparok kien ko an Anij?
Katakin Katak eo: Ajri ro Rerūttoļo̧k
Imaron̄ jipan̄ kōpooj “iaļ eo an Irooj.”
Jemaron̄ jipan̄ kakūrm̧ool kanaan eo ilo Aiseia 40:3–5 n̄an jipan̄ ro jet bōk Irooj ilo mour ko aer.
M̧akūtkūt ko Maron̄ Kōm̧m̧ani
-
Kajjitōk bwe juon ajri en riiti Aiseia 40:3 ilo an ajri ro jet kajjojo riiti juon iaan eoon ko im lali naan ko reinjuon im eoon ko: Mark 1:3–4 (Jon Ripeptaij); Alma 7:9 (Alma); Katak im Bujen Ko 33:10–11 (mijenede ro raan kein āliktata). Jipan̄ er jeļā wōn ro rej kōpooj “iaļ eo an Irooj” ilo kajjojo eoon. Elmen an kar armej rein kōpooj iaļ eo an Irooj? Ta eo jemaron̄ kōm̧m̧ane n̄an jipan̄?
-
Jin̄aik juon iaļ ioon bo̧o̧t eo, im riit ippān ajri ro Aiseia 40:3–5. Kajjitōk ippān ajri ro n̄an kōlaajraki kapan̄pan̄ ko me emaron̄ kabōjrak an armej ro ļoor Rilo̧mo̧o̧r eo, im kajjitōk ippāer n̄an jin̄aik kapan̄pan̄ ko ioon iaļ eo. Kōtļo̧k aer jereļo̧k kapan̄pan̄ ko ilo am̧ ekōnono kōn wāween ko jemaron̄ jipan̄ armej ro anjo̧ jeni.
Irooj ej pād ippa ilo melejjon̄ ko aō.
N̄e jej kōm̧m̧ani bujen ko ippān Irooj, Ej kallim̧ur bwe Enaaj pād ippād—em̧ool ilo iien apan̄ ko ad. Jipan̄ ajri ro lo er make āinwōt m̧ōttan armej in bujen ro an Irooj im āinwōt ribōk kallim̧ur ro An.
M̧akūtkūt ko Maron̄ Kōm̧m̧ani
-
Je ioon boot eo N̄a… im Inaaj… Kajjitōk bwe ajri ro ren riiti Aiseia 41:10 im Aiseia 43:1–5 im lale wōn ro Irooj ej ba E ej im ta eo E ba E enaaj kōm̧m̧ane. Ta naan ko jet rej ālji ilo eoon kein? Elmen an ennaan kein letok aenōm̧m̧an im kōjatdikdik ilo iien ko reppen?
-
Riit ippān doon Aiseia 48:10, im kōnono kake ta in upaaj im wāween oktan kōjerbale. Kōmeļeļeik bwe aeen ko rej bwiļ ilo upaaj eo. Etke upaaj em̧m̧an ilo juon wāween n̄an kōmeļeļeiki en̄taan. Elmen an en̄taan ko ad kakwojarjar kōj? (lale Alma 62:41).
Irooj ejjām̧in meļo̧kļo̧k eō.
N̄e jej en̄jake ad ettoļo̧k jān Irooj kōn jerawiwi ko ad, apan̄ ko, ak jabdewōt un, enaan eo ilo Aiseia 49:14–16 emaron̄ bōktok aenōm̧m̧an.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an riiti Aiseia 49:14. Ta eo emaron̄ kōm̧m̧an bwe armej ro ren en̄jake ke ejej tokjāer? Elmen ad maron̄ jipan̄ ro jet jeļā bwe Irooj ejjab meļo̧kļo̧k er? Elmen ad jeļā ke E ejjab meļo̧kļo̧k kōj?
-
Kajjitōk ippān ajri ro n̄an kōnono kake juon eo rejeļā kajjien reban meļo̧kļo̧k e, āinwōt juon uwaan baam̧le eo ak m̧ōttad. Ekōnono elmen an juon jinen eo ej iakwe en̄jake kōn ajri ro nejin im elmen an Irooj en̄jake kōn kōj. Innām kajjitōk ippān ajri ro n̄an riiti Aiseia 49:15–16. Ekkar n̄an eoon kein, etke Irooj eban meļo̧kļo̧k kōj? Kajjitōk ippān ajri ro n̄an kwaļo̧k en̄jake ko aer kōn Jisōs Kraist.
Kōketak Ekkatak ilo M̧weo
Kajjitōk ippān ajri ro n̄an ļōmņake jet men ko raar ekkatak rainin me rekōņaan jeļā eļapļo̧k kake. Jipan̄ er je juon kajjitōk kake me remaron̄ kajjitōk ippān m̧am̧a ak baba ak juon uwaan baam̧le.
Kōkm̧anm̧anļo̧k Ad Katakin
Kōm̧m̧an ekkar aikuj ko an ajri ro. N̄e kwoj katakin ajri ro reddikļo̧k ak en̄jake im̧we n̄an katakin er juon iaan pedped in katak ko ilo laajrak in “Ajri ro Rōrūttoļo̧k” ak jekjek eo juon, ukot im kōkkar juon iaan m̧akūtkūt ko n̄an pedped eo n̄an tōpar aikuj ko im maron̄ ko an ajri ro kwoj katakin.