“17–23 Oketopa. Ieremia 30–33; 36; Auega a Ieremia1; 3: ‘Ou te Liua foi lo Latou Faanoanoa i le Fiafia,’” Sau, Mulimuli Mai ia te A’u—Mo le Peraimeri: Feagaiga Tuai 2022 (2021)
“17–23 Oketopa. Ieremia 30–33; 36; Auega a Ieremia1; 3,” Sau, Mulimuli Mai ia te A’u—Mo Le Peraimeri: 2022
The Cry of Jeremiah the Prophet, mai se togitogiga na saunia e le Aoga Nazarene
17–23 Oketopa
Ieremia 30–33; 36; Auega a Ieremia1; 3
“Ou te Liua foi lo Latou Faanoanoa i le Fiafia”
O tusi a Ieremia ma Auega a Ieremia atonu e faigata mo tamaiti ona malamalama i ai, ae e mafai lava e lau vasega ona aʻoaʻoina lesona mai mataupu faavae ua aʻoaʻoina i nei tusi. O a ni mea ua uunaia oe e faasoa mai?
Tusi Faamaumau Ou Lagona Uunai
Valaaulia le Fefaasoaai
Tufa atu se kopi o le Tusi Paia. A o uu e tamaiti le tusi, fai atu ia i latou e faasoa mai se mea latou te fiafia i ai e uiga i le Feagaiga Tuai—atonu o se mataupu faavae po o se tala e sili ona fiafia i ai ua latou aʻoaʻo mai ai i le fale po o le lotu.
Aoao atu le Aoaoga Faavae: Tamaiti Laiti
E alolofa le Tama Faalelagi ma Iesu Keriso ia te au.
O le lagonaina o le “alofa faavavau” o le Tama Faalelagi ma Iesu Keriso o le a fesoasoani i tamaiti o e aoaoina ia latalata atili atu ia i Laua.
Gaoioiga e Mafai Ona Fai
-
Faaali atu i tamaiti ni mea faitino (poʻo ni ata o ni mea faitino) e umi se taimi o lelei ma o nisi e leai, pei o se tupe siliva ma se vaega o se fualaʻau ‘aina. Fesili atu i tamaiti po o le fea o nei mea o le a umi ona lelei, ma talanoaina pe aisea e umi ai ona lelei le isi nai loo isi. Faitau le Ieremia 31:3,ma fesoasoani i tamaiti ia malamalama o le alofa o le Tama Faalelagi ma Iesu Keriso mo i latou e “faavavau.”
-
Fesili i tamaiti e fetufaai mai pe faapefea ona faaalia e le Tama Faalelagi ma Iesu Keriso lo Laʻua “alofa” mo i latou (Ieremia 31:3). Ina ia tuu atu i tamaiti ni aitia, usu se pese e uiga i lo La’ua alofa mo i tatou, e pei o le “E Alofa Lo’u Tama Faalelagi ia te A’u” po o le “Le Alofa o lou Faaola” (Tusipese a Tamaiti, 16–17, 42). Afai e mafai, faaali atu ata o mea o loʻo taua i le pese. O a ni o tatou lagona pe a tatou mafaufau e uiga i le alofa o le Tama Faalelagi ma Iesu Keriso?
E mafai e tusitusiga paia ona musuia i tatou ia salamo ma liliu atu i le Alii.
O tusitusiga paia o afioga ia a le Atua.
Na taʻu atu e le Alii ia Ieremia e tusi i lalo Ana upu, ma o tusitusiga a Ieremia na teuina mo i tatou i le tusi a Ieremia. Fesoasoani i tamaiti ia loloto lo latou fiafia i tusitusiga paia, lea tatou te maua ai le afioga a le Atua.
Gaoioiga e Mafai Ona Fai
-
Tofi se tamaititi e faafoliga o ia o Ieremia, ma valaaulia isi tamaiti e avea ma Paruka. Fesoasoani i le tamaititi o loʻo fai ma Ieremia e fai mai ni upu mai le Ieremia 36: 3 ao faʻafoliga e tusia e isi tamaiti, pei o Paruka. Ia molimau atu o tusitusiga paia i aso nei o “afioga a Ieova” (Ieremia 36: 4) na Ia fai atu i perofeta e tusi i lalo.
-
Faaali atu se tusi a tamaiti ma se kopi o tusitusiga paia, ma fai i tamaiti e talanoa e uiga i eseesega latou te maitauina i le va o tusi. O le a le mea e faapitoa ai tusitusiga paia? Fesoasoani i tamaiti ia malamalama o tusitusiga paia o afioga ia a le Atua na tusia e perofeta, e pei foi o le tusi a Ieremia o le mea na taʻu atu e le Atua ia Ieremia e tusia.
E mafai ona ou faasoa atu mea o loo ou aoaoina mai tusitusiga paia.
E mafai ona matuai faatosinaina e tamaiti i latou o loo siomia ai i latou. Pei o Paruka, e mafai ona latou faasoa atu i isi mea o loo latou aʻoaʻoina i tusitusiga paia.
Gaoioiga e Mafai Ona Fai
-
Fai i tamaiti e fai taga e o faatasi ma upu a o e faitau (pe aoteleina) Ieremia 36: 4–10, e pei o le faafoliga e tusi i se tusi (tagai i le fuaiupu4), uuina ia pa o le falepuipui (tagai fuaiupu5), ma le faitauina o tusitusiga paia i tagata (tagai i le fuaiupu 8,10). Faamamafa atu sa i ai ia Paruka le lototele e faitau ai upu a Ieremia i tagata e ui lava sa le mananao ia taitai i Ierusalema. Fesoasoani i tamaiti e manatua se mea na latou aʻoaʻo mai le Feagaiga Tuai ma mafaufau i ni auala e mafai ona latou fetufaai ai ma isi.
-
Usu se pese e faatatau i tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti,66). Faasoa atu lau molimau e uiga i tusitusiga paia, ma valaaulia tamaiti e faasoa mai foi a latou molimau.
Aoao atu le Aoaoga Faavae: Tamaiti Matutua
E mafai ona ou tausia a’u feagaiga ma le Atua.
O aoaoga a Ieremia e uiga i le feagaiga fou ma faavavau a le Alii e mafai ona fesoasoani i tamaiti e te aʻoaʻoina e faʻamalosia ai lo latou manaʻo e tausi a latou feagaiga.
Gaoioiga e Mafai Ona Fai
-
Tusi se fatu i luga o le laupapa, ma valaaulia le afa o le vasega e faitau le Ieremia 31:31–34 ae o le isi afa e faitau le Ieremia 32:38–41. Valaaulia vaega e tusi i le fatu mea ua latou aoaoina mai a latou fuaiupu e uiga ia tatou feagaiga ma le Atua. O le a le eseesega o le i ai o le tulafono a le Atua i o tatou loto (tagai Ieremia 31:33) mai le naʻo le faitauina i tusitusiga paia? Aisea tatou te mananaʻo ai e osia feagaiga ma le Aliʻi? Aisea e finagalo ai o Ia e osia feagaiga ma i tatou?
-
Ina ia iloiloina feagaiga tatou te osia pe a tatou papatiso, valaaulia tamaiti e fai se siata e lua-koluma i luga o se fasi pepa ma ulutala O A’u Folafolaga ma Folafolaga a le Atua. Fai atu ia i latou e faatumu le siata e ala i le faaaogaina o le vaega ua faaulutalaina “O le Feagaiga o le Papatisoga” (topics.ChurchofJesusChrist.org) po o le Mosaea 18:10,13; Mataupu Faavae ma Feagaiga 20:37. Fai i tamaiti e faaali le pepa i le fale e fesoasoani ai ia latou manatua e tausia a latou feagaiga.
O tusitusiga paia o afioga ia a le Atua.
O le tala i le Ieremia36 e mafai ona fesoasoani i tamaiti e aʻoaʻo mai faataʻitaʻiga o tagata na taliaina le afioga a le Alii i tusitusiga paia.
Gaoioiga e Mafai Ona Fai
-
Tusi upu nei i luga o le laupapa: Aisea? O ai na faatauaina tusitusiga paia? O ai e leai? Faitau faatasi le Ieremia 36:1–3, ma fesili i tamaiti pe aisea na finagalo ai le Alii ia Ieremia e tusi i lalo Ana upu. Ona fai atu lea i tamaiti e faitau le Ieremia 36:5–8, 20–25 ma faailoa po o ai na faaalia latou te faatauaina tusitusiga paia ma po o ai e leai. Talanoa e uiga i le mafuaaga e te faatauaina ai tusitusiga paia. Faasoa atu se fuaitau o mau po o se tala e sili ona taua ia te oe. Valaaulia tamaiti e faasoa mai foi.
-
Valaaulia ia tamaiti e faaaoga le itulau o gaoioiga o lenei vaiaso e faataitai ai le faasoaina ma isi o le tala o loo i le Ieremia36. Valaaulia tamaiti e faasoa mai foi a latou molimau o tusitusiga paia.
Auega a Ieremia 1:1–2,16; 3:22–26
O le Faaola na mafai ai ona faamagaloina aʻu agasala.
E pei ona faamatalaina faatusatusa e le tusi o Auega, e masani ona tatou faanoanoa pe a tatou agasala. O nei lagona e mafai ona musuia ai i tatou e suia ma ole atu i le Tama Faalelagi mo se faamagaloga.
Gaoioiga e Mafai Ona Fai
-
Faamatala i tamaiti talu ai e leʻi salamo Isaraelu, o lea na faatafunaina ai Ierusalema ma le malumalu. Fai i tamaiti e talanoa e uiga i ni o latou lagona pe a na latou nonofo i Ierusalema i lena taimi. Faitau faatasi le Auega o Ieremia 1:1–2,16. O a upu ma fasifuaitau i nei fuaiupu e fesoasoani ia tatou malamalama i lagona o tagata Isaraelu? E mafai faapefea e le savali i le Auega a Ieremia 3:22–26 ona maua ai e i latou le faamoemoe?
-
Fai i tamaiti e mafaufau e uiga i se taimi na latou lagona ai le faanoanoa mo se filifiliga sese na latou faia. O le a se mea na latou mauaina i le Auega a Ieremia 3: 22–26 e fesoasoani latou te iloa ai e naunau le Alii e faamagalo i latou?
Uunaia le Aoaoina i le Aiga
Ia valaaulia tamaiti e fai atu i tagata o o latou aiga e fetufaai mai ni mea na tutupu e faatatau i mataupu faavae na e suesueina i le vasega. Mo se faataʻitaʻiga, afai e te talanoaina tusitusiga paia, e mafai e tamaiti ona fai atu i se tagata o le aiga e faamatala mai pe faafefea ona ia iloa e moni tusitusiga paia.
Faaleleia o Lo Tatou Aoao Atu
Gauai atu mafaufau a tamaiti. Atonu e manaomia ona e mafaufau e fatufatu ni auala e faagauai mai ai tamaiti laiti. Mo se faataitaiga, faaaoga ata, pese, taaloga ma isi gaoioiga.