Iesu o loo taitaiina mamoe

Come, Follow Me, saunia e Scott Sumner

24–30 Oketopa

Esekielu 1–3; 33–34; 36–37; 47

“O Le a Ou Tuuina Se Agaga Fou i Totonu o Oe”

E le lava le taimi e aoao uma ai mataupu faavae o loo i totonu o le Esekielu. Saili le taʻiala faaleagaga e uiga i mea e taulaʻi iai, ma faamalosia tamaiti e faaauau ona aʻoaʻo i le fale.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i ni nai tamaiti e feauauai i le tusiaina o ata o se mea na latou aoaoina mai tusitusiga paia talu ai nei. E mafai e isi tamaiti ona mateia le ata a tamaiti uma.

aikona o le aoao atu

Aoao atu le Aoaoga Faavae: Tamaiti Laiti

Esekielu 3:17

O perofeta e pei o ni tagata vaai o loʻo lapataiina i tatou i mea matautia.

O Esekielu sa pei o se tagata vaai, na lapataia tagata Isaraelu i mea matautia latou te le o vaaia. Fesoasoani i tamaiti ia latou iloa pe faafefea ona pei a tatou perofeta i aso nei o ni tagata vaʻai.

Gaoioiga e Mafai Ona Fai

• Faitau i tamaiti le mea na taʻu atu e le Alii ia Esekielu Esekielu 3:17. Valaaulia i latou e fai taga e o faatasi ma upu, pei o le faasino atu i o latou mata, taliga, ma gutu pe a e faitau i upu “tagata vaai,” “faalogo,” ma le “gutu.”

• Taʻitaʻi tamaiti i se sopoaga faataamilo i le potu. Lapataʻi i latou e uiga i tulaga lamatia faataitai i luga o le ala, pei o vaitafe e manaomia ona oso i luga, lala e maulu ai i lalo, po o manu e aloese mai ai. Tuu atu i tamaiti e auauai i le avea ai ma taitai. Talanoa pe faapefea ona lapataia tatou e lo tatou perofeta i mea matautia tatou te le o vaʻaia.

• Faaali se ata o le perofeta o loʻo iai nei a o outou usuina faatasi se pese e uiga i perofeta, pei o le fuaiupu mulimuli o le “Mulimuli i le Perofeta” (Tusipese a Tamaiti, 58). Tau atu i tamaiti pe faapefea ona pei le perofeta o se tagata vaʻai mo oe.

Esekielu 37:15–19

E aoao a’u e tusitusiga paia e uiga ia Iesu Keriso.

Na faatusatusa e Esekielu le aiga o Isaraelu i fasi laau e lua ua avea ma tasi. O nei laʻau o loʻo faatusalia foi le Tusi Paʻia ma le Tusi a Mamona, o loʻo molimau faʻatasi ia Keriso.

Gaoioiga e Mafai Ona Fai

• Tufa i ni tamaiti ni kopi o le Tusi a Mamona; ave i isi kopi o le Tusi Paia. Aotele le Esekielu 37:15–19 i le faamatala atu, na taʻu atu e le Alii ia Esekielu e tusi i luga o ni laau se lua e fai ma sui o le Tusi Paia ma le Tusi a Mamona. Faitau le fuaiupu17, ma valaaulia tamaiti taitoatasi e saili se tasi e i ai se tusi o tusitusiga paia e ese mai ia latou ma “auai faatasi ma i latou” ina ia latou “tasi i [o latou lima].” Talanoa pe faapefea ona fesoasoani uma le Tusi Paʻia ma le Tusi a Mamona ia i tatou e faamalosia lo tatou faatuatua i le Tama Faalelagi ma Iesu Keriso.

• Faaaoga ata mai le Tusi Ata o le Talalelei pe mai tusi o le Sau, Mulimuli Mai ia te A’u o tausaga ua te’a, fesoasoani i tamaiti e faasoa tala e uiga ia Iesu mai le Tusi Paia ma le Tusi a Mamona. Fai atu ia i latou e faasoa mai pe aisea latou te faafetai ai ona ua i ai nei tusi e lua o tusitusiga paia.

toafa ma le Sami Mate

Na vaaia e Esekielu i se faaaliga se vaitafe o tafe mai le malumalu ma faamalolo le Sami Mate.

Esekielu 47:1–12

O faamanuiaga silisili e sau mai le malumalu.

O le vaʻaiga a Esekielu i se vaitafe faamalolo na tafe mai i fafo o se malumalu e mafai ona fesoasoani i tamaiti e aʻoaʻo ai o malumalu e aumaia faamanuiaga i o tatou olaga.

Gaoioiga e Mafai Ona Fai

• Faaali atu i tamaiti se fagu vai. E faapefea ona faamanuia i tatou e le vai? Tau atu i tamaiti le valoaga a Esekielu i le vai o loʻo tafe mai i fafo o le malumalu (tagai Esekielu 47:1-12). Faaaoga le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga (tagai foi i le vitio “And the River Will Grow,” ChurchofJesusChrist.org). Tau atu i tamaiti e uiga i faamanuiaga ua e mauaina, e pei o le vaitafe i le valoaga a Esekielu, e tafe mai le malumalu.

• Valaaulia tamaiti e tusi se ata o i latou lava o loo o atu i le malumalu. Usu faatasi se pese e faamatalaina faamanuiaga o le malumalu, e pei o le “E Mafai Ona Faavavau Aiga” (Tusipese a Tamaiti,98). O le a le mea ua aoao mai e le pese e uiga i le auala e faamanuiaina ai i tatou e malumalu?

aikona o le aoao atu

Aoao atu le Aoaoga Faavae: Tamaiti Matutua

Esekielu 2:3–4; 3:7; 36:26–27

E mafai e Iesu Keriso ona suia lo’u loto.

Sa faaaoga e Esekielu fasifuaitau e pei o le “loto fou” ma le “agaga fou” e aoao ai e uiga i le ituaiga o suiga na aumaia e le Faaola i o tatou olaga.

Gaoioiga e Mafai Ona Fai

• Fai atu i tamaiti e sue le Esekielu 2:3-4; 3:7 mo upu e faamatalaina le au Isaraelu. Ona valaaulia lea o i latou e faitau Esekielu 36:26-27 ia aʻoaʻo pe faʻafefea ona ofo atu le Faaola e fesoasoani ia latou suiga. O a upu e mafai ona faamatalaina le “loto fou” ma le “agaga fou” Na te aumaia ia i tatou? (tagai, mo se faataʻitaʻiga, Mosaea 3:19; 5:2).

• Fai i tamaiti e mafaufau i mea e ono fai e tagata “loto malo” pe “loto maaa” (Esekielu 2:4; 3:7) Mo se faataʻitaʻiga, faafefea ona latou tali atu i le fautuaga mai se matua po o le perofeta? O le a se mea e mafai ona latou faia pe a latou vaai i se tasi e manaomia le fesoasoani? E faapefea ona eseese a tatou aga pe a faavaivaia e le Faaola o tatou loto?

Esekielu 37:19–23

O le Tusi Paia ma le Tusi a Mamona e fesoasoani e “faapotopotoina” i tatou ia Iesu Keriso.

E galulue faatasi le “laau a Iuta” a Esekielu (le Tusi Paia) ma le “laau a Iosefa” (le Tusi a Mamona) e faapotopoto Isaraelu i le Faaola (tagai Esekielu 37:19).

Gaoioiga e Mafai Ona Fai

• Uu i luga se kopi o le Tusi Paia ma le Tusi a Mamona, ma fesili i tamaiti pe aisea latou te lagona ai e lelei le maua uma o nei tusi. Faitau atu ia i latou Esekielu 37:19, ma faamatala atu o le “laau a Iosefa” e faatatau i le Tusi a Mamona, na tusia e tupuaga o Iosefa o Aikupito, ma “o le laau a Iuta” e faatatau i le Tusi Paia, na tusia tele lava e tagata Iutaia. Ona faitau faatasi lea o fuaiupu 21–23 ma le 2Nifae 3:12, ma lisi faamanuiaga e maua mai le mauaina o nei tusi uma.

• Tuu se ata o Iesu i le ogatotonu o le potu, ma valaaulia tamaiti e ave o latou nofoa i nofoaga eseese i autafa o le potu. Ona fai atu lea ia i latou e faaaoga le Topical Guide e saili ai mau i le Tusi Paia ma le Tusi a Mamona o loo aoao mai e uiga ia Iesu Keriso (pe afai e manaomia, ia faaali atu le auala e faia ai lenei mea). A uma ona tufa mai e tamaiti uma se mau, valaʻaulia tamaiti uma e faalatalata mai o latou nofoa i le ata o Iesu. Faaauau seʻi vagana ua “faapotopoto” uma tagata ia te Ia.

Esekielu 47:1–12

E mafai e faamanuiaga o le malumalu ona faamaloloina loto ma aiga.

O le vai na tafe mai le malumalu i le valoaga a Esekielu na aumaia le ola i mea uma na paʻi i ai. E faapena foi, o faamanuiaga e tafe mai le malumalu e mafai ona faamalolo ai tatou faaleagaga ma aumaia ia tatou le ola e faavavau.

Gaoioiga e Mafai Ona Fai

• Lisi i luga o le laupapa ni upu taua ma fasifuaitau e fesoʻotaʻi ma Esekielu 47: 1–12, e pei o le malumalu, vaitafe, toafa, Sami Mate, le tele o iʻa, ma laau fua. Valaaulia tamaiti taitasi e filifili se tasi o nei mea e tusi. Ona faitau faatasi lea o fuaiupu, ma valaaulia tamaiti e fetufaai a latou ata pe a taʻua a latou elemene. O a faamanuiaga na sau mai le vaitafe i lenei faaaliga? (tagai fuaiupu 8–9,12). Fesoasoani i tamaiti ia iloa pe faapefea ona avea nei faamanuiaga ma faamanuiaga ua ofoina mai e le Tama Faalelagi ma le Faaola ia i latou e tausia feagaiga o le malumalu.

• Faaali le vitio “And the River Will Grow” (ChurchofJesusChrist.org). Faitau faatasi le mea na aoao mai e Elder DaleG. Renlund, e faatatau i le valoaga a Esekielu i le “Galuega o Talafaasolopito o Aiga ma le Malumalu: Faamauga ma le Faamalologa” (Ensign po o le Liahona, Me 2018, 47–48). Taʻu i tamaiti le auala ua aumaia ai e le galuega o talafaasolopito o aiga ma le malumalu ia te oe le faamalologa a le Faaola. Valaaulia tamaiti e faasoa mai o latou lagona e uiga i le malumalu.

aikona o le aoaoina

Uunaia le Aoaoina i le Aiga

Ia valaaulia tamaiti e fetufaai atu ma o latou aiga se mea se tasi na latou aoaoina i le aso ma se mea se tasi latou te mananao e aʻoaʻo atili ai.

Faaleleia o Lo Tatou Aoao Atu

Lagolago le aoaoina i le aiga. “O se tasi o au sini i le avea ai o se faiaoga o le faamalosiau lea o i latou o loo e aoaoina ia maua ni a latou lava aafiaga i tusitusiga paia—ia taitoatasi ma o latou aiga” (Aoao Atu i le Ala a le Faaola, 36).

itulau o gaoioiga: E aoao a’u e tusitusiga paia e uiga ia Iesu Keriso.