Nobembwa 7–13

Otea 1–6; 10–14; Ioera

“N na Tangiria ni Boni Kan Tangiria

Ngkana ko kamatebwai booki aika tabu ao ni katauraoi n angareirei, ukoukora te kairi mairoun te Tamnei ae Raoiroi. Tera ae ko namakinna bwa ko na kabanea am iango iaona n tain te kiraati n te wiiki aei?

Korei Am Namakin

Kaunga te Tibwatibwa

Kaota tamnein te Tia Kamaiu, ao kaoiia ataei bwa a na tibwaua te bwai ae ataia ke n reiakina Taekana n te wiiki aei. Kariaia bwa a na ikaruoruo n taua te tamnei ngkana a tibwatibwa.

Reirei te Reirei: Ataei aika a Uarereke

Otea 10:12

I kona n ukoukora te Uea.

Otea 10:12 ni kabonganai tamnein kateboan koraa, te mwakuri korakora, te tai, ao te karau ni kaoira n ukoukora te Uea. Ngkana ko wareka te kibu aei, tera iango aika tamaroa aika roko n am iango ae na kona ni kaunga te ataei n Ukoukoria?

Waaki ni Kakukurei aika a Kona ni Karaoaki

• Wareka Otea 10:12 nakoia ataei, ao kaoia bwa a na karaoi mwakuri aika bebete ni buokiia n ataa te kibu, n aron ae aongkoa ko uniki aroka, kiniki uanikai man te aroka, ke n tei iaan te karau. Ke ni kaoti tamnein koraa, aroka, ao te karau. Buokiia ataei ni kabotaua unikakin te kora ao kinikakin amwarake aika raraoi nakoia aika maiuakina te etieti ao ni karekei a na kakabwaia te Uea. Kakoaua ana kakabwaia te Uea ae e a tia ni bwaka ni karau nako aom ngke ko kataia n Ukoukoria.

• Korea tamnein te tai iaon te burakibooti, ao tuangiia ataei bwa a na tibwauai kawai aika ti kona iai n ukoukora te Uea n tain bong aika kakaokoro. Kaoia ataei bwa a na kaokiokia n taekinna ma ngkoe te mwakoro n taeka “ba bon te tai n ukoukora te Uea” (Otea 10:12). Buokiia n ataia bwa bon te tai n tainako n ukoukora te Uea. Tibwaua te bwai ae ko karaoia n Uringnga n tainako.

Iesu Kristo ara Tia Kamaiu ao te Tia Kabooira.

Otea 13:4,14

Iesu Kristo bon au Tia Kamaiu.

Ngkana ko reirei taekan te Tia Kamaiu ao Ana Mwakuri ni kamaiu, kaota am koaua n Ana tangira ibukiia ataei n tatabemaniia nako.

Waaki ni Kakukurei aika a Kona ni Karaoaki

• Kaoti tamneia aomata tabeman, n raonaki ma Iesu, ao titirakiniia ataei bwa antai mai ibuakoia aomata aikai ae ara Tia Kamaiu. Wareka Otea 13:4, ao katuruturua n taekinna bwa akea te Tia Kamaiu bwa ti Iesu Kristo. Kakoaua bwa ibukin Ana Mwawkuri ni Kamaiu Iesu Kristo, ti kona n oki ni manga maeka ma Tamara are i Karawa.

• Kariaia ataei bwa a na ikaruoruo n taua tamnein Iesu iaon te kaibangaki ke n te nne ni mate ao tamnein Iesu itinanikun te ne ni mate ae akea kaina. Kaoiia ataei bwa a na taekina te bwai ae kaotia te tamnei. Wareka te mwakoro n taeka n Otea 13:14 “N na kaboia ni kamaiuia man makan te n ne ni mate; N na kamaiuia ni kaboia man te mate.” Kakoaua ae e kamaiuira Iesu Kristo man te mate ao ti kona ni mangauti. Bootaki n anenea te kuna ibukin te Mangauti n aron “Did Jesus Really Live Again?” (Aia Boki n Anene Ataei,64). Buokiia ataei ni kina te Tamnei ngkai a anene.

Ioera 2:28

E kona te Tamnei ae Raoiroi ni kairai.

Ngkana ko reirei ana taeka ni burabeti Ioera inanon Ioera 2:28, iangoia bwa ko na kanga ni buokiia ataei ni katauraoia ni karekea te Tamnei ae Raoiroi imwiin are a tia ni bwabetitoaki.

Waaki ni Kakukurei aika a Kona ni Karaoaki

• Wareka Ioera 2:28 nakoia ataei, ao kabwarabwara bwa taeka “aomata ni kabane” nanona ni kabane aomata, n raonaki ma “naati mwaane” ao “naati aine” n aroia. Kaoia ataei bwa a na korea tamneia aomata aika a mwaneaweaki n te kibu aei (naati mwaane ao naati aine, mwaane aika ikawai ao kairake, aine aika ikawai ao kairake), n ikotaki ma ngaiia. Kabwarabwara bwa teuana te kawai ae na nurakina Tamneina te Atua bon anganakira ana bwaintituaraoi te Tamnei ae Raoiroi ngakna ti bwabetitoaki.

• Kaoiia ataei bwa a na tibwaua te bwai ae a ataia irouia taan buaka aika rorobuaka. Buokiia ni kaotaia ae e kona te Tamnei ae Raoiroi n reireiniira taekan Tamara are i Karawa ao Iesu Kristo ao e kona ni buokiira n ata te bwai ae koaua (taraa Ioane 14:26; Reirei ao Berita aika Tabu 42:17). Tibwauai taneiai aika a na buokiia ataei n atai kawai aika e kona iai ni buokiira te Tamnei.

Reirei te Reirei: Ataei aika a Ikawai Riki

Otea 2:19–20

I kona ni kawakin au berita aika tabu ma te kakaonimaki.

N ana boki Otea, e kabotaua Ana berita aika tabu te Uea ma kaain te bata are Iteraera nakon te mare. Ni kaineti ma aia aki kakaonimaki kaain Iteraera, E teimatoa n tangiriia ao e tangiriia bwa a na oki. E kona te kabotau aei ni buokiko n reireiniia ataei taekan kakawakin kawakinan ara berita aika tabu ma te Uea.

Waaki ni Kakukurei aika a Kona ni Karaoaki

• Tuangiia ataei bwa inanon ana boki Otea, te Uea e kabotaua Ana berita aika tabu ma Iteraera nakon te mare. Kaotia nakoia ataei tamnein te tia mare te mwaane ao te tia mare te aine. E kanga Tamara are i Karawa n tangira te bu te mwaane ao te bu te aine n taruaia bon imarenaia? Ti na kanga ni kaotia nakon te Uea bwa ti Tangiria ao ti na kakaonimaki nako Ina?

• Buokia ni kaota nakoia ataei ae berita aika tabu aika ti karaoi ma te Uea a nanonaki bwa a na akea tokiia. Kaoa temanna mairouia ataei bwa e na wareka Otea 2:19–20, n tarai taeka aika a kabwarabwarai ana namakin te Uea ibukin Ana berita ae tabu ma ngaira. Tera ae ti berita iai bwa ti na karaoia ngkana ti bwabetitoaki? Ti na kanga ni kawakina te berita aei ae tia tia ni karaoia ma te Uea?

Otea 13:4,14

Iesu Kristo bon au Tia Kamaiu ao te tia Kabooi maiura.

Ko na kanga ni kabonganai ana taeka Otea ni kakorakorai aia onimaki ataei iroun aia Tia Kamaiu ao te tia Kabooi maiura? Ngkai ko angareirei, buokiia ataei n namakina kimwareirein ao a na tangira ana Mwakuri ni kamaiu Iesu Kristo.

Waaki ni Kakukurei aika a Kona ni Karaoaki

• Kaoia ataei bwa ana wareka Otea 13:4,14, ao ni kakaei taeka ke mwakoro n taeka aika a kabwarabwara taekan Iesu Kristo. Tera ae reireiniira taeka aikai Ibukina? Kaoia ataei bwa a na kabongana te Topical Guide ke Kairi nakon Booki aika Tabu ni kakaei ao n tibwauai bwaai aika a reirei taekan Iesu Kristo bwa ngaia bon e Tia Kamaiu ao te Tia Kabooi maiura. Tibwa am koaua iaon te Tia Kamaiu, ao anganiia ataei aia tai ni karaoa naba anne.

• Ni buokiia ataei n ataia bwa e kanga te Tia Kamaiu ni kabomwi ke ni kamiura man te mate, kaota te witeo “Handel’s Messiah: Debtor’s Prison” (ChurchofJesusChrist.org). Tera ae ti reiakinna man te witeo aei are e buokiira n ataa te bwai ae e a tia te Tia Kamaiu ni karaoia ibukira?

Ioera 2:28–29

E kona te Tamnei ae Raoiroi ni kairai.

A mwaiti ataei aika ko reireiniia aika a taraa n tia ni bwabetitoaki ao ni karekea ana bwaintituaraoi te Tamnei ae Raoiroi. Ko na kanga ni kabonganai booki aika tabu aikai ni buokiia ni kaotaia n te mwaaka ao kakabwaia aika roko man te ongora ni bwanaan te Tamnei?

Waaki ni Kakukurei aika a Kona ni Karaoaki

• Kaoia ataei bwa a na bootaki ni wareka Ioera 2:28–29, ni karin araia n tatabemaniia n onea mwiin mwakoro n taeka “natim mwaane” ao “natim aine.” Koroia iaon te burakibooti te tiententi n aron Te Tamnei ae Raoiroi e kona… ao kaoia ataei bwa a na karekei aia tai ni kabwanina te tiententi. Kaungaia bwa a na karin bwaai aika a reiakin man Ioane 14:16; Moronaai 10:5; Reirei ao Berita aika Tabu 42:17, ao booki aika tabu riki tabeua.

• Katuka te bwai inanon te boora, ao kariaia ataei bwa a na kabwaroa te ran iaona temanna imwiin temanna. Kabwarabwara bwa e tei ibukira te bwai, ao te ran e tei ibukin te Tamnei ae Raoiroi. Ngkana ti bwabetitoaki, ti karekea ana bwaintituaraoi te Tamnei ae Raoiroi, are bon teuana te kawai are e kakoroa iai nanon Ana berita te Uea ni “kabwaroa [Tamneina] i aora.” Tera ae ti riai ni karaoia bwa ti aonga ni karekea te Tamnei ae Raoiroi? Kaoia ataei bwa a na tibwauai aia tai ngke a tia n namakina ana kairoro te Tamnei ae Raoiroi.

Kaungaa te Kamatebwai n te Mweenga

Buokiia ataei ni kinaa te bwai ae a tia n reiakinna ibukin Tamara are i Karawa, Iesu Kristo, ke te Tamnei ae Raoiroi inanon te kiraati n te bong aei. Kaungaia bwa a na tibwaua te bwai aei ma aia utu.

Kanakoraoan Ara Anga reirei

Ukoukora te kaotioti ni katoabong. Ngkana ko katauraoi n reirei, tataro ao iangoi booki aika tabu inanon te wiiki. Iango ao namakin bwa ko na kanga n anga reirei e kona n roko iroum n te tai n aki akaka ao n taabo nako. (Taraa Te Anga Reirei n Ana Kawai te Tia Kamaiu, 12.)