e kaotaaki ubun Iesu n te tauranene inanon te ruu ae roo

Te Berena Ni Kamaiu, iroun Chris Young

Nobembwa 14–20

Amota; Obaria

“Kam na Ukoukora te Uea, ao Kam na Maiu”

Ngkai ko kabanea nanom n reiri iaon reirei aika a koaua ni kawai aika a bebete, ko katauraoa ana tai Tamnei ae Raoiroi ni kaota koauana nakoia ataei. Kabonganai waaki ni kakukurei n te kamataata aei—ke karaoa are oin am bwai—ni buokiko n reirei reirein te euangkerio ni kawai aika a bebete.

Korei Am Namakin

te aikaon ibukin te tibwatibwa

Kaunga te Tibwatibwa

Tuangiia ataei bwa a na tibwaua t bwai are a tia n reiakinna n te tai ae nakko ni mweengaia ke n te umwantabu. N aron te katooto, titirakiniia ngkana a tia ni kunei koroboki aika tabu aika a mamate nanoia iai ke n ongo te rongorongo are a kona n tibwauaia ma kaain te kiraati.

te aikaon ibukin te anga reirei

Reirei te Reirei: Ataei aika a Uarereke

Amota 3:7; 7:14–15

Burabeti bon ana tia uarongorongo Iesu Kristo.

Teuana mai buakon bwaai ae a kona n ataia ataei ibukiia burabeti bwa bon ngaiia ana tia uarongorongo Iesu Kristo. Iango aika inano a kona ni buokiko n reirei nakoia te koaua ae kakawaki aei.

Waaki ni Kakukurei aika a Kona ni Karaoaki

• Wirikirikiia temanna te ataei te rongorongo ibukiia kaain te kiraati ni kabane (n aron n tuangiia ataei bwa a na tei iaon waeia teuana ao ni mino n rairaki), ao tuanga teuanne ke neienne bwa e na tibwaua te rongorongo ma ataei ake tabeman. Kaokioka te waaki ni kakukurei aei, n tuangiia ataei ake tabeman bwa a na riki bwa taan tia uarongorongo. Buokiia ni kamataataia bwa te tia uarongorongo n te waaki ni kaukurei bon titebo ma te burabeti, are e tibwaua ana rongorongo te Atua ma ngaira. Tibwauai tabeua katooto man marooro n taai aika a nako mairoun te burabeti ae maiu are e a tia ni buokiko ni kaaniko riki ma Iesu Kristo.

• Kaoa te ataei bwa e na tei imoan te ruu ao ni baka n riki bwa te burabeti ae Amota. Ngkai ko tibwauai tabeua koaua ibukin Amota man Amota 7:14–15, angan te ataei tamnei ke boua bwa e na taui are a nako ma koaua n tatabeua, n aron tamnein te tiibu, te uanikai, ao te Uea. Kabwarabwara bwa Amota bon te tia kaawakin tiibu are e weteia te Uea bwa e na riki bwa Ana tia uarongorongo. Ngkanne kaota tamnein te Uea ao te burabeti ae maiu, ao kabwarabwara bwa te Uea e reitinako ni weteia taan tia uarongorongo n te bong aei. Wareka Amota 3:7 ni kabaibati, ao tuangiia ataei bwa a na kotea raoi te tamnei ngkana a ongo te taeka ae “te Uea” ao “burabeti.” Tibwaua am koaua n aron are n ana bong Amota, Iesu Kristo e tatae naoira rinanoia Ana burabeti.

• Tibwaua te karaki man ana maekatiin te Aro n taekan te burabeti ae maiu ke taekan aia taneiai kaain te Ekaretia are a karekea ngke a ira ana taeka n ibuobuoki te burabeti. (Tara naba “Meet Today’s Prophets and Apostles” at ChurchofJesusChrist.org.)

• Anene ke katanga te kuna ae raweaki ae taekaia burabeti, n aron “Follow the Prophet” (Aia Boki n Anene Ataei, 110–11), ngkai a mwakuri ataei iaon te iteraniba ni waaki ni kakukurei n te wiiki aei. Koteia nakoia ataei mwakoro n taeka inanon te anene are e reirei aroia burabeti ni kaira te kawai nakon Iesu Kristo.

Amota 5:14

Ngkana I ukora te raoiroi, te Uea e na memena irou.

Amota e kaoia Iteraera bwa a na “ukora te raoiroi, ao tiaki te buakakal” ao ni berita bwa ngkana a karaoia, “te Uea … e na memena iroumi.” Ko na kanga ni buokiia ataei ni kaeka nakon te kakao aei ao ni karekea te berita aei?

Waaki ni Kakukurei aika a Kona ni Karaoaki

• Kaota tabeua tamneia ataei ngke a karaoi bwaai aika a tamaroa, n aron buokakiia tabeman ke ni butimwaea te toa. Anganiia aia tai ataei n tatabemaniia bwa a na ikaruoruo ni kabwarabwara teuana te tamnei ao are temanna e na keetinna terana te tamnei are e kabwarabwara teuanne ke neienne. Wareka Amota 5:14, ao buokiia ataei n iangoi kawai are a na “ukora te raoiroi” ni katoa bong.

• Kaoiia ataei bwa a na korei tamneia ngke a karaoa te bwai ae raoiroi. Wareka Amota 5:14, ao katuruturua ana berita te Uea e na raoraoniira ngkana ti ukora te raoiroi. Koia ataei bwa n reitan aia tamnei ao a na korea tamnein Iesu ngke e tei ma ngaiia.

te aikaon ibukin te anga reirei

Reirei te Reirei: Ataei aika a Ikawai Riki

abotoro n taai aikai a iobai imarenaia n tain te maungatabu ni kabuta

Te Uea e kaoti taian koaua nakoia Ana burabeti.

Amota 3:7

Burabeti bon ana tia uarongorongo Iesu Kristo.

Amota 3:7 bon te ikota ni kibuntaeka ae nakoraoi ni buokiia ataei n ataia bwa ngkana ti kakauongo nakoia burabeti, ti kakauongo nakon ana tia uarongorongo Iesu Kristo.

Waaki ni Kakukurei aika a Kona ni Karaoaki

• Buokiia ataei ni kamatenanoi ni kabane ke iteran Amota 3:7. N aron te katooto, anganiia tabeua te miniti bwa a na wareki kiibu tabeua te tai inanon te tai are ngke ko korei tatabeua taekan te kibu iaon te burakibooti. Kaoia ataei bwa a n akaini aia koroboki aika tabu ao ni kaai n atonga te kibu ni kabaibati, ni kabonganai kamwaninga ake iaon te burakibooti. Ngkanne kamaunai tabeua taeka n tetaina ni karokoa are a kona ataei ni kaokioka te kibu ni kabane n akea te kamwaninga. Tera ae e reireinira te karaki aei ibukiia burabeti? E kanga ara burabeti ae maiu ni buokiira n ataa te bwai are e tangiria te Tia Kamaiu bwa ti na karaoia?

• Korei tabeua titiraki ibukiia burabeti iaon mwakorokoro ni beeba, n aron akana imwiina: Bukin tera iai ara burabeti? Tera ae a karaoia burabeti? Ko na kanga n iriira te burabeti? Tera ae a reirei iaona burabeti? Tuangiia ataei bwa a na ikatoatoa, ao tuanga temanna te atei ibuakoia akana a ikatoatoa bwa e na rinea te titiraki ao n tuanga toana bwa e na kaeka. Ngkana a kainnanoa buokaia ataei ni kaekai titiraki, a kona ni kakaea inanon “Burabeti” inanon Kairi nakon Koroboki aika tabu (scriptures.ChurchofJesusChrist.org). Imwiin are e tia ni kaekai titiraki toam, a kona ngkanne ataei ni kabibiti tabeia ao rinea teuana te titiraki.

• Tibwauaia ma ataei tabeua koaua ibukin te burabeti n Te O Tetemanti are a tia n reiakinna n te ririki aei (n aron Noa, Mote, ke Itaia). Tuangiia bwa a na keetinna bwa antai te burabeti are ko kabwarabwara taekana. Kaokioka aei ibukiia burabeti ake tabeman.

Amota 5:4–15

Ngkana I ukora te raoiroi, te Uea e na memena irou.

E mwaiti aia tai ataei n rinerine imarenan ae eti ao ae kairua. Iangoia bwa ko na kanga ni kaungai nanoia n “ukora te raoiroi, tiaki te buakaka” (te kibu14).

Waaki ni Kakukurei aika a Kona ni Karaoaki

• Kaoia ataei bwa a na kakaea Amota 5:4–15, ni kakaea te taeka ae “ukora.” Tera ae e tangiria te Uea bwa ti na ukoria, ao tera te berita ae E karaoia nakoia naake a karaoia? Ti na kanga n ukora te Uea?

• Buokiia ataei bwa a na kamatenanoa te kabanea ni kibuntaeka man te ka tebwi ma teniua n taekan te onimaki. Ti kanga n “ukori bwaai aikai”?

Amota 8:11–12

Kaokan te euangkerio e katoka te rongo ni kaitanan te koaua.

Ataakin te bwai are e reireia Amota ibukin kitnana te koaua e kona ni buokiia ataei n namakina te kakaitau ibukin Kaokan te euangkerio.

Waaki ni Kakukurei aika a Kona ni Karaoaki

• Kaoia ataei bwa a na wareka Amota 8:11–12, ao maroroakinna tera ae na riki ngkana e tuai reke ana te Uea irouia aomata. Buokiia ataei ni kabwarabwara nanon te taeka ae kitanan te koaua ao te rongo, kabongana te Kairi nakon Koroboki aika tabu (scriptures.ChurchofJesusChrist.org) ke te rikitionari. E kanga kitanan te koaua n titebo ma te rongo?

• Ni buokiia ataei n oota n Kitanan te Koaua ae Moante Korakora, rinanoia ma ngaiia “Imwiin te Nu Tetemanti” (inanon Karaki man Te Nu Tetemanti, 167–70). Ngkanne maroroakin titiraki n aron aikai: Bukin tera ngkai iai Kitanan te koaua? Tera ae riki imwiin Kitanan te koaua? Bukin tera ngkai te Uea e kaoka Ana euangkerio? (tara naba“Kaokan Bwaninin ana Euangkerio Iesu Kristo: Te Katanoata n te Kauabubua n Ririki nakon te Aonaaba,” ChurchofJesusChrist.org). Kaungaia ataei bwa a na korei titiraki aikai ao kaekaaia ao tibwauai ma aia utu ni mweengaia.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na rinea te bwai teuana are a reiakinna n te bong aei are a tangiria ni kan tibwauaia. Kaungaia bwa a na baireia antai a na tibwauaia nakoia ao a na kanga n tibwauaia.

Kanakoraoan Ara Anga reirei

Karababai kakao ake a karinei inaomata n rinerine. Atong titiraki ake a na buokiia ataei n iangoi kawai aika a onoti ni maiuakin ake a reiakinaki iai. N aron te katoto, ko kona n titiraki, “Tera teuana te bwai ae ko namakinna bwa ko riai ni karaoia ae boboto iaon baike ti maroroakin n te bong aei?”

iteraniba ibukin waaki ni kakukurei: Burabeti bon ana tia uarongorongo Iesu Kristo.