Iona iaon te Bike i Ninewe, iroun DanielA. Lewis

Nobembwa 21–27

Iona; Mika

“E Kukurei n te Atataiaomata”

Ukeri reirei aika a kakawaki inanon Iona ao Mika are e na kakabwaiaia ataei ake ko reireiniia. Iangoi raoi kawai are ko na kona ni buokiia ataei n reiakin reirei aikai. Iango ake a koreaki n tekamataata aei e kona n ibuobuoki.

Korei Am Namakin

Kaunga te Tibwatibwa

Ni buokiia ataei n uringa karakinan Iona ke tabeua koaua ake a bae n tia n reiakin ni mweengaia, bootaki anenea n te kuna, n aron te kibu7 man “Follow the Prophet” (Aia Boki n Anene Ataei, 110–11).

Reirei te Reirei: Ataei aika a Uarereke

Iona 1:4–17; 3:3–5

E kakabwaiaai te Uea ngkana I ongeaaba Irouna.

Ngke te Uea e tuanga Iona bwa e na kabwarabwara nakoia kaain Ninewe, e aki ongeaaba Iona. Buokiia ataei bwa a na oota bwa ti kakabwaiaki ngkana ti ongeaaba iroun te Uea.

Waaki ni Kakukurei aika a Kona ni Karaoaki

• Kaota tamnein karakinan Iona, ao kaoiia ataei bwa a na kaota aia atatai n taekan te karaki (tara “Iona te Burabeti” n Karaki man Te O Tetemanti; te iteraniba ni waaki ni kakukurei n te wiiki aei, ke te kamataata n te wiiki aei n Nakomai, Iriirai—Ibukiia Aomata ao Utu). Tabeki titiraki n aron aikai: Tera ae riki ngke e aki ongeaaba Iona iroun te Uea? (tara Jonah 1:4–17). Tera ae riki ngke e ongeaaba? (tara Iona 3:3–5). Tibwa am kakoaua ae te Uea e na kakabwaiaira ngkana ti ongeaaba Irouna.

• Bootaki anenea te kuna n taekan te ongeaba iroun te Uea, n aron “Keep the Commandments” (Aia Boki n Anene Ataei,146). Maroroakinna bwa e na kanga ae e na kona n nangi n tamaroa ibukin Iona bwa e na ongeaaba n temoan tai. Buokiia ataei ni iangoi bwaai ake e tangiria te Atua bwa a na karaoi ao ngkanne katea kaina bwa a na kanga ni waekoa ni karaoi.

Tamara are i Karawa e tangiriia aomata ni kabane bwa a na ongora n te euangkerio.

Iona3

Te euangkerio bon ibukiia aomata ni kabane.

Kaain Ninewe a rairinanoia ngke Iona e tbwa ana rongorongo te Uea ma ngaiia. Tera tibwangaia ataei are e reke n tibwa te euangkerio?

Waaki ni Kakukurei aika a Kona ni Karaoaki

• Katea kain iteran Iona 3:3–8 ma ataei, n aron te nakonako nakon te kaawa ae Ninewe, tibwaan ana rongorongo te Uea, ao korean ana babaire te uea nakoia ana aomata. Kaota tamneia mitinare (tara Bokin Tamnein te Euangkerio, nambwa. 109, 110). Tera ae a karaoia mitinare? E kanga ana mwakuri ni mitinare Iona? Buokiia ataei bwa a na iangoi kawai ake a na kona iai n tibwa te euangkerio ma tabeman, n aron tibwaan taekan te onimaki ke kaotan aia kakoaua iroun Iesu Kristo.

• Taekina am taneiai ngke ko tibwa ana euangkerio Iesu Kristo. Ke, tabeua te bong imwaain te kiraati, kaoa temanna bwa e na kawara am kiraati ao e na tuangiia ataei taekan te tai are ngke e tibwa iai te euangkerio ke ngke temanna e tibwa te rongorongo nakoin teuanne ke neienne. Kaunga te aomata bwa e na kaoti tamnei, ngkana e kona. Buokia ataei ni iangoi kawai ake a kona iai n riki bwa mtinare ngkai.

Mika 5:2

Iesu e bungiaki i Betereem.

E taetae ni burabeti Mika bwa n taai aika a na roko “te tia tautaeka i Iteraera” e na bungiaki i Betereem. Ko kona ni buokiia ataei n ataia bwa bungiakin Iesu Kristo kakoroan nanon te taetae ni burabeti.

Waaki ni Kakukurei aika a Kona ni Karaoaki

• Kaota tamnein bwaai aika a riki ni katotobia bungiakin Iesu Kristo (tara Bokin Tamnein te Euangkerio, nambwa. 28, 29, 30, 31). Kaoiia ataei bwa a na tuangko tera ae e riki n taian tamnei. Wareka Mika 5:2, ao kaoiia ataei bwa a na teirake ngkana a ongo te taeka ae “Betereem.” Kakoaua bwa bungiakin Iesu e bon rangi ni kakawaki bwa a kamatan atai burabeti imwaain ae E bungiaki.

• Kaoiia ataei bwa a na korea tamnein bungiakin Iesu. Ngkai a kaoti aia tamnei, tuangiia bwa a na tibwa te bwai are a kakaitau iai ibukin Iesu Kristo.

Reirei te Reirei: Ataei aika a Ikawai Riki

Iona 1:10–12; 2:1–4,9; 3:1–5

Te Rairannano kanoana kinaan am bure ao te bubuti te kabwarabure.

Ana katooto Iona e kona ni kaungaia ataei n rairaki nakon te Uea ngke a tia ni karaoa te bure.

Waaki ni Kakukurei aika a Kona ni Karaoaki

• Buokiia ataei ni karinani bwaai ni korei iaon te burakibooti ibukin aan tabeua bwaai iaon te rairannano (tara Kairi nakon Koroboki aika Tabu, “Repent, Repentance,” scriptures.ChurchofJesusChrist.org). Bootaki rinanoa karakinan Iona, ao kaoiia ataei bwa a na kinai kakoaua bwa e a bon raira raoi nanona Iona (tara, n aron te katooto, Iona 1:10–12; 2:1–4,9; 3:1–5). Ti na kangaa ni kaotia nakon te Uea bwa e koaua ara rairannano?

• Bootaki n anenea te kuna ae reirei taekan te rairannano, n aron “Repentance” (Aia Boki n Anene Ataei,98). Titirakiniia ataei baikara taeka ke mwakoro n taeka man te kuna ae a kan tibwaia ma Iona ni buokia n rairananona.

Iona 2:7–10; 3:10; 4:2; Mika 7:18–19

Te Uea e nanoanga nakoia ni kabane ake a rairaki nakoina.

Ngke a ataia ataei ae te Uea e nanoanga ao n akoi, a rairaki nakoina ngkana a kainnanoa te nanoanga.

Waaki ni Kakukurei aika a Kona ni Karaoaki

• Kaoiia ataei bwa a na kakaea nanon te taeka ae nanoanga n te rikitionari ke inanon Kairi nakon Koroboki aika tabu (scriptures.ChurchofJesusChrist.org). Bukin tera ngkai Iona e kainnanoa te nanoanga? Bukin tera ngkai aomata mai Ninewe a kainnanoa te nanoanga? (tara Iona 1:1–3). Tuangiia ataei bwa a na iangoia aongkoa are a marooro ma Iona. Tera te kakoaua are e na kona n anga Iona ni kaota bwa e nanoanga te Uea? (tara, n aron te katooto, Iona 2:7–10; 3:10; 4:2). E kanga te Uea ni kaota te nanoanga nakoira?

• Tuangiia ataei bwa a na korei ni karinani bwaai iaon te burakibooti are a “kukurei” inanona, n aron kakibotu, kakabwaia mairoun te Uea, ao a mwaiti riki. Kaoiia bwa a na wareka Mika 7:18–19 ni kunea teuana te bwai are e kukurei iai te Uea. Tera koaua inanon kiibu aikai ae na buoka te aomata ae maaku n rairananona?

• Buokiia ataei n iangoi katooto ngke te Tia Kamaiu e kaota te nanoanga nakoia tabeman, n aron Mareko 2:3–12; Ruka 23:33–34; ao Ioane 8:1–11. Kaota tamnein bwaai aika a riki aikai, ngkana e kona. Buokiia ataei n iangoi taai are ngke a riai n nanoanga ao nakoia tabeman.

Mika 6:8

Te Uea e tangiria bwa N na karaoa ae eti, n tangira n nanoanga, ao nakonako n nanorinano ma Ngaia.

Mika 6:8 e karekea te banna ibukin maiuakinan te raoiroi. Ko na kanga ni buokiia ataei ni kunea ao ni maiuakin anga reirei inanon te kibu aei?

Waaki ni Kakukurei aika a Kona ni Karaoaki

• Bootaki wareka Mika 6:8, ao buokiia ataei ni mataata tera nanon mwakoro n taeka aikai: “karaoa ae eti,” “tangira te nanoanga,” ao “te nakonako n nanorinano ma Atuam.” Kaoiia ataei bwa a na korea tamneiia ngke a karaoa te bwai teuana ae irekereke ma mwakoro n taeka aikai.

• Korea iaon te burakibooti “Tera ae e kainnanoia te Uea mairou?” Kaoiia bwa a na kakaea te kaeka inanon Mika 6:8. E kanga te ongeaaba n ana tua te Uea e buokiira ni kakoroa nanon are e kantaningaia mairoura inanon te kibu aei?

Kaungaa te Kamatebwai n te Mweenga

Korea iaon te mwakoro ni beeba ibukin te ataei temanna ma temanna kiingin te mwakoro n taeka man teuana mai buakon koroboki aika tabu are ko maroroakinna ma kaain te kiraati. Kaoiia ataei bwa a na kataia ni kamatenanoa te mwakoro n taeka ao n titirakina kaain te utu n itbwa ana iango teuanne ke neienne ibukin anne.

Kanakoraoan Ara Anga reirei

Kanakoa am iango ao tarataraia am ataei. A kanga ataein am kiraati ni kaeka nakon waaki ni kakukurei ni kamatebwai? Ngkana a taraa n aki kua, tao manga te tai ni kataa te aekaki ni waaki ni kakukurei riki teuana. N te itera teuana, ngkana ko nooria bwa a kabaeaki ataei n te waaki ni kakukurei, tai namakina te raraoma ni waaki nako ibukina ngkai ko tuai bane n rinanoi reirei akana inanonte te boki n reirei.