“Nakonakona Ai Aron Ake Ngkoangkoa” (Abakuka 3:6). N te Moan ao Bon Iai te Taeka , iroun Eva Timothy

Nobembwa 28–Ritembwa4

Naum; Abakuka; Tebania

“Nakonakona Ai Aron Ake Ngkoangkoa”

Am tangira ibukin booki aika tabu e kona n iai ana kairoro ae korakora iaoia ataei aika ko reireiniia. Kariaia bwa ana nora aron am kakaitau ibukin ana taeka te Atua.

Korei Am Namakin

Kaunga te Tibwatibwa

Kaoia ataei bwa a na ikaruoruo n tei ao n riki bwa angkoa te burabeti n te O Tetemanti n tei “iaon te nne n tantani” n aron Abakuka (Abakuka 2:1). Tuangiia bwa ana tuangiia ataei ake tabeman te bwai ae a reiakinna iroun Iesu Kristo ao Ana euangkerio.

Reirei te Reirei: Ataei aika a Uarereke

Abakuka 2:3

E na kakoroa nanon Ana berita te Atua n tainako.

Te Burabeti Abakuka e reke n te kangaanga n te bwai ae buakaka are e noria irouia ana aomata Iuta (taraa Abakuka 1:2–4). E kakoaua te Uea nakoina bwa a na bane ni koro bukin Ana berita n Ana tai (taraa Abakuka 2:3).

Waaki ni Kakukurei aika a Kona ni Karaoaki

• Tibwauai tabeua katooto ni bwaai aika raraoi ma ti imwiin ae ti tataninga—n aron te uanikai ae kainnanoia bwa e na tawaa ke kariki ae kainnanoa kukanakiia. Tera te bwai ae na riki ngkana ti kataia ni kana te uanikai ke te kariki imwain ae e tauraoi? Taekina rongorongon te burabeti Abakuka, ae tangiria n ataia bwa n ningai ae na katoki buakaka te Uea aika e noori. Warekia nakoia ataei ana kaeka te Uea, ae kuneaki inanon Abakuka 2:3. Kamatataa ae Abakuka e kainnanoia n tataninga ibukin ana berita te Uea bwa e na kakoroaki bukina, n aron ae ti kainnanoia n tabetai ni karaoia. Tibwaua te tai ngke ko na riai n tataninga ibukin te kakabwaia.

• Buokiia ataei n iangoi bwaai aika e a tia te Uea ni berita ibukiia—n aron te katooto, Iesu Kristo e na oki nakon te aonaaba ke are ti kona ni manga maeka ma te Atua. Ma katooto n tatabeua nako, kaoa te ataei bwa e na kaokioka te mwakoro n taeka “Tataninga naba, ba e na bon tai roko.”

Abakuka 2:14

I kona n ibuobuoki n reireiniia tabeman taekan Iesu Kristo.

Abakuka e taetae ni burabetiia te bong are e na ataaki iai Iesu Kristo n te aonaaba. Te taetae ni burabeti anne e moanna ni korobukina n ara bong. Iangoia bwa ko na kanga ni buokiia ataei n tiki bwa mwakoron koron bukin te tai anne.

Waaki ni Kakukurei aika a Kona ni Karaoaki

• Kaota n nen te mooi ae akea kanoana, ao anganiia ataei n tatabemaniia te bwai ae uarereke. Tuangiia ataei n tatabemaniia nako bwa a na tibwaua te bwai ae karaoia Iesu ke n reirei ao ngkanne ti katikui aia bwai inanon nen te mooi. Wareka ni kabaibaiti Abakuka 2:14, ao kabwarabwara bwa n aroia ataei ngke a kanoa n nen te mooi ma aia atatai iroun te Uea, ti kona naba ni kanoa te aonaaba ma atatai Ibukina.

• Kaotia nakoia ataei mwaben te aonaaba (taraa Church History Maps, nambwa.7, “Mwaben te Aonaaba”). Buokiia ni kakaea te tabo are a maeka iai ao aia tabo mitinare ake a ataia ae a tia ni beku iai. Kaota am koaua bwa Tamara are i Karawa e tangiriia aomata ni kabane ni kabuta te aonaaba bwa ana ataa taekan Iesu Kristo. Ti na kanga ni buokia n reireiniia aomata riki tabeman taekan Iesu? Tuangiia ataei taekan bwaai aika ko a tia n noori ni karaoa te bwai ae reireiniko n taekan Iesu Kristo. Buokiia n iangoi bwai aika a kona ni karaoi.

• Bootaki n annenea te anene iaon tibwauaan te euangkerio, n aron “I Want to Be a Missionary Now” (Aia Bokin Anene Ataei,168). Tera ae ti kona n tuangiia tabeman n taekan Iesu Kristo? Ibukin iango riki tabeua, taraa Taekan te Onimaki.

Tebania 2:3

“Ukoukora te Uea.”

E reirei Tebania bwa ti riai n ukoukora te Uea n taai aika e korakora iai te buakaka, n aron aika riki ni boong aika kaitira. Iangoia bwa ko na kanga ni kaungaia ataei bwa ana Ukoukoria.

Waaki ni Kakukurei aika a Kona ni Karaoaki

• Kaota tamnein Iesu, ao warekia nakoia ataei Tebania 2:3. Kaoia bwa ana kamwangkongkoi baia ni katobibia i mataia n aron kiraati n taratara ao n taraa te tamnei n tainako ngkana ko wareka te taeka “ukeuke.” Kabwarabwara bwa te burabeti Tebania e tangiriia aomata bwa ana ukoukora te Uea. Ti na kanga n ukoukora te Uea? Ia ae ti kona ni Kuneai iai?

• Kabongana te iteraniba ni waaki n te wiiki aei, ke iangoa te takakaro riki teuana ae na kaungaia ataei n ukoukora te Uea. Katangnga ke bootaki n anenea te anene ae irekereke ma atuun te reirei aei, n aron “Seek the Lord Early” (Aia Boki n Anene Ataei,108). Maroroakina te bwai ae reiakinaki n te anene n arora ni kona ni kunea Iesu Kristo ni maiura.

Reirei te Reirei: Ataei aika a Ikawai Riki

Naum 1:7

“E raoiroi te Uea, bon te tabo ni kamaiu ae korakora n te bong ae e kai te nano iai .”

Ngaira n tatabemaniira ti kaitarai oin ara “bong ni kangaanga.” Ko na kanga ni buokiia ataei bwa ana rairaki nakon te Uea, “onimakinna,” ao kakaea te kamanoaki n te tamnei n aia bong ni kangaanga?

Waaki ni Kakukurei aika a Kona ni Karaoaki

• Kaotia nakoia ataei tamnein te tabo ni kamaiu ae korakora ke te tabo ni kamanomano. Bukin tera ibukina tabeman aomata a kainnanoa te tabo ni kamanomano? Kaoia ataei bwa ana wareka Naum 1:7 ni kakaea te bwai ae taekinna te burabeti Naum ti tebo ma te tabo ni kamaiu ae korakora ke te tabo ni katantan ibukira. Tera ae na kona te Tia Kamaiu ni kamanoira mai iai?

• Kaoia ataei bwa e na korea tamneia ao aia utu inanon te tabo ni kamaiu ae korakora ke te tabo ni katantan. Kaungaia bwa ana koroi taeka itinanikun te tabo ni kamaiu ae korakora are e kabwarabwarai tabeua kairoro aika buakaka n te aonaaba. Kaoia bwa a na koroi taeka inanon te tabo ni kamaiu ae korakora are e kabwarabwara Iesu Kristo. Tera ae E tuangiira bwa ti na karaoia bwa ti aonga ni karekea Korakorana ao ana kamanomano? (taraa Reirei ao Berita aika Tabu 35:24).

  

  “E raoiroi te Uea, bon te tabo ni kamaiu ae korakora n te bong ae e kai te nano iai ” (Naum 1:7).

Abakuka 3:17–19

I kona ni karekea te kimwareirei iroun Iesu Kristo, e ngae ngke aki nakoraoi bwaai.

E kabwarabwarai tabeua kataaki Abakuka aika a kona n riki nakoia ana aomata, n raonaki ma kaai ke kurebe aika aki kariki uaa. E taku bwa e ngae ngke a riki bwaai aikai, “n na boni kimareirei naba iroun Iehova.”

Waaki ni Kakukurei aika a Kona ni Karaoaki

• Kaoia ataei bwa ana wareka Abakuka 3:17 ao kinai kataaki aika kabwarabwaraaki inanon te kibu aei. E na kanga a na namakin te aomata ngkana a riki bwaai aikai? Buokiia ataei bwa ana iangoi kataaki aika a kona n riki nakoia. Ngkanne bootaki ni wareki kiibu 18–19 n reirei bwa e kanga n taekina a na namakin Abakuka e ngae ngke a riki bwaai aikai nakoina.

• Buokiia ataei ni kakaai katooto riki tabeua irouia aomata inanon koroboki aika tabu aika a kimwareirei iroun te Uea e ngae ngke n taai ni kangaanga. A kona ni kunei katooto inanon Mwakuri 16:19–25; Motiaea 24:10–15; ao ana rongorongo Beretitenti DieterF. Uchtdorf “Grateful in Any Circumstances” (Liahona, Meei 2014, 70–77), riki iaon te mwakoro “Being Grateful in Our Circumstances.” Bukin tera aomata aikai a kona ni kimwareirei n taai ni kangaanga? Ti na kangaa n irii aia katooto?

Tebania 3:14–20

Naake a ira Iesu Kristo a karekea te rau ao te kimwareirei.

Tebania 3:14–20 e kabwarabwara te bong ae rangi ni kakukurei ngke Iesu Kristo, “uean Iteraera,” E na uea ibuakoia Ana aomata ao ni “kimwareirei ma [ngaira] n te anene” (kiibu 15,17).

Waaki ni Kakukurei aika a Kona ni Karaoaki

• Botaki ni wareka Tebania 3:14. Imwiina kaoia ataei n tatabemaniia bwa ana rinea teuana te kibu inanon Tebania 3:15–20 ao kamatebwaia, ni kakaea te bwai ae kona ni buokiira “bwa a na kimwareirei ao ni kakatonga.” Tuangiia bwa a na tibwaua te bwai ae a kunea.

• Buokiia ataei ni kakaei anene ke aia anene ataei ae na buokiia “ni kimwareirei ao ni kakatonga n te nano ni kabanea” (Tebania 3:14). Botaki n anenei tabeua anene, ao kaungaia ataei bwa a na taekina taekan te kimwareirei ae a kunea n a na euangkerio Iesu Kristo.

Kaungaa te Kamatebwai n te Mweenga

Tuangiia ataei bwa a na korei kiibu nakon koroboki aika tabu aika a tangiri n tibwauai ma aia utu (ke koroi ibukiia).

Kanakoraoan Ara Anga reirei

Buokiia ataei bwa a na kinaa te Tamnei. Kataia n tarai mwaingiing ngkana ataei a namakina a na kairoro te Tamnei. Ngkana e riki aei, buokiia n ataia bwa namakin aikai a roko mairoun te Tamnei ae Raoiroi.