“Ritembwa 19–25. Te Kiritimati: ‘Ti Kantaningaia, ao E na Kamaiuira,’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Ritembwa 19–25. Kiritimati,” Nakomai, Iriirai—Ibukin te Moanrinan: 2022
Bwa Ibukira e Bungiaki te Merimeri, iroun Simon Dewey
Ritembwa 19–25
Kiritimati
“Ti Kantaningaia, ao E na Kamaiuira”
Burabeti n Te O Tetemanti a kantaninga ma te kimwareirei ae moan te korakora nakon bungiakin te Meetia (tara Itaia 25:9). Ngkai ko katauraoi n anga reirei n tain te Kiritimati, iangoia ko na kanga ni buokiia ataei ni kunea te kimwareirei ni bungiakin te Tia Kamaiu Iesu Kristo.
Korei Am Namakin
Kaunga te Tibwatibwa
Kaoiia ataei bwa a na tibwaua te bwai ae a ataia ibukin bungiakin Iesu Kristo. Ngkai a atonga aran te aomata ke te bwai man te karaki, kaoiia bwa a na korea tamneina iaon te burakibooti. Titirakiniia ataei bwa tera ae a tangira iai taekan te karaki aei.
Reirei te Reirei: Ataei aika a Uarereke
Te O Tetemanti e reireinai taekan Iesu.
Buokiia ataei bwa a na katurui aia iango iaon te Tia Kamaiu ngkai ngaia bukin ae ti buakamarua iai te Kiritimati. Ko kona ni karaoa aei man bonganaakin koroboki aika tabu man Te O Tetemanti are a kakoaua ibukina.
Waaki ni Kakukurei aika a Kona ni Karaoaki
-
Kaota tamnei te bungiaki (n aron Bokin Tamnein te Euangkerio, nambwa.30, ke teuana te tamnei inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu). Wareka Itaia 9:6, angan ana tai te ataei temanna ma temanna ni kotea Iesu ngkana a ongo te mwakoro n taeka “e bungiaki te teei ibukira.” Tibwaua am koaua bwa burabeti n Te O Tetemanti a ataa bungiakin Iesu.
-
Kaoa te ataei temanna ma temanna bwa e na atonga arana teuanne ke neienne, ao ni katereterea bwa n raonaki ma arara, ti kona n aranaki ni bwaai tabeua, n aron te tari te aine ke te tari te mwaane ke te rao. Kaoiia ataei bwa a na iangoi tabeua katooto. Wareka Itaia 9:6 nakoia ataei, katuruturui aara ake a kaineti nakon Iesu Kristo: “Kamimi, TeTia Reirei, Te Atua ae Mwaaka, Te Tama ae akea Tokina, Te Uea n Raoi.” Buokiia ataei ni kamataataia tera ae a tuangiira aara aikai n taekan Iesu.
-
Angan te ataei temanna ma temanna ana beeba ae te itoi, ao kaoiia ataei bwa a tabeki ieta aia itoi ngkana ko wareka te mwakoro n taeka man Warekaia Iteraera 24:17: “ane e na oti nako te Itoi teuana i buakoia Iakobwa.” Kaoiia ataei bwa a na tibwauaia bwa e kanga aron Iesu n riki kanga ai aron te itoi ae raneanea are e ota nako nako aonaaba ni kabane. Bootaki anenea te kuna ae taekan te itoi are e kaoti ngke e buaki Iesu, n aron “Stars Were Gleaming” (Aia Boi n Anene Ataei,37) ke “The First Noel” (Anene n taromauri, nambwa.213).
Iesu Kristo bon au Tia Kamaiu.
Te Kiritimati bon te tai ni bukamaru tiaki n tii ni bungiakin Iesu ma Maiuna naba ao ana mition bwa te Tia Kamaiu ibukin te aonaaba. Ko na kanga ni buokiia ataei n namakina te kimwareirei ao te kakatonga ibukin ana Mwakuri ni Kamaiu Iesu Kristo?
Waaki ni Kakukurei aika a Kona ni Karaoaki
-
Tuangiia ataei bwa a na iangoa te bwai teuana ae a kakantaninga nako iai. Kabwarabwara bwa aomata ake a kakaonimaki n Te O Tetemanti a kakantaninga bungiakin Iesu Kristo. Wareka Itaia 25:9 nakoia ataei, ao anganiia bwa a na kaokioka te mwakoro n taeka “Ti Kantaningaia, ti na kukurei ma ni kimwareirei n ana kamaiu.” Tibwauaia mangaiia bukin tera ngkai ko kukurei ao ni kimwareirei ngkai e a bungiaki Kristo. Kaoiia ataei bwa a na tibwauai aia namakin n taekan te Tia Kamaiu.
-
Bootaki anenea te kuna ae taekan bungiakin Iesu, n aron “Away in a Manger” (Aia Boki n Anene Ataei, 42–43) ke “Hark! The Herald Angels Sing” (Anene n taromauri, nambwa 209). Buokiia ataei bwa a na kakaei mwakoron taeka ni kuuna aikai are e reireiniira taekan ara Tia Kamaiu ao kakabwai ake ti karekei mairouna.
Reirei te Reirei: Ataei aika a Ikawai Riki
Te O Tetemanti e reireina taekan Iesu Kristo, te Meetia ae beritanaki.
Te O Tetemanti e riaon riki ae tii ikoikota ni karaki ao koroboki aika a kakaongora, oin te kantaninga iai, n aron koroboki aika tabu ni kabane, bon kakoauan Iesu Kristo. Buokiia ataei n ataia bwa a na kanga ni kakaea n Te O Tetemanti.
Waaki ni Kakukurei aika a Kona ni Karaoaki
-
Kaoiia ataei bwa a na karinani ni korei aara ao mwiokoan Iesu Kristo are a kona ni kunea ni Mote 7:53; Taian Areru 23:1; Iobi 19:25; Itaia 7:14; 9:6; 12:2; Amota 4:13; ao Tekaria 14:16. Kariaia bwa a na ikatotoa ni mwakuri ngkana a tangiria. Kaoiia bwa a na tibwauai baike a karinani ni korei i bon irouia. Tera ae ti reiakinna n rongorongon te Tia Kamaiu man aara ao mwioko aikai?
-
Kaota nakoia ataei tabeua bwai ni katamroa ibukin te Kiritimati (ke tamnein tabeua), n aron te itoi, te ota, ke te bwaintangira. Tuangiia ataei bwa a kanga bwaai aikai n tatabeua ni kona ni kauringiia ibukin te Tia Kamaiu. Kabwarabwara bwa koroboki aika tabu n taainako a kabonganai kanikina n reireiniira taekan Iesu Kristo. Kaoiia ataei bwa a na tara teuana ke ae mwaiti riki man kiibu akana imwiina n te bwai are e na kona n tei ibukin Iesu Kristo: Karikani Bwaai 22:8; Te Otinako 17:6; Taian Areru 18:2; 27:1 (tara te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu ibukin rakan katooto riki tabeua). E kanga Iesu n riki kanga te tiibu te tei, te ran, te atiibu, te nono, ke te ota?
-
N banen kamatebwaian Te O Tetemanti n te ririki aei, kaoiia ataei bwa a na tibwauai aia karaki aika mamatennaoia ke koroboki aika tabu man Te O Tetemanti. Tera ae a reireiniira karaki ao koroboki aika tabu aikai ibukin taekan Iesu Kristo? Bukin tera ti kakaitau n reken koroboki aika tabu?
Iesu Kristo bon au Tia Kamaiu ao Te Tia Kabooi Maiura.
Ngkai ti bukamarua bungiakin Iesu Kristo, ti kona ni kimwareirei naba ni Maiuna ao ana karea ni kamaiu. Ko na kanga ni kabonganai koroboki aika tabu man Te O Tetemanti ni buokiia ataei ni katea aia onimaki iroun te Tia Kamaiu ao te Tia Kabooi Maiura?
Waaki ni Kakukurei aika a Kona ni Karaoaki
-
Bootaki wareka Itaia 7:14; ngkanne kaoiia ataei n tibwaua aia atatai n taekan bungiakin Kristo. Ke kaota te witeo “Te Bungiaki” (ChurchofJesusChrist.org), ao kaoa te ataei temanna ma temanna bwa e na rinea te aomata man te witeo ao n tibwaua aron ana namakin te aomata anne. Tibwaua am koaua n taekan te Tia Kamaiu, ao kaoiia ataei bwa a na karaoa naba anne.
-
Ni buokiia ataei bwa a rangi ni mataata raoi n taben Iesu Kristo bwa ara Tia Kamaiu,kaoiia bwa a na wareka Itaia 25:8–9; 53:3–5; ao Otea 13:14. Tera ae a reireiniira koroboki aika tabu aikai aron te Uea ni kamaiuira? Ti kanga ni “kinwareirei n ana kamaiu”? (Itaia 25:9).
-
Bootaki anenea taekan ana tangira Iesu Kristo ibukira, n aron “Away in a Manger” (Aia Boki n Anene Ataei, 42–43) or “I Mim n Ana Tangira” (Anene n taromauri, nambwa.193). Kaoiia ataei bwa a na tibwauai mwakoro n taeka are a buokiia n namakina ana tangira te Tia Kamaiu.
Kaungaa te Kamatebwai n te Mweenga
Kaoia ataei bwa ana tibwauaia ma aia utu bwaai ke ma raoraoia te bwai are reiakinna n taekan Iesu Kristo man Te O Tetemanti. Kaungaia bwa a na moana kamatebwaian Te Nu Tetemanti n te wiiki aei.
Kanakoraoan Ara Anga reirei
Karaoa te otabwanin are e kaoa te Tamnei. A mwaiti kawai aika ko kona ni kaoa iai te Tamnei nakon am kiraati. Te katangitang e kona ni kaunga ni karinea Tamam are i Karawa. Kaotakin te tangira ao te kakoaua e kona ni karekea te tangira, te tabo ae iai te tamnei iai. Tataromwaaka n iangoia bwa tera ae ko kona n karaoia ni karika am kiraati bwa te tabo ae iai te tamnei iai. (Tara Reirei n ana Kawai te Tia Kamaiu,15.)