ļeo im lieo pālele ilo peļaakin tampeļ eo

Nobōm̧ba 7–13

Hoseia 1–6; 10–14; Joel

“Inaaj Yokwe Er ilo Jouj”

Ilo am̧ ekkatak jen jeje ko rekwojarjar im keppopo n̄an katakin, pukot im̧we jān Jetōb Kwojarjar. Ta eo kwoj bōk im̧we n̄an mije ilo kūlaaj wiik in?

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kwaļo̧k juon pijain Rilo̧mo̧o̧r eo, im kajjitōk ippān ajri ro n̄an kwaļo̧k juon men rejeļā kake ak kar ekkatak kōn E wiik in. Kōtļo̧k bwe ren bōk kuņaer kotak pija eo ilo aer kwaļo̧ke.

pija ej bōk jikin katakin

Katakin Katak eo: Ajri ro Reddikļo̧k

Hoseia 10:12

Imaron̄ pukot Irooj.

Hoseia 10:12 kōjerbal pija in ekkat, m̧adm̧ōd, iien, im wōt im kajjitōk ippād bwe jen pukot Irooj. Ilo am̧ riiti eoon in, ta ļōmņak in jerbal ko rej itok n̄an ļōmņak me emaron̄ kar im̧we ajri ro n̄an pukot E?

M̧akūtkūt ko Maron̄ Kōm̧m̧ani

• Riiti Hoseia 10:12 n̄an ajri ro, im kajjitōk ippāer n̄an kōm̧m̧ani m̧akūtkūt ko repidodo n̄an jipan̄ er meļeļe eoon in, āinwōt katōn n̄e rej katōk ine ko, ebbōk leen wōjke ko jān jikin kallib eo, ak jutak ilo an wōt. Ak kwaļo̧k pija in ine ko, kein ekkat ko, im wōt. Jipan̄ ajri ro keidi kein ekkat in juon ine im m̧adm̧ōde em̧m̧an ko rem̧m̧an n̄an mour jim̧we im bōk kōjeraam̧m̧an ko an Irooj. Kam̧ool kōn kōjeraam̧m̧an ko an Irooj rekar lutōkleplep ioom̧ ilo am̧ kajjieon̄ in pukot E.

• Jin̄aik juon clock ioon boot eo, im kajjitōk ippān ajri ro n̄an kwaļo̧k wāween ko jemaron̄ pukot Irooj ilo iien ko reoktak ilo raan eo. Kajjitōk ippān ajri ro n̄an āliji ippam̧ naan kein “Ej iien pukot Irooj” (Hoseia 10:12). Jipan̄ er meļeļe bwe ej aolep iien n̄an pukot Irooj. Kwaļo̧k ta eo kwoj keememej E aolep iien.

Jisōs ej jijōt ippān ajri ro

Jisōs Kraist ej ad Rilo̧mo̧o̧r im ad Ripinmuur.

Hoseia 13:4,14

Jisōs Kraist ej aō Rilo̧mo̧o̧r.

Ilo am̧ kwaļo̧k kōn Rilo̧mo̧o̧r im Pinmuur eo An, kwaļo̧k naan in kam̧ool kōn iakwe eo An n̄an kajjojo ajri ro nejin.

M̧akūtkūt ko Maron̄ Kōm̧m̧ani

• Kwaļo̧k pija in jet armej, ekoba Jisōs, im kajjitōk ippān ajri ro n̄an lale ewi iaan armej rein ej ad Rilo̧mo̧o̧r. Riiti Hosia 13:4, im kōmeļeļeiki bwe ejjeļo̧k bar Rilo̧mo̧o̧r ijelo̧kin Jisōs Kraist. Kam̧ool bwe kōn Pinmuur eo Jisōs Kraist, jemaron̄ bar jepļaak im mour ippān Jemedwōj Ilan̄.

• Kōtļo̧k bwe ajri ro ren bōk koņaer jibwe pija in Jisōs ilo dōbwāāl eo ak ilo lōb eo im juon pijain Jisōs iņam̧ōjin lōb eo. Kajjitōk ippān ajri ro n̄an kōnono kake ta eo pija in ej kwaļo̧ke. Riit jān Hoseia 13:14 naan eo “Inaaj wiaik er jān kajoor an lōb; Inaaj lo̧mo̧o̧ren er jān mej.” Kam̧ool bwe Jisōs Kraist ekar lo̧mo̧o̧ren kōj jān mej im bwe jemaron̄ bar jerkakpeje. Al juon al ippān doon kōn Jerkakpeje, āinwōt “Did Jesus Really Live Again?” (Children’s Songbook,64). Jipan̄ ajri ro kile im̧we eo an Jetōb ilo aer al.

Joel 2:28

Jetōb Kwojarjar eo emaron̄ tōl eō.

Ilo am̧ riit kōn kanaan eo an Joel ilo Joel 2:28, ļōmņake elmen am̧ maron̄ jipan̄ ajri ro pojak n̄an bōk menin letok eo an Jetōb Kwojarjar ālkin aer peptaij.

M̧akūtkūt ko Maron̄ Kōm̧m̧ani

• Riit Joel 2:28 n̄an ajri ro, im kōmeļeļeiki bwe naan ko “aolep kanniōk” meļeļein aolep, ekoba “m̧aan ro” im “kōrā ro” āinwōt er. Kajjitōk ippān ajri ro n̄an jin̄aik pijain armej ro rej kōnono kake ilo eoon in (ļaddik ro im jiron̄, m̧aan ro reddik im rūtto, kōrā ro reddik im rūtto) ekoba er make. Kōmeļeļeik bwe juon wāween Jemedwōj Ilan̄ ej lutōkleplep An Jetōb ej ilo an letok n̄an kōj menin letok eo an Jetōb Kwojarjar n̄e jej peptaij.

• Kajjitōk ippān ajri ro n̄an kwaļo̧k ta eo rejeļā kōn Jetōb Kwojarjar. Jipan̄ er meļeļe bwe Jetōb Kwojarjar emaron̄ katakin kōj kōn Jemedwōj Ilan̄ im Jisōs Kraist im emaron̄ jipan̄ kōj jeļā ta eo em̧ool (lale Jon 14:26; Katak im Bujen Ko 42:17). Kwaļo̧k en̄jake ko n̄an jipan̄ ajri ro meļeļe wāween ko me Jetōb emaron̄ jipan̄ kōj.

pija ej bōk jikin katakin

Katakin Katak eo: Ajri ro Rerūttoļo̧k

Hoseia 2:19–20

Imaron̄ tiljek ilo aō kōjparok bujen ko aō.

Ilo bok in Hoseia, Irooj eaar keidi bujen ko An ippān riIsrael ro n̄an juon m̧are. Kōjekdo̧o̧n jab tōmak eo an riIsrael ro, E ekar wōt iakwe er im kar kōņaan bwe ren jepļaak. Jen keidi in emaron̄ jipan̄ eok katakin ajri ro kōn aorōk eo an kōjparok bujen ko ad ippān Irooj.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro bwe ilo bok in Hoseia, Irooj eaar keidi bujen ko An ippān Israel n̄an juon m̧are. Kwaļo̧k n̄an ajri ro juon pijain ļeo im lieo pālele. Elmen an Jemedwōj Ilan̄ kōņaan bwe ļeo im lieo pālele ren kōm̧m̧ann n̄an doon? Elmen ad maron̄ kwaļo̧k n̄an Irooj ke jej iakwe E im jenaaj tiljek n̄an E?

• Jipan̄ ajri ro meļeļe bwe bujen ko jej kōm̧m̧ani ippān Irooj rej meļeļein n̄an indeeo. Kajjitōk ippān juon iaan ajri ro n̄an riiti Hoseia 2:19–20, pukot naan ko me ej kōmeļeļeik elmen an Irooj en̄jake kōn bujen ko An ippād. Ta eo jej bujen n̄an kōm̧m̧ane ke jaar peptaij? Elmen ad maron̄ kōjparok bujen in jaar kōm̧m̧ane ippān Irooj?

Hoseia 13:4,14

Jisōs Kraist ej aō Rilo̧mo̧o̧r im Ripinmuur.

Elmen am̧ maron̄ kōjerbal naan ko an Hoseia n̄an kōkajoorļo̧k naan in kam̧ool ko an ajri ro kōn aer Rilo̧mo̧o̧r im Ripinmuur? Ilo am̧ katakin, jipan̄ ajri ro en̄jake lan̄lōn̄ im iakwe in Pinmuur eo an Jisōs Kraist.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Hoseia 13:4,14, pukot naan ak eoon ko rej kōmeļeļe kōn Jisōs Kraist. Ta eo eoon kein rej katakin kōj kōn E? Kajjitōk ippān ajri ro n̄an kōjerbal Topical Guide ak Unin Tōl n̄an Jeje ko Rekwojarjar n̄an kappukote im kwaļo̧k eoon ko jet me rej kwaļo̧k kōn Jisōs Kraist āinwōt Rilo̧mo̧o̧r im Ripinmuur. Kwaļo̧k naan in kam̧ool eo am̧ kōn Rilo̧mo̧o̧r eo, im leļo̧k iien em̧m̧an bwe ajri ro ren kōm̧m̧an āinwōt.

• N̄an jipan̄ ajri ro meļeļe elmen an Rilo̧mo̧o̧r wiaki ak lo̧mo̧o̧ren kōj jān mej, kwaļo̧k video eo “Handel’s Messiah: Debtor’s Prison” (ChurchofJesusChrist.org). Ta eo jaar ekkatak jān video in me ejipan̄ kōj meļeļe ta eo Rilo̧mo̧o̧r ekar kōm̧m̧ane n̄an kōj?

Joel 2:28–29

Jetōb Kwojarjar eo emaron̄ tōl eō.

Elōn̄ iaan ajri ro kwoj katakin ekar m̧ōj aer peptaij im kar bōk menin letok eo an Jetōb Kwojarjar. Elmen am̧ maron̄ kōjerbal eoon kein n̄an jipan̄ er meļeļe kajoor im kōjeraam̧m̧an ko me rej itok jān ron̄jake ainikien Jetōb?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riit ippān doon Joel 2:28–29, likūt etaāer kajjojo ilo jikin naan eo “m̧aan ro nejimi” im “kōrā ro nejimi.” Je ioon bo̧o̧t eo juon jentōj āinwōt in Jetōb Kwojarjar emaron̄… im kajjitōk ippān ajri ro n̄an bōk kuņaer kadedeļo̧k jentōj eo. Rōjan̄ er n̄an kobaiki men ko raar ekkatak jān Jon 14:16; Moronai 10:5; Katak im Bujen Ko 42:17, im eoon ko jet.

• Likūt juon kein ekkatak ilowaan juon booļ, im kōtļo̧k an ajri ro bōk kuņaer ten̄i kōn dān. Kōmeļeļeiki bwe kein ekkatak eo ej pinej jenkwan kōj, im dān eo ej pinej jenkwan Jetōb Kwojarjar. N̄e jej peptaij, jej bōk menin letok eo an Jetōb Kwojarjar, eo ej juon wāween n̄an kakūrm̧ool kallim̧ur eo an Irooj n̄an “lutōk [An] jetōb.” Ta eo jej aikuj kōm̧m̧ane bwe jen bōk Jetōb Kwojarjar? Kajjitōk ippān ajri ro n̄an kwaļo̧k iien eo raar en̄jake im̧we eo an Jetōb.

pija ej bōk jikin ekkatak

Kōketak Ekkatak ilo M̧weo

Jipan̄ ajri ro kalikkar men ko raar ekkatak kōn Jemedwōj Ilan̄, Jisōs Kraist, ak Jetōb Kwojarjar rainin ilo kūlaaj. Rōjan̄ er n̄an kwaļo̧k menin n̄an baam̧le ko aer.

Kōkōm̧anm̧anļo̧k Ad Katakin

Pukōt revelesōn aolep raan. Ilo am̧ kōppopo n̄an katakin, jar im lūn̄ūri jeje ko rekwojarjar aolep wiik eo. Ļōmņak ko im im̧we ko kōn wāween n̄an katakin emaron̄ itok n̄an eok jabdewōt iien im jabdewōt jikin. (Lale Teaching in the Savior’s Way, 12.)

peij in m̧akūtkūt: Jetōb Kwojarjar emaron̄ tōl eō.