mejen Jisōs merame jen kāāntōļ ilo ruum eo emarok

Bread in Mour, jān Chris Young

Nobōm̧ba 14–20

Amos; Obedaia

“Pukot Jeova, im Kom̧naaj Mour”

Ilo am̧ mije katakin katak eo em̧ool ilo wāween ko repidodo, komaron̄ leļo̧k iien ko rem̧m̧an n̄an Jetōb Kwojarjar n̄an kam̧ool n̄an ajri ro. Kōjerbal m̧akūtkūt ko ilo laajrak in—ak ejaake am̧ make—n̄an jipan̄ eok katakin pedped in gospel eo ilo wāween ko repidodo.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k men ko raar ekkatak m̧oktaļo̧k ilo m̧weeo ak ilo m̧ōnjar eo. N̄an waanjon̄ak, kajjitōk n̄e raar lo jabdewōt eoon ko rekāāl em̧m̧an ippāer ak kar ron̄ juon ennaan me remaron̄ kwaļo̧ke ippān kūlaaj eo.

pija ej bōk jikin katakin

Katakin Katak eo: Ajri ro Reddikļo̧k

Amos 3:7; 7:14–15

Rikanaan ro rej rikōņņaan kōn Jisōs Kraist.

Juon iaan men ko raorōk me ajri ro remaron̄ jeļā kōn rikanaan ro ej bwe rej rikōņņaan kōn Jisōs Kraist. Lōmņak kein ilaļ emaron̄ jipan̄ eok katakin er m̧ool in eaorōk.

M̧akūtkūt ko Maron̄ Kōm̧m̧ani

• Unoojdikdik n̄an juon iaan ajri kōn juon enaan n̄an aolepen kūlaaj eo (āinwōt kajjitōk ippān ajri ro n̄an jutak kōn juon ne ak oktakļo̧k ilo juon doulul), im kajjitōk ippān n̄an kwaļo̧k ennaan eo n̄an ajri ro jet. Ālijji m̧akūtkūt in, kōtļo̧k an jejjo̧ ajri erom̧ rikōņņaan ro. Jipan̄ er meļeļe elmen an rikōņņaan in ilo m̧akūtkūt in āinwōt juon rikanaan, eo ej kwaļo̧k naan in Anij n̄an kōj. Kwaļo̧k jejjo̧ waanjon̄ak in ennaan ko m̧oktaļo̧k jān rikanaan eo emour me ekar jipan̄ eok epaakļo̧k Jisōs Kraist.

• Kajjitōk ippān juon ajri bwe en jutak im̧aan in ruum̧ eo im anto̧o̧ne an rikanaan Amos. Ilo am̧ kwaļo̧k jet m̧ool ko kōn Amos jān Amos 7:14–15, leļo̧k n̄an juon ajri pija ko ak kein kappen me ej etal ippānļo̧k kajjojo m̧ool, āinwōt pijain juon jiip, juon leen wōjke, im Irooj. Kōmeļeļeik bwe Amos ekar juon seperd me Irooj ekar kūr e bwe en An rikōņņaan. Innām kwaļo̧k pijain Irooj im rikanaan eo emour, im kōmeļeļeiki bwe Irooj ej wōnm̧aanļo̧k wōt im kūr rikōņņaan ro rainin. Riit Amos 3:7 eļaaj, im kajjitōk ippān ajri ro n̄an jitōn̄ļo̧k pija eo ekkar n̄e rej ron̄ naan ko “Jeova” im “rikanaan ro.” Kwaļo̧k naan in kam̧ool eo am̧ bwe āinwōt ilo raan ko an Amos, Jisōs Kraist ej kōnono n̄an kōj jen rikanaan ro An.

• Kwaļo̧k juon bwebwenato jān juon māākjiin an Kabun̄ in kōn rikanaan eo emour ak kōn en̄jake ko an membōr ro an Kabun̄ in ke raar ļoor kapilōk eo an rikanaan eo. (Bar lale “Meet Today’s Prophets and Apostles” ilo ChurchofJesusChrist.org.)

• Al ak kejo̧ juon al em̧ōj rekoote kōn rikanaan ro, āinwōt “Follow the Prophet” (Children’s Songbook, 110–11), ilo an ajri ro jerbal kōn peij in m̧akūtkūt eo an wiik in. Kalikkar n̄an ajri ro naan ko ilo al eo me ej kwaļo̧k elmen an rikanaan ro tōl iaļ eo ļo̧k n̄an Jisōs Kraist.

Amos 5:14

N̄e ij kappukot em̧m̧an, Irooj enaaj pād ippa.

Amos eaar kajjitōk ippān riIsrael ro n̄an “pukot em̧m̧an, im jab nana” im kallim̧ur ko bwe n̄e renej, “Jeova … enaaj pād ippemi.” Elmen am̧ naaj jipan̄ ajri ro uwaake kajjitōk in n̄an bōk kallim̧ur in?

M̧akūtkūt ko Maron̄ Kōm̧m̧ani

• Kwaļo̧k jet pijain ajri ro rej kōm̧m̧ani men ko rem̧m̧an, āinwōt jipan̄ ro jet ak bōk kwojkwoj eo. Kōtļo̧k an kajjojo ajri bōk kuņaer kōmeļeļeik juon iaan pija ko ilo an ajri ro jet kajjidedeiki pija eo ej kōmeļeļeiki. Riit Amos 5:14, im jipan̄ ajri ro lōmņaki wāween ko renaaj “pukot em̧m̧an” aolep raan.

• Kajjitōk ippān ajri ro n̄an jin̄aik pijain er make kōm̧m̧ani men ko rem̧m̧an. Riit Amos 5:14, im kōmeļeļeik kallim̧ur eo an Irooj me E enaaj pād ippād n̄e jenaaj kappukot em̧m̧an. Kajjitōk ippān ajri ro n̄an kobaikiļo̧k n̄an jin̄n̄a eo aer juon pijain Jisōs ej jutak ippāer.

pija ej bōk jikin katakin

Katakin Katak eo: Ajri ro Rerūttoļo̧k

Rijilōk ro raan kein rej idik pein kajjojo armej ilo kweilo̧k eo eļap

Irooj ej kwaļo̧k m̧ool ko n̄an rikanaan ro An.

Amos 3:7

Rikanaan ro rej rikōņņaan ro an Jisōs Kraist.

Amos 3:7 ej juon eoon em̧m̧an n̄an jipan̄ ajri ro kile bwe n̄e jej ron̄jake rikanaan eo, jej ron̄jake rikōņņaan eo an Jisōs Kraist.

M̧akūtkūt ko Maron̄ Kōm̧m̧ani

• Jipan̄ ajri ro kakkilōklōke aolepān ak jidikin Amos 3:7. N̄an waanjon̄ak, leļo̧k n̄an er jejjo̧ minit n̄an riiti eoon ko jet alen ilo am̧ je aolep eoon in naan eo ioon bo̧o̧t. Kajjitōk ippān ajri ro n̄an kiil jeje ko aer rekwojarjar im ba eoon eo ippān doon ilo eļļaaj, kōjerbal naan eo ioon bo̧o̧t eo. Innām jerre jidikin naan eo m̧ae iien ajri ro remaron̄ āliji aolepen eoon ilo an ejjeļo̧k jabdewōt jipan̄. Ta eo eoon in ej katakin kōj kōn rikanaan ro? Elmen an rikanaan eo ad emour kar jipan̄ kōj jeļā ta eo Rilo̧mo̧o̧r ekōņaan bwe jen kōm̧m̧ane?

• Je jet iaan kajjitōk ko kōn rikanaan ro ioon peba ko, āinwōt ijin ilaļ: Etke ewōr rikanaan? Ta eo rikanaan ro rej kōm̧m̧ane? Etke kwoj ļoor rikanaan eo? Ta eo rikanaan ro rej kwaļo̧k kake? Kajjitōk ippān ajri ro n̄an kapeeaea, im bōk juon ajri jen juon kurup n̄an bōk juon kajjitōk im kajjitōk ippān eo m̧ōttan n̄an uwaake. N̄e ajri ro reaikuj jipan̄ uwaake juon kajjitōk, remaron̄ lale ilo “Rikanaan” ilo Unin Tōl n̄an Jeje ko Rekwojarjar (scriptures.ChurchofJesusChrist.org). Ālkin an eo m̧ōttan uwaake kajjitōk eo, ajri ro remaron̄ ukōt jerbal ko aer im kālet bar juon kajjitōk.

• Kwaļo̧k n̄an ajri ro jet m̧ool ko kōn rikanaan eo ilo Kallim̧ur M̧okta raar ekkatak kake ilo iiō in (āinwōt Noa, Moses, ak Aiseia). Kajjitōk ippāer n̄an kajjidede wōn rikanaan eo kwoj kōmeļeļeiki. Āliji menin n̄an rikanaan ro jet.

Amos 5:4–15

N̄e ij pukot em̧m̧an, Irooj enaaj pād ippa.

Ajri ro ewōr aer iien em̧m̧an n̄an kālet ikōtaan jim̧we im bōd. Lōmņake elmen am̧ naaj im̧we er n̄an “kappukot em̧m̧an, im jab nana” (eoon14).

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kappukote Amos 5:4–15, lale naan eo “pukot.” Ta eo Irooj ekōņaan bwe jen pukot, im ta kallim̧ur eo Ej kōm̧m̧ane n̄an ro rej kōm̧m̧ane? Elmen ad pukot Irooj?

• Jipan̄ ajri ro kakkilōklōke jentōj eo āliktata in laajrak in tōmak ko joun̄ouljilu. Elmen ad “kappukoti men kein”?

Amos 8:11–12

Jepļaaktok eo an gospel eo ekar kōjem̧ļo̧k n̄ūta in bun̄ jen tōmak eo.

Meļeļe ta eo Amos ekar katakin kōn bun̄ jen tōmak eo emaron̄ jipan̄ ajri ro en̄jake m̧ōņōņō kōn Jepļaaktok eo an gospel in.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Amos 8:11–12, im kōnono kake ta eo ej waļo̧k n̄e armej ro rejjab bōk naan eo an Irooj. Jipan̄ ajri ro kōmeļeļein naan kein bun̄ jen tōmak im n̄ūta, kōjerbal Unin Tōl n̄an Jeje ko Rekwojarjar (scriptures.ChurchofJesusChrist.org) ak juon tūkjinede. Elmen an bun̄ jen tōmak āinwōt juon n̄ūta?

• N̄an jipan̄ ajri ro meļeļe Bun̄ jen Tōmak eo Eļap, etale ippāer “After the New Testament” (ilo Bwebwenato ko an Kallim̧ur Ekāāl, 167–70). Innām kōnono kajjitōk āinwōt kein: Etke ekar wōr Bun̄ jen Tōmak? Ta tōprak eo ewaļo̧k jen Bun̄ jen Tōmak eo? Etke Irooj eaar kōjepļaaktok gospel in An? (bar lale “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in Kōn Rūbukwi Iiō in Jepļaaktok eo,” ChurchofJesusChrist.org). Rōjan̄ ajri ro n̄an je kajjitōk ko im uwaak ko aer im n̄an kwalo̧ki n̄an baam̧le eo aer ilo m̧weeo.

pija ej bōk jikin ekkatak

Kōketak Ekkatak ilo M̧weo

Leļo̧k n̄an ajri ro jidik iien n̄an ļōmņake men ko raar ekkatak rainin me emaron̄ em̧m̧an ippāer n̄an kwaļo̧k n̄an juon uwaan baam̧le eo. Rōjan̄ er n̄an kālet wōn ro renaaj kwaļo̧k n̄an e im elmen aer naaj kwaļo̧ke.

Kōkōm̧anm̧anļo̧k Ad Katakin

Leļo̧k kajjitōk me ebōk anemkwoj in kālet. Kajjitōk kajjitōk ko me ejipan̄ ajri ro ļōmņake wāween ko an juon make n̄an mour kake ta eo raar ekkatak. N̄an waanjon̄ak, kwomaron̄ kajjitōk, “Ta juon iaan men eo kwoj en̄jake kwoj aikuj in kōm̧m̧ane pedped wōt ioon ta eo jaar kōnono kake rainin?”

peij in m̧akūtkūt: Rikanaan ro rej rikōņņaan kōn Jisōs Kraist.