Laie Hawaii Temple

Tijem̧ba 5–11

Haggeai; Zekaraia 1–3; 7–14

“Kwōjarjar n̄an Irooj”

Lukkuun jar ilo am̧ riiti Haggeai im Zekaraia, kōļmenļo̧kjeņ kōn im̧we ko kwaar būki. Ewi wāween an m̧ool ko ilo bok kein jipan̄ tōpar aikuj ko an ajri ro kwoj katakin?

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jin̄aik juon māj elem̧ōņōņō ilo jidik peba, im kōm̧m̧an bwe ajri ro ren kajjojo jibwe. Ilo iien eo aer, kajjitōk ippāer n̄an kwaļo̧k jet men rekar ekkatak kōn Jemedwōj Ilan̄ im Jisōs Kraist me ekam̧ōņōņōik er.

pija ej bōk jikin katakin

Katakin Katak eo: Ajri ro Reddikļo̧k

Haggeai 1:6–8

Imaron̄ likūt Irooj m̧oktata ilo mour eo aō.

Ekkatak kōn kapilōk in an Anij n̄an “kōļmenļo̧kjeņ kōn iaļ ko ami” ej juon iien em̧m̧an bwe ajri ro ren lukkuun kōm̧m̧ani men ko raorōk Anij ekar kajjitōk ippād bwe jen kōm̧m̧ani.

M̧akūtkūt ko Maron̄ Kōm̧m̧ani

• Kōmeļeļeik n̄an ajri ro bwe Irooj ekar kōņaan bwe Riisrael ro ren kalōk juon tampeļ, ak ijjelo̧kin rekar kōm̧m̧ane bar jet men. Riiti eļļaaj Haggeai 1:7, im kōmeļeļeik “kōļmenļo̧kjeņ kōn iaļ ko ami” meļeļein bwe Irooj ekar kōņaan bwe riIsrael ren ļōmņake n̄e rej kōm̧m̧ane men ko rej make wōt aorōktata. Riit eoon8 n̄an ajri ro, im kajjitōk ippāer n̄an kōtan n̄e “rej wanlōn̄ļo̧k n̄an ioon toļ eo,” “bōktok aļaļ,” im “kalōk m̧weo [im̧ōn Irooj].” Ta jerbal eo aorōk Anij ekōņaan bwe jen kōm̧m̧ane?

• Kapedoik juon pija ioon juon tābōļ me ej pinej jenkwan jet iaan men ko raorōk ippān Anij, āinwōt jeje ko rekwojarjar, jar, im tampeļ. Kōtļo̧k an ajri ro bōk koņaer kālet juon pija im kwaļo̧ke n̄an kūlaaj eo. Jipan̄ er meļeļe etke eaorōk n̄an lukkuun lale n̄e jej kōm̧m̧an iien n̄an men ko kajjojo ilo pija ko.

Zekaraia 3:1–7

Jisōs Kraist emaron̄ kōm̧m̧an bwe jetōb eo aō en erreeo.

Nuknuk ettoon ko an Joshua pris eo eļap, kar kōmeļeļeiki ilo Zekaraia 3:1–7, kōkkaļļein ta eo ej waļo̧k n̄e jej jerawiwi. Kōn pinmuur eo an Jisōs Kraist, jemaron̄ bar erreeo, āinwōt kar Joshua an kar erreeo ke eaar kōņak nuknuk ko rekāāl.

M̧akūtkūt ko Maron̄ Kōm̧m̧ani

• Kōtļo̧k bwe ajri ro ren leto-letak juon jōōt ettonoon, im riiti Zekaraia 3:3. Innām leto-letak juon jōōt erreeo, im riiti eoon4. Kōnono n̄an ajri ro kōn wāween kōm̧m̧ani kālet ko rebōd āinwōt etoon ilo mour in jetōb, ak Rilo̧mo̧o̧r emaron̄ kōm̧m̧an bwe jen bar erreeo. Ewi wāween ad en̄jake n̄e jej erreeo? Kwaļo̧k am̧ naan in kam̧ool bwe kōn en̄taan im mej eo an Jisōs Kraist n̄an kōj, jenaaj bar erreeo jān jerawiwi ko ad ilo ad ukweļo̧k.

• N̄e ekkar, kwaļo̧k n̄an ajri ro pija in juon eo rejeļa kajjein ekar nuknuk mouj ilo peptaij eo an (ak lale Gospel Art Book, no. 103, 104). Etke jej ekkōņak nuknuk mouj ilo iien ad peptaij? Al juon al kōn peptaij, āinwōt “When I Am Baptized” (Children’s Songbook,103). Kajjitōk ippān ajri ro n̄an jin̄aik er make aer peptaij im kwaļo̧k elmen aer en̄jake kōn peptaij juon raan.

Zekaraia 2:10; 9:9; 14:3–9

Rikanaan ro rej kwaļo̧k kōn Jisōs Kraist.

Āinwōt rikanaan ro jet ilo Kallim̧ur M̧okta, Zakaraia ekar kanaan kōn Jisōs Kraist. Ta kanaan ko ilo Zakaraia 2:10; 9:9; 14:3–9 emaron̄ katakin ajri ro kōn E?

M̧akūtkūt ko Maron̄ Kōm̧m̧ani

• Kwaļo̧k juon pija in Jisōs Kraist an deļo̧n̄e Jerusalem ioon juon donkey (lale Gospel Art Book, no. 50). Kwaļo̧k n̄an ajri ro bwe elōn̄ iiō ko m̧oktaļo̧k jān an Jisōs kar itok n̄an laļ, Zakaraia ekar kanaan bwe Jisōs Kraist enaaj iuwe ioon juon donkey n̄an Jerusalem m̧okta jān An mej kōn kōj. Ilo am̧ riit Zakaraia 9:9, kajjitōk ippān ajri ro n̄an jitōn̄ļo̧k an armej ro ilo pija eo “kanooj lan̄lōn̄” im bar jitōn̄ļo̧k “Kiin̄ eo.” Wōn eo ej Kiin̄? Kajjitōk ippān ajri ro n̄an kwaļo̧k men ko rej kam̧m̧oolol kaki kōn Jisōs.

• Riit n̄an ajri ro n̄an kwaļo̧k kanaan ko Zakaraia ekar kōm̧m̧ani kōn Itok eo Kein Karuo an Rilo̧mo̧o̧r eo, āinwōt ko ilo Zakaraia 2:10; 14:9. Kajjitōk ippān ajri ro n̄an jin̄n̄aik pija ko kōn ta eo rekar ļōmņak āinwōt n̄e Jisōs ej bar itok, ak al juon al ippān doon kōn Itok eo Kein Karuo, āinwōt “When He Comes Again” (Children’s Songbook, 82–83).

pija ej bōk jikin katakin

Katakin Katak eo: Ajri ro Rerūttoļo̧k

Haggeai 1:12–8

“Kōļmenļo̧kjeņ kōn iaļ ko ami.”

Eaorōk n̄an kōjwōj aolep bwe jen ekkōl im bōk iien n̄an “kōļmenļo̧kjeņ kōn iaļ ko [ad].” Elmen am̧ maron̄ im̧we ajri ro n̄an kōm̧m̧an iien ilo mour ko aer n̄an men ko an Anij?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Haggeai 1:2–5 n̄an lale etke Irooj ekar jab m̧ōņōņō ippān Riisrael ro. Kajjitōk ippān ajri ro n̄an bōk juon naan jān eoon6 im jin̄aiki juon pijaen. Kōtļo̧k bwe kūlaaj eo en kajidede ta naan eo ej pinej jenkwan jin̄n̄a eo. Kōnono kōn elmen joļo̧k iien ilo men ko jet ijeļo̧kin ta eo Irooj ekōņaan ej āinwōt baj m̧ōn̄ā ak ban mat, nuknuk ak ban okmāānān, im ko jet. Etke eaorōk n̄an kōm̧m̧an iien n̄an men ko me raorōk an Irooj?

• Je “Kōļmenļo̧kjeņ kōn iaļ ko ami” ioon bo̧o̧t eo (eoon7). Kajjitōk ippān kajjojo ajri n̄an kōm̧m̧ane juon laajrak in men ko emaron̄ kōm̧m̧ani ilo juon raan, ekoba men ko Irooj ekar kajjitōk ippād n̄an kōm̧m̧ani. Kajjitōk ippān ajri ro n̄an “kōļmenļo̧kjeņ kōn iaļ ko [aer]” ilo aer doululi ta eo Irooj emaron̄ ba kōn men eo me eaorōktata aer. Elmen ad maron̄ lukkuun leļo̧k ad iien kajjojo raan n̄an men ko Irooj ekōņaan bwe jen kōm̧m̧ani?

leddik jidikdik eo ej peptaij jen em̧m̧aan eo

Jej kōņak nuknuk mouj ilo iien ad peptaij n̄an kwaļo̧k bwe Jisōs Kraist emaron̄ karreeoik kōj ilo ad ukweļo̧k jen jerawiwi ko ad (lale Zakaraia 3:3–4).

Zekaraia 3:1–7

Kōm̧m̧an im kōjparok bujen ko emaron̄ jipan̄ kōj erom̧ eļapļo̧k āinwōt Jemedwōj Ilan̄ im Jisōs Kraist.

Ilo juon visōn, Zakaraia ekar lo juon pris eļap etan Joshua, eo ekar “kōņak nuknuk ko rettoon” (Zakaraia 3:3). Juon enjeļ eaar leļo̧k n̄an e nuknuk erreeo im kar kōmeļeļe bwe ej kōkkaļļein erreeo jān jerawiwi ko an. Komaron̄ bar kōjerbal visōn in n̄an jipan̄ ajri ro meļeļe bujen ko im kōjeraam̧m̧an ko rej ippānļo̧k peptaij.

M̧akūtkūt ko Maron̄ Kōm̧m̧ani

• Riit ippān doon Zakaraia 3:1–7 im kajjitōk kajjitōk ko āinwōt kein: Ta eo “nuknuk ettoon ko” an Joshua rej pinej jenkwan? Elmen ad erreeo jān jerawiwi ko ad? Elmen an bujen peptaij ko ad jipan̄ kōj “etal ilo” iaļ ko an [Jeova]?

• Jejjo raan m̧okta jen kūlaaj eo, kajjitōk ippān juon ajri bwe en itok ilo an pojak n̄an kōnono kōn peptaij eo an. Etale ippān doon bujen ko jej kōm̧m̧ani ilo peptaij (lale Katak im Bujen Ko 20:37). Elmen kōjparoki bujen ko ad jipan̄ kōj erom̧ eļapļo̧k āinwōt Jemedwōj Ilan̄ im Jisōs Kraist? Elmen bōk kwojkwoj eo kajjojo wiik jipan̄ kōj kōjparok bujen peptaij eo ad?

Zakaraia 9:9–11; 11:12; 13:6–7

Jisōs Kraist ej Messaia eo kar kallim̧ur kake.

Ta eo ajri ro remaron̄ ekkatak jān kanaan eo an Zakaraia kōn Jisōs Kraist?

M̧akūtkūt ko Maron̄ Kōm̧m̧ani

• Ajeje kūlaaj eo n̄an ruo m̧ōttan ko. Leļo̧k n̄an kajjojo kurup juon iaan kanaan kein jān Zakaraia, ippānļo̧k eoon ko kōmeļeļeiki ilo Kallim̧ur Ekāāl an kūrm̧ool: Zakaraia 9:9 im Matu 21:5–9; Zakaraia 9:11 im 1Piter 3:18–19; Zakaraia 11:12 im Matu 26:14–16; Zarakaia 13:7 im Matu 26:31. Kajjitōk ippān kajjojo kurup n̄an kwaļo̧k n̄an kūlaaj eo ta eo raar ekkatak kōn Jisōs Kraist jān eoon ko aer im etke rej kam̧m̧oolol kōn E.

• Kwaļo̧k pija ko 50, 60, im64 jān Gospel Art Book. Je eoon eo in jipan̄ kein ioon bo̧o̧t eo, im kajjitōk ippān ajri ro n̄an māje pija in jipan̄ ko n̄an pija ko: Zakaraia 9:9; 13:6; 13:7. Kajjitōk ippān ajri ro n̄an kwaļo̧k en̄jake ko aer kōn Jisōs Kraist.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an je juon m̧ool raar ekkatak ilo kūlaaj eo. Kajjitōk ippāer n̄an kōnono ippān baam̧le ko aer elmen aer maron̄ bōk naan in kam̧ool eo ekajoorļo̧k kōn m̧ool in.

Kōkōm̧anm̧anļo̧k Ad Katakin

Kōjerbal jeļā eo am̧. Kōtļo̧k bwe ļōmņak ko ilo laajrak in ej kōkm̧anm̧anļo̧k jeļā eo am̧ make. Ļōmņak kōn ta eo ajri ro renaaj lem̧ōņōņō im ta eo enaaj jipan̄ er lo ekkeijel ko ikōtaan jejek ko rekwojarjar im mour ko aer.

peij in m̧akūtkūt: Jisōs Kraist emaron̄ kōm̧m̧an bwe jetōb eo aō en erreeo.