Nin̄nin̄ Jisōs kar kūrboke kōn nuknuk mouj im kar babu ilo jikin m̧ōn̄ā an kidu

Bwe n̄an Kōj juon Nin̄nin̄ Eļotak, juon , jān Simon Dewey

Tijem̧ba 19–25

Kūrijm̧ōj

“Jaar Kattar E, im E Enaaj Lo̧mo̧o̧ren Kōj”

Ilo Kallim̧ur M̧okta rikanaan ro raar reim̧aanļo̧k kōn eļap lan̄lōn̄ n̄an ļotak eo an Messaia (lale Aiseia 25:9). Ilo am̧ keppopo n̄an katakin ilo jijen in Kūrijm̧ōj in, ļōmņake elmen am̧ maron̄ jipan̄ ajri ro lo lan̄lōn̄ kōn lo̧tak eo an Rilo̧mo̧o̧r Jisōs Kraist.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ta eo rejeļā kōn ļo̧tak eo an Jisōs Kraist. Ilo aer kwaļo̧k juon armej ak jān bwebwenato eo, kajjitōk ippāer n̄an jin̄aiki ioon boot eo. Kajjitōk ippān ajri ro ta eo rejeļā kōn bwebwenato in.

pija ej bōk jikin katakin

Katakin Katak eo: Ajri ro Reddikļo̧k

Kallim̧ur M̧okta ej katakin eō kōn Jisōs.

Jipan̄ ajri ro mije wōt Rilo̧mo̧o̧r Jisōs Kraist āinwōt unin ad kememe ilo Kūrijm̧ōj. Kwomaron̄ kōm̧m̧ane menin kōjerbal eoon ko jān Kallim̧ur M̧okta me ej kam̧ool kōn E.

M̧akūtkūt ko Maron̄ Kōm̧m̧ani

• Kwaļo̧k juon pija in ļotak eo (āinwōt Gospel Art Book, no.30, ak juon iaan pija ko ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko). Riiti Aiseia 9:6, leļo̧k bwe kajjojo ajri ren bōk kuņaer n̄an jitōn̄ļo̧kr nin̄nin̄ Jisōs n̄e rej ron̄ naan eo “juon nin̄nin̄ eļotak.” Kwaļo̧k naan in kam̧ool eo am̧ kōn rikanaan ro ilo Kallim̧ur M̧okta me rekar jeļā bwe Jisōs enaaj ļotak.

• Kajjitōk ippān kajjojo ajri n̄an ba etan, im kalikkar ilo kakkobaba n̄an etad, jemaron̄ kūr kōj bar jet āt, āinwōt sister ak brother ak jera. Kajjitōk ippān ajri ro n̄an ļōmņake waanjon̄ak ko jet. Riit Aiseia 9:6 n̄an ajri ro, kwaļo̧k bwe āt ko etan Jisōs Kraist āinwōt: “Kabwilōn̄lōn̄, Ripepe, Anij e Kajoor Bōtata, Jemān iien Indeeo. Irooj in Aenōm̧m̧an.” Jipan̄ ajri ro meļeļe ta āt ko rej jiron̄ kōj kōn Jisōs.

• Leļo̧k n̄an kajjojo ajri juon peba in iju, im kajjitōk ippān ajri ro n̄an kotake iju ko aer n̄e kworiiti naan kein ilaļ jen Bōnbōn 24:17: “juon iju enaaj waļo̧k jān Jekob.” Kajjitōk ippān ajri ro n̄an kwaļo̧k elmen an Jisōs āinwōt juon meram in iju me ej rome aolepān laļ in. Al juon al ippān doon kōn iju eo ekar waļo̧k ke Jisōs ekar ļotak, āinwōt “Stars Were Gleaming” (Children’s Songbook,37) ak “The First Noel” (Hymns, no.213).

Jisōs Kraist ej aō Rilo̧mo̧o̧r.

Kūrijm̧ōj ej juon iien kemeeme ejjab wōt ļotak eo an Jisōs ak barāinwōt mour eo An im jerbal eo āinwōt Rilo̧mo̧o̧r eo an laļ. Elmen am̧ maron̄ jipan̄ ajri ro en̄jake lan̄lōn̄ im kam̧m̧oolol kōn Pinmuur eo an Jisōs Kraist?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an ļōmņake men ko me rej reim̧aanļo̧k n̄ani. Kōmeļeļeiki bwe armej ro retiljek ilo iien ko ilo Kallim̧ur M̧okta rekar reim̧aanļo̧k n̄an ļotak eo an Jisōs Kraist. Riiti Aiseia 25:9 n̄an ajri ro, im kōm̧m̧an bwe ren āliji naan kein “Jaar kattar E, jenaaj m̧ōņōņō im lan̄lōn̄ ilo lo̧mo̧o̧r eo An.” Kwaļo̧k n̄an er etke kwoj m̧ōņōņō im lan̄lōn̄ bwe Kraist ekar ļotak. Kajjitōk ippān ajri ro n̄an kwaļo̧k en̄jake ko aer kōn Rilo̧mo̧o̧r.

• Al juon al ippān doon kōn ļotak eo an Jisōs, āinwōt “Away in a Manger” (Children’s Songbook, 42–43) ak “Hark! The Herald Angels Sing” (Hymns, no. 209). Jipan̄ ajri ro pukot naan ko ilo al ko me rej katakin kōj kōn ad Rilo̧mo̧o̧r im kōn kōjeraam̧m̧an ko jaar bōki kōn wōt E.

pija ej bōk jikin katakin

Katakin Katak eo: Ajri ro Rerūttoļo̧k

Kallim̧ur M̧okta ej katakin eō kōn Jisōs Kraist, Messaia eo kar kallim̧ur kake.

Kallim̧ur M̧okta eļapļo̧k jen baj bwebwenato ko rekabwilōn̄ļōn̄ kar aiinitok im jeje ko, jibadbad eo an, āinwōt aolep jeje ko rekwojarjar, ej n̄an kam̧ool kōn Jisōs Kraist. Jipan̄ ajri ro ekkatak elmen lo E ilo Kallim̧ur M̧okta.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kōm̧m̧ane juon laajrakin in aolep āt ko im taitōļ ko an Jisōs Kraist me remaron̄ loi ilo Moses 7:53; Sam Ko 23:1; Job 19:25; Aiseia 7:14; 9:6; 12:2; Amos 4:13; im Zekaraia 14:16. Kōtļo̧k bwe ren jerbal ilo pea n̄e rekōņaan. Kajjitōk ippāer n̄an kwaļo̧k laajrak ko aer n̄an doon. Ta eo jaar ekkatak kōn Rilo̧mo̧o̧r jen kajjojo iaan āt ko im taitōļ ko?

• Kwaļo̧k n̄an ajri ro jejjo kainōknōk ko an Kūrijm̧ōj (ak jet pija in), āinwōt juon iju, ļait, ak juon menin letok. Kajjitōk ippān ajri ro elmen an kajjojo iaan men kein maron̄ kakeememej kōj kōn Rilo̧mo̧o̧r. Kōmeļeļeiki bwe ekkā an jeje ko rekwojarjar kōjerbal kōkkaļļe ko n̄an katakin kōj kōn Jisōs Kraist. Kajjitōk ippān ajri ro n̄an pukote juon ak elōn̄ļo̧k ilo eoon kein ilaļ kōn jet men me emaron̄ in kōkkaļļein Jisōs Kraist: Jenesis 22:8; Exodus 17:6; Sam Ko 18:2; 27:1 (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le ko n̄an kakkobaba in waanjon̄ak ko). Elmen an Jisōs Kraist āinwōt juon ļaam̧, dān, dekā, juon m̧ōn tōrak, ak meram?

• Ilo jem̧ļo̧kin ekkatak Kallim̧ur M̧okta iiō in, kajjitōk ippān ajri ro n̄an kwaļo̧k bwebwenato eo em̧m̧an ippāer ak jeje ko rekwojarjar jān Kallim̧ur M̧okta. Ta eo bwebwenato kein ak jeje ko rekwojarjar rej katakin kōj kōn Jisōs Kraist? Etke jej kam̧oolol bwe ewōr Kallim̧ur M̧okta?

Jisōs Kraist ej aō Rilo̧mo̧o̧r im Ripinmuur.

Ilo ad kememe ļotak eo an Jisōs Kraist, jemaron̄ bar lan̄lōn̄ kōn mour eo im en̄taan in pinmuur eo An. Elmen am̧ maron̄ kōjerbal jeje ko rekwojarjar jān Kallim̧ur M̧okta n̄an jipan̄ ajri ro kalōk aer tōmak ilo aer Rilo̧mo̧o̧r im Ripinmuur?

M̧akūtkūt ko Maron̄ Kōm̧m̧ani

• Riit ippān doon Aeseia 7:14; innām kajjitōk ippān ajri ro n̄an kwaļo̧k ta eo rejeļā kōn ļotak eo an Kraist. Ak kwaļo̧k bitieo eo “The Nativity” (ChurchofJesusChrist.org), im kajjitōk ippān kajjojo ajri n̄an kālet juon armej jān bitieo eo im kwaļo̧k elmen an kar armej eo en̄jake. Kwaļo̧k naan in kam̧ool eo am̧ kōn Rilo̧mo̧o̧r, im kajjitōk ippān ajri ro n̄an kōm̧m̧an āinwōt.

• N̄an jipan̄ bwe en em̧m̧anļo̧k an ajri ro meļeļe kōn jerbal eo an Jisōs Kraist āinwōt ad Rilo̧mo̧o̧r, kajjitōk ippāer n̄an riiti Aiseia 25:8–9; 53:3–5; im Hoseia 13:14. Ta eo jeje kein rekwojarjar rej katakin kōj kōn elmen an Irooj lo̧mo̧o̧ren kōj? Elmen aō maron̄ “lan̄lōn̄ ilo lo̧mo̧o̧r eo An”? (Aiseia 25:9).

• Al juon al ippān doon kōn iakwe eo an Jisōs Kraist n̄an kōj, āinwōt “Away in a Manger” (Children’s Songbook, 42–43) ak “Ij Lokjenaō” (Al, no.14). Kajjitōk ippān ajri ro n̄an kwaļo̧k naan ko me ejipan̄ er en̄jake iakwe eo an Rilo̧mo̧o̧r.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kwaļo̧k ippān baam̧le ko aer ak juon m̧ōttāer juon men me rekar ekkatak kōn Jisōs Kraist jān Kalim̧m̧ur M̧okta. Rōjan̄ er n̄an jino ekkatak kōn Kallim̧ur Ekāāl wiik in.

Kōkōm̧anm̧anļo̧k Ad Katakin

Ejake juon jukjukinpād me ej karuwaineneiktok Jetōb eo. Ekanooj lōn̄ wāween ko komaron̄ karuwaineneiktok Jetōb eo n̄an kūlaaj eo am̧. Al emaron̄ kōketak kautiej. Kwaļo̧k kōn iakwe im naan in kam̧ool emaron̄ ejaake juon mejatoto em̧m̧an, juon jetōb em̧m̧an. Lukkuun ļōmņake ta eo kwomaron̄ kōm̧m̧ane n̄an ejaake juon jukjukinpād eo ejetōbtōb ilo kūlaaj eo am̧. (Lale Teaching in the Savior’s Way,15.)

peij in m̧akūtkūt: Kallim̧ur M̧okta ej katakin eō kōn Jisōs