“Tijem̧ba 12–18. Malakai: ‘Iar Yokwe Kom̧, Irooj ej Ba,’” Itok, Ļoor Eō—N̄an Būraimere: Kallim̧ur M̧okta 2022 (2021)
“Tijem̧ba 12–18. Malakai,” Itok, Ļoor Eō—N̄an Būraimere: 2022
Tijem̧ba 12–18
Malakai
“Iar Yokwe Kom̧, Irooj ej Ba”
Irooj ej iakwe ajri ro kwoj katakin. Elmen am̧ naaj jipan̄ ajri ro en̄jake iakwe eo An ilo am̧ katakin katak eo ej waļo̧k ilo bok in Malakai
Je En̄jake ko Rej Im̧we Eok
Kajjitōk bwe ren Kwaļo̧k
Riiti naan kein ilaļ jān Malakai 1:2: “Iar Yokwe Kom̧, Irooj ej Ba.” Kajjitōk ippān kajjojo ajri n̄an kwaļo̧k juon iaan wāween eo rejeļā ke Irooj ej iakwe er. Ālkin an kajjojo ajri kwaļo̧k, kam̧m̧oolol er, im kwaļo̧k am̧ naan in kam̧ool bwe Irooj ej iakwe ajri eo.
Katakin Katak eo: Ajri ro Reddikļo̧k
Jemedwōj Ilan̄ enaaj kōjeraam̧m̧an eō n̄e ij kōļļā juon m̧ōttan jon̄oul.
Men̄e ajri ro reddik kwoj katak rejjab kōm̧m̧an jāān kiiō, remaron̄ ekkatak kōn kōjeraam̧m̧an ko kōn kōļļā juon m̧ōttan jon̄oul.
M̧akūtkūt ko Maron̄ Kōm̧m̧ani
-
Jipan̄ ajri ro n̄an bwine 10 mennin ekkatak ko reddik, āinwōt jāān jiddik ko ilo peij in m̧akūtkūt eo an wiik in. Kajjitōk ippāer n̄an kōjeno̧ļo̧k juon iaan kein ekkatak eo jān ko jet, im kōmeļeļeiki bwe en̄in ej āinwōt m̧ōttan jon̄oul eo jej leļo̧k n̄an Irooj. Jej leļo̧k n̄an E juon m̧ōttan jon̄oul in ta eo jej bōke. Kwaļo̧k am̧ naan in kam̧ool elmen an Irooj kōjeraam̧m̧an kōj ilo ad kōļļā juon m̧ōttan jon̄oul. Al ippān doon juon al kōn juon m̧ōttan jon̄oul, āinwōt “I want to Give the Lord My TenthChildren’s Songbook,150).
-
Jin̄aik juon wūntō ioon boot eo im riiti Malakai 3:10 n̄an ajri ro. Kajjitōk ippāer n̄an jitōn̄ļo̧k wūntō eo ilo am̧ riiti naan ko “wūntō ko an lan̄.” Kōmeļeļeik bwe meļeļein menin ej bwe Jemedwōj Ilan̄ ej letok n̄an kōj kōjeraam̧m̧an ko reļļap n̄e jej kōļļā juon m̧ōttan jon̄oul. Ilo an ajri ro kōļare peij in m̧akūtkūt eo an wiik in, kōnono kōn jet un ko etke jej kōļļā juon m̧ōttan jon̄oul.
-
Kwaļo̧k juon bwebwenato jān Jera Māākjiin māākjiin eo ak jān mour eo am̧ make kōn kōļļā juon m̧ōttan jon̄oul. Kajjitōk ippān ajri ro n̄an ron̄jake kōjeraam̧m̧an ko me rej itok jān kōļļā juon m̧ōttan jon̄oul.
Jej liāp āinwōt baam̧le ko ilo tampeļ.
Kōn kii ko an priesthood kōn liāp me Ilaija eaar leļo̧k n̄an Josep Smith ilo Kirtland Tempel, baam̧le ko remaron̄ ippān doon indeeo. Ilo am̧ kwaļo̧k katakin in em̧ool, lale en̄jake ko an ajri ro me baam̧le ko aer rejjan̄in liāp ilo tampeļ.
M̧akūtkūt ko Maron̄ Kōm̧m̧ani
-
Riiti ļo̧k Malakai 4:5 n̄an ajri ro. Innām kwaļo̧k n̄an er kallim̧ur in ekar kūrm̧ool ke Ilaija ekar waļo̧k n̄an Josep Smith ilo Kirtland Tempel (lale “Chapter40: Visions in the Kirtland Temple,” ilo Doctrine and Covenants Stories,157). Kwaļo̧k juon pija in iien in eļap (lale Gospel Art Book, no.95), im kajjitōk ippān ajri ro n̄an jitōn̄ļo̧k Ilaija im Josep Smith. Kōmeļeļeik bwe kōnke Ilaija ekar itok, jemaron̄ bar liāp āinwōt baam̧le ko ilo tampeļ. Kwaļo̧k am̧ naan in kam̧ool kōn aorōk eo an liāp āinwōt baam̧le ko.
-
Kwaļo̧k n̄an ajri ro kōn iakwe eo am̧ n̄an baam̧le eo am̧; kwaļo̧k juon pija, n̄e ekkar. Kajjitōk ippān jet ajri n̄an kwaļo̧k en̄jake ko aer kōn baam̧le eo aer. Al juon al ippān doon kōn baam̧le ko, āinwōt “Families Can Be Together Forever” (Hymns, no.300), im kam̧ool bwe Jemedwōj Ilan̄ ekōņaan bwe baam̧le ko ren liāp ippān doon im bwe en̄in ej juon un bwe en wōr tampeļ ko. Jipan̄ ajri ro meļeļe bwe kōn Jisōs Kraist, jemaron̄ liāp n̄an ro uwaan baam̧le ro rejjab maron̄ etal n̄an tampeļ ilo mour in. Kajjitōk ippān ajri ro n̄an jin̄aik an baam̧le eo aer ippān doon ilo lan̄.
Katakin Katak eo: Ajri ro Rerūttoļo̧k
Jemedwōj Ilan̄ enaaj kōjeraam̧m̧an eō n̄e ij kōļļā juon m̧ōttan jon̄oul.
Kōļļā juon m̧ōttan jon̄oul ej eļapļo̧k kōn tōmak ilo Jemedwōj Ilan̄ im Jisōs Kraist jen baj jāān. Ta eo ajri ro remeļeļe kōn juon m̧ōttan jon̄oul? Elmen am̧ naaj jipan̄ er bōk tōmak n̄an kōļļā juon m̧ōttan jon̄oul?
M̧akūtkūt ko Maron̄ Kōm̧m̧ani
-
Je ioon boot eo kajjitōk ko kōn juon m̧ōttan jon̄oul āinwōt in ilaļ: Ta in juon m̧ōttan jon̄oul? Elmen aō kōļļā juon m̧ōttan jon̄oul? Ta juon m̧ōttan jon̄oul ej jerbal n̄ane? Ta Kōjeraam̧m̧an ko kōn kōļļā juon m̧ōttan jon̄oul? Kajjitōk ippān ajri ro n̄an lale Malakai 3:8–12 im “Tithes, Tithing” ilo Unin Tōl n̄an Jeje ko Rekwojarjar (scriptures.ChurchofJesusChrist.org) im je uwaak ko rej loi. Kajjitōk ippāer n̄an kwaļo̧k uwaak ko aer n̄an doon. Kain armej rōt eo jej erom̧ jen kōļļā juon m̧ōttan jon̄oul?
-
Kwaļo̧k pija in alooj eo “Jesus Teaches about the Widow’s Mite” (ChurchofJesusChrist.org), ak riit ippān doon Mark 12:41–44. Ta eo bwebwenato in ej katakin kōj kōn wāween an Irooj en̄jake kōn joortak ko ad?
-
Jin̄aiki juon wūntō ioon boot eo, im kajjitōk ippān ajri ro n̄an je ilowaan wūnto eo kōjeram̧m̧an ko me juon emaron̄ būki jen kōļļā juon m̧ōttan jon̄oul (n̄an ļōmņak ko, lale Malakai 3:10–12). Kajjitōk ippān ajri ro n̄an kwaļo̧k juon waanjon̄ak eo an juon make elmen aer ak baam̧le ko aer kar jeraam̧m̧an jen kōļļā juon m̧ōttan jon̄oul. Ak komaron̄ kwaļo̧k juon waanjon̄ak jān mour eo am̧ make kōn wāween an kōļļā juon m̧ōttan jon̄oul kar kōļapļo̧k tōmak eo am̧ ilo Jemedwōj Ilan̄ im Jisōs Kraist.
Pijain an Ilaija waļo̧k n̄an Josep Smith im Oliver Cowdery ilo Kirtland Tempel, jān RobertT. Barrett
“Inaaj jilkinwaj Ilaija.”
Kanaan eo an Malakai kōn Ilaija rikanaan eo ekar kūrm̧ool ke Ilaija ekar waļo̧k n̄an Josep Smith ilo Kirtland Temple im leļo̧k n̄an e priesthood kii ko me ekōm̧m̧an bwe baam̧le ko ren liāp ippān doon indeeo. Komaron̄ ļōmņak in kajjitōk ippān juon ilo ward eo ej eddoik tempeļ im jerbal in menmenbwij an baam̧le (āinwōt juon uwaan būreejtōnji eo an doulul eo an elder ro ak būreejtōnji an Doulul eo an Kōrā ro) n̄an jipan̄ eok katakin katak in em̧ool n̄an ajri ro. Keememej in lale en̄jake ko an ajri ro me baam̧le ko aer rejjan̄in liāp.
M̧akūtkūt ko Maron̄ Kōm̧m̧ani
-
Je kajjojo naan jān Malakai 4:5–6 ioon jidik peba. Leļo̧k peba ko n̄an ajri ro, im kajjitōk ippāer n̄an likūt naan ko ilo laajrak eo ejjejōt. Riiti eoon ko ippān doon, im kōnono kajjitōk ko āinwōt kein: Wōn eo Irooj ekar kallim̧ur enaaj jilkinļo̧k? N̄āāt eo E ekar ba armej in enaaj kar itok? Ta eo Irooj ekar ba armej in enaaj kar kōm̧m̧ane? Etke armej in eaikuj bwe en itok? Ia eo kanaan in ekar kūrm̧ool ie? (lale Katak im Bujen Ko 110:13–16).
-
Je ioon boot eo juon kajjitōk āinwōt Ta meļeļein bwe būruwōn ro nejier en oktak n̄an būruwōn ro jemāer? (lale Malakai 4:6). Kajjitōk ippān ajri ro n̄an kōļmenļo̧kjeņ kake kajjitōk in ilo aer alooje pija in alooj in “Their Hearts Are Bound to You” (ChurchofJesusChrist.org). Innām kajjitōk ippān ajri ro n̄an kwaļo̧k ļōmņak ko aer kōn kajjitōk in ioon boot eo. Kōnono ippān doon kōn en̄jake ko kwe ak ajri ro kar ekkatak kōn menmenbwij an baam̧le.
-
Kwaļo̧k pijain Ilaija jān unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Kajjitōk ippān ajri ro n̄an kwaļo̧k ta eo rejeļā kōn men ko ilo pija eo (bar lale Katak im Bujen Ko 110:13–16). Kam̧ool bwe kajoor in liāp eo Ilaija ekar kōjepļaaktok ekōm̧m̧an bwe baam̧le ko ren ippān doon indeeo—ekoba baam̧le ko rekar jab wōr aer iien em̧m̧an ilo mour in. N̄e kwaar bōk kūņaam̧ ilo juon liāp, men̄e kwe make ak n̄an armej eo emej, kwaļo̧k ta en̄jake eo am̧ ilo kain̄i in. Kajjitōk ippān ajri ro n̄an kwaļo̧k en̄jake ko aer kōn baam̧le ko aer im kōn karōk eo an Anij n̄an jipan̄ baam̧le ko n̄an ippān doon indeeo.
Kōketak Ekkatak ilo M̧weo
Kajjitōk ippān ajri ro n̄an ļōmņaki jet men ko raar ekkatak ilo kūlaaj rainin, im kajjitōk ippān jet ajri n̄an kwaļo̧ke. Rōjan̄ aolep ajri ro n̄an kwaļo̧k n̄an baam̧le ko aer jet men rekar ekkatak kōn katak ko an Malakai.
Kōkōm̧anm̧anļo̧k Ad Katakin
Kobaik ajri ro ilo kōnono kōn gospel in. Komaron̄ aikuj in ļōmņak kōn jekjek ko im kwojeļā kaki make n̄an kōketa ajri ro reddikļo̧k ilo ekōnono ko kōn gospel in. N̄an waanjon̄ak, ajri ro remaron̄ leto-letak juon ball im kwaļo̧k uwaak ko aer n̄an kajjitōk eo n̄e rej jibwe ball eo.