tamaitiiti o loo i ai i se nofoa faataavalevale ma se fafine

Taulimaina o Manaoga o Tamaiti e i ai Manaoga Faapitoa

E i ai i taitai o le Peraimeri se tiutetauave e aoao atu ai le talalelei a Iesu Keriso i tamaiti uma, e aofia ai ma i latou e i ai manaoga faapitoa. I le Peraimeri o tamaiti uma e tatau ona faafeiloaiina, alofaina, faafaileleina ma fa’aaofiaina. O lenei siosiomaga ua faigofie ai i tamaiti uma ona malamalama i le alofa o lo tatou Tama Faalelagi ma Iesu Keriso ma lagona ma iloa ai le uunaiga a le Agaga Paia. O manatu nei e mafai ona fesoasoani ia te oe e fetaui ma manaoga o tamaiti e i ai manaoga faapitoa.

• Aoao e uiga i manaoga faapitoa o le tamaitiiti. O le auala sili e fai ai lenei mea o le talanoa lea i matua po o tagata o loo tausia le tamaitiiti. Saili po o a auala e sili atu ona lelei ai le aoao o le tamaitiiti ma po o a metotia e sili ona aoga. E mafai foi ona e fefautuaai ma isi taitai o le Peraimeri ma faiaoga o loo i ai le poto masani ma malamalamaaga e faasoa atu.

• Fatu se siosiomaga lelei lea e lagona ai e tamaiti uma le saogalemu ma le alofaina. Aoao ia igoa o tamaiti uma o lau vasega, ma fesoasoani ia latou lagonaina le taliaina, alofaina, ma le faaaofiaina. O tamaiti e i ai manaoga faapitoa e masani ona faitioina, o lea ia vaavaai mo avanoa e viia ai i latou mo amio lelei.

• Faia fetuunaiga ina ia mafai e tagata uma ona auai. E mafai ona faia ni suiga laʻiti i gaoioiga e faamautinoa ai e mafai e tamaiti uma ona aʻoaʻo, e aofia ai i latou e i ai faafitauli faaletino pe faigata ona aoao. Mo se faataʻitaʻiga, afai o se gaoioiga e fautuaina ai le faaalia o se ata, e mafai ona e usuina se pese e fesoʻotaʻi faatasi ma tamaiti e i ai ni faaletonu i o latou fofoga.

• Faatulaga ni faiga masani ma le faasologa tumau o le potuaoga. O se tasi o auala e faia ai lenei mea o le fatuina lea o se pepa lautele i le vasega e faatulaga ai le auala o le a faagasolo ai le vasega. O lau faatulagaga e ono aofia ai tatalo, taimi mo le aoaoga, ma le taimi o gaoioiga. O lenei mea e mafai ona fesoasoani e faaitiitia lagona o le le mautonu lea e mafai ona faateleina ai le atuatuvale i nisi tamaiti.

• Faaaoga faailoilo vaaia. O tamaiti e i ai ni manaoga faapitoa i le aoaoina ma le amio e ono aoga ai faailoilo vaaia, e pei o ata o loo faataitai mai ai amio talafeagai e pei o le siiina o le lima ae leʻi taliina se fesili.

• Malamalama pe aisea e i ai amioga faigata. Aoao e uiga i manaoga faapitoa po o tulaga e mafai ona aafia ai se tamaitiiti e amio le talafeagai. Vaavaai totoa i mea o loʻo tupu pe a tulaʻi mai amioga faigata. Mafaufau ma le agaga tatalo pe faapefea ona suia le tulaga ina ia mafai ona sili atu le lagolago i le tamaitiiti.