O Oe o se Faiaoga o Tamaiti

Ua valaauina oe e le Atua e aoao Lana fanau i le ala a le Faaola. Sa vaetofiaina oe i lenei valaauga i le pule o Lana perisitua paia. Tusa lava pe le o oe o se faiaoga ua i ai le tomai masani, a o e ola agavaa, tatalo i aso taitasi, ma suesue i tusitusiga paia, o le a avatu e le Tama Faalelagi ia te oe le tosinaga ma le mana o le Agaga Paia e fesoasoani ia te oe ia faamanuiaina (tagai 2 Nifae 33:1).

O i latou ua tuuina atu i lau vaavaaiga o fanau a le Tama Faalelagi, ma ua Ia silafia mea latou te manaomia ma le ala sili e aapa atu ai ia te i latou. E ala atu i le Agaga Paia, o le a taiala oe e le Atua i le taimi o au tapenapenaga ma a o e aoao atu. O le a Ia faaali atu ia te oe mea e tatau ona e fai atu ma mea e tatau ona e faia (tagai 2 Nifae 32:5).

O le faamoemoega taua o le aoaoina atu ma le aoaoina mai o le faalauteleina o le liuaina i le Tama Faalelagi ma Iesu Keriso. O lau sini o se faiaoga, o le fesoasoani lea ia i latou e te faiaoga ai e faia mea uma latou te mafaia ina ia liua atili ai—o se taumafaiga e faalautele i tala atu o taimi o le vasega. Valaaulia i latou e te faiaoga ai e auai atoatoa i le aoaoina e uiga ia Iesu Keriso ma Lana talalelei ma faatino i luga o mea latou te aoaoina. Fautuaina i latou e fai a latou lava suesuega taitoatasi ma faaleaiga i fafo atu o le vasega o le uluai punavai o lo latou aoaoina o le talalelei. A o latou faatino ai i le faatuatua e ala i le suesue o le tagata lava ia ma aiga, o le a latou valaaulia le Agaga i o latou olaga ma o le Agaga lena e aumaia le liua moni. O mea uma e te faia o se faiaoga e tatau ona faasino atu i lenei faamoemoega paia.

Aoao atu na o le aoaoga faavae lava o le talalelei toefuataiina a Iesu Keriso o loo maua i tusitusiga paia ma upu a perofeta o aso e gata ai. O aoaoga faavae mama—faavavau, o upumoni e le masuia e aoao mai e le Atua ma Ana auauna—e valaaulia ai le Agaga ma o loo i ai le mana e suia ai olaga.

O le valaauga e aoao o se faatuatuaga paia, ma o se mea masani le lagona lofituina i nisi o taimi. Ae ia manatua o lou Tama Faalelagi na valaauina oe, ma o le a Ia le tuulafoaiina lava oe. O le galuega lenei a le Alii, ma a o e auauna atu “ma lou loto atoa, manatu, mafaufau ma le malosi atoa” (Mataupu Faavae ma Feagaiga 4:2), o le a Ia faalauteleina ou gafatia, meaalofa, ma taleni, ma o le a faamanuiaina olaga o i latou e te faiaoga ai.