tamaiti aoga i le potuaoga a le lotu

Faaaogaina o le Sau, Mulimuli Mai ia te A’u—Mo le Peraimeri

Sauniuni e Faiaoga i le Peraimeri

O suesuega patino ma faaleaiga i le aiga e tatau ona avea ma nofoaga autu o le aoaoina o le talalelei. E moni lenei mea mo oe ma mo tamaiti o loo e aoaoina. A o e sauni e aoao atu, amata i le i ai o ou lava aafiaga i tusitusiga paia. O lau tapenaga aupito taua lava o le a tupu a o e sailiili i tusitusiga paia ma musumusuga a le Agaga Paia.

O le Sau, Mulimuli Mai ia te A’u—Mo Tagata Taitoatasi ma Aiga o se vaega taua foi lea o au suesuega faaletagata lava ia ma au sauniuniga e aoao atu. O le a fesoasoani lea e maua ai sou malamalama loloto i mataupu faaleaoaoga faavae o loo maua i tusitusiga paia.

I le taimi o au tapenapenaga, o le a oo mai mafaufauga ma uunaiga ia te oe e uiga i tamaiti e te faiaoga ai. O le a e mauaina ni malamalamaaga e uiga i auala o le a faamanuiaina ai o latou olaga i mataupu faavae o loo i totonu o tusitusiga paia. O le a taialaina oe e musuia i latou e sue na mataupu faavae a’o latou aoao mai mau mo i latou lava ma o latou aiga.

Manatu e Aoao Atu Ai

A o e saunia e aoao atu, e te ono maua ni lagona musuia faaopoopo e ala i le suesueina o otootoga e aoao atu i lenei punaoa. Aua e te mafaufau i nei manatu faapea o ni faatonuga o lea sitepu ma lea sitepu, ae o ni fautuaga e faaosofia ai ou lava musumusuga. E te iloa nei tamaiti—ma o le a sili atu lou iloa o i latou aʻo e fegalegaleai ma i latou i le vasega. E silafia foi e le Alii i latou, ma o le a Ia musuia oe i auala sili e aoao ma faamanuia ai i latou.

E tele isi punaoa o loo maua mo oe e faaaoga a o e tapenapena, e aofia ai manatu o i le Sau, Mulimuli Mai ia te Au—Mo Tagata Taitoatasi ma Aiga ma mekasini a le Ekalesia. Mo nisi faamatalaga e uiga i nei punaoa, tagai “Punaoa Faaopoopo mo le Aoaoina o Tamaitii le punaoa lenei.

tagata o loo suesue i tusitusiga paia

O Ni Mea e Manatua

• O taimi uma e te feiloaʻi ai ma tamaiti, mafaufau i ni auala e mafai ai ona e fesoasoani ia latou lagona le alofa o lo tatou Tama Faalelagi ma Iesu Keriso ma lagona ma iloa ai le uunaiga a le Agaga Paia.

• Ua i ai i matua le tiutetauave autu e aoao a latou fanau. I le avea ai o se faiaoga, ua ia te oe se tiutetauave taua e lagolago, faamalosiau, ma fausia i luga o le aoaoina o le talalelei i le fale. Ia nofouta i tamaiti e le aoaoina e o latou matua le talalelei i le fale. Ia faaaofia tamaiti uma i talanoaga o le talalelei tusa lava po o a tulaga o o latou aiga.

• O le malamalama i aoaoga i le Feagaiga Tuai e faigofie atu mo tamaiti pe a latou iloa le talafaasolopito mo na aoaoga. E mafai ona e mauaina faamatalaga faatalafaasolopito i le Sau, Mulimuli Mai ia te A’u—Mo Tagata Taitoatasi ma Aiga ma Tala o le Feagaiga Tuai.

• E lelei le faifai soo. E sili ona lelei le aoaoina e tamaiti o upumoni o le talalelei pe a aoao atu nei upumoni i le fai soo o ni gaoioiga eseese. A e iloa o se gaoioiga e aoao mai ai e lelei i tamaiti, fuafua e toe fai ma toe fai, aemaise pe a o e faiaoga i tamaiti laiti. E mafai foi ona e toe iloiloina se gaoioiga mai se lesona talu ai.

• E finagalo le Tama Faalelagi ia faamanuiaina oe o se faiaoga. Ua Ia saunia le tele o punaoa e fesoasoani ia te oe, e aofia ai ma fonotaga faaleaufono a faiaoga. I nei fonotaga e mafai ai e oe ona fefautuaai ma isi faiaoga e uiga i soo se luitau atonu o feagai ma oe. E mafai foi ona e talanoaina ma faata’ita’i ia mataupu faavae o le aoao atu e faapei o Keriso.

• Afai o e faiaoga i tamaiti laiti ifo ma e manaomia se fesoasoani faaopoopo, tagai i le “Taulimaina o Manaoga o Tamaiti Laiti”” i le punaoa lenei.

• O lenei punaoa ua aofia ai otootoga mo vaiaso taitasi o le tausaga. I Aso Sa e le faia ai le Peraimeri ona o loo fai ia konafesi aoao, konafesi faalesiteki, po o nisi mafuaaga, e mafai e aiga ona faaauau le faitauga o le Feagaiga Tuai i le fale e fua i le faasologa ua otooto atu. Aua e te popole i lesona ua e misia; aoao atu otootoga o vaiaso ua atofaina.